1-2. Ngako u sa lungekela kubhabhatiswa ngu kutxani u sa fanela kugodhola? (Wona mfota.)

 NGAKO u txi tsakela kubhabhatiswa u fanete ku ti vekela makungo. Ina u lungekile kuteka dizambo donedo konku? Ngako u txi tsaniseka to u lungekile ni ngako madhota ma txi tumelelana ni nawe u nga kanakani kubhabhatiswa ka mkhanjo wu no humelela. Ngako u txi maha toneto u na mana makatekwa o tala ka mthumo wa Jehovha.

² Ina u ta nga gelwa to u fanete kutshukwatisa to kari u sise kubhabhatiswa? Mwendo ku ni mu u ti wonako upune to u fanete kutshukwatisa? I di toneto u nga godholi, u nga sikota kutshukwatisa kala u hokela dizambo donedo da lisima ti si nga ni mhaka ni ti to u ngadi jovhem mwendo u kute ngu tanga.

3. Ngu tihi ti nduna ya Muetiyopiya yi nga wotisa Filipi, ni ku kuguleka txiwotiso txihi? (Mithumo 8:36, 38)

³ Lera Mithumo 8:36, 38. Nduna ya Muetiopiya yi wotisile Filipi yi txi: “Ni nga tsivelwa ngu txani kubhabhatiswa kani?” Wamwamna wule ati ni minavelo yo lava kubhabhatiswa kambe ina a di lungekilele ngu ditshuri kuteka dizambo diya da lisima?

4. Muetiopiya a ti kombisile ngu nzila yihi to adi ti emisete kusimama e gonda?

⁴ Wamwamna wuwa wa Muetiopiya ‘ati tsute Jerusalema ku ya khozela.’ (Mith. 8:27) Ti nga maha wamwamna wule ati ko hunduka eva ka wukhongeli wa txi Judha. Kha ti kanakanisi to  ati gondile mayelano ni Jehovha ka Mibhalo sawuleka ya Txihebheru kambe adi ti emisete kugonda to tala. Mbimo yi Filipi a nga mana wamwamna wule, a mmani a txi maha txani? A mmani a txi gonda mibhalo ya wuprofeti wa Isaya. (Mith. 8:28) Phela asiya i di sakudya so banga sa moya. Phela ene a sa eneliseka ngu tigondo to khata ati a ngadi ti mani kambe a txi lava kusimama e gonda to tala.

5. Muetiopiya a mahile txani ngu ti a nga ti gonda?

⁵ Wamwamna wuwa i ti nduna ya hombe, a txi thuma nyumbani ka Mfumeli wa txisikati wa Muetiopiya; “ene i ti muwoneleli wa txotshe txuma txakwe.” (Mith. 8:27) Kambe ti nga maha ene adi ni wutixamuleli wo tala. Hambi keto ati ningile mbimo yo khozela Jehovha. Ene a sa eneliseka ngu kuva a di gondile ditshuri dwe, kambe a mahile ati a nga ti gonda. Ene a khukhile ngu Etiyopiya e ya Jerusalema kasi ku ya khozela Jehovha dithepeleni. Ti nga maha ka diendo dile adi hetile mbimo ya yingi e tshumela e gastara mali yo tala, kambe txa lisima ngutu kwakwe i ti kukhozela Jehovha.

6-7. Lirando li Muetiopiya a ngadi nalo ngu Jehovha li simamile li kula ngu nzila yihi?

⁶ Muetiopiya a gondile timhaka ta lisima ka Filipi, ati di nga txi pata kuziva to i mani Mesiya. (Mith. 8:34, 35) Wamwamna wuwa a tsakile ngutu mbimo a nga gonda ngu ti Jesu a nga mmahela. Msana ko gonda tiya a mahile txani? Ina a simamile e va nga tonti a ngadi ka tona, to va m’thu wo xoniphwa? Phela lirando lakwe ngu Jehovha ni Jesu li ti kute, se ene a mahile kutxitxa e teka txisungo txo bhabhatiswa ti to e va mulondeteli wa Kristu. Aku Filipi a nga wona to wamwamna wule ati lungekile a to mu bhabhatisa.

⁷ Ngako u txi tekelela Muetiopiya, nawe u nga lungeka kubhabhatiswa. Nawe u nga womba ngu kutsaniseka u txi: “Njitxani txi ni tsivelako kubhabhatiswa?” Konku he wone to u nga etetelisa kutxani a ti Muetiopiya a nga ti maha. Ene a simamile e gonda ni kumaha ati a nga ti gonda ni ku a simamile e kulisa lirando lakwe ngu Txizimu.

8. U nga ma thumisisa kutxani mapswi ya ma ku ka Johani 17:3?

⁸ Lera Johani 17:3. Ina mapswi awa a Jesu ma ku vhuni kumaha txisungo txo gonda Bhiblia? Hotshethu ma hi vhunile kumaha toneto, ni ku ma hi vhuna kusimama hi gonda Bhiblia. Athu hi na mbi thuka hi leka “kuziva . . . Txizimu tximwetxo txa ditshuri.” (Ekl. 3:11) Hi na simama hi gonda kala kupinduka. Mbimo yi hi yako hi gonda hi ya hi kulisa wungana wathu ni Jehovha.—Mas. 73:28.

9. Ngu tihi hi fanelako ku ti maha msana ko gonda tigondo ta makhato?

 ⁹ Ta pfisiseka to mbimo yi hi khatako kugonda ngu Jehovha, hi gonda tigondo to hehuka dwe. Ka dipapilo dakwe di a nga bhalela Vahebheru, Paulo a dhanile tigondo toneto kota “tigondo ta makhato.” Kambe, hi nga ti to a txo kanyisa “tigondo ta makhato,” ene a txo fananisa tigondo toneto ni masi ya ma ningwako mwanana. (Vaheb. 5:12; 6:1) A tshumete e kuzeta Makristu ti to ma si gwiteli ko sela masi dwe, kambe ve simama ve gonda tigondo to tshima ta Dipswi da Txizimu. Ina wa tiha mbimo yo gonda ngu tigondo to tshima ta Bhiblia? Ina u ti emisete kusimama u kula ngu didhawa da moya, ngu kugonda ngu Jehovha ni sikongomelo sakwe?

10. Ngu kutxani vamwani ti txi va karatela kulera ni kugonda?

¹⁰ Kutala kwathu ta hi karatela kugonda. Awe ko? Ina txikolwani u gondisilwe kulera kwati ni kugonda ta tinene? Ina u tsakile ni kuwuyelwa ngu ti u nga txi ti gonda mwendo u gwitile u wona to ati to gonda mabhuku hi nga tangu? I di toneto khu nga wekha, Jehovha a nga kuvhuna. Ene Mgondisi wamnene ngutu kupinda votshe.

11. Jehovha a ti kombisisa kutxani ti to “Mgondisi wa hombe”?

¹¹ Jehovha ati dhana apune a txi “Mgondisi wako wa hombe.” (Isaya 30:20, 21) Ene a ni wumbilu, wunene ni kupfisisa. Ene wa xola ati i ku ta tinene ka sigondiana sakwe. (Mas. 130:3) Jehovha kha emeli ku hi maha ati hi no mbi tikota, khumbula to ngene a nga maha wongo wako i ku ningo yo xamatisa. (Mas. 139:14) Ngu mtumbuluko wathu hi ni minavelo yo lava kugonda. Mvangi wathu a lava to hi simama hi lera ni ku hi tidila ngu ti hi ti gondako. Hi nga kombisa wutxhari konku ngu “kunavela” ditshuri da mu ka Bhiblia. (1 Pedro 2:2) Ti vekeli makungo aya u nga ma hokelako ni kusimama ni txiemiso txako txo lera ni kugonda Bhiblia. (Jox. 1:8) Ngu kuvhunwa ngu Jehovha u nga tidila ngu kulera ni kugonda to tala ngu ngene mbimo yotshe.

12. Ngu kutxani i di ta lisima kuveka mapimo ka Jesu mbimo yi mahako gondo yathu hipune?

¹² Mbimo yotshe alakanyisisa ngu wutomi wa Jesu ni mthumo wakwe wo txhumayela. Kulondeta mazambo a Jesu ngu yona khiya ya lisima yo thumela Jehovha ngutu-ngutu ka timbimo tiya to karata. (1 Pedro 2:21) Jesu a wombawombile ngu sikarato asi valondeteli vakwe va no wonisana naso. (Luka 14:27, 28) Kambe ene a txi tsaniseka to valondeteli vakwe va na humelela nga ha ene a nga maha ngu kona. (Joh. 16:33) Gonda ngu matimu a wutomi wa Jesu ni ku ti vekela makungo a nzila yi u nga mu etetelako ngu yona masiku otshe.

13. Ngu tihi ti hi fanelako kusimama hi ti kombela ka Jehovha, ni ku ngu kutxani?

¹³ Kha ta enela ku va ni wuzivi dwe. Wona wu fanete ku hi vhuna kugonda to tala ngu Jehovha ni ku kulisa tifanelo to fana ni lirando ni likholo lathu ngu ngene. (1 Vak. 8:1-3) Mbimo yi u yako u gonda, simama u kombela Jehovha ti to e ku vhuna u va ni likholo lo engeteleka. (Luka 17:5) Ngu wunene ene wa xamula mikombelo yo nga toneto. Likholo ali li nga seketelwa ka wuzivi wa Txizimu li nga ku vhuna to u kula ngu didhawa da moya.—Jak. 2:26.

14. Mpostoli Pedro a junyatisile lisima lo hanya ngu ti hi tigondako ngu nzila yihi? (Wona ni mfota.)

¹⁴ Mpostoli Pedro a junyatisile lisima lo valondeteli va Kristu ve simama ve hanya ngu ti va ti gondako. Ene a wombawombile ngu matimu a Nowa. Jehovha a gete Nowa to a na  tisa ndambi kasi ku ta lovisa vathu vo biha ka masiku yale. Kuziva to yi na ta ndambi ti sa enela kasi ku Nowa ni mwaya wakwe ve huluka. Pedro a womba-wombile ngu mbimo ya “kuakwa ka ngalava,” i ku mbimo yile yi nga sise ta ndambi. (1 Pedro 3:20) Nowa ni mwaya wakwe va mahile ti va nga ti gonda ka Txizimu ve aka ngalava ya hombe ngutu. (Vaheb. 11:7) Pedro a fananisile ati Nowa a nga maha ni bhabhatiso ngu kuwomba tiya: “Bhabhatiso ayi yi dinganako toneto konkuwa ya mi ponisa.” (1 Pedro 3:21) Ngu toneto, nathu hi nga fananisa mthumo wu u wu mahako konku wo ti lulamisela kubhabhatiswa ni mthumo wu Nowa ni mwaya wakwe va nga wu maha kudingana malembe o tala wo aka ngalava. U nga maha txani kasi ku u ti lulamisela kubhabhatiswa?

15. Ti pata txani kutisola ti txi huma mbiluni?

¹⁵ Mhaka yo khata ya lisima ayi hi fanelako ku yi maha, ngu tisola ka sionho sathu ti txi huma mbiluni. (Mith. 2:37, 38) Kutisola ti txi huma mbiluni ti nga ku vhuna ku u maha kutxitxa ka ditshuri. Ina u lekile kumaha a ti ti si tsakisiko Jehovha, to fana ni mahanyelo a nzambwa, kudhaha, mwendo mawomba-wombelo o biha? (1 Vak. 6:9, 10; 2 Vak. 7:1; Vaef. 4:29) Ngako u si se leka, simama u maha kutxitxa. Gela wu a ku gondelako Bhiblia mwendo madhota dibanzani kasi ku me ku vhuna. Va kombele ti to ve ku vhuna u leka mikhuva yo biha ni ku kuninga mkongomiso. Ngako u di ngadi jovhem u txi zumba ni vaveleki vako, va kombele ti to ve ku vhuna u leka mikhuva yo biha ayi yi nga ku tsivelako kubhabhatiswa.

16. Txiemiso txa txinene txa timhaka ta moya txi pata txani?

¹⁶ Nda lisima ngutu kuva ni txiemiso txa txinene txa timhaka ta moya. Eto ti pata kuxalela mitshangano ni ku pateka ka yona. (Vaheb. 10:24, 25) Ngako u txi faneleka kutxhumayela mahungu a manene, wa so maha toneto mbimo yotshe. Ngako u txi ya masoni u maha mthumo wuwa wo txhumayela u na pfa litsako la hombe ngutu. (2 Tim. 4:5) Ngako u di ngadi jovhem u txi zumba ni vaveleki vako ti wotise tiya:‘Ina na teka dizambo do xalela mitshangano ni kuya ka mthumo wo txhumayela mwendo ni emela kukhumbutiswa ngu  vaveleki vangu? Phela ngako u txi teka mazambo oneyo upune u kombisa lirando, likholo ni kubonga Txizimu. Phela eyo “mahanyelo o sawuleka a wukhongeli” i ku ningo ayi u ningako Jehovha. (2 Pedro 3:11; Vaheb. 13:15) Phela Jehovha wa tsaka ngu totshe tiningo ti hi mningako hi di khululekile i si nga ngu ku kurumetwa. (2 Vak. 9:7) Hi maha toneto nguko ha tsaka kumaha totshe ti hi nga ti kotako hi txi mahela Jehovha.

17-18. Nji txani txi no ku vhuna ku u hokela ko bhabhatiswa, ngu kutxani? (Mavingu 3:3-6)

¹⁷ Mbimo yi u yako u gonda kasi ku u ya bhabhatiswa, u na manana ni sikarato. Phela vamwani ti nga maha ve ku kaneta, ve ku poyila mwendo ku ku xanisa ngu mhaka ya likholo lako. (2 Tim. 3:12) Mbimo yi u mahako mizamo yo leka mahanyelo o biha mbimo yimwani u nga thuka u navela ku tshumelela msana. Mwendo u thuka u godhola, u wona nga makungo ako khu na mbi sikota ku ma hokelela. Se nji txani txi nga ku vhunako? Lirando li u ku nalo ngu Jehovha.

¹⁸ Phela lirando li u ku nalo ngu Jehovha i fanelo yo tshura ngutu ka totshe ti u ku nato. (Lera Mavingu 3:3-6.) Lirando lako ngu Jehovha li nga ku vhuna kuwonisana ni sikarato u di tsani. Bhiblia ya womba-womba ngu lirando lo mbi guma ali Jehovha aku nalo ngu malanda akwe. (Mas. 100:5) Khumbula to awe u mahilwe ngu txifaniso txa Txizimu. (Gen. 1:26) Se u nga li kombisisa kutxani lirando liya lo mbi guma?

19. U nga kombisa ngu nzila yihi kubonga Jehovha ngu totshe ti a ku mahelako? (Vagalatiya 2:20)

¹⁹ Kukhata kombisa kubonga. (1 Vat. 5:18) Ditshiku dimwani ni dimwani ti wotise tiya, “Jehovha a li kombisisa kutxani lirando lakwe kwangu?” Ka mikombelo yako u nga divali kubonga Jehovha ni ku m’gela totshe ti a nga kumahela. Wona simaho sakwe sa lirando asi a ku mahelako awe ngu kukongoma nga ha mpostoli Paulo a nga tipfa ngu kona. (Lera Vagalatiya 2:20.) Ti wotise tiya, ‘Ni nga li kombisisa kutxani lirando langu ngu ngene?’ Lirando lako ngu Jehovha li nga vhuna to u simama u di tsani u txi wonisana ni siduko ni sikarato. Eto ti na kuvhuna kusimama ni txiemiso txako txa timhaka moya ni kusimama u kombisa lirando ka Jehovha Tate wako ditshiku ni ditshiku.

20. Ku tiningetela ka Jehovha ti pata txani ni ku ngu kutxani etxo i di txisungo txa lisima?

 ²⁰ Lirando li u ku nalo ngu Jehovha li na ku kuzeta kumaha mkombelo wo sawuleka. I ku mkombelo wo tiningetela upune ka Txizimu. U txi za u tiningetela ka Jehovha awe u ni themba ya lisima ngutu. U nga lumba Jehovha ngu ha ku si gumiko. Mbimo yi u mahako txixambanyo txo tiningetela ka Jehovha awe u thembisa to u na mthumela ka timbimo ta tinene mwendo to karata. Txixambanyo txonetxo u txi maha kumweko dwe ka wutomi. Ngu ditshuri mbimo yi u ti ningetelako ka Jehovha u teka dizambo da lisima ngutu. Awe u nga maha sisungo so tala ka wutomi simwani sa sinene, kambe khu na mbi maha txa lisima ngutu txo pinda kuningetela wutomi wako ka Jehovha. (Mas. 50:14) Sathani a na zama kumaha to lirando lako ngu Jehovha li hola a txi pimisa ti to u na leka kuthembeka. Kambe u nga tumeleli Sathani e ku xula! (Jobe 27:5) Lirando lako lo tsana ngu Jehovha li na ku vhuna kumaha txisungo txo simama u mthumela ngu ha ku si gumiko.

21. Ngu kutxani hi nga wombako to bhabhatiso hi nga magwito kambe makhato?

²¹ Msana ko ti ningetela ka Jehovha, womba-womba ni madhota a dibanza dako mayelano ni dizambo di di londiselako. Khumbula to kubhabhatiswa hi nga magwito, kambe makhato o thumela Jehovha ngu ha ku si gumiko. Ngu toneto kulisa lirando lako ngu Jehovha konkuwa. Ti vekele makungo aya ma no ku vhuna kukulisa lirando lako ngu Jehovha ditshiku ni ditshiku. Eto ti na kumaha u hokela ko bhabhatiswa. Edo i nava ditshiku do sawuleka ngutu. Kambe eyo o va makhato basi. Nga lirando lako ngu Jehovha ni Jesu li nga simama li kula kala kupinduka!