1. Ngu kutxani hi txi xalela mitshangano?

 NGU kutxani hi txi xalela mitshangano? Txo khata ngu ti to hi dhumisa Jehovha. (Mas. 26:12; 111:1) Hi tshumela hi xalela mitshangano kasi ku hi kuzetana ni vanathu ka timbimo to karata. (1 Vat. 5:11) Mbimo yi hi guletako diwoko kasi ku hi xamula hi na va hi txi hetisisa timhaka tiya ta timbidi.

2. Ngu yihi mikhanjo hi yi manako yo xamula mitshanganoni?

² Otshe mavhiki, hi ni mikhanjo yo xamula ka mitshangano yathu. Ngu txikombiso, ngu magwito ka divhiki hi nga pateka ka gondo ya Muwoneleli ya dibanza. Ka ya hagari ka divhiki hi nga xamula ka tithomba ta moya, ka gondo ya Bhiblia ya dibanza mwendo ka maparte mamwani ya ma lavako ku hi xamula.

3. Ngu sihi sikarato si hi nga wonisako naso, ni ku Vahebheru 10:24, 25 yi nga hi vhunisa kutxani?

³ Hotshethu hi lava kudhumisa Jehovha ni kutsanisa vakhozeli kulothi, kambe hi nga manana ni sikarato. Hi nga ti pfa hi txi thava kuxamula, mbimo yimwani hi nga tilava kuxamula ko tala kambe va si hi ningeti. Nji txani txi nga hi vhunako kuwonisana ni sikarato siya? Hi nga mana xamulo ka dipapilo da Paulo di a nga bhalela Vahebheru. Mbimo yi a nga txi womba-womba ngu lisima la kutshangana kwathu, ene a wombile ti to hi fanete kuveka mapimo ko “tsaniselana.” (Lera Vahebheru 10:24, 25.) Ngako hi txi ziva ti to hambi xamulo yathu i di yo koma, kambe yi txi phofula ta likholo lathu ya kuzeta vanathu, ti nga hi vhuna ku hi si thavi kugula diwoko to hi xamula. Hambi i di ti to kha hi ningetwi makhambi o tala, kambe  hi nga tsaka kuziva ti to vamwani va na mana mkhanjo wo xamula.—1 Pedro 3:8.

4. Ngu tihi timhaka tiraru ati hi no bhula ngu tona ka gondo yiya?

⁴ Ka gondo yiya, kukhata hi na bhula ngu nzila yi hi nga tsanisanako ngu yona ka dibanza da didotho aha ku si ngako ni vanathu va vangi vo xamula. Hi na tshumela hi bhula ngu ti to hi nga tsanisana ngu nzila yihi ka dibanza da hombe aha vanathu vo tala va guletako diwoko. Ngu magwito hi na bhula ngu nzila yi hi nga kuzetako vamwani ngu ti hi ti wombako mbimo yi hi xamulako.

5. Hi nga tsanisa vamwani ngu nzila yihi ka dibanza da didotho?

⁵ Ka dibanza da didotho mwendo ka grupu kha ngu nga ni vathu va vangi vo xamula. Se mbimo yimwani mtsimbitisi ti nga lava e ema mbimonyana kasi ku kuhumelela wo xamula. Ti nga maha mtshangano wonewo wu si tsakisi ni ku ti nga karata kutsanisana. U nga maha txani? Tiemisele kugula diwoko mbimo yotshe, se u txi maha eto u nga kuzeta vamwani ti to ni vona ve guleta makhambi o tala.

6-7. Ngu tihi ti ti nga hi vhunako ku hi hungula kuthava kuxamula?

⁶ U nga maha txani ngako u txi thava kuxamula? Vo tala va ti pfa ngu nzila yi yi fanako. Hambi keto, ti to u tsanisa vamwani, ngu kutxani u si lavi tinzila to hungula kuthava kuxamula? U nga ti mahisa kutxani toneto?

⁷ Kasiku u vhuneka wuseta tinzila ti ti nga kombiswa ka direvhista da Muwoneleli. b Ngu txikombiso, lulamisela kwati. (Mav. 21:5) Ngako u txi di ziva kwati didungula donedo ti na kuhehukela kugula diwoko ti to u xamula. Ningela xamulo yo koma. (Mav. 15:23; 17:27) Xamulo yo koma yi nga ku vhuna to u si thavi ngutu. Xamulo yoneyo yo koma ti nga maha vanathu ti va hehukela ku yi pfisisa kupinda xamulo yo lapha ayi yi ku ni titxhamuselo ta tingi. Ku ningela xamulo yo koma ngu mapswi ako ti na kombisa to u lulamisete kwati ni ku wa di pfisisa kwati didungula donedo.

8. Jehovha ayi wonisa kutxani mizamo yi hi yi mahako ti to hi xamula?

⁸ Se kuwombwa txani ngako u di duketile tinzila tiya, kambe u simama u thava kuguleta diwoko ko pinda kumbidi? Tsaniseka ti to Jehovha wa yi wona yotshe mizamo yi u yi mahako kasi kuxamula. (Luka 21:1-4) Jehovha kha hi kombeli ti hi no mbi ti kota kumaha. (Vaf. 4:5) Tiemisele kumaha totshe ti u nga ti kotako ni ku tivekela makungo o maha toneto, mkombele ti to e ku ninga mbilu yo thutha. Dikungo do khata, zama kuningela xamulo yo koma.

9. Ngu sihi sikarato si si nga manekako ka mabanza a hombe?

⁹ Ngako dibanza dano di di ni vahuweleli vo tala u nga mana sikarato so hambana. Ti nga maha vanathu va txi guleta ngutu mawoko aha ko dako di si wonwi. Ngu txikombiso, Danielle mbimo yotshe a txi ti dila ngu kuxamula. c Ene a wona kuxamula i di txienge txa wukhozeli, i di nzila yo tsanisa vamwani ni ku m’vhuna ku e tsanisa likholo lakwe ka ti Bhiblia yi ti gondisako. Kambe mbimo yi a nga rura eya ka dibanza da hombe ene a si ningetwi ngutu, mbimo yimwani nem a si xamuli hambi ka kumweko. Ene a womba tiya: “Ti si ni tsakisi, ni txi tipfa  nga no luza lungelo yo kari. Ngako eto ti txi maheka makhambi o wuyelela, u nga pimisa to o maha kha kwenye.”

10. Hi nga maha txani kasi ku hi va ni mikhanjo yo tala yo xamula?

¹⁰ Ina u tipfa kufana ni Danielle? Ti nga maha u godhola, u pimisa kuzumba u si xamuli. Kambe u nga godholi, duketa kuxamula. U nga mahisa kutxani toneto? Txa lisima ngutu ngu lulamisela tixamulo ta tinginyana ka mitshangano yimwani ni yimwani. Se hambi i di to khu ningetwi ka dikhambi do khata u nava ni mikhanjo yimwani yo u xamula mbimo yi mitshangano yi tsimbilako. Mbimo yi u lulamiselako gondo ya Muwoneleli, wona nzila yi paragrafu yimwani ni yimwani yi yelanako ngu yona ni msungo mhaka wa gondo. Ngako u txi maha toneto, yi na mbi guma gondo yotshe u sa xamula. To engetela, lulamisela ka paragrafu yi ku ku ni timhaka to tshima ngutu ati ti karatako ku ti txhamusela. (1 Vak. 2:10) Ngu kutxani? Nguko ti nga maha i di vadotho ava va no xamula ka paragrafu yoneyo. Se u nga maha txani i di ti to u thumisile totshe tinzila tiya kambe khu wu mani mkhanjo wo xamula? Tshuketela mtsimbitisi wa gondo yi si se khata mitshangano u m’gela paragrafu yi u tsakelako kuxamula.

11. Vafilipiya 2:4 yi hi kuzeta kumaha txani?

¹¹ Lera Vafilipiya 2:4. Ngu kususumetwa ngu moya wo sawuleka, Paulo a kuzetile Makristu ti to me khatalela silaveko sa vamwani. Hi nga txi thumisisa kutxani txialakanyiso txiya ngu mbimo ya mitshangano? Ngu kukhumbula ti to vamwani va ti lava kuxamula kufana ni nathu.

12. Ngu yihi nzila ya yinene yo kuzeta vamwani mitshanganoni? (Wona ni mfota.)

¹² Alakanya ngu tiya. Ngako u txi bhula ni vangana vako, ina wo thuma kuwomba-womba wekha u si va ningi mkhanjo wo ve womba-womba ni vona? Ditshuri to ahim-him! Wa ti lava to ni vona ve pateka ka dibhulo. Ngu ha kufanako, hi di mitshanganoni hi lava kuleka vamwani ve xamula. Nzila yimwani yo tsanisa vanathu, ngu va ninga mkhanjo wo ve phofula ta likholo lawe. (1 Vak. 10:24) He wone nzila yi hi nga mahako ngu yona toneto.

13. Hi nga leka vamwani ve xamula ngu nzila yihi?

 ¹³ Tximwani txi hi mahako hi komisa tixamulo tathu ngu ti to hi lava kusiya mbimo yo vamwani ve xamula. Madhota ni vahuweleli ava va ku ni txiperiyensiya va nga veka txikombiso txa txinene ka mhaka yiya. Hambi u txi ningela xamulo yo koma, u nga tateli to womba. Ngako u txi xamula totshe ti ti ku ka paragrafu vamwani va na mbi mana to womba. Hi mana tigondo timbidi hawa, i ku kukomisa xamulo ni kwa mbi tatela to womba. Se ngako u di wo khata kuningetwa ti to u xamula ka paragrafu yiya, thumisa yimweyo ka tiya ta timbidi.

14. Nji txani txi nga hi vhunako kuziva mbimo yi hi nga gulako ngu yona diwoko? (Wona ni mfota.)

¹⁴ Ziva kudinganisela ka makhambi ya u no guleta ti to u xamula. Ngako hi txi zumbela kuguleta diwoko mbimo yotshe ti nga maha mtsimbitisi e tipfa a txi sinziseka ku hi ningeta hambi i di ti to ku ni vamwani va si se mana mkhanjo wo xamula. Eto ti nga godholisa vamwani va si guleti.—Ekl. 3:7.

15. a) Hi nga angulisa kutxani ngako va si hi ningeti to hi xamula? b) Mtsimbitisi wa gondo a nga kombisisa kutxani to wa khatala ngu vamwani? (Wona dibhokiso di di ku, “ Ngako u di mtsimbitisi wa gondo.”)

¹⁵ Ngako vahuweleli vo tala va txi guleta mawoko ngu mbimo ya gondo ti nga maha hi si xamuli nga ha hi nga txi lava ngu kona. Ni ku ti nga maha mtsimbitisi a si hi ningeti mbimo yotshe. Eto ti nga hi godholisa, kambe kha ha fanela kuhenya ngako va si hi ningeti.—Ekl. 7:9.

16. Hi nga va tsanisisa kutxani ava va xamulako?

¹⁶ Idi ti to khu xamuli ngu ha u nga txi lava ngu kona, engisela kwati tixamulo ta vamwani se msana ka mitshangano u nga va bonga ngu tixamulo tawe. Kundunduzela vanathu ngu tixamulo tawe ta va tsanisa, ti fana ni ku nawe u di xamute. (Mav. 10:21) Phela kundunduzela i nzila yimwani yo tsanisa vanathu.

17. a) Vaveleki va nga va vhunisa kutxani vanana vawe ti to ve lulamisela xamulo yi yi tsimbitisanako ni tanga yawe? b) Ngu kuya ngu vhidhiyo ngu yahi mazambo a mune o lulamisela xamulo? (Wona ni nota.)

¹⁷ Hi nga tsanisana ngu nzila yihi ka mitshangano? Ngako u di mveleki vhuna vanana vako ti to ve lulamisela xamulo yi yi tsimbitisanako ni tanga yawe. (Mat. 21:16) Nguko hagari ka gondo ku nga thuka kuwombwa-wombwa ngu timhaka ta hombe ngutu, to fana ni sikarato sa vatekani ni nzila yi hi fanelako ku tiñola ngu yona. Kambe ku nga thuka kuva ni paragrafu yimweyo mwendo mambidi aya vanana va nga xamulako. Vhuna vanana vako ve pfisisa ti to ngu kutxani i si nga mbimo yotshe va no ningetwa ku ve xamula hambi va txi gula diwoko. U txi va txhamusela toneto ti na va vhuna ku va si godholi ngako va txi guleta kambe ku ningetwa vamwani.—1 Tim. 6:18. d

18. Hi nga vayilelisa kutxani kuwomba-womba ngutu ngu ngathu ka tixamulo tathu? (Mavingu 27:2)

¹⁸ Hotshethu hi nga lulamisela tixamulo ati ti no dhumisa Jehovha ni kukuzeta vanathu. (Mav. 25:11) Hambiku mbimo yimwani ti nga lavako ku hi womba txiperiyensiya txo koma, kambe hi fanete kuvayilela kuwomba-womba ngutu ngu ngathu. (Lera Mavingu 27:2; 2 Vak. 10:18) Hahanze keto hi lava kusimama hi veka mapimo ka Jehovha, ka Dipswi dakwe ni vathu vakwe ha mafuni kotshe. (Mtu. 4:11) Ngako txiwotiso txa paragrafu txi  txi lava hi womba ta mbiluni, ndinene kumaha toneto. Txikombiso txa toneto hi na txi wona ka paragrafu yi yi londiselako ya gondo yiya.

19. a) Hi na wuyelwa ngu txani ngako hi txi kombisa kukhatala ngu votshe dibanzani? (Varoma 1:11, 12) b) Ngu tihi ti ti kutsakisako mayelano ni kuningela tixamulo ka mitshangano ya dibanza?

¹⁹ Kha ku nga ni milayo ayi yi kombisako ati hi fanelako kuxamulisa tona, kambe hotshethu hi nga maha ti hi ti kotako kasi ku hi tsanisana. Atiya ti womba to ti lava hi xamula makhambinyana o tala. Mwendo hi nga eneliseka ngako hi txi mana mikhanjo yo xamula ni kutsaka ngako vamwani ni vona va txi mana mkhanjo wonewo. Ngako hi txi kombisa kukhatalela vamwani ka mitshangano ya dibanza hotshethu hi nga tidila ngu “kuthavelelana.”—Lera Varoma 1:11, 12.