1. Ngu tihi a ti tifakazi ta Jehovha ti ti mahako ngu kona ha ka lirando li ti ku nalo?

 BHIBLIA yi profetile ti to vathu va Txizimu va ndi “nata . . . ngu kutsaka” ve ta thumela Jehovha hahatshi ka mkongomiso wa mwanana wakwe Jesu Kristu. (Mas. 110:3) Wuprofeti wonewo wu hetiseka nyamsi. Dilembe ni dilembe vathu va Jehovha va heta timiliyoni ta maora ka mthumo wo txhumayela. Vona va maha toneto ngu ku ti tsakela ni ku kha va holi ngu kumaha m’thumo wonewo, va tiha mbimo yo vhuneta vakhozeli kulowe ngu didhawa da nyama da moya ni da matipfelo. Malanda a wuthumeli kumweko ni madhota ni ona ma heta mbimo yo tala ma txi lulamisela sienge sawe asi va ku ta veka mitshanganoni, kumweko ni kumaha maendo a wudyisi ka vanathu. Vona va susumeteleka kumaha toneto ngu kona ha ka lirando li va ku nalo ngu Jehovha kumweko ni ngu vaakelani.—Mat. 22:37-39.

2. Ngu kuya ngu dibhuku da Varoma 15:1-3 ngu txihi txikombiso a txi Jesu a nga hi vekela txona?

² Jesu a hi vekete txikombiso txa txinene txo thangetisa silaveko sa vamwani i si nga si sakwe, se nanathu hi lava kulondisela txikombiso txonetxo. (Lera Varoma 15:1-3.) Ava va zamako kutekelela txikombiso txa Jesu va wuyelwa ngutu. Ngu kutxani? Jesu a ti khene: “Kuha i kateko ya hombe ngutu kupinda kuhiwa.”—Mith. 20:35.

3. Ngu tihi a ti hi no bhula ngu tona ka gondo yiya?

³ Ka gondo yiya hi na wona ati Jesu a nga ti maha kasi kuthumela  vamwani ni ku hi na tshumela hi wona to hi nga maha txani kasi kutekelela txikombiso txakwe. Ngu magwito hi na wona ti to hi nga maha txani kasi ku hi va ni mixuvo yo vhuna vamwani.

4. I ngu nzila muni Jesu a nga ti komba ti to ati thangetisa silaveko sa vamwani kupinda sakwe?

⁴ Jesu a vhunile vamwani hambiku a nga ti karate. Alakanya ngu ti Jesu a nga maha mbimo yi a nga telwa ngu dibutho da hombe a di khe Kapernawume. Jesu a hetile wotshe wusiku a txi khongela, se ti nga maha a ti karate ngutu. Kambe mbimo yi a nga wona dibutho da hombe ngutu, ene a pfete wusiwana avale vo xupheka ni va vo lwalwa, ngu toneto a va vhunile hambi ku a nga ti karate. Jesu kha gwitela ko va hanyisa ka malwati awe dwe, a tshumete eva vekela mwomba-wombo awu wu dhanwako ku i gondo ya mmangoni.—Luka 6:12-20.

5. Msungo wa mwaya wu nga txi tekelelisa kutxani txikombiso txa Jesu ngako a txi wuya ngu mthumoni a di karate?

⁵ Msungo wa mwaya wu nga txi tekelelisa kutxani txikombiso txa Jesu? Alakanyisisa ngu tiya, msana ko va msungo wa mwaya wu di thumile dotshe ditshiku ti nga maha e hoka mtini a di karate ngutu, a nga pimisa kuthindekisa wukhozeli wa mwaya. Kambe a si se kumaha toneto a khata ngu kukombela Jehovha kasi ku e mninga mtamo wo ve simama ni wukhozeli wawe. Se Jehovha e xamula mkombelo wawe, e tshumela e mana mtamo wo ve maha wukhozeli wa mwaya. Ngu toneto vanana ni vona va thavisa gondo ya lisima ya ti to vaveleki vawe ngu ditshuri va thangetisa timhaka ta moya ka wutomi wawe.

6. Ningela txikombiso txa nzila yi Jesu a nga tiha mbimo yo vhuna vamwani hambi ku a nga ti la va ku va ekha.

⁶ Jesu ati tiha mbimo yo vhuna vamwani hambi ka timbimo ti a nga ti karatekile. Hi nga alakanya nzila yi Jesu a nga tipfa ngu yona mbimo yi a nga ziva ti to mngana wakwe Johani Mbhabhatisi a ti datwe. Ngu ditshuri Jesu a karatekile ngutu. Bhiblia yi womba tiya: “Ngako Jesu a di engisile tiya [ta kufa ka Johani Mbhabhatisi] a to khukha konaho ngu ngalava e tsula ka wukhalo wa txiwula ene ekhalela.” (Mat. 14:10-13) Ta pfisiseka to ngu  kutxani Jesu a di lavile kuva ekha. Kutala kwathu, hi di karatekile hi lava kuzumba hokha. Kambe Jesu kha ti kota kumaha toneto, ngu kutxani? Nguko dibutho da vathu di thangete masoni kwakwe di ya amu a nga ti lava ku ya kona. Se Jesu a mahile txani? Ene a woni to vathu vale va ko xaniseka, se a to “va pfela wusiwana.” Jesu ati woni ti to vathu vale va ti lava txivhuno ni kuthavelelwa aku ku nga txi ta ngu ka Txizimu. Se Jesu ngu txi kuluveta a va ningile txivhuno. Bhiblia yi womba ti to a to “khata ku va gondisa timhaka to tala.”—Marku 6:31-34; Luka 9:10, 11.

7-8. Ningela txikombiso txa nzila yi madhota ma etetelako ngu yona txikombiso txa Jesu nga ku m’thu wo kari a txi la txivhuno.

⁷ I ngu nzila muni madhota ma etetelako Jesu? Athu ha bonga ngutu m’thumo wu madhota ma wu mahako kasi ku hi vhuna. Kutala ka thumo wu madhota ma wu mahako vanathu vo tala va dibanzani kha va wu zivi. Ngu txikombiso, ngako ku di ni timhaka ta txi kuluveta ti lavako sibhejela, vanathu va thumako ka kuvhunetela vanathu ka timhaka ta sibhejela va tutuma va ya va vhuna. Makhambi mamwani eto ti maheka ni wusiku. Kambe ngu kona ha ka lirando va ku nalo ngu vanathu, vanathu vonevo vo dhundeka kumweko ni timwaya tawe, va maha mizamo yo vhuna vanathu vonevo kasi kukombisa ti to va thangetisa silaveko sa vamwani i si nga sawe.

⁸ Madhota ma tshumela ma vhuneta ko aka tinyumba ta mfumo ni tinyumba timwani ta sengeletano ni ku va vhuneta a mu ku nga humelela tiphango. Kha hi wombi ngu maora aya va ma hetako va txi gondisa dibanzani kutsanisa ni kuvhuna vamwani. Ha bonga ngutu vanathu va va kumweko ni timwaya tawe. Hi kombela ti to Jehovha eva katekisa ngu kona ha  ka wunene awu va wu mahako! Madhota ni ona ma fanete kuziva kudinganisela, kha ma fanela kuheta mbimo yo tala ma txi khatalela timhaka ta moya ha koza ma si salelwi ngu mbimo yo khatalela timwaya tawe.

9. Ngu kuya ngu Vafilipiya 2:4, 5 ngu tihi ati otshe Makristu ma fanelako ku ti maha?

⁹ Lera Vafilipiya 2:4, 5. Ditshuri ti to hi nga hotshethu hi ku madhota, hambi keto nanathu hi nga etetela txikombiso txa Jesu txo thangetisa silaveko sa vamwani. Bhiblia yi womba ti to Jesu “a tekile txiemo txa txithumi.” (Vaf. 2:7) Ngu tihi ati hi nga ti gondako ka mapswi yawa? Txithumi txa txinene, mbimo yotshe txi lava tinzila to tsakisa nyamne wa txona. Kota sithumi sa Jehovha athu hi lava kuthumela vanathu. Ngu toneto, hi lava kumaha totshe ti hi nga ti kotako kasi ku Jehovha e hi thumisa ngutu. U nga sikota kumaha toneto ngu kuthumisa tinzila a ti ti londiselako.

10. Ngu sihi siwotiso a si hi nga ti wotisako sona?

¹⁰ Ti xolisise upune. Ti wotise tiya: ‘Ina ni ti emisete ku ti tona so kari kasi kuvhuna vamwani? Ni maha txani ngako ni txi kombelwa ti to ni ya pfuxela mwanathu wu a nga kula ngu tanga? Mwendo ku ni txi kombelwa ku ya vhuna mwanathu wu a nga kumba kasi ku ni mu teka e ya mitshanganoni? Ina na ti emisela ku ya vhuneta ngako ku txi laveka vathu vo ya vhuneta ko basisa wukhalo wo maha mitshangano ya hombe mwendo ko wuseta nyumba ya mfumo?’ Jehovha wa tsaka ngutu ngako a txi wona ti to ha ti karata ngu kuthumisa mbimo yathu ni silo sathu kasi ku hi vhuna vamwani. Se hi nga maha txani ngako hi txi wona to hi fanete hi tshukwatisa ka mhaka yiya?

11. Hi nga maha txani ngako hi txi tumbula ti to hi fanete kutshukwatisa ka mhaka yo thangetisa silaveko sa vamwani?

¹¹ Khongela ka Jehovha. Ngako u txi wona ti to u fanete u tshukwatisa ka mhaka yiya kambe u pwata mtamo wo maha toneto, u nga maha txani? Gela Jehovha ngu mkombelo, u nga jika-jiki, gela Jehovha ati u ti pfisako tona u tshumela u mkombela ti to e ku ninga ‘kuxuva ni kuthuma kuranda kwakwe.’—Vaf. 2:13.

12. Vafana ava va nga bhabhatiswa va nga vhunisa kutxani mabanzani?

¹² Ngako u di mphya awu a nga bhabhatiswa, sakulela kuxuva kuthuma ngutu dibanzani. Ka matiko mamwani mtengo wa madhota mbwa hombe ngutu kupinda wa malanda a wuthumeli ni ku malanda o tala a wuthumeli ma kute nyana ngu tanga. Aku sengeletano yi yako yi txi kula ku ni txilaveko txa vanathu va i ku ngadi vaphya kasi ku vhuneta ko thuma. Ngako u txi ti ningetela ko vhuneta u na tsaka ngutu ngu kutxani? Nguko awe u tsakisa Jehovha ni ku u na va ni nduma ya yinene, i si nga eto dwe, u na tshumela u mana litsako ali li tiswako ngu kuvhuna vamwani.

13-14. Ngu tihi ati hi nga mahako kasi kuvhuna vanathu? (Wona mfota wa kapa.)

¹³ Zumba u txi lavetela mikhanjo yo vhuna vamwani. Mpostoli Paulo a gete tiya Vahebheru: “Mi nga divaleni kumaha ta tinene, mi txi abana ni vakwanu asi mi ku naso, nguko atiya ngu tona timhamba ti ti tsakisako Txizimu.” (Vaheb. 13:16) Etxo i ti txialakanyiso txa txinene. Kha ka pinda mbimo yo lapha vanathu va Judheya va di amukete dipapilo dileya. Makristu a kona kheya ti lavile me rura mitini kwawe ve siya tithomba tawe, maxaka awe me ‘thavela mimangoni.’ (Mat. 24:16) Ka mbimo yoneyo ti hakubasani to ti ti laveka ngutu ku ve vhunana. Ava va nga engisa txialakanyiso txa mpostoli Paulo txo ziva kuabana ni vamwani  asi va ku naso ti va hehukete ku ya simama ve maha toneto mbimo yile va nga ya va ka txiemo txo karata.

¹⁴ Hi nga mbimo yotshe vanathu va no hi gela ti to va lava txivhuno. Ngu txikombiso, ti nga maha mwanathu e felwa ngu msikati wakwe, ngu toneto ti nga maha e lava txivhuno ka mithumo ya ha mtini yo fana ni kubhika, male ya xapa ni timwani. Ni ku ti nga maha a si wombi to a ni txilaveko etxo ngu ku pimisa ti to o ninga m’thumo vamwani, kambe hi txi tiha mbimo yo ya mvhuna ene a na tsaka ngutu ngu txivhuno txonetxo. Kha ha fanela kupimisa ti to dhevhi nombwe ngene a mkhatalelako mwendo kupimisa ti to ngako a txi lava txivhuno a na hi gela. Ngu toneto hi fanete ku ti wotisa tiya: ‘I di ti to ngani ni ku ka txiemo txile ngu tihi a ti ni ndi no tsakela kuvhunwa ka tona?’

15. Ngu tihi ati hi fanelako kusakulela ku ti maha kasi ku hi vhuna vamwani?

¹⁵ Vana m’thu wo beleka. Ti hakubasani ti to wa ziva vanathu dibanzani kwanu ava mbimo yotshe va nga ti emisela kuvhuna vamwani. Vanathu vonevo kha va ti mahi hi tipfa nga ho va ninga m’thumo, mbimo yotshe ha ti ziva ti to va na hi vhuna ni ku nanathu hi lava ku va tekelela. Mwanathu mmwani i ku didhota a dhanwako ku i Alan, a ku ni kona mu ka 40 wa malembe a womba tiya mayelano ni txikombiso txa Jesu: “Jesu i ti m’thu wu a nga ti zumba a di bhisi ngutu. Kambe vathu va totshe titanga va txi mu tsanela ni ku va txi tipfa va ti txhusekile kukombela txivhuno. Vona va txi mu wona i di m’thu wu a nga txi khatala ngu vona, nanani ni lava kuzama kutekelela txikombiso txa Jesu ni ziwa kota m’thu wu a belekako, a kombisako kukhatala ni lirando.”

16. Dibhuku da Masalmo 119:59, 60 di nga hi vhunisa kutxani ti to hi etetela txikombiso txa Jesu ngu hafuhi?

¹⁶ Kha ha fanela kugodhola ngako hi txi tandeka  kuetetela Jesu ngu kuhetiseka. (Jak. 3:2) Mgondi a nge pali mgondisi wakwe, kambe ene mbimo yotshe wa gonda ka tiphazamo ti a ti mahako mbimo yi a zamako kuetetela mgondisi wakwe. Mbimo yi a mahako toneto a na ya masoni e tshukwatisa. Ngu ha kufanako, ngako hi txi thumisa ati hi ti gondako mu ka Bhiblia ni kutshumela hi lulamisa a mu hi phazamako kona hi na va hi txi etetela txikombiso a txi Jesu a nga hi siyela txona.—Lera Masalmo 119:59, 60.

17-18. Ngu yihi wuyelo hi no yi mana ngako hi txi tekelela txikombiso txa Jesu Kristu txa ku khatalela silaveko sa vamwani?

¹⁷ Ngako hi txi ti emisela kuthangetisa silaveko sa vamwani vanathu ni vona va na lava ku hi tekelela. Didhota dimwani di dhanwako ku i Tim di womba tiya: “Ku ni majaha aya i ku ngadi vaphya a ya va nga kula ve hokela ko sawula kuthuma kota malanda a wuthumeli, timwani ti ti nga va kuzeta ngu tekelela txikombiso txa vamwani txo tiningetela ko vhuna vamwani. Mizamo yi va yi mahako yo thangetisa silaveko sa vamwani ya vhuna ngutu dibanzani ni ku tshumela yi vhuna madhota.”

¹⁸ Hi hanya ka mafu ya vathu va ko lwela tawe dwe, kambe kota vathu va Jehovha, athu hi hambanile hi gonda ka txikombiso txa Jesu Kristu. Ngu toneto athu hi lava kutekelela txikombiso txakwe. Kha ngaho a wu a nga sikotako kulondisela txikombiso txa Jesu ngu kuhetiseka, kambe hi nga sikota “kulondetela mkondo wakwe” ngu hafuhi. (1 Pedro 2:21) Ngako hi txi tekelela txikombiso txa Jesu Kristu txo khatalela silaveko sa vamwani i si nga sathu, hi na mana litsako ali li tiswako ngu kuziva ti to hi maha ti ti tsakisako Jehovha.