1-2. a) Ngu kuya ngu mapswi a Jesu a ya ma ku ka Matewu 28:18-20, ngu txihi txiavelo txa lisima ngutu txa dibanza da Wukristu? b) Ngu sihi siwotiso si hi no bhula ngu sona ka msungo wuwa?

MSANA ka ku va a di wusilwe ngu ka vafi, Jesu a gete vagondiswa vakwe ti to ve ya manana mmangoni ka Galileya. Ti nga maha va di tsakile ngutu mbimo yi va nga hoka ka wukhalo wonewo. (Mat. 28:16) Ti woneka nga i ngu mbimo yoneyo a nga ‘ti wonekisa ka vanathu vo pinda mtxhanu wa mazana, ngu txikhati tximwetxo.’ (1 Vak. 15:6) Ngu kutxani Jesu a ti va kombete ku e ta tshangana navo? Ene a ti lava ngu va ninga txiavelo txo tsakisa ngutu txo: “Tsulani mi txi ya phindula vamatiko votshe ve maha vagondiswa vangu.”—Lera Matewu 28:18-20.

² Vagondiswa va va nga ti tiho ka ditshiku donedo va mahile mtxawa wa dibanza do khata da Wukristu. Txiavelo txa lisima ngutu txa dibanza donedo i di txo maha vagondiswa va Kristu. * Nyamsi, ku ni mabanza o tala ngutu a Wukristu wa ditshuri ha mafuni kotshe aya ma mahako mthumo wa lisima ngutu i ku wo maha vagondiswa. Ka msungo wuwa hi na bhula ngu siwotiso sa mune i ku: Ngu  kutxani i di ta lisima kumaha vagondiswa? Ti pata txani kumaha vagondiswa? Mba mani va va fanelako kumaha vagondiswa? Ngu kutxani ti txi lava hi timisela?

3. Ngu kuya ngu Johani 14:6; ni 17:3, ngu kutxani i di ta lisima kumaha vagondiswa?

³ Ngu kutxani i di ta lisima kumaha vagondiswa? Nguko mbagondiswa va Kristu dwe ava va nga sikotako ku va vangana va Txizimu. Kuengetela ka toneto, ava va londiselako Jesu va tshukwatisa wutomi wawe ni ku va ni lungelo yo ta va ni wutomi wo mbi guma mbimo yi yi tako. (Lera Johani 14:6; 17:3.) Jesu a hi ningile txiavelo txa lisima ngutu, kambe kha hi thumi hokha. Mpostoli Paulo a bhate tiya mayelano ni nene ni vathumi kulowe: “Athu hi vavhuneteli va Txizimu.” (1 Vak. 3:9) Hi nga wona lungelo ya hombe ayi vathu vo mbi hetiseka va nga ningwa ngu Jehovha ni Jesu!

4. Hi gonda txani ka ti ti nga humelela ka Ivan ni Matilde?

⁴ Mthumo wo maha vagondiswa wu nga hi tisela litsako la hombe ngutu. Wona txikombiso txa Ivan ni msikati wakwe Matilde va Colômbia. Vona va txhumayete dijaha dimwani di dhanwako ku i Davier, awu a nga va gela ku khene: “Na ti lava kutxitxa wutomi wangu, kambe na ti tanda.” Davier i ti mpeki wa sibhakela so ganya male, ati dhaha, ati sela ngutu ni ku ati zumba ni txigango txakwe Erika. Ivan a womba tiya: “Hi khatile ku mu endela mtini kwakwe, i ti kule ni ku ti txi lava hi tsimbila ngu bhasikeni mu madhakani. Mbimo yi Davier a nga khata kutxitxa wutomi wakwe, Erika nene a to khata kugonda Bhiblia.” Ngu mbimo Davier a lekile kudhaha, kusela, ni kulwa. A tshumete e txhadha ni Erika. Matilde a khene: “Mbimo yi Davier ni Erika va nga bhabhatiswa ngu 2016, hi khumbute ti Davier a nga ti tolovela kuwomba, ‘Na ti lava kutxitxa wutomi wangu, kambe na ti tanda.’ Hi ti tsakile ngutu ha ko za hi dila.” Ti hakubasani ti to ta tisa litsako la hombe ngutu mbimo yi hi vhunako vamwani ve va vagondiswa va Jesu.

5. Ngu dihi dizambo do khata do maha vagondiswa?

⁵ Hi teka dizambo do khata do maha vagondiswa ngu ‘kulava kuziva’ ava va ku ni timbilu ta tinene. (Mat. 10:11) Ngako hi txi gela vathu mayelano ni Jehovha hi kombisa to ngu ditshuri hi Tifakazi takwe. Hi tshumela hi kombisa ti to hi Makristu a ditshuri ngako hi txi londisela mkongomiso wo txhumayela.

6. Hi nga maha txani ti to vathu ve hi engisela hi txi txhumayela?

⁶ Vathu vamwani va tsakela kugonda Bhiblia, kambe vamwani kha va kombisi kutsakela ka makhambi o khata. Ti nga lava hi zama kuwusa kutsakela. Ti to hi humelela ka mthumo wo txhumayela, hi fanete hi ziva mabelelo a manene. Sawula timhaka ati ti no ya tsakisa awu a no riya nzeve. Se, lulamisa nzila yo khata ngu yona mabhulo.

7. U nga khatisa kutxani mabhulo ni m’thu, ni ku ngu kutxani i di ta lisima kuriya nzeve ni kuxonipha?

⁷ Ngu txikombiso u nga gela nyamne wa mti to u navela ku mu wotisa to kari. Se u nga khawe: “Nyamsi ha manana ni sikarato so tala ngutu asi si hi gwesako. Ina u pimisa to ngu wuhi mfumo wu wu nga gumisako  sikarato soneso?” Ngu msana u nga lera dibhuku da Dhaniyeli 2:44. Mwendo u nga wotisa to fana ni tiya: “Ngu yihi khiya yo kulisa vanana ve va ni txixonipho? Ngu yahi mawonelo ako?” Se u nga thumisa Dhewuteronome 6:6, 7. Tihi ni tihi ati u nga ti thumisako, alakanyisisa ngu vaengiseli vako. Pimisa ngu nzila yi va no wuyelwa ngu yona ngu ti va no ti gonda ka Bhiblia. Mbimo yi u bhulako navo, nda lisima ku va engisela ni kuxonipha mawonelo awe. Ngu nzila yoneyo u na va pfisisa ni ku ti nga maha ve kuengisela.

8. Ngu kutxani ti txi lava hi timisela ka maendo athu?

⁸ Mbimo yimwani ti nga lava u wuyelela makhambi o tala ti to m’thu e tumela gondo ya Bhiblia. Ngu kutxani? Nguko hi nga thuka hi va pwata. Timwani ngu ti to ti nga maha u mu endela makhambi o tala na a si se txhatxheka kugonda Bhiblia. Khumbula to mndonga kha wu na kukula na wu si theletelwi mati. Ngu ha kufanako, m’thu a ngo kulisa lirando lakwe ngu Jehovha ni Jesu ngako hi txi gonda nayo Bhiblia mbimo yotshe.

9-10. Ngu kutxani hi nga wombako to otshe Makristu ma pateka ko xota vathu?

⁹ Otshe Makristu ma pateka ko xota vathu va timbilu ta tinene. Hi nga fananisa mthumo wuwa ni wo xota mwanana wo mwalaleka. Ngu nzila yihi? Wona txikombiso atxi txi nga maheka txa mwanana wa malembe mararu awu a nga mwalaleka. Kupatekile 500 wa vathu va kutsimbila ve mu xola. Se, ku dipindile 20 wa mawora na a di mwalalekile, a di ya manwa ka thembwe  yo kari ngu mmweyo wa vaxoli. Ene a lambile kudhumiswa hambi ku i ku ene a nga mu mana. A gwitile a txi khene: “Kulavekile 500 wa vathu ti to e manwa.”

¹⁰ Vathu vo tala va fana ni mwanana eneyo, va mwalalekile. Vona kha va na themba, ngu toneto va lava txivhuno. (Vaef. 2:12) Kona mu ka 8 wa timiliyoni ta vanathu va bhisi va txi xota ava va ku ni timbilu ta tinene. Mbimo yimwani u nga thuka u si mani m’thu wo tumela kugonda Bhiblia. Kambe, vahuweleli vamwani va nga mana m’thu awu a tsakelako kugonda ditshuri di di ku mu ka Bhiblia. Ngako mwanathu wo kari a txi mana wo tsakela e tshumela e bhabhatiswa, hotshethu hi nga pateka ko txhumayela ha tsaka.

11. Hambi i di ti to khu tsimbitisi txigondo, u nga va vhunisa kutxani vamwani?

¹¹ Hambi i di ti to khu tsimbitisi txigondo, u nga vhuneta ngu tinzila timwani. Ngu txikombiso, u nga hoyozela ava va tako mitshanganoni ka makhambi o khata u zama kumaha wungana navo. Ngu nzila yoneyo, u na va tsanisekisa ti to athu hi Makristu a ditshuri ngu lirando li hi ku nalo. (Joh. 13:34, 35) Tixamulo ti u ningelako mitshanganoni, hambi i di to koma ti nga vhuna va vaphya kuwomba ti va ti kholwako ngu nzila ya txixonipho. U nga tshumela u huma thembwe ni muhuweleli wamphya u m’vhuna ku e txhamusela kwati tindimana ta Bhiblia. Ngako u txi maha toneto, u na va u txi m’gondisa kuetetela Kristu.—Luka 10:25-28.

12. Ina ti lava hi va ni wusikoti wa hombe kasi ku hi maha vagondiswa? Txhamusela.

¹² Kha ha fanela hi pimisa ti to ti lava hi va ni wusikoti wa hombe kasi ku hi maha vagondiswa va Jesu. Ngu kutxani? Wona txikombiso txa Faustina wa Bolívia. Mbimo yi a nga khata kugonda ni Tifakazi ta Jehovha a si ti koti kulera. Kambe kukhukhela ka mbimo yoneyo wa zamanyana. Konkuwa se a bhabhatisilwe ni ku a dhunda kugondisa vamwani. A tolovela kutsimbitisa 5 wa sigondo ngu divhiki. Hambiku Faustina a si leriko kufana ni vamwani va sigondo sakwe, ene se a vhunile 6 wa vathu ku ve bhabhatiswa.—Luka 10:21.

13. Hambi loko hi di bhisi ngu mithumo yimwani, ngu yahi makatekwa ya hi ma manako hi txi maha vagondiswa?

¹³ Makristu o tala ma bhisi ngu kukhatalela timhaka timwani ta lisima. Kambe, ma ti ninga mbimo yo tsimbitisa sigondo ni ku eto ta ma tisela litsako. Wona txikombiso txa Melanie awu a nga txi xayisa ekha mwanana wa 8 wa malembe khe Alaska. Ene a  ti thuma mthumo wa mbimo yotshe ni ku a ti khatalela tate wakwe a nga ti ni Câncro. Melanie i ti ene ekha Fakazi ka wukhalo wu a nga ti zumba ka wona. A ti tolovela kukombela ka Jehovha mtamo wo wonisana ni pheho a txi ya kutxhumayelani nguko a ti lava m’thu wo gonda nayo Bhiblia. Ngu mbimo a txhumayete Sara, awu a nga xamala ngu kuziva to Txizimu txi ni ditina. Ku di pindile mbimo, Sara a tumete kugonda. Melanie a khene: “Divhiki ni divhiki ngu wazixanu ni minova, ni tipfa ni di karate, kambe, ani ni mwanana wangu hi wuyetwe ngutu ngu kuva hi di tsimbitisile txigondo. Ti txi hi tsakisa mbimo yi hi nga txi xamula siwotiso sakwe ni ku mu wona a txi aka wuxaka ni Jehovha.” Sara ngu txibindi a wonisanile ni kukanetwa, e leka txhetxhe yakwe, e bhabhatiswa.

14. a) Kumaha vagondiswa ti fana ni kudota ngu nzila yihi? b) Mapswi a Paulo ya ma ku ka 2 Timoti 4:1, 2 ma kugwesa ngu nzila yihi?

¹⁴ Hambi ti txi woneka nga khu eluli kutxhumayelani, u nga godholi, simama u xota. Khumbula to Jesu a fananisile kumaha vagondiswa ni kudota. Vadothi va nga heta mbimo yo tala va txi swayela si si dyeli. Mbimo yimwani va dotha kala wusiko mwendo kala mixo, hambi kutsimbila ve ya kule ngutu. (Luka 5:5) Ngu kufana, vamwani vahuweleli va nga heta mbimo yo lapha va txi “swayela” makhalo o hambana-hambana ni ngu timbimo to  hambana-hambana. Ngu kutxani? Kasi ku ve mana vathu. Ava va thumako ngu nzila yoneyo va wuyelwa ngu kumana vathu va va tsakelako. Se u nga zama kutxhumayela ngu timbimo ti vathu va nga vako ni mbimo yo engisela, mwendo wukhalo wu va tolovelako kumaneka ka wona.—Lera 2 Timoti 4:1, 2.

15. Ngu kutxani ti txi lava kutimisela ka mthumo wo maha vagondiswa?

¹⁵ Ngu kutxani ti txi lava hi timisela ka mthumo wa kumaha vagondiswa? Txivangelo ngu ti to kha hi lavi ku sigondo si gwitela kuziva ni kuranda tigondo ta mu ka Bhiblia dwe. Hi lava ku va vhuna ve ziva ni kuranda Jehovha Nyamne wa Bhiblia. Hahanze ko va gondisa ti to ngu tihi ati Jesu a ti lavako ka vagondiswa vakwe, ti lava hi va vhuna ve ziva ti to va fanete ve hanyisa kutxani kota Makristu a ditshuri. Ti lava hi va timiselela mbimo yi va lwako ni kutxitxa wuthu wawe ve maha ti Bhiblia yi ti gondisako. Vamwani va nga txitxa mahanyelo awe ngu mitximanyana dwe; vamwani ti nga teka mbimo.

16 U gonda txani ka ti ti nga humelela Raúl?

¹⁶ Hi nga wona ti ti nga humelela murumiwa mmwani khe Perú, ati ti kombisako lisima lo timisela. A khene “Ni gondile mabhuku mambidi ni Raúl. Kambe, ati ngadi a txi wonisana ni sikarato ka wutomi. A si nga ni litsako ni msikati wakwe, a ti bwabwatisa kuruketela, ni ku vanana vakwe va si mu xoniphi. Aku a nga txi ta mitshanganoni, ni simamile ni mu endela ni ku va vhuna kota mwaya. Ku di pindile 3 wa malembe a bhabhatisilwe.”

17. Hi na ta bhula ngu txani ka msungo wu wu tako?

¹⁷ Jesu a hi rumile ku hi ‘tsula hi txi ya . . . maha vagondiswa.’ Ti to hi maha mthumo wuwa, makhambi o tala hi bhula ni vathu ava va ku ni mapimiselo o hambana ni athu, vamwani kha va nga ni wukhongeli ni ku vamwani kha va kholwi to Txizimu txiho. Ka msungo wu wu tako, hi na ta bhula ngu tinzila to ningela didungula ka vathu vonevo.