1-2. Ngu kutxani Jesu a nga ti karatekile?

KA DITSHIKU dakwe do gwitisa ha mafuni, Jesu a ti karatekile. Ka ditshiku donedo a ndi na dawa ngu sigevenga. Jesu a si thavi nguko a ndi no dawa dwe. Ene a ti mu randa ngutu Tate wakwe ni ku a ti lava kumaha ati ti mu tsakisako. Ene a txi tiziva ti to ngako a txo tsanisela sikarato asi a ndi no manana naso ngu kuthembeka, a ndi na basisa ditina da Jehovha. Jesu a ti va dhunda vathu, se a ti tiziva ti to athu hi ndi no mana lungelo ya wutomi wo mbi guma ngako a txi tsanisela kala kuza a txi fa.

² Hambiku Jesu a nga ti ka sikarato sa hombe, ene a ti ni kudikha. A gete vapostoli vakwe a txi khene: “Na mi ninga kudikha kwangu.” (Joh. 14:27) Jesu a ti ni “kurula ka Txizimu” ti wombako kurenga mapimo aku m’thu a ku manako ngu kuva ni wuxaka wa wunene ni Jehovha. Kudikha koneko ku mvhunile ku e zumba a si karateki.—Vaf. 4:6, 7.

3. Hi na xolisisa txani ka msungo wuwa?

³ Awalo ni wammweyo kwathu a no thuka e manana ni sikarato so fana ni si Jesu a nga wonisana naso. Kambe votshe valondeteli va Jesu va na manana ni siduko. (Mat. 16:24, 25; Joh. 15:20) Kufana ni Jesu mbimo yimwani hi na karateka. Hi nga maha txani kasi ku hi si tekelwi kudikha ngu mhaka ya kuvilela? Ka msungo wuwa hi na xolisisa timhaka tiraru ti Jesu a nga maha mbimo yi a nga ti ha mafuni, ni kutshumela hi wona ti to hi nga mu etetelisa kutxani mbimo yi hi mananako ni sikarato.

4. Ngu ku ya ngu 1 Vatesalonika 5:17 ngu sihi sikombiso sa ti to Jesu a khongete ngutu mbimo yi a nga ti ha mafuni?

⁴ Lera 1 Vatesalonika 5:17. Ka ditshiku dakwe do gwitisa, Jesu a khongete ngutu. Mbimo yi a nga simeka txialakanyiso txa lifo lakwe, ene a khongelete dipawu ni vhinya. (1 Vak. 11:23-25) Na a si se khukha ka wukhalo wu va nga dyela ka wona Pasika, ene a khongete ni vagondiswa vakwe. (Joh. 17:1-26) Mbimo yi ene ni vagondiswa vakwe va nga hoka Mmangoni wa Olivheti, ene a khongete makhambi o tala. (Mat. 26:36-39, 42, 44) Ni ku, mapswi a Jesu o gwitisa na a si se fa, i ti mkombelo. (Luka 23:46) Jesu a khongete ka Jehovha mayelano ni totshe ati ti nga ti humelela ditshiku dile.

5. Ngu kutxani vapostoli va di gumetwe ngu txibindi?

⁵ Txivangelo tximwani atxi txi nga maha ti to Jesu e tsanisela ka sikarato sakwe, ngu ti to ene a ti kombela txivhuno ka Tate wakwe. Kasi vapostoli wona wusiku wule va tandekile kusimama ve maha mkombelo. Ngu toneto, mbimo yi txiduko txi nga bwaka, va gumetwe ngu txibindi. (Mat. 26:40, 41, 43, 45, 56) Ngako hi txi londisela txikombiso txa Jesu ni kusimama hi “khongela,” hi na sikota kuzumba hi di thembekile hambi hi txi manana ni sikarato. Hi nga kombela txani ka mkombelo?

6. Likholo li na hi vhunisa kutxani ti to hi va ni kudikha?

⁶ Hi txi maha mkombelo hi nga kombela Jehovha e hi ‘engetela likholo!’ (Luka 17:5; Joh. 14:1) Ti lava hi va ni likholo nguko Sathani a duka votshe ava va londetelako  Jesu. (Luka 22:31) Likholo li na hi vhunisa kutxani ti to hi va ni kudikha hambi sikarato si txo maha ngu kulondiselana? Ngako hi di mahile totshe ati hi ti kotako kasi ku hi wonisana ni txikarato, likholo li na hi vhuna kuleka mhaka manzani ka Jehovha. Se, aku hi thembako ti to ene wa sikota kululamisa mhaka ku hi pala, mialakanyo yathu ni mbilu yathu si na va ni kudikha.—1 Pedro 5:6, 7.

7. U gonda txani ka txikombiso txa Robert?

⁷ Mkombelo wu hi vhuna kuva ni kudikha ka mbiluni ku si nga ni mhaka ni sikarato si hi mananako naso. Wona txikombiso txa Robert wa kona mu ka 80 wa malembe, i ku di didhota. A khene: “Txialakanyiso txa Vafilipiya 4:6, 7 txi ni vhunile kuwonisana ni sikarato so tala ka wutomi wangu. Ni ti ni sikarato sa wusiwana. Ku ve ni mbimo yi ni nga luzekelwa ngu lungelo yo thuma kota didhota.” Robert a vhunwi ngu txani ti to e simama eva ni kudikha ka mbilu? A khene: “Ni txi za ni khata kuvilela, no maha mkombelo. Na tiwona ti to ngako ni txi maha ngutu mkombelo, ni mana ngutu kudikha ka mbilu.”

8. Ngu kuya ngu Johani 8:29, ngu txihi txivangelo tximwani txi nga vhuna Jesu ku e va ni kudikha ka mbilu?

⁸ Lera Johani 8:29. Jesu a ve ni kudikha ka mbilu hambi mbimo yi a nga khata kuxaniswa nguko ene a ti tiziva ti to a ti tsakisa Tate wakwe. Ene a ti simama e engisa, hambi ti txi mu karatela. Ene a ti randa Tate wakwe ni ku wutomi wakwe wotshe a wu thumisile ka mthumo wa Jehovha. Na a si se ta ha mafuni,  ene i ti “m’gondiswa”, mwendo mthumi wa Txizimu wu a ku ni Wusikoti. (Mav. 8:30) Se mbimo yi a nga ti ha mafuni, ngu kuhiseka a gondisile vathu mayelano ni Tate wakwe. (Mat. 6:9; Joh. 5:17) Mthumo wonewo wu mu ningile litsako la hombe.—Joh. 4:34-36.

9. Kuñoleka ngu mthumo wo txhumayela ti hi vhunisa kutxani ku va ni kudikha ka mbilu?

⁹ Hi nga etetela Jesu ngu kuengisa Jehovha ni ‘kukhutala hi ya masoni ka mthumo wa Mkoma.’ (1 Vak. 15:58) Ngako hi txi “ti ningetela” ka mthumo wo txhumayela, hi nga va ni mawonelo a manene ngu sikarato sathu. (Mith. 18:5) Ngu txikombiso, ava hi va manako hi txi txhumayela mbimo yo tala va manana ni sikarato sa hombe ngutu kupinda sathu. Kambe, mbimo yi va gondako kuranda Jehovha ni kuengisa milayo yakwe, wutomi wawe wa tshukwala ni ku va mana litsako. Mbimo yotshe yi hi wonako toneto, hi va ni themba ya hombe ya ti to Jehovha a na hi khatalela. Se themba yoneyo yi hi vhuna kuva ni kudikha ka mbilu. Mwanathu mmwani wa txisikati awu a ti pfako i si nga wa txilo ni dikhodho da mialakanyo, a ti woni ti to eto ditshuri. A khene: “Ngako ni di ñolekile ngu mthumo wo txhumayela, ni tipfa ni rute ni kutsaka. Ni kholwa eto ngu ti to ni di thembweni, ni tipfa ni di hafuhi ni Jehovha.”

10. U gondile txani ka ti ti nga wombwa ngu Brenda?

¹⁰ Tshumela u wona txikombiso txa mwanathu wu a dhanwako ku i Brenda. Ene ni mwanana wakwe wa dihorana va xaniswa ngu malwati a hombe. Brenda a thumisa txitulu txa marodha, ni ku kha na mtamo. Ene a txhumayela ngu kubhala mapapilo, kambe ngako a txi tshukwala wa txhumayela ngu mti ni mti. A khene: “Neti ni nga pfisisa ti to ni na mbi kalamuka ka malwati angu, ni vekile mialakanyo yangu ka mthumo wangu wo txhumayela. Kutxhumayela ti ni maha ni si zumbeli kupimisa ngu sikarato sangu. Ni tikaratela kuveka mapimo angu ka kuvhuna ava va ku ka thembwe ya dibanza dathu. Eto ti zumbela ku ni kukhumbutisa themba ayi ni ku nayo ya mbimo yi yi tako.”

11-13. a) Vapostoli ni vamwani va ti kombisisile kutxani to i ti vangana va ditshuri va Jesu? b) Jesu a ti pfisile kutxani ngu txivhuno txa vangana vakwe?

¹¹ Mbimo yi Jesu a nga ti manana ni sikarato ka wuthumeli wakwe, vapostoli vakwe vo thembeka va kombisile to i ti vangana vakwe va ditshuri. Vona va ti londisa divingwa adi di ku kha dona: “Ku ni mngana wo thembeka ngutu kupinda mwanawe.” (Mav. 18:24) Jesu a ti va ninga lisima vangana vakwe. Ka mbimo yi a nga ti txhumayela ha mafuni, ni wammweyo ka vananda ni tindiyakwe va nga kholwa kwakwe. (Joh. 7:3-5) Ku ni mbimo ayi maxaka akwe ma nga pimisa ku wa xanga. (Marku 3:21) Kuhambana ni maxaka akwe, wusiku wu a ndi no fa ngu wona, Jesu a gete vapostoli vakwe vo thembeka a txi khene: “Anu mi vathu va va nga timisela kumweko ni nani ka sotshe siduko sangu.”—Luka 22:28.

¹² Mbimo yimwani vapostoli va txi ta ve maha to huma hanzila, kambe Jesu kha veka mialakanyo yakwe ka tiphazamo tawe, ene a ti wona likholo li va nga ti nalo kwakwe. (Mat. 26:40; Marku 10:13, 14; Joh. 6:66-69) Ka wusiku awu a ndi no dawa ngu wona, a gete vavamna vale vo thembeka ku khene: “Ni mi dhana ngu ditina da ku mi vangana,  nguko ni mi tulete totshe ti ni nga ti engisa ka Tate wangu.” (Joh. 15:15) Kha ti kanakanisi ti to vangana va Jesu va ti mu tsanisa ngutu. Jesu a mani litsako ka mthumo wakwe wo txhumayela ngu txivhuno atxi a nga txi mana kwawe.—Luka 10:17, 21.

¹³ Kuleka vapostoli, Jesu a ti ni vangana vamwani va majaha ni vavasikati ava va nga mu vhuna mbimo yi a nga ti txhumayela. Vamwani va mu rambile mitini kwawe ti to e mana so susula. (Luka 10:38-42; Joh. 12:1, 2) Vamwani va ti tsimbila nayo, ve tshumela ve mu ninga asi va nga ti naso. (Luka 8:3) Jesu a ti ni vangana va vanene nguko nene i ti mngana wa mnene kwawe. Ene a va mahete ta tinene ni kutshumela e va ñola ngu nzila yi a nga ti lava to ni vona ve mu ñola ngu yona. Jesu a ti hetisekile, kambe a kombisile kubonga txivhuno txa vathu vo mbi hetiseka. Kha ti kanakanisi ti to vona va mu vhuni kumana kudikha ka mbilu.

14-15. Hi nga va manisa kutxani vangana va vanene? Vona va nga hi vhunisa kutxani?

¹⁴ Vangana va vanene va na hi vhuna ti to hi zumba hi di thembekile ka Jehovha. Hi nga va manisa kutxani vangana va vanene? Ngu athu hi va mngana wamnene. (Mat. 7:12) Ngu txikombiso, Bhiblia yi hi kuzeta kuthumisa mbimo ni mtamo wathu ti to hi vhuna vamwani, ngutu-ngutu ava va “va ku si nga naso.” (Vaef. 4:28) Ina ku ni va u nga va vhunako dibanzani kwako? Ina u nga vhuna vanathu va va si ti kotiko kuhuma mtini ngu ku va yela txitolo? Ina u nga ninga so susula mwaya wu wu wonisanako ni txikarato  txa wusiwana? Ngako u txi sikota kuthumisa jw.org^® ni JW Library^® ina u nga vhuna vamwani dibanzani ti to ni vona ve mana tithomba ati ti manekako ka sona? Ngako hi txi ñoleka ngu kuvhuna vamwani, hi na mana litsako.—Mith. 20:35.

¹⁵ Vangana va na hi vhuna kusimama hi va ni kudikha ka mbilu ngako hi txi manana ni sikarato. Kufana ni Elihu awu a nga engisela Jobe mbimo yi a nga ti womba sikarato sakwe, vangana vathu ni vona va hi vhuna ngu ku hi engisela mbimo yi hi wombako matipfelo athu. (Jobe 32:4) Hi na mbi emela ti to vangana vathu ve hi mahela sisungo, kambe hi na va hi di txharihile ngako hi txi engisa txialakanyiso txawe txo seketelwa mu ka Bhiblia. (Mav. 15:22) I si ngeto dwe, kufana ni Mkoma Dhavhidha awu ngu kutiveka hahatshi a nga tumela txivhuno txa vangana vakwe, kha ha fanela ku ti kulisa hi lamba txivhuno txa vangana vathu mbimo yi hi ku ka txikarato txa wusiwana. (2 Sam. 17:27-29) Ngu ditshuri, vangana vonevo va vanene i ningo ya Jehovha.—Jak. 1:17.

16. Ngu kuya ngu Vafilipiya 4:6, 7, ngu yihi nzila yimweyo dwe yo mana kudikha? Txhamusela.

¹⁶ Lera Vafilipiya 4:6, 7. Ngu kutxani Jehovha a txi khene kudikha aku ene a hi ningako hi nga kumana “ngu Kristu Jesu”? Nguko ngako hi txi pfisisa ni kuva ni likholo ka mthumo wa Jesu ka txikongomelo txa Txizimu ngu kona hi nga manako kudikha ka mialakanyo ni matipfelo athu. Ngu txikombiso, digandelo da mtirulo da Jesu di maha ti to sotshe sionho sathu si divalelwa. (1 Joh. 2:12) Eto ta hi txhatxha mbilu! Kota Mkoma wa Mfumo wa Txizimu, Jesu a na lulamisa totshe ati Sathani ni matsimbitiselo akwe va nga onhetela. (Isaya 65:17; 1 Joh. 3:8; Mtu. 21:3, 4) Eto ti hi ninga themba yo tsakisa! Ni ku, hambiku Jesu a nga hi ninga mthumo wo karata, ene a ni nathu, e hi vhuna ka masiku awa o gwitisa. (Mat. 28:19, 20) Eto ti hi ninga txibindi txo tsana! Kudikha, themba ni txibindi nzilo sa lisima si si lavekako ti to hi va ni kudikha.

17. a) Mkristu a nga ku manisa kutxani kudikha ka mbilu? b) Ngu kuya ngu txithembiso txa Johani 16:33, ngu tihi ati hi no ti kota kumaha?

¹⁷ Se, ngako u di sakatilwe ngu sikarato, u nga kumanisa kutxani kudikha ka mialakanyo? U nga kumana ngu kuetetela ati Jesu a nga maha. Txo khata, maha mkombelo, u si karali. Txa wumbidi, engisa Jehovha, u txhumayela ngu kuhiseka hambi ti txi karata. Se txa wuraru, themba ti to vangana vako va na kuvhuna ka sikarato sako. Ngu magwito, kudikha ka Txizimu ku na veketa mialakanyo ni mbilu yako. Ni ku, kufana ni Jesu, u na xula sotshe sikarato.—Lera Johani 16:33.