Ngu kutxani wamwanna wule wa dixaka da Bhowazi a di wombile to “ngu onha” thomba yakwe ngako a txi txhadha ni Rute? (Rute 4:1, 6)

Ka timbimo ta Bhiblia, ngako wamwamna a txi fa a si nga ni vanana, ku txi mahwa siwotiso so fana ni siya: Ku na maheka txani ngu thomba yakwe? Ina txiloso txakwe txi na mbi fuva? Kambe mlayo wa Mosi wu txi va vhuna ka mhaka yoneyo.

Se ku txi maheka txani ngu thomba ya wamwamna awu a nga fa, mwendo ya wamwamna awu a nga xavisa tithembwe ngu konaha ka wusiwana? Mwanakwe mwendo dixaka dakwe di txi xava tithembwe toneto. Se tithembwe toneto ti da simama ti va ta mwaya wule.—Levhi 25:23-28; Mit. 27:8-11.

Se ti da mahisa kutxani ku txiloso txa wamwamna wule txi si fuvi? Mwanawe mwendo dixaka da hafuhi di ndi na txhadha ni Rute. Wamwamna wuwa a di na txhadha ni wamsikati eneyo wa noni ve veleka vanana kasiku txiloso txi simama ni ku tithomba ti da simama ti lumba mwaya wule. Malulamiselo onewo a lirando ma txi kombisa kukhatala ngu noni yoneyo.—Dhewut. 25:5-7; Mat. 22:23-28.

Wona txikombiso txa Nowemi. Ene a ti txhadhile ni wamwamna awu a dhanwako ku Elimeleki. Mbimo yi Elimeleki ni vanana vakwe vavambidi va nga fa, Nowemi a si nga ni m’thu wo sala e khatalela silaveko sakwe. (Rute 1:1-5) Mbimo yi va nga tshumela Judha, Nowemi a gete Rute ti to e ya kombela Bhowazi kasiku e mu terula. Nguko ene i ti dixaka da Elimeleki. (Rute 2:1, 19, 20; 3:1-4) Kambe Bowazi a woni to ku di ni dixaka dimwani da Elimeleki.Ene a ti fanete kuva wo khata kuterula Rute ngako a txi ti lava.—Rute 3:9, 12, 13.

Kambe makhatoni, wamwamna eneyo a di ti emisete ku mu vhuna. (Rute 4:1-4) Ene a woni to a di na luza male yo tala kasi kuxava thembwe ya Elimeleki ni ti to Nowemi se i ti wa hombe, asi nga ni tanga yo veleka vanana kasi kusala ni thomba ya Elimeleki. Kuxava tithembwe tile ti da pata ni takwese eto ti txi woneka nga a ndi na wuyelwa ngutu.

Kambe wamwamna wule a txitxile mawonelo akwe mbimo yi a nga ziva to ku ti ni Rute awu nene a ngadi ka tanga yo e txhadha. Ene a wombile tiya: “Ani kha ni na mbi mtirula, kasiku ni si onheteli thomba yangu.” (Rute 4:5, 6) Ngu kutxani a di txitxile mawonelo akwe?

I di ku a to txhadha ni Rute ve veleka mwanana wa mfana, mwanana wule a ndi na sala ni thomba ya Elimeleki. Se i ngu nzila yihi “thomba” ya wamwamna wule yi di no ‘onhwa?’ Bhiblia kha yi wombi, kambe ti nga maha ku ti ni sivangelo so pfala.

• Txo khata, ti ndi na fana ni kuluza male nguko thembwe ya Elimeleki yi si na kulumba ene, kambe yi da na lumba mwanana wa Rute.

• Txa wumbidi, a di na va ni wutixamuleli wo khatalela Rute ni Nowemi.

• Txa wuraru, i di ti to Rute a to veleka mwanana mmwani ni dijaha dile, va da ningela thomba yile ka mwanana wule nene.

• Txa wumune, i di ti to dijaha dile di si veleki vanana vamwani ni Rute, m1wanana wa Rute a ti ni fanelo yo teka thomba ya Elimeleki ni ya He mawe. Ene a ndi na luza tithomba takwe ti ya ka txiloso txa Elimeleke. Se ene a si ti lavi kuningela thomba yakwe kasi kuvhuna Nowemi. Ngu toneto a tumelete Bhowazi ti to e teka wutixamuleli wonewo. Bhowazi a tumete kumaha toneto nguko a txi lava “kuwusa ditina da mfi, txitimwi ka thomba yakwe.”—Rute 4:10.

Ti ti komba nga wamwamna wule a txi karateka ngutu ngu kuxayisa ditina dakwe ni thomba yakwe. A tumelete ku ti alakanyela ku fuma mapimo akwe. Kambe hahanze ko xayisa ditina dakwe, a di luzile. A luzile kambe lungelo ya lisima ayi yi nga manwa ngu Bhowazi ya ti to ditina dakwe di bhalwa ka lihunzu ali Mesiya, Jesu Kristu a nga humela ka lona. Ngu mhaka ya ku ti alakanyela, ene a lambile kuvhuna ava va ngadi ni txilaveko!—Mat. 1:5; Luka 3:23, 32.