1. Ngu tihi ati otshe malanda a Txizimu ma ti lavako? Ngu kutxani? (Wona mfota wa kapa.)

JESU KRISTU a gete vagondiswa vakwe a txi khene “tsulani mi txi ya phindula vamatiko votshe ve maha vagondiswa.” (Mat. 28:19) Otshe malanda a Txizimu o thembeka ma lava kugonda nzila yo ‘hetisisa’ kwati mthumo awu ma nga ningwa. (2 Tim. 4:5) Phela, mthumo wuwa mbwa lisima ngutu, ni ku mbwa txikuluveta kupinda yotshe mithumo ka wutomi wathu. Kambe, mbimo yimwani ti nga karata kumana mbimo yo txhumayela nga ti hi nga ti ti lavisa tona.

2. Ngu sihi sikarato si si nga khulumetalako mthumo wathu?

² Ku ni mithumo yimwani ya lisima ayi ti nga lavako hi yi maha. Ti nga maha ti txi lava hi heta mbimo yo tala ti to hi mana txo ti xayisa kumweko ni timwaya tathu. Ti nga maha hi di ni wutixamuleli wa mwaya, malwati, dikhodho mwendo tinyamakazi ni kukumba. Hi nga wu hetisisa ngu nzila yihi mthumo wathu hambi hi txi wonisana ni siemo soneso?

3. Mapswi aya ma ku ka Matewu 13:23 ma la kuwomba txani?

³ Ngako siemo sathu si txi hi dyela mbimo ayi hi nga yi hetako ka mthumo wa Jehovha, hi nga gumeni mtamo. Jesu a txi ti ziva ti to hotshethu kha hi na ku sikota kuveka mihando yo fana ka mthumo wa Mfumo. (Lera Matewu 13:23.) Ngako hi txi maha ati hi ti kotako, Jehovha wa ninga lisima totshe ti hi mahako ka mthumo wakwe. (Vaheb. 6:10-12) Mbimo yimwani hi nga mana mkhanjo wo andisa mthumo wathu. Konkuwa he xolisiseni ti to hi  nga wu thangetisa ngu nzila yihi mthumo wa Jehovha, hi hehukisa wutomi wathu, ni tinzila to tshukwatisa matxhumayelelo athu ni wusikoti wathu. Kambe txo khata, ti womba txani kuhetisisa mthumo kha kwati?

4. Ti womba txani kuhetisisa kha kwati mthumo wo txhumayela?

⁴ Ngu mapswi o koma, kasi ku hi hetisisa kwati mthumo wathu, ti lava hi zama kutxhumayela ngutu ni kugondisa nga ti hi nga ti kotisako tona. Kambe toneto kha kuwombwi mtengo wa mbimo yi hi yi hetako. Txa lisima ka Jehovha njivangelo txi txi hi mahako hi txhumayela. Aku hi randako Jehovha ni muakelani wathu, hi maha mthumo wa Wukristu * ngu mbilu yotshe. (Marku 12:30, 31; Vakl. 3:23) Kuthumela Jehovha ngu mbilu yotshe ti womba ku ti ningela ngu mtamo wathu, hi maha ati hi ti kotako ka mthumo wakwe. Ngako hi txi ninga lisima lungelo yathu yo txhumayela, hi zama kuwomba-womba ni vathu vo tala nga ti hi nga ti kotisako tona.

5-6. M’thu wu a si ngako ni mbimo yo tala a nga thangetisa mthumo wo txhumayela ngu nzila yihi? Womba txikombiso.

⁵ Alakanyisisa ngu txikombiso txiya: Mfana wo kari a dhunda kutxhaya vhiyola. Ene wa ti dhunda kutxhaya vhiyola yakwe mbimo yotshe. Se ngu kutsimbila ka mbimo e mana mthumo ka restaurante yo kari ti to e ya a txi txhaya ngu magwito ka mavhiki. Kambe male yi a holako yidotho. Se e mana mthumo wumwani ka txitolo ti to e thuma kukhukhela mvhulo kala wazixanu. Hambiku a hetako mbimo yo tala a txi thuma txitolo mapimo akwe ma ka wutxhayi. A pimisa ngu kutshukwatisa wusikoti wakwe ti to e va mtxhayi wa mbimo yotshe. Kambe, ene wa tsakela kutxhaya wutxenje hambiku a ku ni mbimo ya yidotho.

⁶ Ngu ha kufanako, ti nga maha u si nga ni mbimo ya yangi yo txhumayela. Kambe, kutxhumayela wa ti dhunda ngutu. Wa zama totshe ti to u tshukwatisa wusikoti wako kasi ku u gwesa timbilu ta vathu ngu mahungu a manene. Ngu ku va u di ñolekile ngutu ngu mithumo yimwani, ti nga maha u tiwotisa ku ina  ni nga sikota kuthangetisa mthumo wo txhumayela kani.

7-8. Hi nga ma etetelisa kutxani mawonelo a Jesu ngu mthumo wo txhumayela?

⁷ Jesu a hi vekete txikombiso txa txinene ngu mawonelo akwe ka mthumo wa Jehovha. Ka wutomi wakwe, txakwe i ti kutxhumayela Mfumo wa Txizimu. (Joh. 4:34, 35) A dhawute makenekene a txi tsimbila e txhumayela. Mbimo yotshe a ti lava tinzila to bhula ni vathu mitini kwawe ni kumwani amu va manekako kona. Wutomi wa Jesu i ti kutxhumayela dwe.

⁸ Hi etetela txikombiso txa Jesu ngu kulava mikhanjo yo bhula ni vathu ngu mahungu a manene hani ni hani hi va manako. Hi tiemisete kuluza simwani ti to hi txhumayela. (Marku 6:31-34; 1 Pedro 2:21) Vamwani dibanzani va si kota kuthuma kota vanyaphandule vo sawuleka, va mbimo yotshe mwendo vo vhuneta. Vamwani va gondile lidimi limwani mwendo ve rura ve ya amu ku ku ni txi laveko txa vatxhumayeli. Kambe, mthumo wa hombe wo txhumayela wu mahwa ngu vahuweleli ava va si si kotiko kuva vanyaphandule ava va mahako ati va ti kotako. Ku si nga ni mhaka ni siemo sathu, Jehovha kha hi geli kumaha ati hi no mbi ti kota kumaha. Ene a lava hi tsaka ngu mthumo wuwa wo sawuleka hi txi txhumayela “evhangeli . . . ayi yi pfalisako Txizimu, i ku txisima txa makatekwa.”—1 Tim. 1:11; Dhewut. 30:11.

9. a) Paulo a wu thangetisisile kutxani mthumo wo txhumayela hambiku ti nga txi lava e thuma? b) Ngu yahi mawonelo a Paulo ngu mthumo wo txhumayela aya ma ku ka Mithumo 28:16, 30, 31?

⁹ Mpostoli Paulo a hi vekete txikombiso txa txinene ka mhaka yo thangetisa mthumo wo txhumayela ka wutomi wathu. Mbimo yi a nga ti Korinto ka liendo lakwe la wumbidi, a ti ni male ya yidotho se ti lavile e maha matenda. Kambe kumaha matenda i si nga tona ta lisima ngutu ka Paulo. Ene a ti ti thumela ti to e mana txo ti hanyisa ngu txona kasi ku e txhumayela Vakorinto mahungu a menene “mahala.” (2 Vak. 11:7) Hambiku Paulo ti nga ti lava e maha mthumo wo tihanyisa, ene a ti simama e thangetisa mthumo wo txhumayela, ni ku a ti txhumayela sabbata yimwani ni yimwani. Mbimo yi txiemo txi nga tshukwala a txi khatalela ngutu mthumo wo txhumayela. Paulo a txi “ti ningetela kugondisani ka dipswi tsena, e tsanisa masoni ka Vajudha ti to Mesiya ngene Jesu.” (Mith. 18:3-5; 2 Vak. 11:9) Msana keto, mbimo yi a nga ti khotetwe Roma kudingana malembe mambidi, Paulo a txhumayete ava va nga ti ta mu pfuxela e tshumela e bhala mapapilo. (Lera Mithumo 28:16, 30, 31.) Paulo a ti ti emisete kwa mbi leka txilo txi khulumetela wuthumeli wakwe. A ti khene: “Aku hi ku ni m’thumo wu hi nga ningwa . . . , kha hi gumi mtamo.” (2 Vak. 4:1) Kufana ni Paulo, hambi i di ti to ti lava hi thuma, hi nga simama hi thangetisa mthumo wo txhumayela ka wutomi wathu.

10-11. Hi nga wu hetisisa kutxani mthumo wo txhumayela hambi hi txi manana ni malwati?

¹⁰ Ngako hi si sikoti kutxhumayela ngu mti ni mti ngu mhaka ya tanga mwendo malwati, hi nga thuma ka mamahelo mamwani o txhumayela. Makristu a kale ma txhumayete vathu hani ni hani va nga ti kona. Va londote mikhanjo yo txhumayela ditshuri ngu mti ni mti, ha kubasani ni ngu txitshuketi, hani ni hani aha vathu “va nga ti dhuka va txi maneka kona.” (Mith. 17:17; 20:20) Ngako ti txi hi karatela kutsimbila, hi nga lava wukhalo wo tuleka ti to hi txhumayela ava va pindako. Hi nga txhumayela ngu txitshuketi, ngu mapapilo mwendo  ngu telefone. Vahuweleli vo tala ava va ku ni sikarato sa malwati mwendo sa tanga, va tsaka ngu mamahelo onewo o txhumayela.

¹¹ Ku si nga ni mhaka ni sikarato sa sako, u nga sikota kuhetisisa kwati mthumo wako. Tshumela u wona txikombiso txa Paulo. A ti khene: “Totshe na ti kota, ngu kutsaniswa ngu wule a ni ningako mtamo.” (Vaf. 4:13) Paulo a ti lava mtamo mbimo yi a nga lwala a di ka liendo lakwe la wurumiwa. Ene a txhamusete Vagalatiya a txi khene: “Malwati ma nga ni ninga mbimo ya kuta khata ku mi txhumayela Evhangeli.” (Vag. 4:13) Ngu kufana, nawe u nga thumisa mkhanjo wu u wu manako ngu ku va u txi lwala ti to u txhumayela vamwani vo fana ni vadhokodhela. Wungi wa vathu vonevo va tolovela ku va mthumoni mbimo yi hi va endelako mitini kwawe.

12. Ti womba txani ku diso dathu di “wonetela txilo tximwetxo”?

¹² Jesu a ti khene: “Dilambu da mmidi ngu diso. Ngu konaho, ngako diso dako i di dinene [di txi wonetela txilo tximwetxo, NM], wotshe mmidi wako wu na tala ngu liwoningo.” (Mat. 6:22) A ti la ku khene txani ngu toneto? A ti womba ti to kulava hi hehukisa wutomi wathu mwendo kuwonetela txilo tximwetxo, hi si tsulupetelwi ngu txilo. Jesu apune a vekile txikombiso ngu kuthumisa wutomi wakwe ka kutxhumayela, se a gondisile vagondiswa vakwe kuveka mapimo awe ko thumela Jehovha ni Mfumo Wakwe. Hi etetela txikombiso txa Jesu ngu kuteka mthumo wa Wukristu kota wona wa lisima ka wutomi wathu, ‘kukhata hi lava Mfumo wa Txizimu ni kululama ka txona.’—Mat. 6:33.

13. Hi nga maha txani ti to hi veka diso ka mthumo wa Wukristu?

 ¹³ Nzila yimwani yo veka diso dathu ka mthumo wo txhumayela ngu kuhehukisa wutomi kasi ku hi mana mbimo yo vhuna vamwani ve ziva Jehovha. * Ngu txikombiso ina u nga hungula mawora o thuma ti to u mana mbimo yo huma thembwe hagari ka divhiki? Mwendo u nga pumba mbimo yi u yi hetako ka timhaka to sakana ni timwani ti ti nga ku hetelako mbimo?

14. Ngu tihi ati mpatwa wumwani wu nga maha ti to wu kota kuheta mbimo yo tala ka mthumo wo txhumayela?

¹⁴ Wona ti Elias i ku didhota ni msikati wakwe va nga maha. Va khona: “Hi si na ku sikota ku tekela kubela ka wunyaphandule, kambe ku ti ni to tala hi nga ti maha ti to hi heta mbimo yo tala hi txi txhumayela. Se hi mahile ta tidotho ati ti ndi no engetela mbimo yathu yo txhumayela. Ngu txikombiso, hi pumbile asi hi nga ti xava, mbimo yo hungala, hi kombela valungu vathu ti to ve hi hungulela mbimo mthumoni kasi ku hi txhumayela ngutu. Toneto ti mahile hi sikota kutxhumayela ni minova, hi tsimbitisa sigondo, hi tshumela hi maneka thembweni hagari ka divhiki kumbidi ngu mtxima. Hi mani litsako la hombe!”

15-16. Ngu kuya ngu 1 Timoti 4:13, 15 hi nga tshukwatisisa kutxani wusikoti wathu kota vatxhumayeli? (Wona dibhokiso di di ku “ Ni nga maha txani kasi kutiningetela ka mthumo wa Wukristu?”)

¹⁵ Nzila yimwani yo hetisisa kwati mthumo wathu, ngu tshukwatisa wusikoti wathu wo txhumayela. Vathu vamwani ava va ku ka mithumo yo kari, kulaveka ku ve simama ve gonda ti to ve tshukwatisa wuzivi ni wusikoti  wawe. Toneto ta laveka ka vahuweleli va Mfumo. Ti lava hi simama hi gonda nzila yo tshukwatisa wusikoti wathu wo txhumayela.—Mav. 1:5; lera 1 Timoti 4:13, 15.

¹⁶ Hi nga wu tshukwatisisa kutxani wusikoti wathu ka mthumo wo txhumayela? Ngu kulondisela kwati sileletelo asi hi si manako divhiki ni divhiki ka Mitshangano ya mahanyelo a Wukristu. Mitshangano yiya ya hi vhuna kutshukwatisa wusikoti wathu wo txhumayela. Ngu txikombiso, mbimo yi mtsimbitisi wa txikolwa a ningelako silayelo ka vagondi, hi nga wona sileletelo asi si nga hi nga hi vhunako hi di kutxhumayelani. Hi nga thumisa sialakanyiso soneso mbimo yi hi bhulako ni m’thu ngu mahungu a manene. Hi nga tshumela hi kombela muwoneleli wa mtxawa wathu wa thembwe ku e hi vhuna mwendo kuthuma nayo. Hi nga kombela kambe vahuweleli vamwani ava va ku ni wusikoti, vanyaphandule, mwendo muwoneleli wa txigava. Mbimo yi hi yako hi txi ti toloveta kuthumisa Farameti yo Gondisa hi na mana litsako hi txi txhumayela ni kugondisa.

17. U na mana txani ngako u txi hetisisa kwati wuthumeli wako?

¹⁷ I lungelo ya hombe aku Jehovha a nga hi tumelela ti to hi va “vavhuneteli” vakwe! (1 Vak. 3:9) Ngako u txi lava ati i ku “ta tinene ngutu” ni kuveka mapimo ka mthumo wa Wukristu, u na ‘khozela MKOMA ngu litsako.’ (Vaf. 1:10; Mas. 100:2) Kota mthumeli wa Txizimu, tsaniseka ti to txona txi na kuninga mtamo awu u wu lavako ti to u hetisisa wuthumeli wako ku si nga ni mhaka ni sikarato asi u mananako naso. (2 Vak. 4:1, 7; 6:4) Ku si nga ni mhaka ni ti to siemo sako sa kutumelela mwendo kha si kutumeleli kumaha to tala ka mthumo wo txhumayela, u nga “sikota ku ti dhumisa” ngu litsako ngako u txi tiningetela ngu mbilu yotshe ko txhumayela. (Vag. 6:4) Mbimo yi u hetisisako kwati mthumo wako, u kombisa to wa randa Jehovha ni vathu kuloni. “Ngako u txi maha toneto, u na ti hanyisa awe ni va va ku engisako.”—1 Tim. 4:16.