1. Ngu tihi ti ti xamalisako vathu va va xalelako mitshangano yathu ngu dikhambi do khata? (Wona ni mfota.)

 ALAKANYA ngu kazali ayi yi xalelako mitshangano Nyumbani ya Mfumo ya Tifakazi ta Jehovha ngu dikhambi do khata. Yona ya xamala ngutu ngu nzila yi yihoyozelwako ngu yona ni lirando li vanathu va kombisanako dibanzani. Se mbimo yi va tshumelako ve wuya mtini, msikati wa kona a womba tiya ka mwamna wakwe, ‘Tifakazi ta Jehovha ta hambana ngutu ni vathu vamwani ni ku ni tsakile ngutu ngu ku va nato.’

2. Ngu tihi timhaka ati tikhuvekisako vamwani?

² Lirando li li kuho ka mabanza a Wukristu la xamatisa ngutu. Ditshuri ti to Tifakazi ta Jehovha vathu vo mbi hetiseka. (1 Joh. 1:8) Mbimo yi hi yako hi va ziva kwati ava hi tshanganako navo dibanzani hi na wona tiphazamo tawe. (Var. 3:23) Txo mbi tsakisa ngu ti to ku ni va va nga tumelela tiphazamo ta vamwani ti va khuvekisa.

3. Nji txani txi kombisako to hi valondeteli va ditshuri va Kristu? (Johani 13:34, 35)

³ Tshumela u wona msungo mhaka wa gondo yiya. (Lera Johani 13:34, 35.) Nji txani txi kombisako to hi valondeteli va ditshuri va Kristu? Lirando, i si nga ti to kha hi mahi tiphazamo. Wona to Jesu kha nga khene: ‘Ngu toneto anu mi no ziviswa tona to mi vagondiswa vangu,’ kambe ati khene: “Ngu toneto va no mi zivisa tona ti taku mi vagondiswa vangu.” Jesu a kombisile ti to hi nga vagondiswa wakwe dwe va no wona lirando liya, kambe ni va va ku hahanze ka dibanza va na li wona lirando liya la ditshuri ali vona kombisanako lona.

4. Ngu sihi siwotiso asi vamwani va nga ti wotisako sona mayelano ni valondeteli va ditshuri va Kristu?

 ⁴ Vamwani ava i si ngako Tifakazi ta Jehovha va nga ti wotisa tiya: ‘Lirando li nga hi vhunisa kutxani kutumbula valondeteli va ditshuri va Kristu?’ Jesu ali kombisisile kutxani lirando liya ka vapostoli vakwe ni ku hi nga ti kotisa kutxani kuetetela txikombiso txa Jesu nyamsi? Se hambi athu Tifakazi ta Jehovha nda lisima ku hi alakanyisisa ngu tixamulo ta siwotiso siya. Hi txi maha toneto ti nga hi vhuna kukombisa lirando la ditshuri, ngutu-ngutu ngako hi txi thuka hi gohelana ni vanathu.—Vaef. 5:2.

5. Txhamusela mapswi ya ma ku ka Johani 15:12, 13.

⁵ Jesu a ti vekile hakubasani ti to valondeteli vakwe va na kombisa lirando lo sawuleka. (Lera Johani 15:12, 13.) Wona ti a nga va leleta tona: “Randanani nga ti ni nga mi randisa tona.” Ti womba txani toneto? Jesu a tshumete e txhamusela ti to lirando liya la ditshuri li nga susumeta Mkristu ku e fela Mkristu kulowe ngako ti txi laveka. b

6. Dipswi da Txizimu di junyatisa ngu nzila yihi lisima lo kombisa lirando?

⁶ Dipswi da Txizimu da junyatisa ti to lirando nda lisima ngutu. Mavhersikulo mamwani aya vathu vo tala va ma dhundako ngutu ngu awa: “Txizimu i Lirando.” (1 Joh. 4:8) “Randa muakelani wako nga ti u ti randisako tona awe upune.” (Mat. 22:39) “Lirando la fenengeta mtalo wa sionho.” (1 Pedro 4:8) “Lirando kha li na mbi va ni magwito.” (1 Vak. 13:8) Mavhersikulo awa ni mamwani ma kombisa ti to ti ni lisima kusakulela ni kukombisa fanelo yiya yo tshura.

7. Ngu kutxani Sathani a no mbi sikota kuwumba mtxawa wu wu ku ni lirando la ditshuri?

 ⁷ Vathu vo tala va ti wotisa tiya: ‘Aku wukhongeli wo tala wu wombako to wu gondisa ditshuri kuveti ati va ti gondisako mayelano ni Txizimu ta hambana, se hi nga wu tumbulisa kutxani wukhongeli wa ditshuri? Sathani a juja misungo vathu ngu kuhumisa titxhetxhe to tala ta makuhu, se eto ti maha to ti karata kutumbula wukhongeli wa ditshuri. Kambe ene kha nge sikoti kuwumba mtxawa wa vathu ava va kombisanako lirando ha mafuni kotshe. Eto to kotwa ngu Jehovha dwe. Eto ta pfisiseka nguko lirando la ditshuri li ta ngu ka Jehovha. Lirando liya li kombiswa ngu va va ku ni moya wo sawuleka ni makatekwa a Jehovha. (1 Joh. 4:7) I ngu mhaka yoneyo Jesu a nga khene lirando la ditshuri li na kombiswa ngu valondeteli vakwe dwe.

8-9. Vamwani va gwesilwe ngu nzila yihi ngu lirando li kuho hagari ka Tifakazi ta Jehovha?

⁸ Nga ha Jesu a nga womba ngu kona vathu vo tala va tumbute valondeteli vakwe va ditshuri ngu mhaka ya lirando li va kombisanako. Ngu txikombiso mwanathu wu a dhanwako ku i Ian, a khumbula mtshangano wo khata awu a nga wu xalela awu wu nga mahwa ka extadhiyu ya ha hafuhi ni mtini kwakwe. Ian a txi khala kuya ka extadhiyu yile e ya xalela bholwa. Ene a khene: “Ka dikhambi diya ni ti ya wona kuhambana ka hombe ka mtshangano wuwa. Tifakazi ta Jehovha kumweko ni vanana va tona ti di ni txixonipho, va txi ti ñola ngu nzila ya yinene ni ku va ti ambate kwati.” A tshumela a txi: “Ka totshe, vona va txi woneka va di tsakile ni kurula i ku ti nani ni nga txi ti lava. Kha ni khumbuli txilo ka ti ti nga wombwa ka ma dhiskursu, kambe nzila yi Tifakazi ta Jehovha ti nga txi tiñola ngu yona ti ni gwesile ngutu kala nyamsi.” c Kutiñola koneko ngu nzila ya yinene ti koteka ngu mhaka ya lirando la ditshuri ali va ku nalo. Athu ha va randa vanathu, ngu toneto ha va ñola kwati ni ku ha va xonipha.

⁹ Mwanathu wu a dhanwako ku i John a ti pfite ngu nzila yo fana mbimo yi a nga xalela mtshangano ngu dikhambi do khata. Ene a wombile tiya: “Atxi txi nga ni tsakisa ngutu ngu ti to vona va hanya kota vangana va ditshuri, ni txi va wona nga vathu vo mbi na tiphazamo. Lirando lawe la ditshuri li ni tsanisekisile ti to ni mani wukhongeli wa ditshuri.” d Maexperiyensiya o fana ni yawa ma kombisa ti to vathu va Jehovha ngu vona i ku Makristu a ditshuri.

10. Nga sihi siemo ti no lava hi kombisa ti to ngu ditshuri hi ni lirando? (Wona nota.)

¹⁰ Nga ha hi nga ti wona ngu kona makhatoni, otshe Makristu a ditshuri kha ma hetiseka. Mbimo yimwani va nga maha mwendo kuwomba to kari ati ti nga hi henyisako. e (Jak. 3:2) Siemo so nga soneso si hi ni mkhanjo wo kombisa lirando la Wukristu ngu nzila yi hi no angula ngu yona. Ti di ngeto hi nga gonda txani ka Jesu?—Joh. 13:15.

11. Ngu sihi simaho so biha asi Johani ni Jakobe va nga si kombisa? (Wona ni mfota.)

¹¹ Jesu a si emeli ti to valondeteli vakwe veva vo hetiseka mwendo vo pelela. Ngu lirando ene a va vhuni ti to ve lulamisa mahanyelo awe ni simaho sawe kasi ku ve kota kuamukelwa ngu Jehovha. Dikhambi dimwani, vapostoli vakwe va vambidi Johani ni Jakobe  va gete mwamwawe ti to e ya womba-womba ni Jesu kasi ku e va vekela sikhalo so sawuleka ka Mfumo wakwe. (Mat. 20:20, 21) Eto ti txi kombisa to Johani ni Jakobe va txi tiguleta ni ku va ni mabewu.—Mav. 16:18.

12. Ina i Johani ni Jakobe dwe va nga kombisa simaho so biha? Txhamusela.

¹² Phela, ka tximahakalo txile hi nga Johani ni Jakobe dwe va nga kombisa mahanyelo a walo. Wona ti vapostoli vamwani va nga angulisa tona: “Ngako vale va digumi va di ti pfite, va to henyela avale va vambidi va mkoma ni mnanda.” (Mat. 20:24) Ti nga maha vamwani va di xamute ngu nzila yi: ‘U lava ku khawe awe u wa lisima ngutu ku hi pinda, u zako u ya kombela sikhalo so guleka ka Mfumo wa Txizimu, kasi nathu kha ha thuma kumweko ni Jesu? Se hotshethu ha fanelwa ngu lungelo yiya yo sawuleka!’ Ti si nga ni mhaka ni ti va nga ti womba mwendo va nga txi ti pimisa, vona va tumelete txiemo txiya txi va maha va si kombani lirando.

13. Jesu a angulisile kutxani mbimo yi vapostoli vakwe va nga phazama? (Matewu 20:25-28)

¹³ A angulisile kutxani Jesu ka mhaka yile? Ene kha henya, kha womba to a da sawula awu i ku wamnene, ati vekako ngutu hahatshi mwendo awu mbimo yotshe a ñolako vamwani ngu nzila ya lirando. Hahanze keto, ene ava kombisile wumbilu ni ku a khalahatshile e bhula navo ngu nzila ya yinene. (Lera Matewu 20:25-28.) A simamile e thumisana  navo ngu nzila ya lirando, hambiku va nga si njo khata kuphikizana ngu ti to i mani i ku wa hombe hagari kwawe.—Marku 9:34; Luka 22:24.

14. Vapostoli va Jesu va kulete ka wukhalo wo zumbisa kutxani?

¹⁴ Jesu a txi ti ziva ti vapostoli vakwe va nga kulisa tona. (Joh. 2:24, 25) Amu va nga kulela kona, vathangeli va wukhongeli va txi teka sikhalo so guleka i di sona sa lisima ngutu. (Mat. 23:6; wona ni vhidiyo yi yi ku Primeiros assentos nas Sinagogas ka nota de estudo ya Matewu 23:6.) Phela vathangeli vava va wukhongeli va txi tshumela ve tigela ti to vona ngu vavanene va kona. f (Luka 18:9-12) Jesu a txi ti pfisisa ti to wukhalo wu va nga kulela ka wona wu txi gwesa nzila yi va nga txi ti wona ngu yona ni ti va nga txi va wonisa tona vamwani. (Mav. 19:11) Phela Jesu asi emeli ti to vapostoli vakwe ve va vo pelela, kambe ngako va txi thuka ve phazama ene a txi va divalela. Kambe ene a va vhuni ti to ve xula moya wule wa ku ti guleta ni kuva ni mabava, ve kusakulela lirando.

15. Hi nga gonda txani ka ti ti nga mahwa ngu Johani ni Jakobe?

¹⁵ Hi nga gonda to tala ka phazamo yi yi nga mahwa ngu Johani ni Jakobe. Vona va ti phazamile ngutu ngu kukombela sikhalo so guleka. Kambe vapostoli vamwani ni vona va phazamile ngu kutumelela txiemo txile txi khulumeta wumwewo wawe. Hambiketo Jesu a thumisanile ni vapostoli vava va 12 ngu lirando ni wunene. Hi gonda txani? Mhaka kha yi nga ka tiphazamo ti vamwani va ti mahako dwe, kambe ka nzila yi hi angulako ngu yona ka tiphazamo toneto. Se nji txani txi nga hi vhunako? Ngako hi di henyisanile ni mwanathu hi nga tiwotisa tiya: ‘Ngu kutxani ti txi ni karata ngutu ati ti nga mahwa ngu mwanathu? Ina hi nga ani ni ku ni txikarato? Ina ti nga maha m’thu wu a nga ni henyisa a txo wonisana ni sikarato so kari? Hambi i di ti to ni ni sivangelo so ni karateka, kambe ina ni nga kombisa lirando la ditshuri ngu kudivalela m’thu eneyo?’ Ngako hi txi hanyisana ni vamwani ngu nzila ya lirando hi nava hi txi kombisa ti to hi valondeteli va ditshuri va Jesu Kristu.

16. Ngu tihi timwani hi nga ti gondako ka txikombiso txa Jesu?

¹⁶ Txikombiso txa Jesu txi tshumela txi hi gondisa to ti lava hi zama kupfisisa matipfelo a vanathu. (Mav. 20:5) Phela Jesu a txi wona ati ti ku timbiluni ka vathu. Kambe athu kha hi sikoti. Hambiketo hi nga va laphisela mbilu vanathu ngako va txi thuka ve hi henyisa. (Vaef. 4:1, 2; 1 Pedro 3:8) Eto hi ngo tikota ngako hi txi ti ninga mbimo yo va ziva kha kwati.

17. Muwoneleli wa txigava a wuyetwe ngu nzila yihi aku a nga ti ninga mbimo yo mziva kwati mwanathu?

¹⁷ Muwoneleli mmwani wa txigava awu a nga thuma wutxani ka África a khumbula mwanathu awu a nga txi mpimisela to kha khatali ngu vamwani. Se a angulisile kutxani muwoneleli wuwa? Ene a womba tiya: “Hahanze ko mvayilela mwanathu wule, ni ti vekete makungo o mziva kwati.” Ngu kumaha eto, muwoneleli wule a gondile to tala mayelano ni ti mwanathu wule a nga kulisa tona, ati ti nga mmaha e va ni mazumbelo yale.  Mbimo ni nga wona ti to mwanathu wule wa lwa ngutu kasi kuxula mahanyelo a walo ngu mhaka ya ti a nga kulisa tona, ni xamate ngutu. Ni vile mngana vakwe wa hombe.” Ngu toneto ngako hi txi zama ku va pfisisa kwati vanathu ti na hi hehukela ku va komba lirando.

18. Ngu sihi siwotiso si hi nga ti wotisako sona ngako hi di henyisilwe ngu mwanathu wo kari? (Mavingu 26:20)

¹⁸ Mbimo yimwani ti nga lava hi tshuketela mwanathu awu a nga hi henyisa. Kambe txo khata ti lava hi ti wotisa siwotiso so fana ni siya: ‘Ina na yi ziva kwati mhaka?’ (Mav. 18:13) ‘Ina a to ni henyisa kha kwenye?’ (Ekl. 7:20) ‘Ina ni khala kumaha phazamo yo fana?’ (Ekl. 7:21, 22) ‘Ngako ni txo mu yela, ina kha ni njo ya vhuka mifi?’ (Lera Mavingu 26:20.) Ngako hi txi tiha mbimo yo alakanyisisa ngu siwotiso siya hi nga tumbula to lirando lathu ngu mwanathu wule li nga hi susumetela ku m’divalela.

19. U ti emisete kumaha txani?

¹⁹ Tifakazi ta Jehovha ta ti komba to mbalondeteli va ditshuri va Jesu. Mmweyo ni mmweyo wathu a nga kombisa to mlondeteli wa ditshuri wa Jesu ngako a txi kombisa lirando la ditshuri ka vanathu ti si nga ni mhaka ni tiphazamo tawe. Ngako hi txi maha eto, hi na vhuna vamwani ve wu tumbula wukhongeli wa ditshuri ni ku ve ta tipata ni nathu ve thumela Jehovha, i ku Txizimu txa lirando. He ti emiseleni kusimama hi kombisa lirando ali li hi kombisanako kota Makristu a ditshuri.