1. Txhamusela ati ti nga maheka mbimo yi Jesu a nga maha txidiwukiso txakwe txo khata.

 ALAKANYA mbimo yi Jesu a nga khata ngu yona mthumo wakwe wo txhumayela ngu dilembe da 29 E.C. Jesu, vagondiswa vakwe ni mame wakwe Mariya va ti rambilwe ka mtxhadho khe Kana i ku txidhoropana txa wuphemba hafuhi ni Nazareta a mu Jesu a nga velekelwa kona. Mariya i ti mngana wa vale va nga ti txhadha ni ku ti nga maha a txi vhunetela ko khatalela ava va nga rambwa. Kambe hagari ka festa vhinya yi gumile, etxo i ti txikarato txa hombe atxi txi ndi no thela tingana mpatwa wu wu nga ti txhadha ni maxaka a kona. b Ti nga maha ku ti ni vathu vavangi vo pinda a va va nga ti rambilwe. Ngu txikuluveta Mariya a to tsula ka mwanana wakwe atxi ya khene: “Kha va nga ni vhinya.” (Joh. 2:1-3) Se Jesu a mahile txani? A mahile timhaka to xamatisa ngutu i ku kuhindula mati me va “vhinya ya yinene.”—Joh. 2:9, 10.

2-3. a) Ngu sihi sidiwukiso si Jesu a nga si maha? b) Hi nga wuyeliswa kutxani hi txi gonda ngu sidiwukiso sa Jesu?

² Jesu a di na simama e maha sidiwukiso sasingi mbimo yi a nga ti txhumayela. c Ene a mahile sidiwukiso soneso kasi kuvhuna  vathu vo tala. Ngu txikombiso ka sidiwukiso simbidi si a nga si maha a dyisile 5.000 wa vavamna, ka tximwani e dyisa 4.000 wa vavamna, se hi txi pata vavasikati ni vanana ava va nga di ho va maha mtengo wo pinda 27.000 wa vathu. (Mat. 14:15-21; 15:32-38) Se ka simahakalo soneso sa simbidi Jesu a tshumete e hanyisa vathu vo tala ava va nga ti lwala. (Mat. 14:14; 15:30, 31) Hi nga alakanya ti dibutho di nga tsakisa tona di txi wona sidiwukiso sa Jesu so hanyisa ni kudyisa vathu!

³ Nyamsi hi nga gonda to tala ka sidiwukiso sa Jesu. Ka gondo yiya hi na bhula ngu tigondo timwani ati ti tsanisako likholo ati hi nga ti manako ka sidiwukiso sa Jesu. Hi na tshumela hi gonda nzila yi hi nga etetelako ngu yona kutiveka hahatshi ni wumbilu wu Jesu a nga wu kombisa mbimo yi a nga ti maha sidiwukiso.

4. Mbimo yi hi gondako ngu sidiwukiso sa Jesu hi tsanisa likholo lathu ngu mani?

⁴ Sidiwukiso sa Jesu si hi ninga tigondo ta lisima ati ti tsanisako likholo lathu kwakwe ni Tate wakwe. Phela Jehovha ngene Txisima txa sidiwukiso sotshe. Dibhuku da Mithumo 10:38 di hi gela tiya: “Txizimu txi totile ngu Moya wo Sawuleka ni kutsanisa Jesu wa Nazareta; awu a nga tsimbila a txi maha tatinene, e hanyisa votshe vale va nga ti xaniswa ngu Sathani, nguko Txizimu txi ti ni nene.” Kambe khumbula tiya, Jesu a kombisile ngu kuhetiseka mapimiselo ni matipfelo a Tate wakwe ka totshe ti a nga womba kupata ni sidiwukiso si a nga si maha. (Joh. 14:9) Konku he xolisise tigondo tiraru ati hi nga ti manako ka sidiwukiso sa Jesu.

5. Nji txani txi nga susumetela Jesu ku e maha sidiwukiso? (Matewu 20:30-34)

⁵ Txo khata, Jesu ni Tate wakwe va hi randa ngutu. Mbimo yi a nga ti ha mafuni, Jesu a kombisile lirando la hombe ngu vathu ngu kumaha sidiwukiso kasi kuvhuna ava va nga ti xaniseka. Dikhambi dimwani, vavamna vambidi a va i nga ti mabhofu va kwangute va txi kombela txivhuno ka Jesu. (Lera Matewu 20:30-34.) Se Jesu “ngu kutelwa ngu wumbilu” a to va hanyisa. Dipswi da Txigriki di di nga hundulexelwa va txi “kutelwa ngu wumbilu” di txhamusela kupfela wusiwana ti txi khukhela mbiluni. Mpfela wusiwana wonewo awu i ku txikombiso txa lirando, wu susumetile Jesu ti to e dyisa ava va nga ti ni nzala ni kuhanyisa ava va nga ti ni tshekela. (Mat. 15:32; Marku 1:41) Hi nga tsaniseka ti to Jehovha i ku Txizimu txa “wumbilu wa hombe” ni Mwanana wakwe va hi randa ngutu ni ku va pandiseka ngako hi txi xaniseka. (Luka 1:78; 1 Pedro 5:7) Vona va ti emete ngu maso o bhilivila ku ta thavisa sotshe sikarato si vathu va mananako naso!

6. Ngu wuhi mtamo wu Jehovha a nga ninga Jesu?

⁶ Txa wumbidi, Jehovha a ningile Jesu mtamo wo gumisa sotshe sikarato sa vathu. Ngu kuthumisa sidiwukiso Jesu a kombisile mtamo wakwe ngu kuxula sikarato a si hi nga si na kusikota ku si xula ngu mtamo wathu. Ngu txikombiso, ene a ni mtamo wo hi khulula ka ditshina di di vangako sikarato i ku txionho txi hi nga tshapeliswa ngu Adhamu atxi txi vanga malwati ni lifo. (Mat. 9:1-6; Var. 5:12, 18, 19) Sidiwukiso sakwe si kombisile ti to ene a nga sikota kuhanyisa “otshe malwati” ni kuwusa ava va nga fa. (Mat. 4:23; Joh. 11:43, 44) Ene a ni mtamo wo lawula diphuho da hombe ni wo khulula vathu ka mimoya yo biha. (Marku 4:37-39; Luka 8:2) Ta tsakisa ngutu  kuziva ti to Jehovha a ningile mtamo wuwa Mwanana wakwe!

7-8. a) Ngu yihi themba hi yi manako ka sidiwukiso sa Jesu? b) Ngu txihi txidiwukiso a txi u emelako ku ta txi wona ka mafu a maphya?

⁷ Txa wuraru, hi nga tsaniseka ti to Mfumo wa Txizimu wu na tisa makatekwa aya wu nga ma thembisa. Sidiwukiso si Jesu a nga si maha ha mafuni hawa i ti kova txibaka dwe, a na ta maha to tala kupinda tiya ka mbimo yi yi tako kota Mkoma wa Mfumo wa Txizimu. Wona ti hi no ta ti hanya i singa kale, mbimo yi Jesu a nova a txi fuma ha mafuni. Hi na ta ti dila ngu dihanyo da dinene, ene a na thavisa totshe tixaka ta malwati ni sikarato a si vathu va wonisanako naso. (Isaya 33:24; 35:5, 6; Mtu. 21:3, 4) Hi na mbi swa hi ta dila ngu nzala mwendo kuwonisana ni tiphango ta mtumbuluko. (Isaya 25:6; Marku 4:41) Hi na ta va ni litsako la hombe ngu kuamukela maxaka athu aya ma no ta wuswa “mayivani.” (Joh. 5:28, 29) Ngu txihi txidiwukiso atxi awe u emelako ku ta txi wona ka mafu a maphya?

⁸ Mbimo yi Jesu a nga ti maha sidiwukiso ene a kombisile kutiveka hahatshi ni wumbilu i ku tifanelo ti hi lavako ku ti etetela. Konku he xolisise sikombiso simbidi, txo khata i ku txa mtxhadho wa khe Kana.

9. Ngu tihi ti Jesu a nga maha ka festa ya mtxhadho? (Johani 2:6-10)

⁹ Lera Johani 2:6-10. Mbimo yi vhinya yi nga pela, ina ti txo sunga ku Jesu e maha to  kari? Ahim-him. Kha ku na wuprofeti wu nga womba to Mesiya a ndi na maha txidiwukiso txo hindula mati me va vhinya. Kambe pimisa ti u nga ti pfisako tona ngako ku txo pela so sela ka mtxhadho wako. Jesu a pfete wusiwana mwaya wule ngutu-ngutu a vale va nga ti txhadha nguko a si lavi to ve theleka tingana. Nga ha hi nga womba ngu kona makhatoni, ene a mahile txidiwukiso. A hindute 390 wa malitro a mati me maha vhinya ya yinene ngutu. Ti nga maha a di mahile vhinya yo tala ngutu yo nga eto kasiku yi ta thumiswa ngu mbimo yimwani mwendo ku ayi yi no sala, mpatwa wule wu ndina xavisa kasi ku wu mana male yo ti vhuna ngu yona. Alakanya nzila yi mpatwa wule wu nga hefu ngu yona ngu txidiwukiso txile.

10. Ngu tihi titxhamuselo ta lisima a ti hi ti manako ka Johani kapitulo 2? (Wona ni mfota.)

¹⁰ Wona timhaka timwani ti ti nga txhamuselwa kwati ka Johani kapitulo 2. U ti woni ti to Jesu a si lavi kutiguleta? Phela hi nga ene a nga tata sidhuwana sile ngu mati, kambe a rumile vaservhenti va mtxhadho wule. (Vhersikulo 6, 7) Msana ko hindula mati me va vhinya, Jesu hi ngene a nga tsulisa vhinya ka mathangeli wa festa kambe a rumile vaservhenti. (Vhersikulo 8) Ni ku Jesu kha reka vhinya se e ema masoni ka votshe va va nga rambwa e ti guleta atxi, ‘dukani vhinya yi ni nga maha!’

11. Hi gonda txani ka txidiwukiso txa Jesu?

¹¹ Hi gonda txani ka txidiwukiso txa Jesu txo hindula mati me va vhinya? Hi mana gondo ya lisima ya kutiveka hahatshi. Jesu kha nga za e ti guleta ngu txidiwukiso txile mwendo ngu totshe ti a nga maha. Hahanze keto, mbimo yotshe atxi tiveka hahatshi ni ku ningela wudhumo ka Tate wakwe. (Joh. 5:19, 30; 8:28) Ngako hi txi etetela Jesu ngu kusimama hi txi ti veka hahatshi hi na mbi ti guleta ka totshe ti hi ti mahako. Hambi i di ti to ha maha to tala ka mthumo wa Jehovha hi na mbi ti guleta, kambe hi na guleta Jehovha ngu lungelo yi hi ku nayo yo mthumela. (Jer. 9:23, 24) He simameni hi ningela wudhumo ka Jehovha nguko ti walo ti hi nga ti mahako i singa ngu kuvhunwa ngu ngene.—1 Vak. 1:26-31.

12. Ngu yihi nzila yimwani ayi hi nga etetelako kutiveka hahatshi ka Jesu? Ningela txikombiso.

¹² Wona nzila yimwani ayi hi nga etetelako ngu yona kutiveka hahatshi ka Jesu. Alakanya ngu txikombiso txiya: Didhota dimwani di heta mbimo di txi vhuna mwanathu wu i ku dilanda da wuthumeli kululamisela mwombawombo wa dona wo khata. Se mwanathu wule eya veka mwombawombo wo tsakisa ni kutsanisa dibanza. Msana ka mtshangano mwanathu mmwani e yela didhota dile a txi ya khene: ‘U wu pfite mwombawombo wa mwanathu nombwe? Phela a wu pekile ta tinene.’ Ina ta sunga ku didhota dile di txi: ‘Phela ngani ni nga m’vhuna.’ Mwendo di na ti veka hahatshi di txi: ‘Ina a wu vekile kwati.’ Ngako hi txi ti veka hahatshi hi na mbi ti guleta ngu ti hi nga mahela vamwani. Kambe hi na tsaka ngu kuziva ti to Jehovha wa ti wona ni ku wa ti ninga lisima a ti hi ti mahako. (Fananisa Matewu 6:2-4; Vaheb. 13:16) Tsaniseka ti to Jehovha wa tsaka ngako hi txi etetela txikombiso txa Jesu txo tiveka hahatshi.—1 Pedro 5:6.

13. Ngu tihi ti Jesu a nga ti wona ka didhoropa hafuhi ni Nayimi, ni ku a mahile txani? (Luka 7:11-15)

¹³ Lera Luka 7:11-15. Alakanya ati ti nga humelela hafuhi ni ha Jesu a nga ti txhumayela kona. Ene a endete Nayimi ka didhoropa da Galileya hafuhi ni Sunemi aha mprofeti Elixa a nga wusa mwanana wa mfana wa wamsikati 900 wa malembe msana. (2 Vafu. 4:32-37) Se  mbimo yi a nga ti bela ka didhoropa donedo a woni vathu va txiya txilaxoni. Phela i ti tximahakalo txo panda ngutu, nguko noni yi ti fetwe ngu mwanana wa yona wammweyo dwe. Vathu vo tala va didhoropa dile va ti tsute kasi kuya singata mame wule. Se Jesu e emisa vathu va nga tiya kutshotshani e wusa mwanana wa mfana wa mame wule. Adiya dimwedo da makhambi a mararu adi di nga bhalwa mu ka Tievhangeli aha Jesu a nga wusa m’thu wo fa.

14. Ngu tihi titxhamuselo timwani ta lisima ati ti ku ka dibhuku da Luka Kapitulo 7? (Wona ni mfota.)

¹⁴ Wona timhaka timwani ati ti nga txhamuselwa kwati ka Luka Kapitulo 7. Ina u ti tumbute to mbimo yi Jesu “a nga wona” mame wule a txi dila ene “a to mpfela wusiwana”? (Vhersikulo 13) Ti nga maha Jesu a di gwesilwe mbilu e za e mpfela wusiwana mame wule ngu ku m’wona atxi dila mbimo yi va nga ti ya kutshotshani ka mwanana wakwe. Jesu kha ngo mpfela wusiwana dwe mame wule, kambe a kombisile wumbilu. Jesu a womba-wombile nayo ngu dipswi do mtsanisa atxi khene: “U nga dile.” Ene a tekile dizambo do maha to kari i ku kuwusa mwanana wule “e mnigela ka mame wakwe.”——Vhersikulo 14, 15.

15. Hi nga gonda txani ka txidiwukiso txa Jesu?

¹⁵ Hi nga gonda txani ka txidiwukiso txa Jesu txo wusa mwanana wa noni? Hi mana gondo ya lisima yo kombisa wumbilu ka va va nga felwa. Ditshuri ti to hi na mbi wusa vafi kufana ni Jesu. Kambe hi nga sakulela kuva ni wumbilu ngu kuwonisisa kwati ava va nga felwa nga ha Jesu a nga maha ngu kona. Hi nga maha toneto ngu kuwomba mwendo kumaha to kari ati ti nga va thavelelako. d (Mav.17:17; 2 Vak. 1:3, 4; 1 Pedro 3:8) Simaho mwendo mapswi a madotho si nga vhuna ngutu.

16. Nga ha ti nga kombiswa ngu kona ka mfota, u gonda txani ka txiperiyensia txa mveleki wu a ku ngadi kufelwa ngu mwanana wakwe?

¹⁶ Wona txiperiyensia tximwani. Ka malembenyana msana, mwanathu mmwani wa txisikati a woni mame wo kari awu a nga  ti khalahatshile ka fila ya masoni a txi dila mtshanganoni mbimo yi va nga ti embelela. Ndando yoneyo yi ti womba-womba ngu themba ya kuwuka ka vafi ni ku mame wule a di ngadi kufelwa ngu mwanana wakwe wa dihorana. Mbimo yi mwanathu wule a nga mu wona a to tsula e ya mu bharasara, se ve hetisa kuembelela votshe ndando yile. Msana ka mbimo mame wule a khumbute mhaka yiya a txi khene: “Ni pfite lirando la hombe la vanathu.” Ene a bongile ngutu ngu kuva a di tsute mitshanganoni ditshiku dile “i ku mu hi manako kona txivhuno.” Hi nga tsaniseka ti to Jehovha wa ti wona ni ku wa ninga lisima a ti hi ti mahako hambi i di ta tidotho, kasi kukombisa wumbilu ka va va nga felwa ava “va ku kupandisekani ka mbilu.”—Mas. 34:18.

17. Hi gondile txani ka gondo yiya?

¹⁷ Hi nga wuyelwa ngutu ngako hi txi gonda mayelano ni sidiwukiso sa Jesu asi si nga bhalwa mu ka Tievhangeli. Sona si hi gondisa ti to Jehovha ni Jesu va hi randa ngutu, Jesu a ni mtamo wo gumisa sotshe sikarato sa vathu ni kuthemba ti to i singa kale ma na hoka makatekwa ya ma no tiswa ngu Mfumo wa Txizimu. Mbimo yi hi xolisisako matimu oneyo hi nga alakanyisisa ngu tinzila ati hi nga etetelako ngu tona tifanelo ta Jesu. Ngu kutxani u si ti maheli txiemiso txo va ni gondo yako upune mwendo txa wukhozeli wa mwaya ti to u gonda ngu sidiwukiso simwani si Jesu a nga si maha? Zama kuwona tigondo ti u nga ti manako ni kutshumela u bhulela vamwani ngu ti u nga ti gonda. U txi maha eto, u nga va ni mabhulo aya ma akako!—Var. 1:11, 12.

18. Hi na ta bhula ngu txani ka gondo yi yi londiselako?

¹⁸ Mbimo yi mthumo wa Jesu wo txhumayela wu nga di hafuhi ni kugwita, ene a mahile txidiwukiso txa wuraru txo wusa m’thu wo fa. Kambe txidiwukiso txiya txi ti hambana ni simwani, a wusile mngana wakwe wa hombe ni ku ene a mahile toneto ka siemo so mbi toloveleka. Hi nga gonda txani ka txidiwukiso txiya? Hi nga tsanisisa kutxani likholo lathu ka themba ya kuwuswa ka vafi? Hi na ta mana xamulo ya siwotiso siya ka gondo yi yi londiselako.