1. Ngu kutxani mpostoli Paulo a di gete Makristu a kale a Vahebheru ti to me tsaniselana “ngutu-ngutu” mbimo yile?

NGU mbimo ya vapostoli, Paulo a ningete txialakanyiso txiya ka Makristu a Vahebheru: “Ahi laveni tinzila to vhunana, hi txi tsaniselana amu ka lirando ni ka mithumo ya yinene. Hi nga lekeni misengeletano yathu, nga vamwani va tolovelako kumaha. Aniko ahi laveni tinzila to tsaniselana yotshe mbimo, ngutu-ngutu akuwa mi wonako ditshiku da Mkoma di txi tshuketela.” (Vahebheru 10:24, 25) Ti nga maha vanathu va di xamalisilwe nguko Paulo a nga vagela ti to ve ya masoni ve tsaniselana. Na ku si se guma mtxhanu wa malembe, txivangelo txi wonekile. Ku ve ni mbimo yi va nga wona ti to ditshiku da Jehovha do lamula Jerusalema di ti hafuhi. Va khumbute ti to va ti fanete ve huma didhoropani ka Judha ngati Jesu a nga ti va gelisile tona. (Luka 21:20-22; Mithumo 2:19, 20) Ditshiku donedo da Jehovha di tile ngu dilembe da 70 mbimo yi Varoma va nga hoxota Jerusalema.

2. Ngu kutxani ti txi lava hi khatalelana ngutu-ngutu nyamsi?

 ² Nyamsi, hi ka txiemo txi txi fanako. Ditshiku da ‘hombe kambe do thisa’ da Jehovha di hafuhi. (Joyeli 2:11) Mapswi a mprofeti Zefaniya ni ona ma thuma ni nyamsi: “Ditshiku da hombe da MKOMA di hafuhi, di hafuhi, kambe da kuluveta ngutu”! (Zefaniya 1:14) Ngu toneto “ahi laveni tinzila to vhunana, hi txi tsaniselana amu ka lirando ni ka mithumo ya yinene.” (Vahebheru 10:24) Ti lava hi khatala ngutu ngu vanathu kasiku hi va tsanisa ngako ti txi laveka.

3. Paulo a ti khene txani mayelano ni kutsaniselana? (Wona mfota wu wu ku makhatoni.)

³ “Kuvilela ka mbiluni ka gomisa m’thu, kambe mapswi a manene ma m’tsakisa.” (Mavingu 12:25) A walo wo mbi lava kutsaniswa. Paulo a tivekile ha kubasani ti to hambi va va ku ni wutixamuleli wo tsanisa vamwani, ni vona va ti lava kutsaniswa. Abhate tiya: “Na xuva ngutu ku mi wona, kufela ku miha txiningo txo kari txa Moya, kasiku mi tsaniswa. Kasi ngu ti to, ngako ni di hafuhi ni nanu, hi na thavelelana ngu likholo li hi ku nalo, anu ni nani.” (Varoma 1:11, 12) Hambi ene mpostoli Paulo mbimo yimwani a ti lava kutsaniswa.​—Lera Varoma 15:30-32.

4, 5. Mba mani ava hi nga va tsanisako? Ngu kutxani?

⁴ Nyamsi, hi nga tsanisa ava va ku ka mthumo wa mbimo yotshe, kufana ni vanyaphandule. Kutala kwawe va lekile silo si va nga ti si dhunda ti to ve kota kuphandula. Ta fana ni varumiwa, vathumi va Bhetele, vawoneleli va sigava ni vasikati vawe ni va va thumako ka tinyumba ta wuhunduluxeli. Votshe, va lekile to kari ti to ve kota kuthumela Jehovha mbimo yo tala. Se i nga va ta tinene ku va tsanisa. Ku ni vamwani va nga ti tsakela kuva ka mthumo wa mbimo yotshe, kambe konkuwa va nge sikoti. Ni vona va tsaka ngako va txi tsaniswa.

⁵ Mba mani vamwani va va lavako kutsaniswa? I vanathu vo tala ava va simamako ve zumba va sa txhadha nguko va lavako kuengisa Jehovha, ve tekwa “ngu mlayo wa Mkoma.” (1 Vakorinto 7:39) Vavamna va nga tsanisa vasikati vawe ngu kuva gela ti to va varanda ni kubonga totshe ti va mahako. (Mavingu 31:28, 31) Hi nga tsanisa vanathu va va xaniswako mwendo va va lwalako. (2 Vatesalonika 1:3-5) Jehovha ni Jesu va va thavelela vanathu vonevo vo thembeka.—Lera 2 Vatesalonika 2:16, 17.

6. Hi nga gonda txani ngu mthumo wa madhota awu wu nga wombwa ka Isaya 32:1, 2?

⁶ Lera Isaya 32:1, 2. Hi hanya ka timbimo to karata, se ti nga hehuka ku hi henya mwendo hi va ni dikhodho. Jesu Kristu a thumisa vasawuleki ni “vathangeli” vo thembeka ti to ve hi tsanisa. Madhota onewo a dibanza hi nga “vakoma” kambe ‘mbavhuneteli’ va litsako lathu. Vona va lava kuhi vhuna hi tsaka ni kuzumba hi di thembekile.​—2 Vakorinto 1:24.

7, 8. Madhota ma nga tsanisisa kutxani vanathu ngu mapswi ni simaho?

⁷ Madhota ma nga tekelela txikombiso  txa mpostoli Paulo, awu a nga duketa kutsanisa vanawe. Mbimo yi Makristu a Tesalonika ma nga ti xaniswa, a ma bhalete tiya: “Nanathu kota nga ti hi nga ti mi dhunda, hi xuvile kuabana ni nanu i si nga dipswi da Evhangeli ya Txizimu, dokha, aniko hambi ni wona wutomi hi ti ti lava ku wu ningela ngu kota yanu, nguko anu mi vo randeka ngutu kwathu.”—1 Vatesalonika 2:8.

⁸ Madhota ma nga tsanisa vamwani ngu ti ma ti wombako. Kambe toneto ta enela? Paulo a gete madhota a Efesu a txi khene: “Ngu totshe tinzila, ni mi kombisile ti to, ngu kuthumisa tiya, hi fanela kuvhuna ava i ku sisiwana, na hi txi alakanya mapswi a Mkoma Jesu, a nga khene: ‘Kuha i kateko ya hombe ngutu kupinda kuhiwa.’” (Mithumo 20:35) Paulo a ti ti emisete ‘kuningela sotshe sakwe, hambi ene apuni e tiningela’ ngu mhaka ya vanawe. A ti kombisile ngu simaho ti to a ti ti emisete kumaha ti a nga tikotako ngu kota yawe. (2 Vakorinto 12:15) Ngu toneto, madhota ni ona ma nga tsanisa ni kuthavelela vamwani i singa ngu mapswi dwe, kambe ni ngu simaho. Eto ti kombisa ti to ona ma hi khatalela.​—1 Vakorinto 14:3.

9. Madhota ma nga vhunwa ngu txani ti to me ningela sialakanyiso si si tsanisako?

⁹ Yimwani mbimo madhota ma fanete me tsanisa vanathu ngu kuvaninga sialakanyiso. Amu ka Bhiblia, madhota ma nga gonda mamahelo a kona. Jesu a vekile txikombiso txa txinene ko ningela sialakanyiso dikhambi di a nga womba mapswi ka mabanza a Ásia Menor mbimo yi a nga tshumela eya nzumani. Ka mabanza a Efesu, Pergamo ni Tiyatira a ti fanete e ma laya. Kambe na a si se va laya, a khatile ngu ku va ndunduzela ngu timhaka ta tinene ati va nga ti ti maha. (Mtuletelo 2:1-5, 12, 13, 18, 19) Ka dibanza da Laodhikheya a ti khene: “Ani na kawuka ni kutsayisa votshe vava ni va randako. Wuseta kukhutala kwako u hunduluka.” (Mtuletelo 3:19) Ka nzila yo ningela sialakanyiso, madhota ma duketa kuetetela Jesu.

10. Hotshethu hi nga tsanisana ngu nzila yihi?

¹⁰ Hi nga madhota dwe ma nga tsanisako vamwani. Paulo a kuzetile Makristu kuwomba-womba “dipswi da dinene, adi di akisako, ni kuninga makatekwa” ka vamwani. (Vaefesu 4:29) Mmwani ni mmwani wathu a fanete e ziva silaveko sa vamwani ti to hi kota ku va vhuna. Paulo a bhalete Vahebheru a txi khene: “Guletani manza anu a kukarala ni mazolo anu a kurereka. Lulamiselani minenge yanu tinzila ta tinene, kasiku txihango txi txi nga lemala, txi si khuduki, aniko txi na hanyiswa.” (Vahebheru 12:12, 13) Hotshethu hi nga tsanisa ni kuthavelela vamwani ngu ti hi ti wombako, hambi hi di ngadi vanana.

11. Marta a vhunwi ngu txani mbimo yi a nga ti ni dikhodho?

¹¹ Mwanathu mmwani wu a dhanwako ku i Marta, ku ni mbimo yi a nga ti ni dikhodho. * (Wona txhamuselo ya hahatshi.) A ti khene: “Ditshiku dimwani ni ti maha mkombelo ni kombela kutsaniswa, ni gwitile ni manana ni mwanathu wa txisikati wu a nga ni komba wuxinji ni wumbilu. Ka  mbimo yoneyo ni ti ka txikarato. A tshumete e womba ni sikarato simwani sakwe so fana ni sangu, se ni tipfite ni singa nokha.” Ti nga maheka mwanathu wule a nga ningela txivhuno a sa tiwona ti to mapswi akwe ma mu vhuni ngutu Marta!

12, 13. Hi nga txi thumisisa kutxani txialakanyiso txa Vafilipiya 2:1-4?

¹² Paulo a bhalete Makristu a Filipiya a txi khene: “Ngu toneto, ngako ku di ho kuthavelelana ngu ka Kristu, ni kumalatelana ngu lirando, ni mpatano wa moya, ngako ku di ho wuxinji ni kuxanisekelana, tatisani kutsana kwangu, kasiku mi va ni myalakanyo yo fana, lirando limwelo, mbilu yimweyo ni moya wumwewo. Mi nga maheni to maha ngu kukanetana hambi kutikulisa, aniko thumani ngu ku ti veka hahatshi, mi si alakanyi ti to ma pinda vamwani ngu wunene. Kha kulaveki ti to mmwani ni mmwani a txi khatalela si i ku sakwe dwe, aniko mmwani ni mmwani a na khatalele ni sa vamwani.”​—Vafilipiya 2:1-4.

¹³ Ndinene ngako hotshethu hi txi xota tinzila to tsaniselana. Hi nga “thavelela ngu lirando” “vakhozeli kulothi” ni ku va ni “wumbilu ni wuxinji” kasiku hi tsanisa vanathu.

14. Ngu yihi nzila yi hi nga tsanisako ngu yona vamwani?

¹⁴ Ha tsaka ngako hi txi pfa ti to ava hi nga khala ku va vhuna va simama ve thembeka. Mpostoli Johani a ti khene: “Ku walo ti ti ni tsakisako ngutu kupinda kuziva ti to vanana vangu va hanya mu ka ditshuri.”  (3 Johani 4.) Vanyaphandule vo tala va tsaka ngako va txi wona ti to m’thu wo kari wu va nga m’gondisa Bhiblia a simama e thumela Jehovha ngu kuthembeka, yimwani mbimo a di tekile ni wunyaphandule. Se ngako vanyaphandule va txi thuka ve guma mtamo, hi nga vavhuna ti to ve khumbula mithumo ya yinene ayi va nga yi maha mbimo yi yi nga pinda ti to ve vhuna vamwani.

15. Hi nga maha txani ti to hi tsanisa ava va thumelako Jehovha ngu kuthembeka?

¹⁵ Vawoneleli vo tala va sigava va womba ti to vona ni vasikati vawe va tipfa va di tsanisilwe ngako vanathu va mabanza ya va ma endelako va txi va bhalela to maha ve va bonga. Ta fana ni madhota, varumiwa, vanyaphandule ni vathumi va Bhetele, ni votshe ava va ku ka mthumo wa mbimo yotshe. Hi txi va bonga, ti nga maha hi txo va tsanisa ngu nzila yi hi nga mbi yi emela.

16. U nga maha txani ti to u tsanisa vamwani?

¹⁶ Yimwani mbimo ti nga maha u si tizivi ti to u na womba txani. U nga maha txani? Phela kha ti karati kutsanisa vamwani. U nga duketa ku sekanyana. Se ngako ene a si seki, ti nga maha a txo va ni sikarato, a txi lava wo m’gela. U nga m’tsanisa ngu kuengisela mbimo yi a womba-wombako.​—Jakobe 1:19.

17. Nji txani txi nga tsanisa Henri?

¹⁷ Mphya mmwani a dhanwako ku i Henri, a karatekile ngutu mbimo wungi wa maxaka akwe ma nga leka kuthumela Jehovha. Mmwani wawe i ti tate wakwe awu  i nga ti didhota. Muwoneleli wa txigava a ti tumbute ti to Henri kha tsaka, se a mtekile ve ya kuselani ka khafi. Mbimo yi Henri a nga ti phofula matipfelo akwe, ene a txo engisela kha kwati. Henri a ti woni ti to nzila yimweyo yo vhuna maxaka akwe ti to me wuyela ka Jehovha i ti kuzumba a di thembekile kwakwe. A tshumete e thavelelwa ngu kulera Masalmo 46, Zefaniya 3:17 ni Marku 10:29, 30.

18. a) Mkoma Solomoni a ti khene txani ngu kutsaniselana? b) Ngu tihi ati Paulo a nga ti womba?

¹⁸ Hi nga gonda txani ka ti ti nga humelela Marta ni Henri? Mmwani ni mmwani wathu a nga tsanisa mwanathu wuhi ni wuhi ngako ti txi laveka. Mkoma Solomoni a ti khene: “M’thu a tsakiswa ngu xamulo ya txisofu txakwe, kambe dipswi do wombwa ngu mbimo ya kona, ndinene. Litsako la maso la tsakisa mbilu, nduma ya yinene yi nonisa ni marambu.” (Mavingu 15:23, 30) Ina ku ni wu u alakanyako ti to kha tsaka mwendo a ku ni dikhodho? Ngu kutxani u si mu maheli to kari, to fana ni ku mulerela to maha ka Muwoneleli mwendo ka site ya jw.org? Mpostoli Paulo a tshumete e gondisa ti to kuembelela tindando hotshethu ti nga hi tangalisa. A ti khene: “Na mi txi gondisana ni kulayana ngu wotshe wutxhari, ni kukombelelana ngu masalmo ni mizeno ni tindando ta moya; embelelani ngu yotshe mbilu ka Txizimu, mi txi komba kubonga kwanu.”​—Vakolosa 3:16; Mithumo 16:25.

19. Ngu kutxani hi no simama hi lava kutsaniselana? Hi nga maha txani?

¹⁹ Aku ditshiku da Jehovha di yako di txi tshuketa hafuhi, nda lisima ngutu kusimama hi tsanisana. (Vahebheru 10:25) Hi na tsaka ngako hi txi engisa txialakanyiso txa Paulo: “Ngu toneto thavelelanani mi txi akisana, nga tona ti mi mahisako tona ni konkuwa.”​—1 Vatesalonika 5:11.