1-2. Ngu kutxani hi txi xalela Txialakanyiso dilembe ni dilembe?

 KUPINDA kona mu ka 2000 wa malembe Jesu a di ningete wutomi wakwe kasi kutula nzila ti to hi mana wutomi wu wu si gumiko. Ka wusiku wakwe wo gwita a si se fa Jesu a gete vagondiswa vakwe ti to ve alakanya tximahakalo txile txa lirando atxi txi patako dipawu ni vhinya.—1 Vak. 11:23-26.

² Athu ha engisa txirumo txiya txa Jesu nguko ha m’randa ngutu. (Joh. 14:15) Dilembe ni dilembe ngu mbimo ya Txialakanyiso ha kombisa kubonga kwathu ka totshe ti ene a nga hi mahela ngu ku ti ninga mbimo yo maha mkombelo hi alakanyisisa ngu txhamuselo ya lifo lakwe. Hi tshumela hi heta mbimo yo tala hi di ka mthumo wo txhumayela, hi kuzeta vathu ngu ha hi nga kotako ngu kona ti to ve ta va ni nathu ka tximahakalo txiya txa lisima. Ni ku hi tiemisete kwambi tumelela txilo txi hi tsivela ku ta xalela Txialakanyiso.

3. Hi na bhula ngu txani ka gondo yiya?

³ Ka gondo yiya, hi na xolisisa tinzila tiraru ati vathu va Jehovha va mahako ngu tona mizamo kasi ku ta alakanya lifo la Jesu: 1) hi etetela txikombiso txi Jesu a nga hi vekela, 2) hi ramba vamwani ti to ve ta va ho ka Txialakanyiso, 3) hi xalela Txialakanyiso hambi hi txi manana ni sikarato.

4. Ngu dihi ditshuri di junyatiswako ka Txialakanyiso dilembe ni dilembe, ni ku ngu kutxani hi di fanete ku di tekela ha msungo ditshuri diya? (Luka 22:19, 20)

⁴ Dilembe ni dilembe ka Txialakanyiso ha engisela mwombawombo wu wu nga seketelwa ka Bhiblia awu wu xamulako siwotiso so tala. Ha gonda ti to ngu kutxani hi txi lava mterulo ni ti to i ngu nzila yihi lifo la mthu wamweyo li kuwulako siwonho sa vo tala. Ha khumbuxetwa ti ti wombako tona kudya dipawu ni kusela vhinya ni ti to mba mani va va fanelako kumaha toneto. (Lera Luka 22:19, 20.) Ha alakanyisisa ngu makatekwa aya Jehovha a nga ma vekela ava va ku ni themba yo ta hanya ha mafuni. (Isaya 35:5, 6; 65:17, 21-23) Phela kha ha fanela ku di tekela hahatshi ditshuri diya. Kambe tibhiliyoni ta vathu kha ti ti pfisisi tiya, ni ku kha ti wu ningi lisima mterulo wa Jesu. Ni ku kha va mahi Txialakanyiso txiya ngu nzila yi Jesu a nga leleta ngu yona. Ngu kutxani?

5. Msana kova vapostoli vo tala va di fite, vathu va khatisile kutxani kumaha txialakanyiso txa lifo la Jesu?

⁵ Msana ka kufa ka vapostoli, Makristu a makuhu ma wulete mndani ka dibanza. (Mat. 13:24-27, 37-39) Vona va khatile “kubwabwatela to soholoka kasi ku ti lavela vagondiswa.” (Mith. 20:29, 30) Yimweyo ya tigondo toneto “to soholoka” ati makristu oneyo ma nga ti gondisa ngu ti to Jesu kha ningela wutomi wakwe “kumweko basi kufela kufuvisa siwonho sa vathu vavangi,” nga ha Bhiblia yi wombako ngu kona, kambe digandelo dakwe di fanete kuwuyeletelwa. (Vaheb. 9:27, 28) Nyamsi vathu va timbilu ta tinene va kholwa ka tigondo tiya ta makuhu. Vona va ya ka titxhetxhe tawe divhiki dotshe mwendo ngu masiku o kari veya ka txilalelo txi dhanwako ku, “Eucaristia.” b Titxhetxhe timwani kha ti mahi Txialakanyiso txa lifo la Jesu mbimo yotshe, ni ku kutala ka vathu va wukhongeli kha wu pfisisi mterulo wa Jesu. Vamwani va nga ti wotisa tiya, ‘Ina lifo la Jesu ngu ditshuri li nga divalela sionho sangu?’ Ngu kutxani va txi maha txiwotiso txonetxo? Makhambi mamwani, va kholwa ti vathu va ti wombako to ti nge koteki ku sionho sathu si divalelwa ngu lifo la Jesu. Vagondiswa va Jesu va vhuni vathu ku ve pfisisa mterulo wa lifo lakwe, ni ti va nga txi mahisako tona Txialakanyiso ngu nzila ya yinene.

6. Ngu 1872, ngu txihi txisungo txi mtxawa wa vagondi va Bhiblia wu nga txi hokelela?

⁶ Ngu ma 1800, mtxawa wa vagondi va Bhiblia wu wu nga ti thangelwa ngu Charles Taze Russel wu khatile kumaha gondo yo tshima ya Bhiblia. Vona va ti lava kuziva ditshuri mayelano ni digandelo da Jesu ni ti Txialakanyiso txi nga ti fanela kumahiswa tona. Se ngu 1872, vona va hokelete txisungo txi txi nga ti seketelwa mu ka Bhiblia txa ti to Jesu a ningete digandelo da mterulo wakwe kasi kufela votshe. Kambe vona kha va sisa ati va nga ti ti gondile. Hahanze keto, va ti hangalasile ngu mabhuku, majornal ni marevhista. Se mtxawa wonewo wu khatile kuxalela Txialakanyiso.

7. Hi wuyeliswa kutxani ngu wuxolisisi wu wu nga mahwa ngu mtxawa wa vagondi va Bhiblia?

⁷ Nyamsi ha wuyelwa ngu wuxolisisi awu Makristu ale o hiseka ma nga wu maha kale. Ngu nzila yihi? Jehovha a hi vhuni kupfisisa ati digandelo da Jesu di wombako tona ni ti di no ti hetisisa ka vathu votshe. (1 Joh. 2:1, 2) Hi tshumete hi gonda ngu tithemba timbidi  ati ti no manwa ngu va va tsakisako Jehovha i ku tiya, ku ni vo kari va no ya hanya nzumani va si fi ni timiliyoni ta vathu ti ku ni themba yo hanya wutomi wu wu si gumiko ha mafuni hawa. Ha tshuketa ka Jehovha mbimo yi hi gondako ngu lirando lakwe la hombe ni nzila yi hi wuyelwako ngu yona ngu digandelo da Jesu. (1 Pedro 3:18; 1 Joh. 4:9) Kufana ni Makristu a kale ha ramba vathu kasi ku hi ta xalela navo Txialakanyiso nga ha Jesu a nga maha ngu kona.

8. Ngu tihi ti vathu va Jehovha va nga ti maha kasi kuramba vamwani ka Txialakanyiso? (Wona mfota.)

⁸ Vathu va Jehovha kukhukela kale va ziwa ngu kuramba vamwani ti to ve ta ka Txialakanyiso. Ngu ma 1881, vanathu khe Estados Unidos va rambilwe kasi ku ve ya patana ka wukhalo wo sisaleka khe Allegheny, Pennsylvania, ti to ve xalela tximahakalo txiya txo sawuleka. Msana ka malembe o kari, dibanza dimwani ni dimwani di txi ti mahela Txialakanyiso. Ngu Março wa 1940, vahuweleli va getwe ti to va ti fanete kuramba votshe ava va nga ti kombisa kutsakela ka teritoriyo yawe. Ngu 1960, ngu dikhambi do khata, Bhetele yi mahile sirambo yi si rumelela mabanzani. Se kukhukhela koneho tibhiliyoni ta sirambo sa Txialakanyiso sa ningelwa ka vathu. Ngu kutxani hi txi maha mizamo yoneyo yo ramba vamwani?

9-10. I mani a wuyelwako ngu mizamo yi hi yi mahako yo ramba vamwani ka Txialakanyiso? (Johani 3:16)

⁹ Txivangelo tximwani txi hi mahako hi ramba vathu ve ta xalela Txialakanyiso hi lava ti to ava va no ta maneka ve gonda mayelano ni ti Jehovha ni Jesu va nga hi mahela. (Lera Johani 3:16.) Hi emela ti to ati va no ti wona  ni ku ti pfa ka Txialakanyiso ti va susumetela kugonda to tala ni ku ve va malanda a Jehovha. Kambe ngu ditshuri vo tala va wuyelwa.

¹⁰ Hi tshumela hi ramba ni va va nga leka kuthumela Jehovha. Hi maha toneto kasi ku va khumbutisa to Jehovha a nga txi va randa. Vo tala va maneka. Ni ku ha tsaka ngutu ngu kuva wona. Kumaneka kwawe, ti va khumbutisa nzila yi va nga ti thumela ngu yona Jehovha ngu litsako. Wona txikombiso txa Mónica. c Ene a wuyisetwe ku va muhuweleli ka mbimo yiya ya mtungu. Msana ko xalela Txialakanyiso ngu 2021, ene a womba tiya: “Txialakanyiso txiya txi ve txa lisima ngutu kwangu. Msana kova ni di hetile 20 wa malembe ni di hahanze, adiya i ve dikhambi do khata ti to ni ramba vathu ve ta maneka ka Txialakanyiso. Ni tiningetete ngutu ngu mbilu yangu ka mthumo wuwa, nguko na m’bonga Jehovha ni Jesu ngu ti va nga ni mahela.” (Mas. 103:1-4) Ti singa ni mhaka ni ti to vathu va tsakela mwendo nem, ha hiseka ko ramba vamwani ka Txialakanyiso, nguko ha ti ziva ti to Jehovha wa tsaka ngu mizamo yathu.

11. Jehovha a yi katekisile ngu nzila yihi mizamo yathu yo ramba vathu ti to ve ta ka Txialakanyiso? (Hagayi 2:7)

¹¹ Jehovha wa katekisa ngutu mizamo yathu yo ramba vathu ti to ve ta maneka ka Txialakanyiso. Ti singa ni mhaka ni sipimelo si nga ti vekilwe ngu mhaka ya mtungo wa COVID-19, ngu 2021, hi hokelete mtengo wa hombe ngutu wu hi nga si khali ku wu hokelela wo dingana 21.367.603 wa vathu ava va nga xalela Txialakanyiso. Mtengo wuwa wu bhanya kumbidi ni hafu mitengo ayi Tifakazi ta Jehovha se ti nga yi hokelela ha mafuni kotshe! Ditshuri ti to Jehovha kha veki mapimo ka mtengo. Kambe ene a khatala ngutu ngu mmweyo ni mmweyo wathu. (Luka 15:7; 1 Tim. 2:3, 4) Ha tsaniseka ti to Jehovha a thumisa sirambo sathu kasi ku hi vhuna hi mana vathu va timbilu ta tinene.—Lera Hagayi 2:7.

12. Ngu sihi siemo si si nga hi mahako ti hi karatela kuxalela Txialakanyiso? (Wona mfota.)

¹² Nga ha Jesu a nga womba ngu kona, ka masiku a magwito hi na wonisana ni sikarato sa hombe, kukanetwa ngu vamwayani, kuxaniswa, tiyimbi, tinzala, ni simwani. (Mat. 10:36; Marku 13:9; Luka 21:10, 11) Mbimo yimwani, sikarato soneso si nga hi maha ti hi karatela kuxalela Txialakanyiso txa lifo la Jesu. Ngu tihi ti vanathu vamwani va nga ti maha kasi kuxula sikarato soneso, ni ku Jehovha a va vhunisile kutxani?

13. Jehovha a katekisile Artem ngu nzila yihi ngu kona ha ka txibindi ni ku tiemisela kwakwe kuxalela Txialakanyiso hambiku a nga ti jele?

¹³ Jele. Vanathu va va ku jele ngu mhaka ya likholo lawe va maha ti va nga ti kotako kasi kualakanya lifo la Jesu. Wona txikombiso txa Artem ka mavhikinyana msana di sa se kuhoka ditshiku da Txialakanyiso, ene a ti khotetwe ka sela ya yidotho ngutu ayi yi nga ti ni 5 wa sibotxhwa. Ti singa ni mhaka ni ku a nga ti khotetwe, ene a sengeletile asi a ndi no si thumisa kota sifanekiselo sa Txialakanyiso, ni ku a ti ti mahete makungo o tivekela mwombawombo wa Txialakanyiso awu wu ndi no mu wuyelisa. Kambe sibotxhwa kulowe si ti dhaha ni kuvangetela diguwa. Se a mahile txani? A va kombete ti to ve ema kudhaha ni kuvangetela diguwa kudingana diwora. Ene a xamate aku va nga tumela kuema kudhaha ni kuvangetela diguwa. Artem a womba tiya, “Ani ni ti tiemisete ku va gela mayelano ni Txialakanyiso.” Hambi ku va nga womba to vona va si ti lavi kuengisela tximahakalo txileya,  kambe msana ko wona ni kupfa ti Artem a nga ti maha ka Txialakanyiso, va m’wotisile mayelano ni lisima la Txialakanyiso.

14. Ngu yihi mizamo yi yi nga mahwa kasi ku kuxalelwa Txialakanyiso ti singa ni mhaka ni mtungo wa COVID-19?

¹⁴ Mtungu wa COVID-19. Mbimo yi mtungo wuwa wu nga khata, Tifakazi ta Jehovha ti si manani Nyumbani ya Mfumo ti maha Txialakanyiso. Kambe eto kha ta va vhalela ti to ve xalela Txialakanyiso. d Mabanza mamwani ma ti thumisa videoconferência mwendo zoom. Se ka makhalo ya ku nga singa ni internet ko? Ka matiko oneyo ku ti mahwa malulamiselo a ti to mtshangano wu kombiswa ka TV mwendo ka radhiyo. Kuengetela keto ma Bhetele ma txi gravhara miwombawombo ngu kona mu ka 500 wa tidimi kasi kurumela ka makhalo aya ku singa ko ni internet ti to ve engisela Txialakanyiso. Se vanathu vonevo vo thembeka va ti maha malulamiselo ya ti to ve rumela magravhasawu oneyo ka va va nga ti ni txilaveko.

15. Hi gonda txani ka txikombiso txa Sue?

¹⁵ Kukanetwa ha mwayani. Ka vamwani, txikarato txa hombe txi nga va tsivelako kuxalela Txialakanyiso, ngu kanetwa ngu maxaka. Wona txikombiso txa txigondiyana tximwani txi dhanwako ku i Sue. Ngu 2021, ku txi txhota ditshiku dimwedo ti to kuxalelwa Txialakanyiso, Sue a gete mgondisi wakwe ti to kha na mbi si kota kuxalela Txialakanyiso ngu mhaka ya kukanetwa ngu maxaka. Se mgondisi wakwe a gondile Luka 22:44. E gwita e mtxhamusela ti to ngako hi txi wonisana ni sikarato, hi fanete kulondisa txikombiso txa Jesu ngu kumaha mkombelo ka Jehovha ni kuveka yotshe themba yathu kwakwe. Se ka ditshiku di nga londisela, Sue a lulamisete sifanekiselo e tshumela e xalela mwombawombo wo sawuleka wa wukhozeli wa nimixo ka jw.org. Se ni minova ya kona a bete kwarto kwakwe e engisela Txialakanyiso ngu kuthumisa fone. Msana keto, Sue a bhalete mgondisi wakwe a txi: “U ni tsanisile ngutu nyamnova. Ni mahile totshe ti ni nga tikota kasi kuxalela Txialakanyiso, ni ku Jehovha ngene a nga ni vhuna ku ti koteka. Ni pwata ni mapswi o bonga litsako li ni li pfako!” U pimisa to Jehovha a nga kuvhuna ngako u txi wonisana ni txikarato txi txi fanako?

16. Ngu kutxani hi txi tsaniseka ti to Jehovha a na yi katekisa mizamo yathu ya ti to hi xalela Txialakanyiso? (Varoma 8:31, 32)

¹⁶ Jehovha wa tsaka ngutu ngu mizamo yi hi yi mahako ti to hi alakanya lifo la Jesu. Hi nga tsaniseka ti to ene a na hi katekisa ngako hi txi kombisa kubonga ngu totshe ti ene a nga hi mahela. (Lera Varoma 8:31, 32.) He tiemiseleni kumaneka ka Txialakanyiso dilembe diya ni kumaha totshe ti hi nga ti kotako kasi kuengetela kuramba vathu di sinzi kuhoka ditshiku da Txialakanyiso.