Mwanathu Wiston, hi nga hi gela u di manisile kutxani ditshuri.

Ni velekilwe Queensland ka ditiko da Australia, vaveleki vangu va si yi beli yo khongela. Aku hi nga kulelanyana txitingani ti txi kala kuziva vathu vamwani i si nga maxaka angu. Mbimo yi ni ngadi 12 wa malembe ni khatile kuxota Txizimu. Ni ti maha mikombelo ni kombela kuziva ditshuri ngu txona. Ngu kutsimbila ka mbimo ni rurile ni ya khe Adelaide, Austrália. Ni ti ni 21 wa malembe mbimo yi ni nga ya Sydney amu ni nga ya ziva kona Pamela, ene a ni gete ngu sengeletano yo kari yi yi nga ti ti gela ku khene vathu Britânia va dhawuka ka liveleko la Israyeli. Tihunzu toneto va khona ngu ti ta digumi ti nga ti lumba mfumo wu wa wuphemba wa Israyeli ti ti nga ya wukhumbini ka Bhabhilona ngu kona mu ka dilembe da wu 700 na Jesu a si se velekwa. Se ni ti tshumete Adelaide, ni ti ya maha txiwotiso txonetxo ka mthumi kulothi awu a nga ti gonda Bhiblia ni Tifakazi ta Jehovha. Msana ko va hi di bhute maworanyana mayelano ni ti Tifakazi ta Jehovha ti kholwako ka tona, ni ti woni to mkombelo wangu wu ni nga maha ni di ngadi mdotho wu txo xamulwa. Ni txo khata kugonda ditshuri mayelano ni Txizimu ni Mfumo wa txona. Se ni ti mani “dhayimana yimweyo ya dibhindu da hombe.”—Mat. 13:45, 46.

Mwanathu Pamela, nawe hi nga hi gela, u yi manisile kutxani dhayimana yiya ya hombe?

Ani ni kulete ka didhoropa da Coffs Harbour khe Nova Gales ka wulambwe, vaveleki vangu i ti vakhongeli. Va papa ni va vhovho va ti tumela tigondo ta sengelatano yile yo khene vathu va Britânia va dhawuka ka liveleko la Israyeli. Tindiyangu, vakoma vangu ni nani hi kulisilwe hi txi kholwa ti to Txizimu txi tsakela  vathu va mdhawuko wa Britânia. Ani ni si kholwi toneto ni ku ni ti nga di ni nzala ya sakudya sa moya. Mbimo yi ni nga ti ni 14 wa malembe ni bete ka titxhetxhe to tala to fana ni Anglicana, Baptista ni Igreja Adventista do Sétimo Dia. Hambiketo, nzala ya moya yi simamile.

Vaveleki vangu va rurile ve ya Sydney, ni ti ya manana ni Winston a nga ti maferiyani. Nga ha a nga womba ngu kona, mabhulo athu a wukhongeli ma hi mahile hi za hi gonda ni Tifakazi ta Jehovha. Kukhukhela ka mbimo yoneyo, ka mapasi ya Winston a nga ti ni bhalela a ti womba-womba ngutu ngu Bhiblia! Kambe, ani ni si renderi ngu toneto. Ngu kutsimbila ka mbimo ni khatile kupfisisa ditshuri.

Ngu 1962 ni rurile ni ya Adelaide kasi ku ni ya maneka hafuhi ni Winston. Ene a mahile malulamiselo o ni zumba ni mpatwa wumwani wa vanathu i nga ti Thomas ni Janice ava i nga ti varumiwa Papua-Nova Guiné. Vona va ni kombile wuxinji wa hombe ngutu, ve tshumela ve ni vhuna ngu didhawa da moya, mbimo yoneyo ni to kova ni 18 wa malembe dwe. Ngu mbimo yoneyo ni khatile kugonda ditshuri ni tshumela ni tsaniseka ti to se ni mani ditshuri. Msana kova hi di txhadhile hi khatile kuthumela Jehovha ngu kutiningela, hambiko hi nga ti manana ni sikarato, mthumo wathu ka Jehovha wu hi vhuni kuninga lisima dhayimani yi hi nga ti yi mani.

Mwanathu Winston, hi nga hi gela makhato a mthumo wako ka sengeletano ya Jehovha.

Ku di pindile mbimonyana hi di txhadhile Jehovha a khatile ku hi ‘tulela ditimba da hombe’ ngu ku hi ninga siavelo so sawuleka. (1 Vak. 16:9) Ditimba do khata hi kombilwe ngu mwanathu Jack Porter, awu a nga thuma ka dibanza dathu kota muwoneleli wa txigava. Konkuwa, ene a thuma kota txiro txa Komisawu ya Didhavi ya Australásia. Jack ni Roslyn va hi kuzetete ku va nyaphandule va mbimo yotshe, hi hetile mtxhanu wa malembe hi di va nyaphandule. Mbimo yi nga ti ni 29 wa malembe hi rumetwe ku ya thumela ka matiko ya linene la Pacífico ka wulambwe aya ma nga ti woneletwa ngu Bhetele ya Fiji. Matiko oneyo a sitondolo i ti Samoa Americana, Samoa, Kiribati, Nauru, Niue, Toquelau, Tonga, Tuvalu ni Vanuatu.

Ka masiku oneyo, vathu va va nga ti zumba ka sitondolo simwani va si woni Tifakazi ta Jehovha ngu nzila ya yinene, ngu toneto ti txi lava hi va ni wutxhari. (Mat. 10:16) Mabanza i ti madotho, ngu toneto ti txi karata kumana ko otela kona. Se hi ti kombela kuzumba ni vathu va i nga ti si nga Tifakazi, ni ku vona va txi hi amukela.

Mwanathu Winston, awe wa wu dhunda mthumo wa wuhunduluxeli, hi nga hi gela, ngu kutxani u txi wu dhunda?

Ku ni mbimo yi ka ditiko da Tonga vanathu va nga ti kova ni siphephana ni sibhukwana basi ka mthumo wa thembwe ngu lidimi la Tonganês i ku lidimi la Polinésia. Se, va ti thumisa dibhuku da A Verdade Que Conduz à Vida Eterna ngu lidimi la Txingiza. Ngu mhaka yeto, ka txikolwa txa madhota txi hi nga va natxo, madhota mararu aya ma nga txi ketikela ka Txingiza ma tumete kuhunduluxela dibhuku donedo ngu Tonga. Pamela a kopiyarile ngu mtxhini e di rumela Bhetele ka Estados Unidos kasi ku di ya ganjwa. Mthumo wotshe wu tekile 8 wa mavhiki. Hambiku wuhunduluxeli wa kona wu nga ti sa tshura ngutu, dibhuku diya di vhunile vathu vo tala kugonda ditshuri. Ani ni Pamela kha hi nga vahunduluxeli, kambe kuva hi di patekile ka mthumo wuwa ku hi mahile hi wu dhunda wuhunduluxeli.

Mwanathu hi nga hi gela ti to wutomi wu ti njani ka matiko a linene la Pacífico u txi wu dinganisa ni wutomi wa Australia?

Wutomi ka matiko a Pacífico wa hambana ni Austrália. Ka matiko o tala hi txi wonisana ni  kudyiwa ngu titshuna, kuhisa ngutu, makonzo, malwati ni kupwata sakudya. Hambiketo, ku txi swa ditambo hi txi ya gee hi txi wonetela linene hi di ka nyumba ya mdhuti i ku tinyumba to tshulelwa ngu mwasi ti ti akwako ka matiko a Polinésia. Ngu masiku ya mtxima wu nga txi woninga kwati ha ko za ti txi koteka kuwona mikhokho, hi txi wona kutshura ka linene mbimo yi mtxima wu wonengetako mati. Timbimo toneto to tsakisa ti txi hi kuzeta kukhongela ni kualakanyisisa hi si zumbeli kudila dila.

Hi ti dhunda ngutu vanana, vona va ti hi tsakela aku va nga ti hi wona hi di valungu. Mbimo yi hi nga ti pfuxela ka ditiko da Niue, txifanyana tximwani txi gwesile misisi ya Winston txi txi khene, “U ni matoya o tshura.” Phela txi si khali kuwona mlungu, se misisi yo nga yoneyo txi si ti zivi to txi nga khene intxani!

Ti txi hi pfisa kupanda kuwona wusiwana awu vathu va nga ti hanya ka wona. Vona va ti zumba ka makhalo o tshura kambe va si nga ni sibhejela hambi mati o basa o sela. Hambiketo, vanathu va si na mhaka, vona se va ti tolovete wutomi wonewo. Vona va txi eneliseka ngu kuva ni maxaka awe, kuva ni wukhalo wo khozela ka wona ni ku va ni lungelo yo dhumisa Jehovha. Txikombiso txawe txi hi vhuni kuziva ati i ku ta lisima ni kuhehukisa wutomi wathu.

Mwanathu Pamela, aku mbimo yimwani u nga zumba ka makhalo aya ti nga ti lava u ti bhikela ngu nzila yi u nga mbi yi tolovela, u ti kotisile kutxani?

Na bonga tate wangu wu a nga ni gondisa timhaka ta tingi to fana ni kuziva kudhivela mndilo ngu tikhuni kasi kumana kubhika, ni kuziva kuhanya wusiwanani. Dikhambi dimwani hi endete ditiko da Kiribati, hi ti ya zumba ka nyumba yo tshulelwa ngu mwasi, ya diseta do mahwa ngu misengele yi di kopotwe hahatshi ngu makodo. Ti to ni bhika ni txi dhivela mndilo amu ka diphala, tikhuni ta kona i ti makhoboto (makamba a makhokho). Mati ni txo ma folela govani ni vavasikati vamwani va wukhalo wule. Marekelo a kona a mati va ti thumisa txikelelo txi txi nga ti sungilwe ngoti ha ka ndonga ya ma 2 metru. Vona va txi tekeletana, mmwani ni mmwani a txi ti rinzela txikelelo txakwe nem va si phazami. Txikelelo txi txi tekela ku ya reka mati. Ni ti ti wona ti si karati, kambe makuhu! Ka di khambe dangu, ni rinzile txikelelo makhambi o tala, kambe txi txo ya deluka basi! Va to ni seka, se mmweyo wawe a ti ta ni vhuna. Va ti ni vhuna ngutu makhambi o tala.

Ha ti ziva ti to mi txi tsakete txiavelo txanu ka matiko a sitondolo sa Pacífico. Ina u nga tsakela ku hi gela to manana nato?

Winston a khene: Ti teka mbimo ti to u tolovela mikhuwo yo kari. Ngu txikombiso, vanathu va txi hi ninga sakudya va ti tolovela ku hi phamela sotshe. Kha ha tekela ku ti tumbula ti to hi ti fanete ku va siyela nivona. Se hi txo dya sotshe! Kasi, mbimo yi hi nga ta ti ziva hi ti va siyela sakudya. Hambiko hi nga theletela mati, vanathu va txi hi pfisisa. Va txi tsaka ngutu ku hi wona mbimo yi hi nga txi va endela kumbidi ngu dilembe ngu mavhiki o sawuleka. Hahanze kwathu vanathu va dibanzani va si zivi Tifakazi timwani ta matiko mamwani.

Maendo athu ma ti tshumela me ningela wufakazi wa wunene. Vathu vo tala va ti pimisa ti to wukhongeli wathu vanathu va to wu sukela. Ngako va txi wona Tifakazi ta matiko mamwani ti txi endela vanathu, va ti ti wona to vanathu va lumba sengeletano ya ha mafuni kotshe.

Pamela a khene: Timwani ti ni ti khumbulako to tsakisa ngutu ngu ti ti nga ni humelela ka ditiko da Kiribati, ku ti ni dibanza adi di nga ti ni vahuweleli va vadotho ngutu. Ku ti kova ni didhota dimwedo basi i nga ti Itinikai Matera, awu a nga ti maha totshe kasi ku hi khatalela. Ditshiku dimwani a tile ni txirema txi nga di kova ni dianda dimwedo dwe e ta hi ninga.  Phela ka mbimo yoneyo ti txi kala kumana dianda. Wuha wonewo wa wudotho wu hi gwesile ngutu.

Mwanathu Pamela, mbimo u nga tshumela ngu msana, nji txani txi nga vhuna ka txikarato txonetxo?

Ni mani txirumbo ngu 1973 mbimo hi nga ti thumela ka matiko a Pacífico wa wulambwe. Se ti lavile hi tshumela hi ya Austrália amu ni nga manana ni txikarato txo tshumela ngu msana ku di pindile mune wa mitxima. Winston nene a ti pandiseka ngutu. Ni zumbile mbimo yo tala ni txi pandiseka, kambe kukhukhela ni nga gonda A Sentinela de 15 de abril de 2009. Msungo wu wu ku khene: “Existe esperança de ressurreição para um bebê que morre no ventre da mãe?” ka siwotiso sa vagondi. Msungo mhaka wuwa wu hi vhuni ti to hi leka timhaka manzani ka Jehovha ni ku ene mbimo yotshe a maha ti i ku ta tinene. Jehovha a na ta fuwisa kupanda kotshe ku ku tiswako ngu mafu awa mbimo yi a no ruma Jesu ku ta “fuvisa mithumo ya Sathani.” (1 Joh. 3:8) Hi vhunwi kuninga lisima “dhayimana” yi hi nga ti yi mani ngu kuva vathu va Jehovha. Wutomi wathu nem wu si tsakisi i si nga mhaka ya kuziva themba yi hi nga vekelwa yona ngu Txizimu.

Msana kova hi di emilenyana mthumo wa mbimo yotshe ngu mhaka ya kuluzekelwa ngu mwanana, hi tshumelete ka mthumo wathu. Hi thumile mitximanyana Bhetele ka Austrália ni ku hi tshumete ka mthumo wa wuwoneleli. Ngu 1981 msana kova hi di thumile mune wa malembe Nova Gales do Sul ni Sydney, hi rambilwe ku ya thumela Bhetele ka Austrália kala nyamsi.

Mwanathu Winston, kuva u di thumile ka matiko a Pacífico wa wulambwe ina ti kuvhuni ka mthumo wako kota txiro txa mmidi wa komisawu ya Bhetele?

Ina ti ni vhunile, nguko txo khata Bhetele ya Austrália yi kombetwe ku yi woneleta Samoa Americana ni Samoa. Se, Bhetele ya Nova Zelândia yi patanisilwe ni ya Austrália. Se konkuwa Bhetele ya Australásia yi pata matiko a Austrália, Samoa Americana, Samoa, sitondolo sa Cook, Nova Zelândia, Niue, Timor-Leste, Toquelau ni Tonga. Wungi wa matiko oneyo ni ve ni lungelo yo ma endela kota muemeli wa didhavi. Kuva ni di thumile ni vanathu vale vo thembeka ka matiko ale ti ni vhunile ngutu, ngutu-ngutu aku ni va thumelako ni di Bhetele.

Ngu magwito ni nga womba ku ani ni Pamela hi ti pfisisile ti to hi nga vathu va hombe dwe va xotako Txizimu hambi va vadotho, hi ti woni ngu ngathu. Va vadotho ni vona va nga xota “dhayimana yimweyo ya dibhindu da hombe” hambi va mwayani va si tsakeli. (2 Vafu. 5:2, 3; 2 Mak. 34:1-3) Kha ditshuri, Jehovha Njizimu txa lirando ni ku a lava ku votshe ve mana wutomi mwendo mbadotho mwendo mbahombe!

Mbimo yi hi nga khata kuxota Txizimu 50 wa malembe msana, ni si pimisi ti to kuxota koneko ku ndi na ni yisa hani. Ditshuri mayelano ni mfumo wa Txizimu, ngu ditshuri i dhayimana ya lisima ngutu! Se hi ti emisete kusimama hi xayisa dhayimana yathu la lisima!