1-2. Ngu tihi ti ti mahekako ngako vathu va txi bhabhatiswa, ni ku ngu kutxani hi di fanete kuxolisisa mhaka yiya?

 INA u ta nga wona mtxawa wa vathu a va va yako kubhabhatiswani? Ti nga maha u ti va pfite ve xamula siwotiso sa simbidi va si se bhabhatiswa ngu dipswi do guleka. U wona va mwaya wawe ni vangana vawe va di tsakile ngutu ta tinene. Mbimo yi va humako ngu kubhabhatiswani u pfa manza ma txi pekwa ni kuwona litsako tikhoheni kwawe. Se divhiki ni divhiki vathu va teka dizambo diya do ti ningetela ni kubhabhatiswa ti to ve va Tifakazi ta Jehovha Txizimu.

² Se awe ko? Ngako u txi pimisa ngu kulava kubhabhatiswa, u nava m’thu wa lisima ka mafu awa o biha, m’thu wu “a lavako Txizimu.” (Mas. 14:1, 2) Phela gondo yiya yi bhaletwe awe ti si nga ni mhaka ni ti to u jovhem mwendo u kute ngu tanga. Se kwathu i ku kale hi di bhabhatisilwe ti lava hi simama hi tsanisa ku ti emisela kwathu kuthumela Jehovha ngu ha ku si gumiko. Konku ahi xolisise sivangelo siraru asi si hi mahako hi thumela Jehovha.

3. Ngu kutxani vathu va Jehovha va txi randa ditshuri ni wululami? (Masalmo 119:128, 163)

³ Jehovha a leletile vathu vakwe ti to “ve randa ditshuri.” (Zak. 8:19) Jesu a kuzelile valondeteli vakwe ti to ve va ni wululami. (Mat. 5:6) Eto ti womba to vona va di fanete kutsanisa minavelo yawe yo maha ti i ku ta tinene ni to lulama masoni ka Txizimu. Ina awe wa randa ditshuri ni wululami? Ha tsaniseka to wa di randa. Nguko awe wa nyenya makuhu ni wotshe wubihi. (Lera Masalmo 119:128, 163.) Makuhu ma kombisa wuthu wa Sathani i ku ene a fumako ditiko diya. (Joh.  8:44; 12:31) Tximwetxo txa sikongomelo sa Sathani ngu nyetisela ditina do sawuleka da Jehovha. Ene a hangalasa makuhu oneyo kukhukhela mbimo yi a nga Jehovha wukelwa khe Jaradhi ka Edheni. Ene a zamile kumaha vathu ve pimisa ti to Jehovha kha khatali, kha thembeki ni ku wa sisela ta tinene vathu. (Gen. 3:1, 4, 5) Makuhu oneyo ma simama me maha vathu ve pimisa to biha ngu Jehovha. Ngako vathu va txi sawula kwa mbi “randa ditshuri” Sathani wa va kongomisa ka otshe mahanyelo o biha.—Var. 1:25-31.

4. Jehovha a ti kombisile ngu nzila muni to “Txizimu txo thembeka”? (Wona ni mfota.)

⁴ Jehovha “Njizimu txo thembeka,” ni ku ene a gondisa ditshuri ka votshe va va mu randako. (Mas. 31:5) Ngu kumaha eto, ene wa va vhuna ni ku va khulula ka makuhu a Sathani. Ene e tshumela e gondisa vathu vakwe ti to ve va vo thembeka ni ku va vo lulama. Wuyelo ya toneto, vona va ni txixonipho ni kudikha ka mbilu. (Mav. 13:5, 6) Ina Jehovha a ku mahete toneto mbimo u nga txi gonda Bhiblia? U gondile u pune ti to totshe tinzila ta Jehovha ndo lulama ka votshe vathu kupata ni nawe. (Mas. 77:13) Se konku u ti emisete kumaha a ti i ku ta tinene masoni ka Jehovha. (Mat. 6:33) U lava kuseketela ditshuri ni kukaneta makuhu aya ma wombwako mayelano ni Jehovha. U nga ti mahisa kutxani toneto?

5. U nga ti kombisa ngu nzila yihi ti to wa seketela ditshuri ni wululami?

⁵ Awe u nga hanya ngu nzila yi yi kombisako ti to: “Wa lamba makuhu a Sathani, ni ku u seketela ditshuri. U lava kufumwa ngu Jehovha ngu kumaha a ti ene a wombako to nda tinene.” U nga ti mahisa kutxani toneto? Ngu kutshuketa ka Jehovha ngu mkombelo ni ku ti ningetela upune kwakwe, u tshumela u kombisa ka vathu ku ti ningetela koneko ngu kubhabhatiswa. Phela kuranda ditshuri ni ti i ku ta tinene ngu tona ti nga ku kuzetako ku u sawula kubhabhatiswa.

6. Ngu sihi sivangelo si si nga wombwa ka Masalmo 45:4 a si si ku mahako u randa Jesu?

⁶ Ngu kutxani u txi randa Jesu Kristu? Wona simwani sa sivangelo si si manekako ka Masalmo 45:4. (Yi Lere.) Jesu a lwete ditshuri, a ti vekile hahatshi ni ku va wo lulama. Phela ngako u txi randa ditshuri ni wululami u ti veka ha kubasani to wa mu randa Jesu Kristu. Alakanya ngu txibindi txi Jesu a nga va natxo  txo seketela ditshuri ni wululami. (Joh. 18:37) A kukombisile ngu nzila yihi ku ti veka hahatshi?

7. Ngu ti hi ti nga kutsakisa mayelano ni kutiveka hahatshi ka Jesu?

⁷ Jesu njikombiso txa txinene txo tiveka hahatshi. Ene a ningela wotshe wudhumo ka Tate wakwe i si nga kwakwe apune. (Marku 10:17, 18; Joh. 5:19) U ti pfisa kutxani u txi wona nzila Jesu a ti vekako ngu yona hahatshi? Ina kha ti kukuzeti kuranda Mwanana wa Txizimu ni ku mu londeta? Eto kha ti kana-kanisi. Se ngu kutxani Jesu a txi ti veka hahatshi? Nguko ene a etetela ni kuranda Tate wakwe awu a ti vekako hahatshi. (Mas. 18:35; Vaheb. 1:3) Ina kha ti ku kuzeti kutshuketa ka Jesu awu a kombisako tifanelo ta Jehovha ngu nzila yo hetiseka?

8. Ngu kutxani hi txi randa Mkoma wathu Jesu?

⁸ Athu ha mdhunda Jesu kota Mkoma, nguko ngene a fanelako kufuma. Jehovha ngene a nga gondisa Mwanana wakwe ni ku msawula ti to e fuma. (Isaya 50:4, 5) Pimisa kambe ngu lirando li Jesu a nga li kombisa ngu kutiningela ene apune kota digandelo. (Joh. 13:1) Kota Mkoma, Jesu wa fanelwa ngu lirando lako. Ene a wombile ti to ava va mu randako ngu ditshuri a va dhana ku vangana vakwe ni ku vona va kombisa lirando lonelo ngu kuengisa sirumo sakwe. (Joh. 14:15; 15:14, 15) Phela i lungelo ya hombe ku va mngana wa Mwanana wa Jehovha!

9. Bhabhatiso ya Jesu yi fana ngu nzila yihi ni ya valondeteli vakwe?

⁹ Tximwetxo txa sirumo sa Jesu ngu ti to valondeteli vakwe ve bhabhatiswa. (Mat. 28:19, 20) Bhabhatiso ya Jesu ya hambananyana ni ya valondeteli vakwe. (Wona Dibhokiso di di ku “ Bhabhatiso ya Jesu ni ya valondeteli vakwe yi hambana ngu nzila yihi?”) Kambe ngu tinzila timwani ya fana. Mbimo yi a nga bhabhatiswa Jesu a txo ti ningela apuni kasi kumaha kuranda ka Tate wakwe. (Vaheb. 10:7) Ngu ha ku fanako valondeteli va Kristu va bhabhatiswa kasi kukombisa ti to va ti ningetete ka Jehovha. Se konku txa lisima ngutu ka wutomi wawe ngu maha kuranda ka Txizimu i si nga kwawe. Ngu toneto vona va etetela txikombiso txa Mkoma wawe.

10. Ngu kutxani lirando li u ku nalo ngu Jesu li txi ku susumetela kubhabhatiswa?

¹⁰ Awe wa kholwa to Jesu i Mwanana wa Jehovha ekha. Ni ku wa tsaka nguko ngene a nga sawulwa ti to e va Mkoma. Awe u wona Jesu kota m’thu wo hetiseka, wo ti veka hahatshi ni wu a kombisako tifanelo ta Tate wakwe. U gondile ti to ene a dyisile a va va ngadi ni nzala, e thavelela a va va ngadi ni dikhodho hambi kuhanyisa va va nga txi lwala. (Mat. 14:14-21) Wa wona nzila yi a kongomisako ngu yona msengeletano. (Mat. 23:10) Ni ku wa ziva to tala a ti a no ta timaha mbimo yi yi tako kota Mkoma wa Mfumo wa Txizimu. Se u nga ti kombisisa kutxani ti to wa va randa? Ngu kuetetela txikombiso txakwe. (Joh. 14:21) Nzila yo khata ayi u nga kombisako ngu yona toneto ngu ti ningetela ka Jehovha ni kubhabhatiswa.

11. Ngu txihi txivangelo txa lisima ngutu txi mahako u bhabhatiswa ni ku ngu kutxani?

¹¹ Ngu txihi txivangelo txa lisima ngutu txi hi mahako hi bhabhatiswa? Jesu a wombile txirumo txa hombe txa Txizimu mbimo yi a nga khene: “U na randa Mkoma Txizimu txako ngu yotshe mbilu yako, ngu wotshe muhefemulo wako, ngu otshe mapimo ako ni wotshe mtamo wako.” (Marku 12:30) Ina awe ni lirando lo fana ni liya ngu Jehovha?

12. Ngu kutxani u txi randa Jehovha? (Wona ni mfota.)

¹² Hi ni sivangelo sa singi so randa Jehovha.  Awe wa ti pfisisa ti to ene ngene “txisima txa wutomi” ni ku ngene i ku mningi “wa sotshe sihiwa sa lisima ni sotshe siningo so hetiseka.” (Mas. 36:9; Jak. 1:17) Sotshe silo sa sinene a si hi ti dilako ngu sona si ta ngu ka Txizimu txathu txa wuha.

13. Nji txani txi mahako to mtirulo i va ningo ya lisima ngutu? (Wona ni mfota.)

¹³ Mtirulo i ningo yo xamatisa ayi Jehovha a nga hi ninga. Ngu kutxani hi txi womba toneto? Hi nga pimisa ngu wungana awu Jehovha ni Mwanana wakwe va ku nawo. Jesu a ti khene “Tate wa ni randa” ni ku “ani na mranda Tate.” (Joh. 10:17; 14:31) Wungana wonewo wu engetete ngutu kudingana tibhiliyoni ta malembe. (Mav. 8:22, 23, 30) Hi nga pimisa kupanda aku Txizimu txi nga kupfa ngu kutumelela Mwanana wa txona ti to e xaniseka ni kutshumela e fa. Jehovha wa randa vathu kupata ni nawe a ha koza a tumelela kuningela Mwanana wakwe wo randeka a va digandelo kasi ku awe ni vamwani mi hanya ngu ha ku si gumiko. (Joh. 3:16; Vag. 2:20) Atxiya ngu txona txivangelo txa hombe ngutu txo hi randa Txizimu.

14. Ngu di hi dikungo da lisima a di u nga ti vekelako dona ka wutomi?

¹⁴ Lirando lako ngu Jehovha li engetete ngutu mbimo yi u nga txiya u gonda to tala ngu ngene. Phela u nga sikota kutshuketa  hafuhi kwakwe konku ni ngu ha ku si gumiko. Ngu wunene ene wa ku kuzeta to u tsakisa mbilu yakwe. (Mav. 23:15, 16) Kambe u nga maha toneto i si nga kuwomba ngu txisofu kambe u kombisa ngu simaho. Mahanyelo ako ngu ona ma no kombisa to wa mranda Jehovha ngu ditshuri. (1 Joh. 5:3) Phela di walo dikungo da lisima ka wutomi wako a di u nga ti vekelako dona kupinda diya.

15. U nga kombisa ngu nzila yi hi to va mranda Jehovha?

¹⁵ U nga ti kombisisa kutxani to wa mranda Jehovha? Kukhata, maha mkombelo wo sawuleka wo ti ningetela upune ka Txizimu txa ditshuri. (Mas. 40:8) Msana keto, kombisa ku ti ningetela kwako ngu kubhabhatiswa. Bhabhatiso tximahakalo txo tsakisa ni txa lisima ngutu ka wutomi wako. Awe u khata wutomi wa wuphya i si nga ku ti hanyela, kambe u txi hanyela Jehovha. (Var. 14:8; 1 Pedro 4:1, 2) Ha kholwa to adiya dizambo da hombe a di u ngadi tekako. Kambe di nga kutulela mkhanjo wo va ni wutomi wo tsakisa. Ngu nzila yihi?

16. Nga ha ti nga kombiswa ngu kona ka Masalmo 41:12, Jehovha a na va hakela ngu txani ava va ningelako wutomi wawe kwakwe?

¹⁶ Jehovha ngene Txizimu txa wuha kupinda votshe. Ti si nga ni mhaka ni ti to u mninga txani, mbimo yotshe a na kutshumetela so pindisa. (Marku 10:29, 30) Ene a na kuhakela, a na kuninga wutomi wo tsakisa hambi hi di ngadi ka mafu awa o biha. Ni ku eto o va makhato dwe. Liendo li u li khatako ngu kubhabhatiswa kha li na magwito. Awe u na simama u thumela Jehovha kala kupinduka. Lirando li u ku nalo ngu Tate wako Jehovha li na simama li kula, u na hanya kala kupinduka nguko Jehovha Txizimu txi txi si ngako ni magwito.—Lera Masalmo 41:12.

17. Ngu sihi si u nga ningelako Jehovha?

¹⁷ Mbimo yi u tekako mazambo o ti ningetela ni kubhabhatiswa, u va ni mkhanjo wo ningela simaha sa lisima ka Tate wako Jehovha. Ene a kuningile silo sa sinene ni litsako lo u na mbi thuka u li mana ka wukhalo wumwani. Se awe u nga ninga Nyamne wa nzuma ni mafu silo sa lisima asi a si ngako naso, i ku kutiemisela  kwako ku mthumela. (Jobe 1:8; 41:11; Mav. 27:11) Ayiya ngu yona nzila ya yinene ngutu yo thumisa wutomi wako kasi kutsakisa Jehovha. Kha hi kanakani to lirando lako ngu Jehovha ngu txona txivangelo txa lisima txi ku mahako u bhabhatiswa.

18. Ngu sihi siwotiso asi u nga ti wotisako sona?

¹⁸ U nga xamulisa kutxani txiwotiso txiya: Ina u na bhabhatiswa? Ngawe dwe u nga xamulako txiwotiso txiya. Kambe u nga vhuneka ngako u txi ti wotisa tiya, ‘Ni ngadi ni txi rinzela txani?’ (Mith. 8:36) Khumbula sivangelo siraru asi hi nga bhula ngu sona. Txo khata, awe wa randa ditshuri ni wululami. Ti wotise tiya: ‘Ina na ti lava ku ta wona mbimo yi hotshethu hi no ta womba-womba ditshuri ni kumaha to lulama?’ Txa wumbidi, wa randa Jesu Kristu. Ti wotise tiya: ‘Ina na lava mwanana wa Txizimu kota Mkoma wangu, mwendo ku ina na ti lava kuetetela txikombiso txakwe?’ Txa wuraru txa lisima ka sotshe, awe wa randa Jehovha. Ti wotise tiya: ‘Ina na ti lava kutsakisa mbilu ya Jehovha ngu ku mthumela kota Txizimu txangu?’ Ngako tixamulo ta siwotiso siya i di ina, ngu kutxani u si bhabhatiswi? U emela txani?—Mith. 16:33.

19. Ngu kutxani u sa fanela ku kanakana ku bhabhatiswa? Ningela txikombiso. (Johani 4:34)

¹⁹ I di ti to wa kanakana kubhabhatiswa xolisisa txidinganiso txa Jesu. (Lera Johani 4:34.) Wona to Jesu a fananisile kumaha kuranda ka Tate wakwe ni sakudya. Ngu kutxani? Nguko sakudya nza sinene kwathu. Jesu a txi ti ziva ti to totshe ti Jehovha a hi kombelako ku hi maha nda tinene. Jehovha kha lavi to hi maha ati ti no hi tisela sikarato. Ina Jehovha wa ti lava to u bhabhatiswa? Ina. (Mith. 2:38) Ngu toneto, tsaniseka ti to kuengisa txirumo txo u bhabhatiswa ti na ku wuyelisa ngutu. Se i di ti to khu thavi kudya sakudya so tshamba, ngu kutxani u txi kanakana kubhabhatiswa?

20. Hi na ta bhula ngu txani ka gondo yi yi londiselako?

²⁰ U ngadi u txi rinzela txani? Vamwani va nga xamula va txi “kha ni se lungeka.” Ditshuri ngu ti to ku ti ningetela ka Jehovha ni kubhabhatiswa ngu txona txisungo txa lisima txi u nga txi mahako ka wutomi wako. Kambe ti lava u pimisa kwati ngu txisungo txiya, ti lava mizamo ni ku ti nga teka mbimo. Se i di ti to u navela kuteka dizambo diya, u nga maha txani kasi kutilulamisela konku? Hi na ta mana xamulo ya txiwotiso txiya ka gondo yi yi londiselako.