1-2.a)Hi ti pfisa kutxani hi txi alakanyisisa ngu wutomi wa Jesu? b) Hi na bhula ngu txani ka gondo yiya?

 MBIMO yi hi felwako ngu dixaka dathu di hi di dhundako, ha di xuva ngutu ta tinene! Ka masiku o khata, txiwalo tximwani hi txi pimisako i singa kupfa kupanda ngutu ngako hi txi pimisa ngu totshe ti ti nga mu humelela kala kuza e fa, ngutu-ngutu i di ti to a xanisekile ngutu asi se fa. Ngu kutsimbila ka mbimo ha khata kutsaka ngako hi txi pimisa ngu to kari ati a nga hi gondisa, a nga ti womba mwendo mapswi o kari aya ma nga hi kuzeta ni ku hi maha hi seka.

² Ngu ha kufanako, nathu ha pandiseka ngako hi txi gonda mayelano ni kuxaniseka ni lifo la Jesu. Ngu mbimo ya Txialakanyiso, ha tiha mbimo yo alakanyisisa ngu ti di wombako tona digandelo da mterulo wa Jesu. (1 Vak. 11:24, 25) Hahanze keto, ha tshumela hi mana litsako ngako hi txi alakanyisisa ngu totshe ti Jesu a nga ti womba ni ku ti maha mbimo yi a nga ti ha mafuni. Ha tshumela hi tsaniswa ngako hi txi alakanyisisa ngu ti a ti mahako konku ni ti a no ta ti maha ka mbimo yi yi tako. Kualakanyisisa ngu tiya, ni lirando lakwe ngu ngathu ta hi kuzeta kukombisa kubonga kwathu ngu simaho, nga ha hi no ti wona ngu kona ka gondo yiya.

3.Ngu sihi sivangelo si hi ku naso so bonga mterulo?

³ Hi txi pimisa ngu wutomi ni lifo la Jesu ta hi kuzeta ku hi bonga. Ka mthumo wakwe wo txhumayela, Jesu a gondisile  vathu mayelano ni makatekwa aya Mfumo wa Txizimu wu no ma tisa. Athu ha bonga ngutu ditshuri donedo da Mfumo. Hi tshumela hi bonga mterulo nguko wu hi tulela nzila yo va ni wuxaka wo tsana ni Jehovha ni Jesu. Ava va kombisako likholo ka Jesu va na tshumela ve va ni themba yo ta hanya ngu ha ku si gumiko ni kuwona maxaka awe ma txi wuswa. (Joh. 5:28, 29; Var. 6:23) Phela athu kha ha maha txilo atxi txi nga hi maha hi mana makatekwa yawa; nem kha hi nge sikoti kuhakela Txizimu ni Jesu ngu ti va nga hi mahela. (Var. 5:8, 20, 21) Kambe hi nga kombisa ku va bonga ngutu. Ngu nzila yihi?

4.I ngu nzila yihi Mariya Magadhala a nga kombisa ngu yona kubonga ti Jesu nga mmahela? (Wona mfota.)

⁴ He wone txikombiso txa wamsikati mmwani wa Mjudha a dhanwako ku i Mariya Magadhala. Wutomi wakwe wu txi karata ngutu, nguko a ti xuphwa ngu 7 wa madhimoni. Ti nga maha a di ti pfite nga txikarato txile kha txi na kululamiswa. Alakanya nzila yi a nga bonga ngu yona mbimo yi Jesu a nga mkhulula ngu kuhinga madhimoni ale! Kubonga koneko ku mkuzetile ti to e va mgondiswa wa Jesu, ni ku a thumisile mbimo yakwe, mtamo wakwe ni silo sakwe kasi kuseketela Jesu ka mthumo wakwe wo txhumayela. (Luka 8:1-3) Hambiku Mariya a nga bonga Jesu ngu ti a nga mmahela, ti nga maha ene a si yi woni ningo ya hombe ayi yi nga txi ta. Jesu a ndi na ningela wutomi wakwe ngu mhaka ya vathu, “kufela ku votshe va va no kholwa kwakwe” ve tidila ngu wutomi wo mbi guma. (Joh. 3:16) Mariya a tshumete e kombisa kubonga kwakwe Jesu, ngu kuva wo thembeka. Mbimo yi Jesu a nga txi xaniseka a di ka phande ya xanisa, Mariya nene a ti kona hale a txi mxanisekela e tshumela e mseketela kumweko ni vamwani. (Joh. 19:25) Msana ko va Jesu a di fite, Mariya kumweko ni vavasikati vamwani vavambidi, va tile ni mafura o bhumula aha a nga ti vekilwe kona. (Marku 16:1, 2) Mariya a haketwe ngutu ngu kona hawa ka  kuthembeka kwakwe. Ene a tsakile ngutu ngu kutshumela e wonana ni Jesu mbimo yi a nga wuswa e wombawomba nayo ku lungelo ya hombe ngutu ayi vagondiswa vamwani va nga mbi yi mana.—Joh. 20:11-18.

5.Hi nga kombisisa kutxani kubonga ngu totshe ti Jehovha ni Jesu va nga hi mahela?

⁵ Nathu hi nga kombisa kubonga kwathu ngu totshe ti Jehovha ni Jesu va nga hi mahela ngu kuthumisa mbimo yathu, mtamo wathu ni silo sathu kasi kuseketela mthumo wa Mfumo. Ngu txikombiso, hi nga ti ningela ko vhuneta ka mthumo wo aka ni kuwuseta tinyumba tathu ta wukhozeli wo sawuleka.

6.Ngu kutxani hi txi womba to mterulo i ningo ka mmweyo ni mmweyo wathu?

⁶ Hi txi wona nzila yi Jehovha ni Jesu va nga hi randa ngu yona, ti hi susumetela ku nathu hi va randa. (1 Joh. 4:10, 19) Ha va randa ngutu ngako hi txi pimisa ngu nzila yi Jesu a nga fela ngu yona mmweyo ni mmweyo wathu. Mpostoli Paulo a txi ti ziva toneto ,ni ku a kombisile kubonga kwakwe ngu ti a nga bhalela Vagalatiya a txi: “Mwanana wa Txizimu . . . ani randile a txi ti ningela ngu ngani.” (Vag. 2:20) Ngu kuthumisa mterulo, Jehovha a kutshuketisile hafuhi kwakwe.kasiku u va mngana wakwe (Joh. 6:44) Ina kha ti kutangalisi mbilu kuziva to Jehovha a woni txo kari txa txinene kwako a ha koza e dihela mtengo wa hombe kasiku awe u balwa kota mngana wakwe? Ina kha ti kutsanisi kuziva to Jehovha ni Jesu va kuranda? Phela ndinene ku ti wotisa tiya, ‘Ina lirando liya la ni kurumeta kumaha to kari?’

7.Nga ha ti nga kombiswa ka mfota, hi nga kombisisa kutxani lirando lathu ngu Jehovha ni Jesu? (2 Vakorinto 5:14, 15; 6:1, 2)

⁷ Lirando lathu ngu Jehovha ni Jesu li hi kuzeta kukombisa lirando lathu ka vamwani. (Lera 2 Vakorinto 5:14, 15; 6:1, 2.) Nzila yimwani  yo kombisa lirando lathu, ngu pateka ngu kuhiseka ka mthumo wo txhumayela. Athu hi bhula ni votshe va hi va manako. Athu kha hi sawuli m’thu ngu kuya ngu lixowo, mdhawuko, txiemo txakwe mwendo txibongo txakwe. Athu hi thuma ngu kuya ngu txikongomelo txa Jehovha “a navelelako to votshe vathu ve mana kuhanyiswa ni kuziva ditshuri.”—1 Tim. 2:4.

8.Hi nga kombisisa kutxani lirando lathu ngu vanathu?

⁸ Hi tshumela hi kombisa lirando lathu ngu Jehovha ngu kuranda vanathu. (1 Joh. 4:21) Ha kombisa kukhatala ngu vona ni ku ha va seketela ngu mbimo ya sikarato. Ha va thavelela ngako va di luzeketwe ngu wu va m’dhundako, hi va endela ngaku va txi lwala ni ku ha maha totshe ti hi nga ti kotako kasi ku va tsanisa mbimo yi va nga funyeka mbilu. (2 Vak. 1:3-7; 1 Vat. 5:11, 14) Ha simama hi va pata ka mikombelo yathu hi txi khumbuka tiya “Mkombelo wa mlulami wu ni mtamo ngutu.”—Jak. 5:16.

9.Ngu yihi nzila yimwani ayi hi nga kombisisako ngu yona lirando lathu ngu vanathu?

⁹ Hi tshumela hi kombisa lirando lathu ngu vanathu ngu kulwela kudikha navo. Hi tikaratela kuetetela txikombiso txa Jehovha txo divalela. Aku Jehovha a nga tumelela mwanana wakwe e ta hi fela ngu mhaka ya sionho sathu, ina kha ha fanela ku ti emisela kudivalela vanathu ngako va txi hi onhela? Phela kha hi lavi kufana ni txithumi txile txo biha atxi txi nga wombwa ka tximwetxo txa sidinganiso sa Jesu. Hambi msana ko va txi di divaletwe ngu nyamne wa txona txikweneti txa hombe, kambe txona txi tandekile kudivalela txithumi kulowe atxi txi nga ti ni txikweneti txa txidotho. (Mat. 18:23-35) Ngako u di phazamisanile ni mwanathu wo kari dibanzani, ina u nga teka dizambo do maha kudikha txi si se hoka Txialakanyiso? (Mat. 5:23, 24) Ngako u txi maha toneto u na va u txi kombisa lirando li u ku nalo ngu Jehovha ni Jesu.

10-11.Madhota ma nga ti kombisisa kutxani to ma randa Jehovha ni Jesu? (1 Pedro 5:1, 2)

¹⁰ Madhota ma nga kombisa ngu nzila yihi to ma randa Jehovha ni Jesu? Nzila yimwani ya lisima ngu khatalela silaveko sa tinvuta ta Jesu. (Lera 1 Pedro 5:1, 2.) Jesu a junyatisile mhaka yiya ka mpostoli Pedro. Msana kova a di lambile Jesu sikhati siraru, Pedro a ti kombisile to a ti mranda ngutu Jesu. Mbimo yi Jesu a nga wuswa a wotisile Pedro a txi: “Simoni mwana Johani awe wa ni randa kupinda vava kani?” Ha tsaniseka to Pedro a ti mahile totshe ti a nga ti kota kasi kukombisa to a ti mu randa Jesu. Jesu a gete Pedro a txi: “Dyisa tinvuta tangu.” (Joh. 21:15-17) Ka wutomi wakwe wotshe, Pedro a khatalete kwati tinvuta ta Mkoma, a txi kombisa ti to ene a ti mranda ngutu Jesu.

¹¹ Ngu mbimo ya Txialakanyiso, anu madhota mi nga kombisisa kutxani to ma ninga lisima mapswi a Jesu aya a nga gela Pedro? Mi nga kombisa lirando li mi ku nalo ngu Jehovha ni Jesu ngu kutiningetela ko maha maendo a wudyisi, ni kumaha totshe ti mi nga ti kotako kasi kuvhuna va va nga hola ngu didhawa da moya to ve tshumelela ka Jehovha. (Eze. 34:11, 12) Mi nga tshumela mi kombisa kukhatala ngu sigondo sa Bhiblia ni va va ku ta xalela Txialakanyiso ngu dikhambi do khata, ngu kumaha totshe ati mi nga ti kotako ti to ve ti pfa va txi amukelwa.

12.Kualakanyisisa ngu mapswi ya Jesu a nga ma womba ka wusiku wo gwita a si se fa ma nga hi vhunisa kutxani ti to hi va ni txibindi? (Johani 16:32, 33)

¹² Ka wusiku wo gwita a si se fa, Jesu a gete vagondiswa vakwe a txi: “Mi na va ni sixaniso  mu ditikoni, kambe tsanani msana ni di xute ditiko.” (Lera Johani 16:32, 33.) Nji txani txi nga vhuna Jesu ti to e wonisana ni valala vakwe ngu txibindi ni kusimama a di thembekile kala e fa? Ngu themba Jehovha. Aku a nga ti ti ziva to vagondiswa vakwe va ndi na wonisana ni siduko si si fanako, Jesu a kombete Jehovha to e va wonelela. (Joh. 17:11) Ngu kutxani tiya ti txi hi tsanisa? Nguko Jehovha a ni mtamo ngutu kupinda valala vathu. (1 Joh. 4:4) Txi walo txi a si txi woniko. Hi nga tsaniseka ti to ngako hi txi themba Jehovha, hi nga xula dizowa ni kutshumela hi kombisa txibindi.

13.Josefa wa Arimateya a kombisile txibindi ngu nzila yihi?

¹³ Wona txikombiso txa Josefa wa Arimateya. Ene a ti xoniphwa ngutu ngu Vajudha. Ene i ti mmweyo wa valamuli ka nyumba ya wukoma ya Vajudha. Mbimo yi Jesu a nga ti txhumayela, Josefa kha kombisa txibindi. Johani a wombile to ene i ti mmweyo “wa vagondiswa va Jesu hambiku i nga ti kumahisa kusisala ngu kuthava Vajudha.” (Joh. 19:38) Hambi ku Josefa a nga txi di tsakela didungula da Mfumo, ene a ti sisela vamwani ti to a ti ni likholo ka Jesu. Kha ti kanakanisi ti to ene a ti thava kuluza txitulu txi a nga ti natxo ka Vajudha. Ti singa ni mhaka ni ti to ngu tihi i ti nga ti mmaha e thava, Bhiblia yi hi gela to msana kova Jesu a di fite, Josefa ngu magwito “a to tsanisa mbilu e tsula ka Pilato eya kombela txirumbi txa Jesu.” (Marku 15:42, 43) Se konkuwa Josefa a si nga ngadi e sisa to wa seketela Jesu.

14.U nga maha txani ngako u di ni txikarato txo thava vathu?

¹⁴ Ina awe wa thava vathu kufana ni Josefa? U di txikolwani mwendo mthumoni, ina wa pfa tingana ku ti kombekisa kota Fakazi ya Jehovha? Ina wa swela kuva muhuweleli mwendo kubhabhatiswa, ngu kuthava ti vathu va no ti womba ngu ngawe? U nga tumelele dizowa donedo di kutsivela kumaha ti i ku ta tinene. Maha mkombelo wo huma mbiluni ka Jehovha. Mkombele ti to e kuninga txibindi txo maha kuranda kwakwe. Se u txi wona nzila yi Jehovha a no xamula ngu yona mikombelo yako, ti na kumaha u tsana ni ku va ni txibindi.—Isaya 41:10, 13.

15.Msana ko va Jesu a di humelete ka vagondiswa vakwe, litsako lawe li va susumetete kumaha txani? (Luka 24:52, 53)

¹⁵ Vagondiswa va Jesu va karatekile ngutu mbimo yi a nga fa. Alakanya i di awe u ku ka wukhalo wawe. Phela vona va si ngo luza mngana wawe wu va mrandako dwe, kambe va txi tipfa va si nga ni themba. (Luka 24:17-21)  Hambiketo, mbimo yi Jesu a nga ta humelela kwawe a ti ningile mbimo yo va vhuna ve pfisisisa nzila yi a nga hetisisa ngu yona wuprofeti wa Bhiblia. Ene a tshumete e va ninga mthumo wa lisima ngutu. (Luka 24:26, 27, 45-48) Mbimo yi a nga kwelela e ya nzumani msana ka 40 wa masiku, kukarateka kuwa vagondiswa vakwe va nga ti nako kuhundukile ku va litsako la hombe. Kuziva to Mgondisi wawe wa hanya ni to a ti emisete ku va vhuna to ve hetisisa mthumo wu a nga va ninga eto ti va tsakisile ngutu. Litsako lawe li va kuzetile kudhumisa Jehovha va si godholi.—Lera Luka 24:52, 53; Mith. 5:42.

16.Hi nga va etetelisa kutxani vagondiswa va Jesu?

¹⁶ Hi nga va etetelisa kutxani vagondiswa va Jesu? Hi nga mana litsako ngu kukhozela Jehovha i singa ngu mbimo ya Txialakanyiso dwe, kambe mbimo yotshe. Ti lava hi thangetisa Mfumo wa Txizimu ka wutomi wathu. Ngu txikombiso, vamwani va mahile kutxitxa ko kari ka mbimo yi va yi hetako va di mthumoni kasiku ve kota kupateka ka mthumo wo txhumayela, ko xalela mitshangano, ni ka wukhozeli wa mwaya mbimo yotshe. Vamwani va mahile txisungo txo mbi lavetela tithomba, i ku ti ti wonwako i di ta lisima ngutu ngu vamwani kasiku ve kota kuthumiswa ngutu dibanzani mwendo ku ya thuma amu ku ku ni txilaveko txa hombe txa vahuweleli va Mfumo. Ti lava hi timisela kasiku hi simama hi thumela Jehovha, ni ku ene a thembisa makatekwa ka va va thangetisako silaveko sa Mfumo.—Mav. 10:22; Mat. 6:32, 33.

17.U ti emisete kumaha txani ngu mbimo yiya ya Txialakanyiso? (Wona mfota.)

¹⁷ Hi ti emisete kuxalela Txialakanyiso ngu wazibili 4 ka Abril. U nga emele ditshiku diya kasiku ta alakanyisisa ngu wutomi ni lifo la Jesu, ni ngu lirando li ene ni Jehovha va nga hi komba lona. Thumisa yotshe mikhanjo yi yi nga kutulekela ngu mbimo ya Txialakanyiso. Ngu txikombiso, u nga ti vekela mbimo yo lera ni kualakanyisisa ngu simahakalo si si nga kombiswa ka dikwadru di di ku “A Última Semana de Jesus na Terra,” di manekako ka Apéndice B12 ka Tradução do Novo Mundo. Mbimo yi u mahako toneto, lava tindimana ta Bhiblia ati ti nga tsanisako kubonga, lirando, txibindi ni litsako lako. Xola tinzila to kongoma ati u nga kombisako ngu tona kubonga kwako ti txi huma mbiluni. U nga tsaniseka ti to Jesu, wa ninga lisima totshe ti u ti mahako kasi ku mu alakanya ngu mbimo ya Txialakanyiso.—Mtu. 2:19.