1. Ngu kutxani ti txi lava hi ti lulamisela ka kuxaniswa?

KA WUSIKU wakwe wo gwitisa ha mafuni, Mkoma wathu Jesu a wombile ti to votshe va va no sawula ku va valondeteli vakwe va na nyenywa. (Joh. 17:14) Se kala konkuwa, Makristu o thembeka ma simama me xaniswa ngu votshe va va si emiko ni wukhozeli wa ditshuri. (2 Tim. 3:12) Aku matsimbitiselo a sa mafu ma hokelako magwito, valala vathu va na ya ve hi nyenya ngutu.—Mat. 24:9.

2-3. a) Hi fanete hi khumbula txani mayelano ni dizowa? b) Ka msungo wuwa hi na bhula ngu txani?

² Hi nga ti lulamiselisa kutxani konkuwa? Kha ti lavi hi zumba hi txi pimisa ngu totshe ti ti nga thukako ti hi humelela. Nguko eto ti nga hi faya misungo hi talelwa ngu kuthava. Hi nga tumelela kuxulwa ngu dizowa da timhaka ti ti nga mbi maheka. (Mav. 12:25; 17:22) Dizowa mlawu awu “mlala” wathu Sathani, a wu thumisako kasi ku hi lwisa. (1 Pedro 5:8, 9) Hi nga maha txani kasi ku hi tsanisela kuxaniswa?

³ Ka msungo wuwa, hi na bhula ngu tinzila to tsanisa wuxaka wathu ni Jehovha ni ku ngu kutxani i di ta lisima kumaha toneto konkuwa. Hi na tshumela hi wona to hi nga txi kulisisa kutxani txibindi txathu. Ngu magwito, hi na xolisisa nzila yo wonisana ni va va hi vengelako.

4. Ngu kuya ngu Vahebheru 13:5, 6, hi na tsaniseka ka ti to txani? Ngu kutxani?

⁴ Tsaniseka ti to Jehovha wa kuranda ni ku kha na mbi thuka e kuleka. (Lera Vahebheru 13:5, 6.) Malembe a msana, direvhista dimwani da Muwoneleli di wombile tiya: “M’thu  wu a zivako kwati Txizimu a na txi themba, ngutu-ngutu ka timbimo ta sikarato.” Eto ditshuri do mbi kanetwa! Ti to hi xula kuxaniswa, ti lava hi randa Jehovha ni ku mthemba, hi si kanakani ti to ene wa hi dhunda.—Mat. 22:36-38; Jak. 5:11.

5. U nga maha txani kasi kuwona lirando la Jehovha?

⁵ Lera Bhiblia ditshiku ni ditshiku kasi ku u tshuketa hafuhi ni Jehovha. (Jak. 4:8) Mbimo yi u lerako, alakanyisisa ngu tifanelo ta tinene ta Jehovha. Zama kupfisisa lirando lakwe ali a li kombisako ngu simaho ni ti a ti wombako. (Eks. 34:6) Vamwani ti nga va karatela kukholwa to Txizimu txa va randa, ti nga maha nguko va si khaliko kukombwa lirando. Ngako u txi tipfisa toneto, ditshiku ni ditshiku duketa kualakanyisisa ngu ti Jehovha a ku mahelako. (Mas. 78:38, 39; Var. 8:32) Mbimo yi u wonako ti Jehovha a nga kumahela ni ti u no va u di lerile ka Bhiblia, ti na ku hehukela kualakanyisisa ngu ti Jehovha a ku mahelako. Se u txi ninga lisima a ti Jehovha a mahako, wuxaka wako ni nene wu na tiya.—Mas. 116:1, 2.

6. Ngu kuya ngu Masalmo 94:17-19, mkombelo wo huma mbiluni wu nga kuvhunisa kutxani?

⁶ Maha mkombelo mbimo yotshe. Alakanya ngu mwanana awu a singarelwako ngu tate wakwe. Mwanana eneyo a tipfa a di txhatxhekile ha ko za e bhulela tate wakwe timhaka ti ti nga mu humelela i nga va to biha mwendo ta tinene. Nawe, u nga va ni wuxaka wo nga wonewo ngako u txi tshuketa hafuhi ni Jehovha ngu mkombelo wo huma mbiluni ditshiku ni ditshiku. (Lera Masalmo 94:17-19.) Mbimo yi u mahako mkombelo u “tshakunuta sotshe si si ku mbiluni kwako” u gela Tate wako wa nzumani mayelano ni ti u ti thavako. (Sid. 2:19) Ku na va yihi wuyelo? U na pfa “kuthutha ka Txizimu, kupindako wotshe wuzivi.” (Vaf. 4:6, 7) Ngako u txi maha mkombelo ngu nzila yiya u na tipfa u di hafuhi ni Jehovha.—Var. 8:38, 39.

7. Ngu kutxani i di ta lisima kutsaniseka ti to sithembiso sa Txizimu mayelano ni Mfumo si na maheka?

⁷ Tsaniseka ti to makatekwa a Mfumo wa Txizimu ma na ta. (Mit. 23:19) Ngako likholo lako mayelano ni sithembiso soneso li sa tsana, Sathani ni maxaka akwe va na kudhukisa. (Mav. 24:10; Vaheb. 2:15) U nga kulisisa kutxani themba yako ka Mfumo wa Txizimu konkuwa? Sawula timhaka toneto u ti pata ka gondo yako mwendo ka wukhozeli wa mwaya, u xolisisa sithembiso sa Jehovha mayelano ni Mfumo wakwe, ni sivangelo si si ku mahako u tsaniseka to sithembiso soneso si na hetiseka. Eto ti na kuvhuna ngu nzila yihi? Wona txikombiso txa Stanley Jones, awu a nga ti betilwe jele ngu mhaka ya likholo lakwe. * Nji txani txi nga m’vhuna kusimama e tsanisela? Ene a khene: “Ngu zumba ni di tsani ka Mfumo wa Txizimu, ni  kholwa ti to wu nata, ni si thuki ni kanakana mwendo kuthava.” Ngako u di ni likholo lo tsana ka sithembiso sa Txizimu, u na tshuketa hafuhi ni Jehovha ni ku khu na mbi xulwa ngu dizowa.—Mav. 3:25, 26.

8. Ngako hi txi ya mitshanganoni mbimo yotshe, ti na kombisa txani? Txhamusela.

⁸ U nga lovhe mitshanganoni. Mitshangano yi hi vhuna kutshuketa hafuhi ni Jehovha. Ngako hi txi ya mitshanganoni mbimo yotshe ti kombisa ti to hi na tsanisela mbimo yi hi no ta xaniswa ka mkama wu wu tako. (Vaheb. 10:24, 25) Hi wombeto ngu txani? Ngako hi txi tumelela sithikamezo sa sidotho si hi tsivela kuxalela mitshangano, se ku na maheka txani ngu ngathu a ku ti no lava hi veka wutomi wathu ha phangoni kasi ku hi tshangana ni vakhozeli kulothi? Hahanze keto, ngako hi txi tiemisela kuxalela mitshangano kha hi na mbi leka kumaha toneto hambi loko valala va txi hi dhukisela. Se, konkuwa i mbimo yo kulisa lirando lathu ngu mitshangano. Ngako hi txi dhunda mitshangano, kha ti nga ho ti ti nga hi tsivelako kuengisa Txizimu kupinda kuengisa vathu, hambi kukanetwa mwendo kutsimbiswa ngu wukoma.—Mith. 5:29.

9. Ngu kutxani kuvekisa mibhalo yo kari ha msungo ti nga kululamiselako ka sixaniso sa mbimo yi yi tako?

⁹ Vekisa ha msungo mibhalo yi u yi dhundako. (Mat. 13:52) Athu kha hi na kusikota kuvekisa totshe ha msungo, kambe Jehovha a nga thumisa moya wakwe wo sawuleka ti to e kuvhuna kukhumbula mibhalo yi u nga lera. (Joh. 14:26) Wona ti mwanathu mmwani awu a nga ti khotetwe Alemanhã a nga womba: “Ni ti tsakile ngutu nguko se ni ti vekile ha msungo tindimana to kari! Se, hambiku ni nga ti nokha ni ti alakanyisisa ngu timhaka to tala ta mu ka Bhiblia.” Mibhalo yoneyo yi mu vhunile kuzumba a di thembekile ka Jehovha ni kutimisela.

10. Ngu kutxani i di ta lisima kuveka ha msungo tindando?

¹⁰ Embelela ni ku vekisa ha msungo tindando to dhumisa Jehovha. Mbimo yi Paulo ni Silasi va nga ti seketwe jele khe Filipiya va ti embelela tindando to dhumisa Jehovha. (Mith. 16:25) Ngu kufana, mbimo yi vanathu va kale ka União Soviética va nga ñolwa ve yiswa Sibéria va tsanisanile ngu kuembelela. Mwanathu Mariya Fedun a khene: “Hi ti embelela totshe tindando ti hi nga txi ti khumbula ta txibhukwana txa tindando.” Ene a  wombile to tindando toneto ti txi va tsanisa ni ku va ti tipfa va di hafuhi ni Jehovha. Nawe u na tipfa u txi tsaniswa u txi embelela tindando. Ngu toneto, vekisa ha msungo tindando toneto konkuwa!—Wona dibhokiso di di ku “ Ni ninge txibindi.”

11-12. a) Ngu kuya ngu 1 Samuwele 17:37, 45-47, ngu kutxani Dhavhidha a di vite ni txibindi? b) Hi nga gonda txani ka txikombiso txa Dhavhidha?

¹¹ Kasi kuwonisana ni sixaniso ti lava hi va ni txibindi. Se ngako u txi tipfa nga wa txhotelwa ngu txibindi, u nga maha txani? Khumbula to kuva ni txibindi kha ti yi ngu tanga, mtamo mwendo wusikoti. Wona txikombiso txa Dhavhidha mbimo yi a nga lwa ni Goliya. Ka Goliya, Dhavhidha a txi woneka nga i tshokoti, nem ku va a di ti lulamisete kulwa, nguko a si nga ni ditxhari. Hambiketo ene a ti ni txibindi, se a lwite nawo mgandawula wule wa txieyiso.

¹² Ngu kutxani Dhavhidha a di vite ni txibindi? Ene a ti tsaniseka ti to Jehovha a ti ni nene. (Lera 1 Samuwele 17:37, 45-47.) Dhavhidha a si woni wuhombe wa Goliya. Kambe, a ti mu wona i ti txitshokotiyana masoni ka Jehovha. Hi gonda txani ka toneto? Hi na va ni txibindi ngako hi txi themba to Jehovha a ni nathu ni kutsaniseka to valala vathu mbadotho ngutu ka Jehovha Nyamitamo. (2 Mak. 20:15; Mas. 16:8) Hi nga kulisisa kutxani txibindi konkuwa hi si se manana ni kuxaniswa?

13. Hi nga txi kulisisa kutxani txibindi? Txhamusela.

¹³ Hi nga kulisa txibindi txathu konkuwa ngu kutxhumayela mahungu a Mfumo wa Txizimu. Ti mahisa kutxani? Nguko kutxhumayela ku hi gondisa kuthemba Jehovha ni kuxula dizowa do thava vathu. (Mav. 29:25) Kufana ni mmidi wu wu nga tiyako ngu ku wu txhukumisa, txibindi txathu txi nga tsaniswa ngu kutxhamayela ngu mti ni mti, ngu txitshuketi, ni mabhazara. Ngako hi txi sakulela txibindi txo txhumayela konkuwa, hi na va hi txi ti lulamisela ku ta simama hi txhumayela hambi mthumo wathu wu txi tsimbiswa.—1 Vat. 2:1, 2.

14-15. Hi nga gonda txani ka Nancy Yuen ni Valentina Garnovskaya?

¹⁴ Hi nga gonda to tala ka sikombiso sa vanathu va vambidi va va nga kombisa txibindi. Wo khata i Nancy Yuen, ene a ti komilenyana, a to kova ni 1 metro ni hafu dwe,  kambe a si dhukiswi ngu m’thu. * A si tumeli kulekiswa kutxhumayela ngu ta Mfumo wa Txizimu. Ngu toneto, a zumbile jele kona mu ka 20 wa malembe khe China. Maphoyisa ya ma nga mu xuxisa ma wombile to ene i ti “txi banga msungo” ka votshe vathu va China.

¹⁵ Mmwani i Valentina Garnovskaya awu a nga ti khotetwe khe União Soviética makhambi mararu, se a hetile kona mu ka 21 wa malembe a di jele. * Ngu kutxani a di khotetwe? A ti ti emisete kwa mbi leka kutxhumayela ha ko za maphoyisa ma txi mu dhana ku “njigevenga txa hombe ngutu.” Nji txani txi nga vhuna vanathu vava ku va ni txibindi? Vona va ti tsaniseka ti to Jehovha a ti navo.

16. Ngu yihi khiya yo mana txibindi txa ditshuri?

¹⁶ Nga ha hi nga ti wona ngu kona, ti to hi kulisa txibindi hi fanete hi si thembi wusikoti wathu mwendo mtamo wathu. Hahanze keto, hi fanete hi kholwa ti to Jehovha a ni nathu ni ku ene a na hi lelwa. (Dhewut. 1:29, 30; Zak. 4:6) Eyo ngu yona khiya yo kulisa txibindi.

17-18. Jesu a wombile txani ka Johani 15:18-21? Txhamusela.

¹⁷ Hotshethu ha ti lava kuxoniphwa ngu vathu, kambe hi nga pimiseni ti to ngako vathu va txi hi nyenya ho va hi si nga va txilo. Jesu a ti khene: “Mi katekile anu, ngako vathu va txi mi venga, va txi mi tovela, va txi mi ruketela, va txi nyenya ditina danu nga do va ni nduma yo biha, ngu mhaka ya Mwanana wa M’thu.” (Luka 6:22) Jesu a txi la kuwomba txani?

¹⁸ Jesu a si lavi kuwomba to Makristu ma na pfa kutshamba aku ma ndi no vengelwa. Hahanze keto, ene a txo womba ditshuri da ti ti ndi no humelela. Athu kha hi lumbi txienge txa mafu. Hi londisela ti Jesu a nga ti  gondisa ni kutxhumayela mahungu a manene. Ngu toneto, ditiko da hi venga. (Lera Johani 15:18-21.) Txa hombe kwathu ngu tsakisa Jehovha, vathu va txi hi nyenya, ndawe eto.

19. Hi nga txi tekelelisa kutxani txikombiso txa vapostoli?

¹⁹ U nga tumelele txilo ni txa tximwetxo ka ti vathu va ku mahelako mwendo kuwomba ti kumaha u tipfa i si nga ta txilo kuva Fakazi. (Mika 4:5) Hi nga gonda kuva ni txibindi ngu kualakanyisisa ngu sikombiso si hi nga siyelwa ngu vapostoli msana kova Jesu a di fite. Vona va txi ti ziva to va vengelwa ngu Vajudha. (Mith. 5:17, 18, 27, 28) Kambe, ditshiku ni ditshiku va txi simama ve ya dithepeleni ni ku va txi ti veka ha kubasani ti to vona i ti valondeteli va Jesu. (Mith. 5:42) Kha va tumela kudhukiselwa ngu vathu. Nathu hi nga xula dizowa do thava vathu ngu kwa mbi ti sisa ti to hi Tifakazi ta Jehovha ova ha hi ku kona, txikolwani, mthumoni mwendo amu hi zumbako kona.—Mith. 4:29; Var. 1:16.

20. Ngu kutxani vapostoli va di simamile ve va ni litsako hambiku va nga ti zondwa?

²⁰ Ngu kutxani vapostoli va di tsakile? Va ti ti ziva ti to ngu kutxani va nga ti vengelwa ni ku va ti ti wona i di lungelo kuxaniswa ngu kumaha kuranda ka Jehovha. (Luka 6:23; Mith. 5:41) Mpostoli Pedro a bhate tiya: “Ngako mi txi xaniswa ngu mhaka ya kululama, mi katekile!” (1 Pedro 2:19-21; 3:14) Hambi loko vathu va txi hi nyenya ngu mhaka ya kumaha ati i ku ta tinene, hi na mbi thuka hi telwa ngu dizowa hi leka kuthumela Jehovha.

21-22. a) U ti emisete kumaha txani kasi ku u ti lulamisela ku ta wonisana ni kuxaniswa? b) Ka msungo wu wu londiselako hi na ta bhula ngu txani?

²¹ Kha hi di zivi ditshiku di hi no manana ni kuxaniswa mwendo kutsimbiswa aku ku no gwesa wukhozeli wathu. Kambe, ha ti ziva ti to hi nga sikota ku ti lulamisela konkuwa hi tsanisa wuxaka wathu ni Jehovha ngu kukulisa txibindi ni kuziva tinzila to wonisana ni kuvengelwa ngu vathu. Ngako hi txi ti lulamisela konkuwa ti na hi vhuna ku ta ema hi di tsani mbimo yi yi tako.

²² Se hi na maha txani ngako wukhozeli wathu wu txi tsimbiswa? Ka msungo wu wu londiselako, hi na ta bhula ngu matshina a milayo ya Bhiblia aya ma no hi vhuna kusimama ni wukhozeli wathu hambi hi txi tsimbiswa.