1, 2. a) Ka masiku a Paulo ngu kutxani mhaka ya wuthuseki ni wukhumbi i nga ti ya lisima? b) Paulo a ti khene i mani Txisima txa mkhululeko?

MAKRISTU a kale ma ti zumba mndani ka Mfumo wa Roma. Vathu va kona va ti tigela ngu milayo, kudikha ni mkhululeko wu va nga ti nawo. Phela mfumo wa hombe wu themba tikhumbi ti to ti thuma mithumo yo nemela. Ka Mfumo wa Roma, ngu txidinganiso, u txi mana vathu vararu, mmweyo i ti khumbi. Se mhaka ya wukhumbi ni wuthuseki i ti ya lisima ka vathu vo tala, kupata ni Makristu.

² Mpostoli Paulo a bhate makhambi o tala mayelano ni mkhululeko. Kambe, ina a ti duketa kutshukwatisa sikarato sa ditiko, ngu ha vo tala va nga ti zama ngu kona? Ahim-him. Kambe Paulo ni Makristu kulowe va ti karatete kugondisa vathu mahungu a manene a Mfumo wa Txizimu ni ku va vhuna ve pfisisa lisima la digandelo da Kristu Jesu. Paulo a gete Makristu kulowe ti to ngu txihi Txisima txa mkhululeko wa ditshuri. A ti khene: “Mkoma i Moya, se aha ku ku ni moya  wa Mkoma, kuho kutxhatxheka.”​—2 Vakorinto 3:17.

3, 4. a) Paulo a ti khene txani na a si se womba ati ti ku ka 2 Vakorinto 3:17? b) Hi fanete hi maha txani ti to hi va ni mkhululeko wu wu tako ngu ka Jehovha?

³ Ka dipapilo da wumbidi do ya ka Vakorinto, Paulo a wombile ati ti nga maheka mbimo yi Mosi a nga relela ngu Mmangoni ka Sinayi, msana ka ku va a di masoni ka ngelozi ya Jehovha. Mbanza yakwe yi ti phatima! Mbimo yi Vaisrayeli va nga wona Mosi, va to thava. Se ene a to fenengeta mbanza yakwe ngu nguwo. (Eksodha 34:29, 30, 33; 2 Vakorinto 3:7, 13) Paulo a txhamusete ti to: “Ngako va di hundulukile ve wuya ka Mkoma, ngu kona nguwo yile ya txitsivelo yi thaviswako.” (2 Vakorinto 3:16) Paulo a ti lava kuwomba txani?

⁴ Se hi gondile ka msungo wu wu nga pinda ti to Jehovha Mvangi wa sotshe, Ngene dwe a ku ni mkhululeko wo mbi na mihingano. Se, ta pfala ti to masoni ka Jehovha ku ni mkhululeko ni “ha ku ku ni moya wa Mkoma.” Kambe Paulo a wombile ti to ngako hi txi lava mkhululeko wonewo ti lava hi hundulukela ka Jehovha. Ti womba txani toneto? Ti to hi fanete hi va ni wuxaka wa hombe ni Jehovha. Mbimo yi Vaisrayeli va nga ti txiwulani va ti ni mawonelo a vathu, i singa a Jehovha. Ti txi fana ni ku va nguwo yi di ka mialakanyo ni ka timbilu tawe. Vona va ti lava kuthumisa mkhululeko ti to ve titsakisa.​—Vahebheru 3:8-10.

5. a) Moya wa Jehovha wu nga hi khulula ka txani? b) Ngako m’thu i di khumbi mwendo a di jele, a nga wu mana mkhululeko awu Jehovha awu ningelako? Hi tizivisa kutxani? c) Ngu sihi siwotiso asi hi no bhula ngu sona?

⁵ Mkhululeko awu hi ningwako ngu moya wa Jehovha wu pala wu wo huma wukhumbini. Moya wu tisa mkhululeko wa hombe wo vathu va nge sikoti ku hi ninga. Ngu kutxani? Nguko wu hi khulula ka wukhumbi wa txionho ni lifo ni ka wukhumbi wa wukhongeli wa makuhu ni sihena sa wona. (Varoma 6:23; 8:2) Mkhululeko wonewo wa xamatisa, hi nga tona? Phela hambi wu a ku wukhumbini mwendo jele a nga wu mana. (Genesisi 39:20-23) Mwanathu Nancy Yuen ni Harold King va betilwe jele malembe yo tala ngu mhaka ya likholo lawe, kambe va ti nawo mkhululeko wuwa. U nga xalela mabhulo a matimu awe ka JW Broadcasting. (Bela ka ENTREVISTAS E CASOS REAIS > SUPORTANDO DIFICULDADES.) Ka msungo wuwa hi na xamula siwotiso siya sa simbidi: Hi nga ti kombisisa kutxani ti to ha wu ninga lisima mkhululeko wathu? Hi nga wuthumisisa kutxani ngu wutxhari?

6. Vaisrayeli va ti kombisile ngu nzila yihi ti to va si bongi mkhululeko awu Jehovha a nga ti va ningile?

⁶ Ngako hi txi ningwa ningo ya lisima, ha m’bonga ngutu wu a nga hi ninga. Phela Vaisrayeli va si bongi mkhululeko awu Jehovha a nga ti va ningile. Mitximanyana  dwe yi nga pinda Jehovha a di vakhulute Egipta, vona va khatile kungurangura ngu mhaka ya sodya ni so sela asi va nga ti naso. Va ti sola-sola manna, i ku sakudya asi Jehovha a nga ti va ninga. Phela va ti lava ni kutshumela ve ya Egipta! Kwawe ‘sihaka, mapswani, magamba, tinyala ni sinyalana’ si ti ni lisima kupinda mkhululeko awu Jehovha a nga ti va ningile wo m’khozela. Kha ti xamalisi aku Jehovha a nga va henyela. (Mitengo 11:5, 6, 10; 14:3, 4) Atiya ti nga hi gondisa mhaka ya lisima.

7. Hi nga txi thumisisa kutxani txialakanyiso txa Paulo ka 2 Vakorinto 6:1?

⁷ Paulo a txharihisile makristu ti to ma si leki kubonga mkhululeko awu Jehovha a nga ti va ningile, ngu kona ha ka Mwanana wakwe Jesu Kristu. (Lera 2 Vakorinto 6:1.) Paulo a sa hetiseka, i ti khumbi ya txionho ni lifo, se eto ti mmahile e ti pfa a di ni dikhombo. Hambiketo a ti khene: “Txi na dhumiswe Txizimu, ngu Mkoma wathu Jesu Kristu!” Ngu kutxani a di wombile toneto? Paulo a txhamusete ka Makristu kulowe a txi khene: “Nguko mlayo wa Moya wa wutomi awu wu ku ka Kristu Jesu wu ni txhatxhile ka mlayo wa txionho ni lifo.” (Varoma 7:24, 25; 8:2) Kufana ni Paulo, hi nga divaleni ti to Jehovha a hi khulute ka wukhumbi wa txionho ni lifo. Mtirulo wu maha ti to hi sikota kuthumela Txizimu hi di ni livhalo lo basa, ni kuva ni litsako la ditshuri.​—Masalmo 40:8.

8, 9. a) Ngu txihi txialakanyiso atxi Pedro a nga hi ninga ngu mathumiselo a mkhululeko wathu? b) Ngu kutxani txialakanyiso txonetxo i di txa lisima ka masiku a ngweno?

⁸ Hi nge mahi ngu kuwomba dwe, ti to ha m’bonga Jehovha. Kambe ti lava hi tshumela hi tiwonela ti to hi si thumisi mkhululeko wathu ngu nzila yo biha. Ngu txikombiso, mpostoli Pedro a hi alakanyisile ti to hi nga barameni ngu mkhululeko wathu ti to hi maha to biha. (Lera 1 Pedro 2:16.) Eto ti hi khumbulisa ati ti nga humelela Vaisrayeli va di txiwulani. Ka masiku  a ngweno, txialakanyiso txonetxo ti nga maha txi txi laveka ngutu. Sathani ni mafu akwe va humisa silo so tala ka siambalo, sodya, so sela ni so hungala ngu sona. Vamahi va mabhindo va thumisa vathu vo tshura ngutu ti to ve hi wonga hi xava asi i singako txilaveko kwathu. Ngu toneto ti nga hehuka ti to hi bzwetwa ngu mafu awa, hi thumisa mkhululeko wathu ngu nzila yo biha.

⁹ Txialakanyiso txa mpostoli Pedro txi nga tshumela txi thumiswa ka timhaka timwani ta wutomi. To fana ni txikolwa, mthumo ni kurso yi hi no yi sawula. Ngu txikombiso, vaphya vamwani va sungeka kutikarata ti to ve bela ka ma Universidade a nduma. Vathu vo tala va va gela ti to ngako va txi bela ka tigondo ta hombe, va na mana mithumo ya yinene, male yo tala ni ku vathu va na vaxonipha. Vathu vonevo va lavetela madungula aya ma kombisako ti to ava va ngaya Universidade va mana male yo tala ngutu kupinda va va nga maha kurso ya mbimo ya yidotho. Ngako mphya a txi lava kumaha txisungo txa wumangwana wakwe, tigondo to guleka ti nga woneka nga ti nga m’vhuna. Kambe ngu tihi ati ene ni vaveleki vakwe va fanelako ve ti khumbula?

10. Hi fanete hi khumbula txani mbimo yi hi mahako sisungo sathu?

¹⁰ Vamwani va nga thuka ve pfa nga va ni mkhululeko wo sawula ova ti va ti lavako kotaku i ku mhaka ya m’thu apuni, yi txa nga va yi si karati livhalo lawe. Va nga thuka ve alakanya tiya: “I nga va mhaka muni kukhululeka kwangu ku txi lamulwa ngu livhalo la mmwani, kani?” (1 Vakorinto 10:29) Athu hi nawo mkhululeko wo ti sawulela tigondo ni mithumo yi hi yi lavako. Hambiketo, hi fanete hi khumbula ti to mkhululeko wathu wu ni mihingano, ni ti to sotshe sisungo sathu si ni wuyelo. Ngu toneto Paulo a nga khene: “Totshe ta tumeleleka,” aniko hi nga totshe ti akako. (1 Vakorinto 10:23) Se hambiku hi ku ni mkhululeko wo sawula ati hi ti lavako ka timhaka tathu, ati ti lawako ngu ngathu hi nga mbimo yotshe i ku tatinene ngutu.

11. Ngu kutxani Jehovha a di hi khulute?

¹¹ Mbimo yi Pedro a nga ningela txialakanyiso mayelano ni kuthumisa mkhululeko wathu ngu nzila yo biha, a ti khene nzila ya yinene yo wu thumisa ngu va “sithumi sa Txizimu.” Txivangelo nguko Jehovha a nga thumisa Jesu ti to e hi khulula ka wukhumbi wa txionho ni lifo, se athu hi lava ku mthumela wutomi wathu wotshe.

12. Ngu txihi txikombiso atxi Nowa ni mwaya wakwe va nga hi vekela txona?

¹² Nzila ya yinene ngutu yo thumisa mkhululeko wathu, ngu thumisa mkama ni mtamo wathu ti to hi thumela Jehovha mbimo yotshe. Kumaha toneto ti na hi vhikela ka kuleka makungo a timhaka ta mafu ni minavelo yathu si si ve sa lisima ngutu ka wutomi wathu. (Vagalatiya 5:16) Alakanya ngu ti Nowa ni mwaya wakwe va nga maha. Vona va ti hanya ka mafu aya ma ku ni mahanyelo o biha. Kambe vona kha va etetela makungo ni mahanyelo awe. Vona va sawute kuzumba va di ñolekile ngu mthumo wu va nga rumwa ngu Jehovha.  Va akile ngalava, ve sengeleta sakudya sawe ni sa sihari, ve tshumela ve gela vathu ta ku ta ka ndambi. “Nowa a to maha toneto; totshe ti Txizimu txi nga mruma, ene a ti mahile.” (Genesisi 6:22) Va wuyetwe ngu txani? Ene ni mwaya wakwe va hulukile ka kuloviswa ka mafu ale.​—Vahebheru 11:7.

13. Nji txani atxi Jehovha a nga hi ruma?

¹³ Nji txani atxi Jehovha a nga hi ruma kumaha nyamsi wa ditshiku? Aku hi ku vagondiswa va Jesu, ngu txhumayela. (Lera Luka 4:18, 19.) Nyamsi, Sathani a vhate maso a vathu vo tala se kha va ti woni ti to nzikarawa sa wukhongeli wa makuhu, tithomba ni matsimbitiselo a tipolitika. (2 Vakorinto 4:4) Kufana ni Jesu, hi ni lungelo yo vhuna vathu ti to ve ziva Jehovha ni ku m’khozela, Txizimu txa mkhululeko. (Matewu 28:19, 20) Kutxhumayela vamwani kha ti hehuki. Ka makhalo mamwani, vathu kha va na mhaka ni kuziva ta Txizimu, vamwani va tshumela ve henya hi txi va txhumayela. Kambe aku Jehovha a nga hi ruma kutxhumayela, hi nga ti wotisa tiya: ‘Ina na thumisa mkhululeko ti to ni engetela mthumo wangu ka Jehovha?’

14, 15. Wungi wa vathu va Jehovha va sawute kumaha txani? (Wona mfota wu wu ku makhatoni.)

¹⁴ Ta hi tsanisa kuwona ti to wungi wa vathu va Jehovha va ti tumbute ti to magwito a mafu ma hafuhi ngutu. Se va hehukisa wutomi ti to ve bela ka wunyaphandule. (1 Vakorinto 9:19, 23) Vanyaphandule vamwani va thumela ka mabanza awe kasi vamwani va ya vhuneta ka ya ma ku ni txilaveko. Ka mtxhanu wa malembe ya ma nga pinda, vanathu vo pinda 250.000 va ve vanyaphandule. Konkuwa ku ni vanyaphandule va mbimo yotshe vo pinda 1.100.000. Hi nga wona kutsakisa ka tona ngako vo tala va txi thumisa mkhululeko wawe ti to ve thumela Jehovha ngu nzila yiya!​—Masalmo 110:3.

¹⁵ Nji txani txi nga va vhuna kuthumisa mkhululeko wawe ngu wutxhari? Alakanya ngu John ni Judith, ava se ku nga pinda 30 wa malembe va txi thuma ka matiko o hambana-hambana. Vona va wombile ti to mbimo yi txikolwa txa mthumo wa wunyaphandule txi nga khata ngu 1977, vagondi va kuzetilwe ti to ve ya ka makhalo aya ku ku ni txilaveko txa hombe. Ti to John ni Judith ve hokelela makungo onewo, ti lavile ve hehukisa wutomi wawe. Ngu toneto John a txitxile mthumo wakwe. Vona va yite ve ya txhumayela ka matiko mamwani. Nji txani txi nga va vhuna kuxula sikarato so fana ni kugonda lidimi limwani ni kutolovela mdhawuko ni matxelo o hambana ni a ditikoni kwawe? Va mahile mkombelo ka Jehovha ni kuthemba ti to a na va vhuna. Ka malembe ya va ku nawo va txi thumela Jehovha va tipfisa kutxani?  John a khene: “Ni tipfite ni di dhupete ka mthumo wa wunene ngutu ka yotshe yi ni yi zivako. Jehovha a vite wa ditshuri kwangu ni ku va tate ngu nzila yo nem ni si khali ku yi alakanya. Konkuwa se na yi pfisisa kwati txhamuselo ya Jakobe 4:8: “Tshuketani hafuhi ka Txizimu, kasi ni txona txi na tshuketela hafuhi kwanu.” Ni ti ti ziva ti to ni mani ati ni nga ti ti lava, i ku txikongomelo txo tsakisa ka wutomi.”

16. Vamwani va wu thumisisile kutxani mkhululeko wawe ngu wutxhari?

¹⁶ Vamwani, kufana ni John ni Judith, va nga va vanyaphandule ngu mbimo yo lapha. Vamwani va nga phandula mbimo ya yidotho ngu mhaka ya siemo sawe. Kambe vamwani va nga tiningetela ka mthumo wo aka ha mafuni kotshe. Ngu txikombiso, vanathu va txisikati va kona mu ka 27.000 va yite ve ya vhuneta ka kuaka mzinda wa mafu otshe khe Warwick, Nova York. Vamwani va ti ya heta mavhiki mambidi, vamwani mitximanyana, se vamwani dilembe mwendo kupinda. Wungi wa vanathu vonevo va mahile mizamo ya hombe ti to ve ya thuma Warwick. Vona nzikombiso sa sinene sa vathu va va nga thumisa mkhululeko wawe ti to ve dhumisa Jehovha, Txizimu txa mkhululeko!

17. Ngako hi txi thumisa mkhululeko wathu ngu nzila ya yinene, ngu yahi makatekwa aya hi nga ma manako?

¹⁷ Ha bonga nguko hi zivako Jehovha ni kuva ni mkhululeko awu hi wu manako ngu ku m’khozela. He kombiseni ngu ti hi tisawulako ti to mkhululeko wuwa mbwa lisima. Hahanze ko wu thumisa ngu nzila yo biha, he wu thumiseleni ngutu ti to hi thumela Jehovha ngu ha hi nga kotako ngu kona. Ngu toneto, hi na mana makatekwa aya Jehovha a nga ma thembisa, mbimo yi ku no hetiseka wuprofeti wu wu ku: “Sona si na poniswa ka wukhumbi wa lifo, kasiku si sikota kuwulela mfumoni ka wudhumo wa vanana va Txizimu.”​—Varoma 8:21.