HAHATSHI ka mlayo wa Mosi matuva kumweko ni situvani si ti tumelelwa kasi kumaha miningelo ngu sona. A mu ka Bhiblia, sinyana siya si tsimbila kumweko ni ku tximwani ni tximwani txi nga thuma ka wukhalo wa tximwani. (Levhi 1:14; 12:8; 14:30) Ni ku ngu kutxani i nga ti ta tinene eto? Tximwetxo txa sivangelo ngu ti to matuva ma si maneki mbimo yotshe. Ngu kutxani?

Matuva kha ma zumbi wukhalo wumwewo, se ma ti maneka ka ditiko da Isarayeli ngu mbimo ya kuhisa. Se dilembe ni dilembe ngu mtxima wa Outubro matuva ma txi rura me ya ka wukhalo wo hisa me tshumela me wuya Isarayeli kukhatani ka kuhisa. (Nda. 2:11, 12; Jer. 8:7) Se a tiya ti womba ti to, ka ditiko da Isarayeli ti ti karata ku ve Isarayeli ve maha miningelo ngu kuthumisa matuva ka mbimo yo titila.

Kuhambana ni matuva, situvani si txi maneka mbimo yotshe khe ka ditiko da Isarayeli i si nga eto dwe, situvani si txi fuywa. (Fananisa ni Johani 2:14, 16.) Dibhuku dimwani di womba ti to “kotshe madhoropani ni sidhoropana sa khe Palestina ku ti fuywa situvani. Ni ku yotshe miti yi ti ni sifi amu ku nga ti zumba kona situvani.”—Fananisa ni Isaya 60:8.

Kuva Jehovha a di tumelete ti to va Isarayeli ve maha miningelo ngu kuthumisa sihari si si ndi no maneka yotshe mbimo ti komba ti to ene Txizimu txa wunene ni lirando.