Ku di pindile mbimonyana wuxaka wangu ni Jehovha wa khatile kuhola. Vagondi kulothi ni txi wona nga va ni mkhululeko wo maha ati va nga txi tilava, se ani ni txi wona nga no luzekelwa. Ni tiwoni nga kuhanya ngu milayo ya Wukristu ti txo ni beta jele. Ni ku ni txi wona nga mithumo ya timhaka ta moya yi txi nemela. Hambiku ni nga ti kholwa to Jehovha waho, ni khatile kutipfa ni di diphanga ngu didhawa da moya.

Hambiketo kha na maha ngu kuleka kuthumela Jehovha. Hambiku ni nga txi ya kutxhumayelani, ni txi tsula ni sa lulamisela, ngu toneto ti txi ni karatela kukhata mabhulo. Eto ti mahile to ni si txhumayeli ngu nzila ya yinene, mthumo wo txhumayela wu si ni tiseli litsako. Totsheto ti mahile ni khata ku wu nyenya. Ni txi tiwotisa tiya: ‘Vamwani va tikotisa kutxani kutxhumayela divhiki ni divhiki mwendo mtxima ni txima?’

Mbimo yi ni nga va ni 17 wa malembe ni lavile ku tihanyela dangu. Ngu toneto ni pakete thundu yangu ni ya Austrália. Mbimo yi ni nga khukha, vaveleki vangu va karatekile ngutu. Atxi txi nga ti va maha ve karateka, ngu pimisa ti to ni si na  kusikota kusimama ni txiemiso txangu txa timhaka ta moya.

Mbimo yi ni nga ti Austrália ni yite ni hola ngutu ngu didhawa da moya. Mitshanganoni ni txo maha ngu kutshuka ni tsula. Ni txi hanyisa ku nga vaphya vamwani, ava i nga ti ku nyamsi va mitshanganoni mangwana va singwereni ni kuselani. Akuwa na tiwona to ngu ditshuri ni txo hanyisa kunga lifakanda. Ni di mitshanganoni ni ti mmwani ni di hahanze ni ti mmwani. Hambi keto ti txi ni karata.

Ku di pindile malembe mambidi ni vite ni mabhulo ni msikati wa muwoneleli wa txigava aya ma nga ni maha ni wona to ni txo huma hanzila. Aha ni nga ti kona ni txi zumba ni vanathu vamwani va mahorana, hotshethu hi ti 6. Hi rambile muwoneleli wa txigava kumweko ni msikati wakwe Tamara ti to hi ta zumba navo kudingana divhiki. Mbimo yi mwamna wa kona a nga ti tendera timhaka ta dibanza, hi ti sala ni Tamara hi peka papo nayo. Ni txi ma dhunda mabhulo onewo. Ene i ti m’thu wu a nga ti bhula ngutu ni ku a txi tshuketeleka. Ti txi ni xamalisa kuwona m’thu wa moya wo nga tile a di ni diphwala.

Tamara i ti mwanathu wo hiseka. Ene a ti dhunda ditshuri aha koza vamwani ve tsakela ku mu tekelela. Ene a ti tsaka ngu kumaha ati a nga ti kotako ka mthumo wa Jehovha, kuveti ani ni si tsaki nguko ni si mahi ta boti. Mawonelo akwe a manene ni litsako ali a nga txi li mana ngu kona ha ka m’thumo wo txhumayela ti txi ni gwesa ngutu. Txikombiso txakwe txi ni mahile ni khumbula to kari ta mu ka Bhiblia ati ti wombako ti to Jehovha a lava ti to votshe ve mu thumela “ngu litsako” ni ngu “tindando ta migiyo.”—Mas. 100:2.

Ni ti lava kumana litsako ali Tamara a nga ti nalo, kambe ti to e limana ti txi lava ni txitxa wutomi wangu. Ti tekile mbimo, kambe ni khatile kudhedha. Ni khatile kululamisela ni txi ya kutxhumayelani. Ni tshumete ni teka wunyaphandule wo  vhuneta. Atiya ti ni vhunile kuxula kuthava ni di kutxhumayelani. Ni tshukwatisile nzila yo thumisa Bhiblia ni di kutxhumayelani, se eto ti ni mahile ni mana litsako. Kha na swela, ni khatile kuthuma kota nyaphandule wo vhuneta mtxima ni mtxima.

Ni khatile kuaka wungana ni vanathu va titanga to hamana-hambana ava va nga ti dhunda ditshuri, ava va nga ti tsaka ngu m’thumo awu va nga ti wu maha ka Jehovha. Txikombiso txawe txa txinene txi ni vhunile kuwona ati i ku ta lisima ka wutomi, ni kutshumela ni va ni txiemiso txa txinene txa timhaka ta moya. Ni khatile ku wu tsakela ngutu mthumo wo txhumayela ngu toneto ni khatile kuthuma kota nyaphandule wa mbimo yotshe. Msana keto ngu kona ni nga tipfa ni di tsani, ni va ni litsako ni kutipfa ni di wa lisima dibanzani.

Ku di pindile dilembe ni txi thuma kota nyaphandule, ni zivile Alex dijaha da dinene adi di nga tidhunda Jehovha ni mthumo wo txhumayela ngu mbilu ya dona yotshe. Ene i ti dilanda da wuthumeli ni ku a ti ni 6 wa malembe a txi thuma kota nyaphandule. Alex a txi khala kuthuma ka wukhalo wa txilaveko khe Malawi. Mbimo yi a nga ti kheya a zivile varumiwa ava va nga mu vhuna ku e simama e thangetisa timhaka ta moya ka wutomi wakwe.

Ngu 2003, ani ni Alex hi txhadhile se akuwa hi simama ka mthumo wa mbimo yotshe. Hi gondile to tala ni ku Jehovha a hi katekisile ngu tinzila to hambana-hambana.

Ngu 2009 hi rambilwe ku hi ya va varumiwa khe Timor-Leste i ku ditiko adi di manekako hafuhi ni Indonésia. Hi xamate hi tshumela hi thava. Ku di pindile 5 wa mitxima hi hokile mzinda wa kona i ku Dili.

Atiya ti lavile hi txitxa to tala. Ti lavile hi tolovela mdhawuko wa wuphya, hi gonda lidimi la liphya, sakudya si hi nga mbi si tolovela ni mahanyelo a maphya. Hi di kutxhumayelani hi ti mana  vathu va i nga ti sisiwana, ava va nga ti sa gonda ni vamwani va nga ti xaniswa. Hi ti tshumela hi mana vamwani ava va nga ti xanisilwe ngu tiyimbi ni wugevenga. *

Mthumo wo txhumayela wu txi tsakisa ngutu! Ngu txikombiso ditshiku dimwani ni mani Maria awu a nga ti ni 13 wa malembe ka mbimo yoneyo. * Ene a ti ngadi kufelwa ngu mame ni ku a si zumbi ni tate wakwe. Maria a si zivi ni ti to a na maha txani. Ni khumbula ditshiku dimwani a nga ni dilela e womba ati ti nga txi mu karata. Kambe ni si ti pfisisi ati a nga ti ni txhamusela nguko ni si womba-wombi bhem lidimi lawe. Ni kombete Jehovha ti to e ni vhuna ni kota ku mu tsanisa, se ni ti ya mgondela mibhalo ayi yi nga m’tsanisa. Ku di pindile malembenyana Maria a txitxile to tala ka wutomi wakwe. Ene a bhabhatisilwe ni ku konku a ni sigondo sakwe asi a tsimbitisako. Konkuwa Maria a ka mwaya wa hombe wa vanathu va ha mafuni kotshe, ni ku konkuwa wa tipfa i di wa lisima.

Jehovha wa katekisa mthumo khe Timor-Leste. Hambiku wungi wa vahuweleli va ku ngadi kubhabhatiswa vo tala va thuma kona vanyaphandule, malanda a wuthumeli ni madhota. Vamwani va thuma ma RTO ve vhuneta ko hunduluxela mabhuku athu ngu tidimi ta wukhalo wonewo. Ni txi tsaka ni txi wona vanathu va di mitshanganoni, va di tsakile ni kukula ngu didhawa da moya.

Txiavelo txathu khe Timor-Leste txi txi hambana ni Austrália kambe mthumo wathu wu txi tsakisa. Mbimo yimwani maxapa ya hi nga txi bela vathu vo txo txhomana ni silo sawe asi va nga ti xava merkadhu so fana ni sihaka ni simwani. Makhambi mamwani ti txi lava hi tsimbitisa sigondo hi di nyumbani amu ku nga di ni nzambwa, ku txi hisa ngutu ni ku tikhukhu ti txo giringa. Ti si nga ni mhaka ni sikarato soneso ani ni txi wu tsakela mthumo wangu.

Ni txi khumbula ati ni nga pinda ngu ka tona na va bonga vaveleki vangu va nga maha totshe va nga ti kota ti to ve ni gondisa ngu Jehovha ni ku ni seketela, vona va ti ni vhuna hambi ni mbimo yi ni nga ti huma hanzila. Mavingu 22:6 yi hetisekile ka mina. Votshe mame ni papa va ti guleta ngutu ngu ngani ni Alex, vona va tsaka ku hi wona hi txi thumiswa ngu Jehovha. Kukhukhela ngu 2016 hi thuma ka mthumo wa wuwoneleli wa txigava ka wukhalo awu wu wonelelwako ngu Bhetele ya Australásia.

Kha ni kholwi ti to mthumo wo txhumayela ni txi wu wona wu txi karata. Konkuwa na wu dhunda ngutu. Ni ti woni ti to ti si nga ni mhaka ni ti hi mananako nato ka wutomi, litsako la ditshuri hi li mana ngu kuthumela Jehovha. Phela 18 wa malembe ya ni ku nawo ni txi thumela Jehovha ni ti ni Alex ngu ona o tsakisa ngutu ka wutomi wangu. Konkuwa na pfisisa ati m’bhali wa masalmo a nga womba a txi gela Jehovha atxi: “Votshe avale va thavelako kwako, va na giye yotshe mbimo.  . . Avale va randako ditina dako, va ku tsakelako.”—Mas. 5:11.