1-2. Nji txani mtirulo? Ngu kutxani wu txi laveka?

MBIMO yi Adhamu a nga onha a luzile wutomi wo mbi guma, kambe hi nga ene ekha, ni vale va ndino huma kwakwe. Kha ti pfisiseki kuva Adhamu a ti mahile txionho. Phela ene a to sawula kumaha txionho. Ani va va ndi no huma kwakwe ko? Ni vona va ndi na mana txhatxhazelo ya txionho txa Adhamu. (Var. 5:12, 14) Ina ku ndi na va ni nzila yo thusa vanana va Adhamu ava va nga tshapelwa ngu txionho ni lifo? Ina! Msana kova Adhamu a di onhile, Jehovha a txhamusete kudotho-kudotho ti to a ndi na mahisa kutxani kasi kuthusa vanana va Adhamu ka txionho ni lifo. (Gen. 3:15) Ngu mbimo ya kona, Jehovha a rumete mwanana wakwe ngu nzumani kasi “kuningela wutomi wakwe kasi ku na tirula vavangi.”—Marku 10:45; Joh. 6:51.

² Nji txani mtirulo? Ka Mibhalo ya Txigriki, mtirulo kuwombwa presu ayi Jesu a nga diha kasi kuxava wutomi awu Adhamu a nga wu luza. (1 Vak. 15:22) Ngu kutxani ku txi laveka mtirulo? Nguko ngu kuya ngu Mlayo, wutomi wu fanete kudihwa ngu wutomi. (Eks. 21:23, 24) Adhamu a luzile wutomi wo hetiseka. Se Jesu a ningete ngu wutomi wakwe wo hetiseka kasi ku totshe ti tsimbila ngu milayo yo lulama ya Txizimu. (Var. 5:17) Ngu toneto, ene a vile “Tate wa Mbimo Yotshe” ka votshe ava va kombisako likholo ka mtirulo.—Isaya 9:6; Var. 3:23, 24.

3. Ngu kuya ngu Johani 14:31 ni 15:13, ngu kutxani Jesu a di ningete ngu wutomi wakwe wo hetiseka?

³ Jesu a ningete wutomi wakwe kota mtirulo ngu lirando li a  ku nalo ngu Tate wakwe wa nzumani ni ngu ngathu. (Lera Johani 14:31; 15:13.) Ngu kona ha ka lirando, ene a ti emisete kusimama a di thembekile kala magwito, kasi kuhetisisa kudhunda ka Tate wakwe. Jesu a mahile toneto ngu kusimama a di thembekile kala kufa. Eto ti na maha to txikongomelo txa Jehovha ngu vathu txi hetiseka. Ka gondo yiya hi na wona to ngu kutxani Jehovha a di tumelete to Jesu a xaniseka ngutu a si se dawa. Hi na tshumela hi wuseta txikombiso txa m’bhali wa Bhiblia awu a nga kombisa to wa ninga lisima mtirulo. Kasi ngu magwito hi na gonda to hi nga maha txani kasi kukombisa to ha bonga mtirulo, ni ku hi nga simamisa kutxani hi kombisa kubonga digandelo adi Jehovha ni Jesu va nga hi mahela dona.

4. Txhamusela nzila yi Jesu a nga fa ngu yona.

⁴ Alakanya kuxaniseka aku Jesu a nga wonisana nako ngu ditshiku digwita ha mafuni. Hambiku ene a nga ti ni mkhanjo wo kombela dibutho da tingelozi ti to di m’vhikela, ene a lekile masotxhwa a Varoma me mu dyiseta. (Mat. 26:52-54; Joh. 18:3; 19:1) Vona va thumisile timhika ati ti nga txi mtshwerulela mbimo yi va nga ti mkwapela. Ve gwita ve mpakatisa phande msana aha se ku nga ti ni silonda. Se Jesu e yi ndinda kala aha a nga ti ya dayelwa kona, kambe konukunuko va mananile ni dijaha adi va nga di pakatisa phandephande yoneyo. (Mat. 27:32) Mbimo yi Jesu a nga hoka ka wukhalo awu a nga ti ya dayelwa ka wona, masotxhwa ale ma bethete manza ni minenge yakwe aha ka phande. Alakanya pezu ya mmidi wu txo tiyiswa ngu sipikiri dwe aha ka phandephande. Vangana vakwe ni mame wakwe ve kheta kupeka tihuwa, kambe vakoma va Vajudha va txo mpoyilela. (Luka 23:32-38; Joh. 19:25) Ene a hetile mbimo yo lapha a txi xaniseka. Ngu kona ha ka nzila yi a nga ti bethetwe ngu yona, mbilu yakwe ni maphaphu si si thumi kwati, se ti txi mu karatela kuhefemula. Mbimo yi a nga ti lava kuhetiseka, ene a mahile mkombelo. Se e namisa thamu yakwe e fa. (Marku 15:37; Luka 23:46; Joh. 10:17, 18; 19:30) Ngu ditshuri, Jesu a txhipisilwe e fa kudotho-kudotho ngu nzila yo panda!

5. Ngu tihi ati ti nga txi karata ngutu Jesu kupinda nzila yi a nga dawa ngu yona?

⁵ Jesu a si karateki ngutu ngu nzila yi a ndi no fa ngu yona. Kambe atxi txi nga ti mu karata ngutu, ngu lumbetwa. Ene a lumbetilwe ku i ti muruketeli wa Txizimu. (Mat. 26:64-66) Kuziva to a ndi na lumbetwa, eto ti txi mu karata ngutu Jesu aha koza e kombela Tate wakwe ti to e mu lamulela. (Mat. 26:38, 39, 42) Ngu kutxani Jehovha a di tumelete Mwanana wakwe wo randeka ngutu ti to e xaniseka e tshumela e fa? He wone sivangelo siraru.

6. Ngu kutxani ti di lavile ku Jesu e hayekwa ka phande ya xanisa?

⁶ Txo khata, Jesu ti lavile e hayekwa ha phandeni ti to kuthaviswa txiruku ka Vajudha. (Vag. 3:10, 13) Vona va thembisile kuvekisa Mlayo wa Txizimu, kambe kha va wu londisa. Eto ti mahile to txitimwi ka txionho txa Adhamu, ve ti txhatekela txionho txa kwa mbi engisa Mlayo wa Txizimu. (Var. 5:12) Mlayo awu Txizimu txi nga ti ningile Vaisrayeli wu ti womba ti to ngako m’thu a di mahile txionho txa kufanelwa ngu lifo a ti fanete kudawa. Ngu msana mmidi wakwe wu ti hayekwa ka phande. * (Dhewut. 21:22, 23; 27:26) Se ngu kuva Jesu a di hayekilwe ha phandeni ti mahile to Vaisrayeli ve wuyelwa ngu mtirulo hambiku i ku vona va nga mlamba.

7. Ngu txihi txivangelo txa wumbidi atxi txi nga maha Txizimu txi tumelela Mwanana wa txona e xaniseka?

 ⁷ Wona txivangelo txa wumbidi atxi txi nga maha Jehovha e tumelela mwanana wakwe e xaniseka. Ene a ti ko treinara Jesu ka mthumo awu a ndi no wu maha wo va Mphaxeli wa Hombe. Jesu a ti pfisisile to ta karata kuengisa Txizimu ngako hi di ka txiduku txa hombe. Ene a karatekile ngutu aha koza e “peka tihuwa e dila mirongo,” e kombela txivhuno. Ngu ditshuri, kuva Jesu a di karatekile ngutu ti maha to e pfisisa sikarato sathu ni ‘kusikota ku [hi] vhuna’ ngako hi txi ‘dukwa.’ Ha bonga ngutu aku Jehovha a nga sawula Mphaxeli wa Hombe awu a ku ni wuxinji, awu asi ‘sindwiko ku hi pfela wusiwana ka sionho sathu.’—Vaheb. 2:17, 18; 4:14-16; 5:7-10.

8. Ngu txihi txivangelo txa wuraru atxi txi nga maha to Jehovha e tumelela to Jesu e dukwa?

⁸ Txa wuraru, Jehovha a tumelete to Mwanana wakwe e xaniseka ti to kuxamuleka txiwotiso txiya txa lisima: Ina vathu va nga simama va di thembekile ka Jehovha hambi va txi manana ni sikarato sa hombe? Sathani a womba to ahim-him! Ene a khene vathu va thumela Jehovha ngu ku va lavako kuwuyelwa. A tshumela e womba to kufana ni Adhamu, kha ku na m’thu wu a nga thembekako ka Jehovha. (Jobe 1:9-11; 2:4, 5) Ngu kuthemba wuthembeki wa Mwanana wakwe, Jehovha a tumelete to mwanana wakwe e dukwa ngu sixaniso. Jesu a simamile a di thembekile e kombisa to Sathani m’hembi.

9. Ngu txihi txikombiso atxi mpostoli Johani a nga hi vekela txona?

⁹ Makristu o tala ma tsaniswa likholo lawe ngu gondo ya mtirulo. Vona va simama ve txhumayela ti si nga ni mhaka ni kukanetwa ni ku va tsanisela sikakaratu so hambana-hambana hambi va di kumbile. Wona txikombiso txa mpostoli Johani. Ene a txhumayete ditshuri mayelano ni Kristu ni mtirulo kona mu ka 60 wa malembe. Mbimo yi a nga ti ni konamu ka ma 90 wa malembe ati wonwa kota mlala ngu Varoma, se va mtekile ve ya mu khotela ka txitondolo txa Patmosi. I ti txihi txikarato? “Ngu mhaka ya dipswi da Txizimu ni kufakazela Jesu.” (Mtu. 1:9) Hi nga wona txikombiso txa txinene txa m’thu wu a nga kombisa likholo ni kutsanisela!

10. Mabhuku ya Johani a nga bhala ma kombisisa kutxani ti to a ti ninga lisima mtirulo?

¹⁰ Ka mabhuku aya Johani a nga bhala a kombisa ngutu lirando lakwe ngu Jesu ni kuninga lisima mtirulo. Ene a wombawombile ngu mtirulo mwendo wuyelo ya kona kupinda 100 wa makhambi. Ngu txikombiso, Johani a bhate tiya: “Ngako mmweyo wanu a txi onha, hi na ni Mthaveleli masoni ka Tata: Ene Jesu Kristu M’lulami.” (1 Joh. 2:1, 2) Mabhuku a Johani ma ninga ngutu lisima “wufakazi wa Jesu.” (Mtu. 19:10) Ti ha kubasani ti to Johani a ti ninga lisima mtirulo. Athu hi kombisisa kutxani ti to ha ninga lisima mtirulo?

11. Nji txani txi no hi vhuna kuvayilela txionho?

¹¹ Vayilela kumaha sionho. Ngako hi txi ninga lisima mtirulo, kha hi na mbi womba hi txi khathu: ‘Kha tilavi ni tikarata ti to ni vayilela txionho. Hambi ni txi maha txionho kha kuna mhaka, na kombela divalelo.’ Hahanze keto, mbimo yi hi dukwako hi na khathu: ‘Na lamba. Jehovha ni Jesu va ni mahete to tala ngutu, ni nga mahisa kutxani timhaka to nga tiya?’ Ngu toneto, mbimo yi hi dukwako hi nga kombela mtamo ka Jehovha hi txi: “U nga hi leke hi txi wa kudukwani.”—Mat. 6:13.

12. Hi nga thumisisa kutxani txialakanyiso atxi txi ku ka 1 Johani 3:16-18.

 ¹² Randa vanathu. Ngako hi txi randa vanathu, hi kombisa to ha ninga lisima mtirulo. Ngu kutxani? Nguko Jesu a ningete wutomi wakwe ngu ngathu ni vanathu. Aku a nga tiemisela kuningela wutomi wakwe ngu vanathu, ti kombisa to ni vona mba lisima kwakwe. (Lera 1 Johani 3:16-18.) Hi nga kombisa to ha randa vanathu ngu nzila yi hi va ñolako ngu yona. (Vaef. 4:29, 31–5:2) Ngu txikombiso, hi nga va vhuna ngako va txi lwala, va txi manana ni siduku, kupata ni tiphango ta mtumbuluko. Hi nga maha txani ngako mwanathu a txi maha mwendo kuwomba to kari ati ti hi henyisako?

13. Ngu kutxani hi di fanete kudivalela?

¹³ Ina awe ta kukaratela kudivalela vanathu? (Levhi 19:18) I di toneto, londisa txialakanyiso txiya: “Mi timiselana ni kudivalelana mmwani ni mmwani, ngako m’thu adi ni txisolo ka mmwani, nga kule Kristu a nga mi divalela, na nanu mahisani toneto.” (Vakl. 3:13) Ngako hi txi divalela vanathu, hi komba Jehovha to ha ninga lisima mtirulo. Se hi nga simamisa kutxani hi kombisa kubonga ningo yi Txizimu txi nga hi ninga?

14. Ngu yihi yimwani nzila yo kombisa lisima ngu mtirulo?

¹⁴ Bonga Jehovha ngu kona ha ka mtirulo. Mwanathu mmwani a hanyako Índia a dhanwako ku i Joanna a ku ni 83 wa malembe, a womba tiya: “Ni ti wona ti di ni lisima kubonga Jehovha ngu kona ha ka mtirulo ditshiku ni ditshiku ka mikombelo yangu.” Ka mikombelo yako ya txihunjani alakanya ngu tiphazamo ati u nga timaha ka ditshiku donedo, se u kombela Jehovha ku e kudivalela. Ditshuri ti to ngako u di mahile txionho txa hombe ti na lava u vhunwa ngu madhota. Ona ma na kuengisela ni kukuninga txialakanyiso atxi txi nga seketelwa amu ka Bhiblia. Ma na kukombelela ka Jehovha ti to e simama e kudivalela ngu kuthumisa digandelo da Jesu Kristu ‘kufela ku u txi hanyiswa’ ngu didhawa da mowa.—Jak. 5:14-16.

15. Ngu kutxani hi di fanete kutiha mbimo yo lera ni kualakanyisisa ngu mtirulo?

¹⁵ Alakanyisisa ngu mtirulo. Mwanathu wa txisikati a dhanwako ku i Rajamani wa 73 wa malembe a womba tiya: “Mbimo yi ni lerako ngu nzila yi Jesu a nga xanisekisa ngu yona ni huma ni mirongo.” Nanawe ti nga kukaratela  kualakanyisisa ngu nzila yi Mwanana wa Txizimu a nga xaniseka ngu yona. Kambe ngako u txi maha toneto, lirando lako ngu Jehovha ni Jesu li na kula. Atxi txi nga kuvhunako ku u alakanyisisa ngu mtirulo ngu timahela gondo yako upune ngu mhaka ayi yi womba-wombako ngu tiya.

16. Ngu yihi wuyelo hi no yi mana ngu kugondisa vamwani ngu mtirulo? (Wona mfota wa kapa.)

¹⁶ Gondisa vamwani ngu mtirulo. Mbimo yi hi gelako vamwani ngu mtirulo, hi naya hi wu ninga lisima. Hi ni tifarameti ta tinene ati hi nga tithumisako ti to hi txhamusela vamwani to ngu kutxani Jesu adi hi fete. Ngu txikombiso, hi nga thumisa gondo 4 ya dibroxura adi di ku, Ngu yahi mahungu a manene aya matako ngu ka Txizimu? Gondo yiya yi ni msungo mhaka awu wu ku: “I mani Jesu Kristu?” Mwendo kuthumisa ndima 5 ya dibhuku di di ku Bhiblia yi nga hi gondisa txani? Ndima yiya yi ni msungo mhaka awu wu ku: “Ngu kutxani Jesu a di fite?” Hi nga kombisa to ha ninga lisima mtirulo ngu kuxalela Txialakanyiso txa lifo la mkoma wathu Jesu Kristu, ni kuhiseka ko ramba vathu ti to ve ta pateka ni vona. Jehovha a hi ningile lungelo yo gondisa vamwani ngu Mwanana wakwe!

17. Ngu kutxani mtirulo i di ningo ya lisima ayi Jehovha a nga ninga vathu?

¹⁷ Ti ha kubasani ti to hi ni sivangelo so kombisa kubonga ni kusimama hi ninga lisima mtirulo. Ngu konaha ka mtirulo, ta koteka kuva ni wuxaka ni Jehovha hambiku hi nga mbi hetiseka. Ngu konaha ka mtirulo, mithumo ya Sathani yotshe yi na fuviswa. (1 Joh. 3:8) Ngu konaha ka mtirulo, txikongomelo txa Jehovha ngu mafu txi na hetiseka. Mafu otshe ma na hunduka me va paradhise. Ka mbimo yoneyo, vathu votshe va na randa Jehovha ni ku mthumela. Ditshiku ni ditshiku he laveni tinzila to bonga mtirulo, i ku ningo ya lisima ayi Jehovha a nga ninga vathu!