1. Ngu tihi ati u nga thukako u ti wotisa?

INA mbimo yimwani wa thuka u karateka u txi pimisa ngu totshe ti no maheka mbimo ayi yi tako, to fana ni kuloviswa ka wukhongeli wa makuhu, kuwukelwa ngu Goge wa ditiko da Magoge ni yimbi ya Armagedhoni? Ina wa thuka u ti wotisa tiya: ‘Ina na simama ni di thembekile ka mbimo ya simahakalo siya so thisa?’ I di toneto, mapswi a Jesu aya ma ku ka m’bhalo awu wu nga ñola msungo wa mhaka wa gondo wu nga kuvhuna. Jesu a gete tiya vagondiswa vakwe: “Timbilu tanu ti nga karateke: Kholwani ka Txizimu.” (Joh. 14:1) Likholo lo tsana li na kuvhuna kasi ku u ta wonisana ni simahakalo sa mbimo ayi yi tako u si thavi txilo.

2. U nga maha txani ti to u tsanisa likholo lako? Hi na bhula ngu txani ka gondo yiya?

² Hi nga kulisa likholo lathu kasi ku hi ta timisela sikarato sa mbimo yi yi tako ngu kuwona nzila ayi hi wonisanako ngu yona ni siduko kona kuwa. Ngako hi txi xolisisa nzila ayi hi wonisanako ngu yona ni siduko kona kuwa, ti na hi vhuna kuwona amu hi fanelako kutshukwatisa kona. Ka txiduko tximwani ni tximwani a txi hi txi xulako, likholo lathu la tsana. Atiya ti na hi vhuna ku hi ta timisela siduko mbimo ayi yi tako. Ka gondo yiya hi na wona mune wa siemo asi vagondiswa va Jesu ti nga ti lava ve engetelwa likholo ka sona. Hi na tshumela hi wona nzila yi hi nga wonisanako ngu yona ni siduko asi si fanako konkuwa ni kuwona ti to eto ti nga hi lulamiselisa kutxani para ku ta wonisana ni siduko mbimo ayi yi tako.

3. Ngu kuya ngu Matewu 6:30, 33, ngu hani amu ti nga lavako ku hi engetela likholo lathu?

³ Kha ta biha ku mwanathu awu i ku msungo wa mwaya a txi karateka, kasi kumana nzila yo xayisa mwaya wakwe, ngu sakudya,  so ambala ni ko zumba kona. Ka timbimo tiya to karata atiya ka ti hehuki, mbimo yimwani atiya kha ti hehuki, hambi va txi maha mizamo yo xola mthumo va wu pwata. Vamwani ti lavile ve lamba mithumo yo kari nguku yi lwisanako ni milayo ya Bhiblia. Kasi siemo soneso, ti laveka likholo lo tsana, kasi kuthemba ti to Jehovha a na xayisa mwaya wakwe. Jesu a yi vekile hakubasani mhaka yiya ka gondo yakwe ya mmangoni. (Lera Matewu 6:30, 33.) Ngako hi txi tsaniseka ti to Jehovha kha na mbi hi tshotsha ti na hi vhuna ti to hi simama hi veka mapimo ko thumela Jehovha. Ngako hi txi wona ti to Jehovha ngu ditshuri wa khatalela silaveko sathu sa nyama, wuxaka wathu ni nene wu na kula ni ku likholo lathu li na tsana.

4-5. Nji txani txi nga vhuna mwaya wo kari ti to wu wonisana ni txikarato txi wu nga manana natxo?

⁴ He wone nzila ayi Jehovha a nga vhuna ngu yona mwaya wo kari khe Venezuela, awu wu nga txi karateka ngu ti to wu da maha txani kasi kumana so ti hanyisa. Vona va txi ti hanyisa ngu kudima thembweni kwawe. Se ditshiku dimwani mabhandidhu ma di ta va honyola thembwe yawe, ni kutshumela me va sinzisa ti to ve rura ve zumba wukhalo wumwani. Tate wa kona i ku mwanathu Miguel a womba tiya: “Konkuwa ti to hi mana sakudya hi dependerwa ngu kudima ka txithembwana hi nga lomba. Se ditshiku ni ditshiku ni kombela Jehovha ti to e hi ninga si hi si lavako ti to hi hanya ditshiku dile.” Wutomi wa karata ngutu ka mwaya wuwa, kambe likholo li va ku nalo la ti to Jehovha a na va khatalela silaveko sawe, vona va simama ve xalela mitshangano va si lovhi ni kupateka ka mthumo wo txhumayela. Vona va thangetisa mthumo wa Jehovha ni ku ene wa khatalela silaveko sawe.

⁵ Ka sikarato si va nga txi manana naso, Miguel ni msikati wakwe Yurai va ti veka mapimo ka nzila yi Jehovha a nga txi va khatalela ngu yona. Mbimo yimwani Jehovha a txi thumisa Makristu kulothi kasi ku va vhuna ngu si va nga txi si lava ni ku Miguel a tshumete e mana mthumo. Mbimo yimwani Jehovha a txi khatalela silaveko sawe sa nyama ngu kuthumisa txivhuno a txi sengeletano yi ningako vale va pwatako sakudya. Jehovha kha thuka e va tshotsha. Kota wuyelo likholo lakwe ni la vahamwayani kwakwe li kute. Msana ko wona nzila yi Jehovha a nga va vhuna ngu yona mwanana wawe wa matiwula Yoselin a womba tiya: “Ta ni gwesa mbilu kuwona nzila yi Jehovha a nga hi vhuna ngu yona. Phela ni wona Jehovha kota mngana wangu awu a ni vhunako yotshe mbimo.” Ene a tshumela e womba tiya: “Siduko si hi nga si mana kota mwaya si hi lulamisela ti to hi ta wonisana ni siduko sa hombe.”

6. U nga maha txani ti to u tsanisa likholo lako ngako u txi wonisana ni sikarato sa wusiwana?

⁶ Ngako u txo wonisana ni txikarato txi kumahako u pwata sakudya mwendo silo simwani sa lisima, ngu ditshuri eto ta karata ngutu. Kambe, hambi i di to sikarato asi u wonisanako naso nza hombe ngutu, londola mkhanjo wonewo ti to u tsanisa likholo lako. Maha mkombelo ni kutshumela u gonda mapswi a Jesu aya ma ku ka Matewu 6:25-34 ni kutshumela u  alakanyisisa ngu ona. U nga tshumela u gonda ngu maexperiyensia a vanathu aya ma kombisako nzila yi Jehovha a vhunako ngu yona vanathu ava va ku ka sikarato ni nzila yi va simamako va di bhisi ka mthumo wa Jehovha. (1 Vak. 15:58) U txi maha toneto, likholo lako li na tsana ni ku Jehovha a na kuvhuna, kufana ni ha a nga maha ka vanathu vale va nga manana ni sikarato so fana ni sako. Ene wa si ziva silaveko sa wena ni ku a na kukhatalela. Ngako u txi wona ti to Jehovha wa kukhatalela, lirando lako ngu ngene li na kula ni ku eto ti na kululamisela ti to u ta wonisana ni sikarato sa mbimo ayi yi tako.—Hab. 3:17, 18.

7. Ngu kuya ngu Matewu 8:23-26, “txihuhuri txa hombe” atxi vagondiswa va Jesu va nga manana natxo txi dukisile kutxani likholo lawe?

⁷ Mbimo yi Jesu ni vagondiswa vakwe va nga pekwa ngu txihuhuri lineneni, Jesu a thumisile tximahakalo txiya kasi kuvhuna vagondiswa vakwe ve wona amu va nga ti fanete kuengetela kona likholo lawe. (Lera Matewu 8:23-26.) Mbimo txi nga peka txihuhuri txile me khata kubela mati ka ngalava, Jesu ati ti ko otela asi karateki. Se vagondiswa vo to karateka ngutu, ve mu wusa ve kombela ku e va hanyisa. Kambe Jesu ava kawukile e womba tiya: “Anu vathu va kukholwa ka kudotho, mi ni dizowa ngu txani kani.” Vagondiswa va Jesu nga va ti fanete kukholwa ti to Jehovha a nga sikota ku va vhikela kumweko ni Jesu ti to va si dawiswi. Hi gonda txani? Hi gonda ti to likholo lo tsana li nga hi vhuna ti to hi xula “txihuhuri” tximwani ni tximwani, mwendo njihuhuri txa ditshuri mwendo njo fanekisela.

8-9. Ngu tihi ati ti nga duka likholo la Anel, ni ku txi txani txi nga mu vhuna?

⁸ Wona txikombiso txa Anel, awu a hanyako Porto Rico. Ene a wonisanile ni txikarato txa hombe atxi txi nga duka likholo lakwe. Ene a mananile ni “txihuhuri” txa ditshuri. Ngu 2017 ngu vile ni txingulo txa hombe atxi txi nga hoxota nyumba yakwe. Sikarato si nga tiswa ngu txingulo txonetxo ti mahile ti to e luza mthumo wakwe. Ene a womba tiya: “Ani ni ti karateka ngutu ka mbimo yoneyo, kambe ni gondile kuthemba Jehovha ni maha mkombelo kasi ku ni si rerekiswi ngu sikarato.”

⁹ Anel a tshumela e womba ti to tximwani txi nga mu vhuna ti to e wonisana ni txikarato txile ngu engisi. Ene a womba tiya: “Kuengisa mkongomiso wa sengeletano ti ni vhunile ti to ni si karateki. Jehovha a ni vhunile ngutu ngu kuthumisa vanathu. Vona va ni vhunile ngu ku ni tsanisa ni ku ni ninga si ni nga txi si lava ti to ni hanya.” Ene a tshumela a womba tiya: “Ngu ditshuri, Jehovha a ni ningile so pinda asi ni nga txi si kombela, likholo langu li tsanisilwe ngutu.”

10. U nga maha txani ngako u txi wonisana ni sikarato sa hombe?

¹⁰ Ina awe u wonisana ni sikarato sa hombe ka wutomi wako? Ti nga maha sikarato soneso si di tisilwe ngu konaha ka kuva ku di humelete phango ya mtumbuluko. Ti nga maha kambe i di sikarato asi si tiswako ngu malwati asi si ku mahako u karateka ngutu se u si ti zivi to u na  maha txani. Se ngako u txi thuka u karateka, u nga leke sikarato soneso si kumaha u leka kuthemba Jehovha. Maha kombela kwakwe. Tsanisa likholo ngu kualakanyisisa ngu totshe timbimo ti Jehovha a nga kuvhuna makhambi ya ma nga pinda. (Mas. 77:11, 12) Tsaniseka ti to Jehovha a nga kuvhuna kha mbi kutshotsha.

11. Ngu kutxani hi di fanete kutiemisela kuengisa ava va thangelako?

¹¹ Nji txani tximwani txi no kuvhuna ti to u wonisana ni siduko? Nga ha Anel nga womba ngu kona hi fanete hi sakulela kuengisa. Hi fanete hi engisa mkongomiso awu hi ningwako ngu sengeletano. Mbimo yimwani ava va thangelako va nga ningela mkongomiso awu hi wu wonako nga wu na mbi hi vhuna txilo. Kambe, Jehovha wa katekisa ava va engisako. Ha ti ziva eto ngu ti hi ti gondako amu ka Bhiblia ni ka maexperiyensia a vanathu vamwani ti to kuengisa ta ponisa wutomi. (Eks. 14:1-4; 2 Mak. 20:17) Alakanyisisa ngu sikombiso soneso. U txi maha toneto u na zumba u di tiemisete kuengisa mkongomiso awu sengeletano yi wu ningako konakuwa ni mbimo ayi yi tako. (Vaheb. 13:17) Se awe khu na mbi ta dukiswa ngu txihuhuri txa hombe atxi hi no ta manana natxo mbimo ayi yi tako.—Mav. 3: 25.

12. Ngu txihi txidinganiso atxi Jesu a nga txi ningela txi kombisako lisima la kutimisela? Txhamusela.

¹² Jesu a txi ti ziva ti to ngako vagondiswa vakwe va txi wonisana ni wubihi, eto ti na duka likholo lawe. Ti to e va vhuna kuwonisana ni txikarato ene a va ningile txidinganiso atxi txi ku ka dibhuku da Luka. Ene a womba-wombile ngu noni ayi yi nga txi simama yi kombela ti to yi lamulwa ngu wululami. Noni yile yi txi tiziva ti to ngako yi txi simamisa yi da engiswa. Ngu magwito, mlamuli wule a pfite kudila kwakwe. Hi gonda txani? Kuhambana ni mlamuli wule wo biha, Jehovha a lulamile. Ngu toneto Jesu a nga womba tiya: “Ina Txizimu txi nga tandeka kulamulela vasawuleki va txona, ni kutimisela ngu vona ava va dilako masoni ka txona, wusiku ni mtshikari, kani?” (Lera Luka 18:1-8.) Ene a tshumete e womba tiya: “Kambe mbimo yi a no wuya Mwanana wa M’thu, ina a na ta mana likholo ha mafuni, kani?” Ngako hi txi mana ni wubihi hi nga kombisa ti to hi ni likholo lo nga lile la noni ngako hi txi kombisa kutimisela. Ngako hi di ni likholo lo nga toneto, hi nga tsaniseka ti to Jehovha a na hi vhuna. Ti lava hi tshumela hi maha mkombelo, ngako hi txi maha toneto, Jehovha nga xamula mikombelo yathu ngu nzila yo nem hi sa yi emela.

13. Mkombelo wu vhunisile kutxani mwaya wa mwanathu Vero, mbimo va nga ñolwa ngu nzila yo biha?

¹³ Wona experiyensia ya mwanathu Vero wa República Democrática do Congo. Vero ni mwamna wakwe awu i singako Fakazi kumweko ni dihorana dakwe da 15 wa malembe, ti lavile ve rura amu va nga ti zumba kona, msana ko dhumelwa ngu masotxhwa. Mbimo yi va nga txi tsula va mananile ni masotxhwa hanzila aya ma nga va ñola ni ku va dhukisela ku va na va daya. Mbimo yi Vero a nga khata kudila, dihorana dawe ni to zama ku mu malatela ngu kumaha mkombela ngu dipswi do guleka a txi wuyeletela ditina da Jehovha. Mbimo yi a nga gwita, komandante a do mu wotisa a txi khene: “I mani a nga kugondisa kumaha mkombelo mwanangu?” Ene a to xamula a txi “i mame wangu, ene a ni gondisile kumaha mkombela ngu kuthumisa ati ti ku ka Matewu 6:9-13.” Se komandante a to gela dihorana dile a txi khene: “Tsulani ngu kurula mwanangu, Jehovha Txizimu txako txi na mu vhikele!”

14. Nji txani atxi txi nga dukako likholo lathu? Ni ku hi nga maha txani ti to si simama hi timisela?

 ¹⁴ Maexperiyensia yawa ma hi vhuna kuwona ti to kha ha fanela ku wu tekela hahatshi mkombelo. Kambe hi na maha txani ngako hi txi wona ngako mikombelo yathu ya swela kuxamulwa? Kufana ni noni yile ka txidinganiso txa Jesu hi fanete kusimama hi maha mkombelo hi txi tsaniseka ti to Jehovha kha na mbi thuka e hi tshotsha ni ku a na hi xamula. Mbimo yimwani a nga maha toneto nem hi sa tiemela. Se simama u kombela Jehovha e kuninga moya wakwe wo sawuleka. (Vaf. 4:13) Khumbula ti to Jehovha a na ta kukatekisa ngutu aha ko za u divala kotshe kuxaniseka aku u mananako nako konkuwa! Ngako u txi wona nzila yi Jehovha a kuvhunako ngu yona ku u wonisana ni sikarato konakuwa, u na va u di lulamekile ku ta wonisana ni siduko mbimo ayi yi tako.—1 Pedro 1:6, 7.

15. Ngu txihi txikarato atxi vagondiswa va Jesu va nga di natxo?

¹⁵ Jesu a txharihisile vagondiswa vakwe ti to va ti fanete kuva ni likholo kasi ku ve xula siduko. (Lera Matewu 17:19, 20.) Dikhambi dimwani vona va palekile kuhinga didhimoni, hambi ku i nga si nga dikhambi do khata kumaha toneto. I ti txihi txikarato? Jesu a va txhamusete ti to va ti fanete ve engetela likholo. Ene a va gete ti to ngako va di ni likholo lo enela, vona va da sikota kuxula siduko asi si wonekako nga va si na kusikota. Nathu ha wonisana ni siduko asi si wonekako nga kha hi na ku si xula.

16. Likholo li vhunisile kutxani mwanathu Geydi kuwonisana ni txidilo atxi a nga manana natxo?

¹⁶ Wona txikombiso txa mwanathu Geydi wa Guatemala. Mwamna wakwe Edi a datwe va txi wuya ngu mitshanganoni. Likholo li vhunisile kutxani mwanathu wuwa e wonisana ni txidilo txiya txa hombe? Ene a womba tiya: “Mkombelo wu ni vhunile ti to ni teka sikarato sungu ni si ningela ka Jehovha, atiya ti ti ni ningile kudikha. Jehovha wa ni vhuna ngu kuthumisa mwaya wangu ni vangana dibanzani. Kuzumba di di bhisi ka mthumo wo txhumayela ni tona ta ni vhuna ti to ni si karateki ni ku ni vhuna ni si karateki ngu ta mangwana. Msana ka totshe tiya ni nga manana nato, ti ni ni vhuna kuwona ti to ti si nga ni mhaka ni ti hi no manana nato ni na xula ngu kuvhunwa ngu Jehovha ni Jesu.”

17. Ngu tihi ati hi ti mahako ngako hi txi wonisana ni siduko sa hombe?

¹⁷ Ngako u di kuxanisekani ngu kona ha ko felwa ngu dixaka, tihe mbimo yo tsanisa likholo lako ngu kugonda ngu matimu a Bhiblia ma womba-wombako ngu kuwuswa ka vakufa. Ni ku ngako u di kukaratekani ngu ku dixaka dako di di thavisilwe dibanzani, tihe mbimo yo gonda kasi kutsaniseka ti to nzila ayi Jehovha a hi kawukako  ngu yona ngu yona ya yinene ya kona. Ti si nga ni mhaka ni sikarato asi u wonisanako naso, londola mkhanjo wonewo ti to u kulisa likholo lako. Gela Jehovha kukarateka kwako. U nga ti mahe mahamba yedwa, tihe mbimo yo va ni vanathu. (Mav. 18:1) Pateka ka mithumo ayi yi no kuvhuna ti to u timisela, hambi i di ti to mbimo yimwani wa thuka u dila u di ka mithumo yoneyo, ngu kukhumbula ati ti nga kuhumelela. (Mas. 126:5, 6) Simama ni txiemiso txako txo xalela mitshangano u si lovhi, u txhumayela ni kugonda Bhiblia. Veka mapimo ka makatekwa aya Jehovha a thembisako kukuninga. Mbimo yi u wonako nzila ayi Jehovha a kuvhunako ngu yona likholo lako li na tsana.

18. Ngako u txi wona to nga wa txhotelwa ngu likholo u fanete u maha txani?

¹⁸ Ngako nzila ayi u wonisanako ngu yona ni sikarato yi di ku mahile u wona to nga wa txhotelwa ngu likholo, u nga godholi. Londola mkhanjo wonewo ti to u kulisa likholo lako. Maha txikombelo atxi txi nga mahwa ngu vapostoli wa Jesu a txo khene: “Hi engetele likholo.” (Luka 17:5) Tshumela u alakanyisa ngu sikombiso asi hi nga bhula ngu sona ka gondo yiya. Kufana ni Miguel ni Yurai, alakanya ngu totshe timbimo ati Jehovha a nga kuvhuna. U nga tshumela u wona txikombiso txa Vero ni Anel ava va nga khongela ngu kuhiseka ka Jehovha ngutu-ngutu mbimo yi va nga txi wonisana ni siduko sa hombe. U nga tekelela Geydi ngu kuthemba ti to Jehovha a nga kuvhuna ngu kuthumisa vanathu mwendo va hamwayani kwathu. Ngako u txi leka Jehovha e kuvhuna mbimo yi u mananako ni sikarato u na tsaniseka ti to ene a na ta kuvhuna ku u ta xula sikarato sa mbimo ayi yi tako.

19. Ngu tihi ati Jesu a nga ti tsaniseka ka tona? Awe ko u tsaniseka tihi?

¹⁹ Jesu a vhunile vagondiswa vakwe ve wona mu va nga ti fanete kuengetela kona likholo lawe. Kambe ene a txi tsaniseka ti to Jehovha a na va vhuna ve tatisela mule va nga txi txhotelwa ngu likholo kasi ku ve xula sikarato asi va no manana naso. (Joh. 14:1; 16:33) Ene a txi tsaniseka ti to dibutho da hombe da vathu di na ta huluka ka xanisa ya hombe ngu konaha ka likholo. (Mtu. 7:9, 14) Ina awe u na ta maneka ka dibutho donedo? Ina, ti nga koteka ngu ko na ha ka wunene wa Jehovha. Kambe ti lava u londola yotshe mikhanjo yi u ku nayo konakuwa ti to u kulisa ni kutsanisa likholo lako.—Vaheb. 10:39.