1. Ngu tihi ti hotshethu hi fanelako ku ti maha?

INA awe u nga ti tsakela kututuma ka mapalisana aya u ti zivako ti to ma karata, ngutu-ngutu u txi tipfa u di karate mwendo u txi lwala? Ti nga maha u si beli. Kambe, mpostoli Paulo a wombile ti to Makristu ma ka mapalisana o tutuma. (Vaheb. 12:1) Hotshethu, mwendo hi vanana, hi va hombe, hi ni mtamo mwendo hi karate hi fanete hi tsanisela kala magwito ti to hi amukela txihiwa a txi Jehovha a nga hi vekela txona.—Mat. 24:13.

2. Nga ha ti nga kombiswa ngu kona ka 2 Timoti 4:7, 8, ngu kutxani Paulo a sa thava kuwomba-womba ngu kuheta mnava?

² Paulo a si thavi kuwomba-womba ngu mhaka yiya nguko ene a ti ‘hetile mnava wa kututuma kwakwe.’ (Lera 2 Timoti 4:7, 8.) Kambe, ngu wuhi mnava awu Paulo a nga ti womba-womba ngu wona?

3. Ngu wuhi mnava awu Paulo a nga ti womba-womba ngu wona?

³ Mbimo yimwani Paulo a ti womba-womba ngu ti ti nga ti maheka ka mapalisana khe Grécia ti to e gondisa timhaka ta lisima. (1 Vak. 9:25-27; 2 Tim. 2:5) Ka makhambi o tala a ti fananisa mapalisana o tutuma ngu mikondo ni mahanyelo a Wukristu. (1 Vak. 9:24; Vag. 2:2; Vaf. 2:16) M’thu a khata kututuma ka “mnava” wuwa mbimo yi a tiningetelako ka Jehovha ni kubhabhatiswa. (1 Pedro 3:21) A weta livilo lakwe mbimo yi Jehovha a mu ningako txihiwa txa wutomi wo mbi guma.—Mat. 25:31-34, 46; 2 Tim. 4:8.

4. Hi na bhula ngu txani ka msungo wuwa?

⁴ Ngu kuhi kuyelana ku kuho ka mapalisana o tutuma ngu  mikondo ni kuhanya wutomi wa Wukristu? Ku ni timhaka to tala ti kombisako kuyelana koneko, ka msungo wuwa hi na bhula ngu timhaka tiraru. Yo khata, ti lava hi tutuma ka nzila yi i ku yona; ya wumbidi, ti lava hi ti wona hi di hokile magwito; ya wuraru, ti lava hi tutuma hambi hi txi manana ni sikarato.

5. Hi fanete kutsimbila ngu nzila yihi? Ngu kutxani?

⁵ Ti to mtutumi e ganya txihiwa ti lava e tutuma ka nzila yi a kombwako ku e tutuma ka yona. Ngu ha kufanako, ngako hi txi lava kumana txihiwa txa wutomi wo mbi guma, ti lava hi tsimbila ka nzila ya Wukristu, i ku mahanyelo a Wukristu. (Mith. 20:24; 1 Pedro 2:21) Kambe, Sathani ni maxaka akwe va lava ti to hi si tsimbili ka nzila yiya, vona va lava hi “tsimbila navo.” (1 Pedro 4:4) Vona va poyilela mahanyelo athu a Wukristu va ti gela ku khona ngu vona va ku ka nzila ya yinene ayi yi ku ni mkhululeko. Kambe, eto hi nga ditshuri.—2 Pedro 2:19.

6. U nga gonda txani ka txikmbiso txa Brian?

⁶ Votshe va va hanyako ngu kuya ngu mahanyelo a mafu yawa a Sathani va gwita ve ti wona to nzila yi va nga yi sawula kha yi va yisi mkhululekoni; kambe yi va yisa wukhumbini. (Var. 6:16) Wona txikombiso txa Brian. Vaveleki vakwe va mu gondisile ku e tsimbila ka nzila ya Wukristu. Kambe, mbimo yi a nga txi kula kha kholwa to mahanyelo yawa ma nga mu ninga litsako. Se ene a to sawula kututuma ni vathu va va nga ti ni mahanyelo a ditiko. Ene a womba tiya: “Kudotho-kudotho ni tumbute to mkhululeko wu wu wombwako wu ndi na ni maha ni ti beta ka sikarato so tala. Ni ti khatile kudhaha, kusela ni kugeleza. Ni hokile ha koza ni khata kudhaha ni timbangi ha koza ni si gwenti kuzumba ni si dhahi. . . . Ni vekile ni kuxavisa timbangi kasi kumana male yo ti hanyisa.” Ngu mbimo, Brian a sungile kuhanya ngu milayo ya Jehovha. Brian a lekile kutsimbila ka nzila ya walo e wuya ka ya ditshuri e bhabhatiswa ngu 2001. Konkuwa a ni litsako la hombe nguko a tsimbila ka nzila ya Wukristu. *

7. Ngu kuya ngu Matewu 7:13, 14, ngu tihi tinzila ti kuho ati hi nga ti sawulako?

⁷ Nda lisima ngutu kusawula kutsimbila ka nzila ya yinene! Sathani a lava ti to hi leka kutsimbila ka nzila yiya yo khwela “ayi yi yisako wutomini,” se hi ndaka hi ya ka nzila ya dibhudhula ayi yi tsimbilwako ngu vathu vo tala. Nzila yoneyo yi ziwa ngu vo tala, ni ku ta  hehuka ku tsimbila ka yona. Kambe, yona yi “yisa kulovani.” (Lera Matewu 7:13, 14.) Ti to hi simama ka nzila ya ditshuri hi si tsulupetwi, ti lava hi themba Jehovha ni ku muengisa.

8. Ngako mtutumi wo kari a txi wa, a maha txani?

⁸ Vatutumi ka mapalisana va veka diso ka nzila yi va tsimbilako ka yona kasi ku va si humbwi. Kambe, ti nga maha e rethwa ngu mtutumi kulowe mwendo kubela ka magidinga. Hambi loko a txo wa, wa wuka e simama e tutuma. Ene a veka mapimo ka magwito i si nga ka txi txi nga mu wisa.

9. Ngako hi txi wa ngu tihi ti hi fanelako kumaha?

⁹ Ka livilo lathu, hi nga thuka hi ti wisa makhambi o tala ngu kuphazama ngu simaho ni mapswi. Hambi vatutumi kulothi va nga maha tiphazamo ati ti nga hi wisako. Eto kha ti xamalisi. Aku hotshethu hi nga mbi hetiseka eto ti na maheka, ngutu-ngutu aku hi tutumako ka nzila yo khwela. Se, mbimo yimwani ha kandana sizenende. Paulo a wombile to ti na maheka ku ‘m’thu e va ni txisolo ka mmwani.’ (Vakl. 3:13) Kambe, hahanze ko heta mbimo ngu kulava kuwona txi txi nga hi wisa, hi lava kupimisa ngu txihiwa txathu. Ngako hi txi wa, he wukeni hi simama hi tutuma. Ngako hi txo zumba hi di henyile hi si lavi kuwuka hi tutuma, kha hi na mbi hoka magwito ka mnava wa kututuma kwathu ti to hi mana txihiwa. Hahanze keto, hi no va sitsha ka vamwani ava ni vona va tutumako ka nzila yiya yo khwela.

10. Hi nga mahisa kutxani ti to hi si vi “txitsha” ka vamwani?

¹⁰ Nzila yimwani yo vayilela ku hi va “txitsha” ka vatutumi kulothi ngu kwa mbi sinzisa ati hi ti lavako, kambe hi thangetisa silaveko sa vamwani. (Var. 14:13, 19-21; 1 Vak. 8:9, 13) Ka mhaka yiya ya lisima ngutu, ha hambana ni vatutumi ka mapalisana. Vona va palisana ngu txawe, mmwani ni mmwani a zama ku ti ganyela txihiwa txakwe. Vatutumi vonevo va pimisa ngu tawe dwe. Se va nga retha vamwani ti to ve ya maneka masoni. Kambe athu kha hi njo palisana. (Vag. 5:26; 6:4) Txikongomelo txathu njo vhuna vathu ava hi va kotako ti to ve ganya txihiwa txa wutomi wo mbi guma. Se, zama kuthumisa  txialakanyiso txa Paulo txa ti to: “Kha kulaveki ti to mmwani ni mmwani a txi khatalela si i ku sakwe dwe, aniko mmwani ni mmwani a na khatalele ni sa vamwani.”—Vaf. 2:4.

11. Vatutumi va mapalisana va veka mapimo ka txani? Ngu kutxani?

¹¹ Hahanze ko veka diso ka nzila yi va tsimbilako ka yona, vatutumi va mapalisana va veka mapimo ka magwito a mnava. Hambi i di ti to kha va ku woni magwito ka mnava, vona va ti wona va txi amukela txihiwa. Ngu kumaha toneto, va mana mtamo wo ve simama.

12. Nji txani txi Jehovha a nga hi thembisa txona?

¹² Ka mnava wu hi tutumako ka wona, Jehovha se a hi thembisile txihiwa txa wutomi wo mbi guma ha mafuni mwendo nzumani ngako hi txi hoka magwito. Bhiblia ya hi vhuna hi wona to txihiwa txonetxo txi na va txo zumbisa kutxani kasi ku hi pimisa ngu litsako li hi no tava nalo. Ngako hi txi zumba hi txi pimisa ngu themba yiya hi na mbi tumelela sitsha si hi humba aha koza hi si wuki kambe.

13. Ngu tihi ti hi va palako ka tona vatutumi va mapalisana?

¹³ Vatutuma va kale ka Grécia ti lavile ve wonisana ni kukarala ni kupanda. Kambe, vona va ti themba kutigondisa vapune ni mtamo wawe. Kufana ni vatutumi vonevo, ha gondiswa kasi kuziva matutumelo. Kambe athu ha va pala vatutumi va mapalisana. Hi nga mana mtamo mbimo yotshe. Ngako hi txi themba Jehovha ene a na hi gondisa ni ku hi ninga ntamo!—1 Pedro 5:10.

14. Ati ti ku ka 2 Vakorinto 12:9, 10, ti hi vhunisa kutxani ku hi xula sikarato?

¹⁴ Paulo ti lavile e wonisana ni sikarato so tala. Hahanze ka ku a nga txi ruketelwa ni kuxaniswa ngu vamwani, mbimo yimwani a txi tipfa a di rerekile, ni ku ti lavile e wonisana ni “m’pa ha mmidini.” (2 Vak. 12:7) Kambe, hahanze ko leka kututuma ngu mhaka ya sikararo soneso, ene a woni i di mkhanjo wo themba Jehovha. (Lera 2 Vakorinto 12:9, 10.) Aku Paulo a nga ti themba Jehovha, ene a mu vhuni ka sotshe sikarato sakwe.

15. Hi nga mu etetelisa kutxani Paulo?

¹⁵ Nanathu hi nga thuka hi rukwa hambi kuxaniswa ngu mhaka ya likholo lathu. Ti nga maha ti lava hi wonisana ni malwati mwendo dikhodho. Kufana ni Paulo, ngako hi txi teka sikarato i di mkhanjo wo themba Jehovha, ene a na hi vhuna.

16. Hambi i di ti to wa lwala, u nga maha txani?

¹⁶ Ina awe u maneka sibhejela ngu kulwala mwendo u thumisa txikarinyana txa marodha ngu kulimala? Ina ta kukaratela kutsimbila mwendo u ni txikarato txa maso? Ti di ngeto, ina ti nga koteta ku u tutuma ni va i ku nga di vaphya mwendo ava va ku di dihanyo da dinene? Ina, ta koteka! Vo tala vo kumba ni va va lwalako ni vona va tutuma ka yona nzila yiya. Vona va nge sikoti kumaha mthumo vokha. Ngu toneto, Jehovha a va ninga mtamo ngu kuthumisa mitshangano ayi va yi engiselako ngu kuthumisa fone mwendo kubhaxara ka JW Stream. Va tshumela ve pateka ka mthumo wo maha vagondiswa ngu kutxhumayela vadhokodhela ni maxaka.

17. Jehovha a ti pfisa kutxani ngu va va ku ni sikarato sa dihanyo?

¹⁷ U nga tumelele sikarato sa dihanyo si ku tisela dikhodho ha koza u pimisa to u nge sikoti kututuma ka nzila yiya ya wutomi. Jehovha wa kuranda ngu mhaka ya  likholo lako ni kutimisela kwako. Konkuwa txa lavela ngutu txivhuno txa Jehovha ni ku ene kha na mbi ku leka. (Mas. 9:10) Ene wa tshuketa hafuhi ni nawe. Wona ti mwanathu mmwani awu a wonisanako ni txikarato txa malwati a nga womba a txi khene: “Aku txikarato txa malwati txi yako txi txi kula, mkhanjo wo txhumayela vamwani wo ya wu txi pumbeka. Kambe, na ti tiziva ti to mizamo yangu hambiku i ku ya yidotho ya tsakisa Jehovha, se eto ta ni tsakisa.” Ngako u txi tipfa u di godhote, khumbula to khu nga wekha. Alakanyisisa ngu txikombiso txa Paulo, u khumbula mapswi ya a nga ma womba o khene: “Na tsaka kutandekani kwangu, . . . Nguko, mbimo yi ni pfako kutandeka, nguyo mbimo ni ku ni mtamo.”—2 Vak. 12:10.

18. Ngu txihi txikarato atxi vamwani va mananako natxo atxi ti karatako kuwonisana natxo?

¹⁸ Vamwani va va tutumako ka nzila yiya ya wutomini va manana ni tximwani txikarato. Vona va wonisana ni sikarato asi vamwani va si sikotiko ku si wona. Ngu txikombiso, ti nga maha va txi wonisana ni txitrese mwendo kuvilela. Ngu kutxani sikarato so nga soneso ti txi karata kuwonisana naso? Nguko loko m’thu a di funyekile diwoko mwendo a txi tsimbila ngu txikarinyana, votshe vathu va nga ti wona to a ka txikarato ti va hehukela ku mu vhuna. Kambe, ava va ko xaniseka a mu ka mialakanyo ti nga maha ti si woneki to va dyeka ngu mndani. Phela, ni vona va xaniseka kufana ni wu a nga limala, kambe kha va xanisekelwi kufana ni wu txikarato txakwe txi wonekako.

19. Hi gonda txani ka txikombiso txa Mefibhosete?

¹⁹ Ngako u txi wonisana ni sikarato asi u wonako to vamwani kha va ku pfisisi, u nga tekelela txikombiso txa Mefibhosete. (2 Sam. 4:4) Ene a wonisanile ni wulema, ni ku Mkoma Dhavhidha a mu sote ni ku mu ñola ngu nzila yo biha. Mefibhosete hi nga ti to a to ya dimela sikarato si a nga ti naso. Kambe, kha tumelela kuxulwa ngu sikarato soneso, ene a txi tsaka ngu ti a nga ti ti kota. A kombisile kubonga wuxinji wu Dhavhidha a nga ti mu kombile. (2 Sam. 9:6-10) Se mbimo yi Dhavhidha a nga mu sola, ene kha karateka ngutu. Kha mu henyela Dhavhidha. Nem kha rweka mnando Jehovha ngu mhaka ya ti Dhavhidha a nga maha. Mefibhosete a ti veka mapimo ko vhuna mkoma Dhavhidha awu a nga ti sawutwe ngu Jehovha. (2 Sam. 16:1-4; 19:24-30) Jehovha a mahile ti to matimu a Mefibhoseti me bhalwa a mu ka Bhiblia ti to hi gonda txo kari.—Var. 15:4.

20. Ngu txihi txikarato txi vamwani va manako natxo? Va nga tsaniseka ka ti to txani?

 ²⁰ Ngu mhaka ya kuvilela ka hombe, vanathu vamwani ta va karatela kuzumba va txi wonetelwa. Ti nga va karatela kuzumba amu ka vathu, hambiketo va simama ve ta ka mitshangano ya divhiki ni divhiki ni ka mitshangano ya hombe. Hambiku ti si va hehukeliko kubhula ni vathu, vona va txhumayela vamwani thembweni. Ngako u di ni txikarato txonetxo, tsaniseka ti to khu nga wekha, ku ni vamwani ni vona va wonisanako ni txikarato txiya. Khumbula to Jehovha wa tsaka ngu mthumo wu u wu mahako. Kuva u txi tsanisela kala konkuwa njikombiso txa ti to Jehovha wa ku katekisa ni kukuninga mtamo wu u wu lavako. * (Vaf. 4:6, 7; 1 Pedro 5:7) Ngako u txi simama u thumela Jehovha hambi u txi manana ni sikarato so hambana-hambana, tsaniseka ti to Jehovha wa tsaka ngu ngawe.

21. Hi txi vhunwa ngu Jehovha, nji txani atxi hotshethu hi no txi kota?

²¹ Txo tsakisa ngu ti to ku ni kuhamba ka mapalisana o tutuma ngu mikondo ni kututuma aku Paulo a nga womba-womba ngu kona. Ka vatutumi va mapalisana onewo, mmweyo dwe a nga ti ganya txihiwa. Kambe kuhambana nito, mmwani ni mwani a wu a timiselako ka kututuma ka Wukristu, wa amukela txihiwa txa wutomi wo mbi guma. (Joh. 3:16) I si ngeto dwe, votshe vatutumi va mapalisana ti lava va di ni dihanyo da dinene; hahanze keto va ngo humelela ngu njombo. Kambe ka kututuma ka Wukristu, hambiku mtalo wathu hi si ngako ni dihanyo da dinene, ha tsanisela. (2 Vak. 4:16) Ngu kuvhunwa ngu Jehovha, hotshethu hi na heta mnava wa kututuma kwathu!