Ngu kutxani Jesu a di wombile mapswi a Dhavhidha aya ma ku ka Masalmo 22:1?

Ku ni mapswi o tala aya Jesu a nga womba asi se fa, mamwani ka ona ngu ya ma ku ka Matewu 27:46 aya m aku khene: “Txizimu txangu, Txizimu txangu, u ni lekete txani?” Kuva Jesu a di wombile tiya kuhetiseka mapswi a Dhavhidha aya ma nga bhalwa ka Masalmo 22:1. (Marku 15:34) Ku va Jesu a di wombile tiya kha ti wombi ti to a to ko henya mwendo ku likholo lakwe i to ko va lidotho. Jesu a txi pfisisa ti to ngu kutxani ti nga txi lava e fa ni ku a di tiemisete kumaha toneto. (Mat. 16:21; 20:28) Ene a txi ti ziva ti to ka ditshiku di a ndi no fa ngu dona Jehovha a ndi na thavisa “diguma da ku mu vhikela.” (Jobe 1:10, NM) Jehovha a tumelete ku Jesu e dukwa ngutu kasi kukombisa ti to ene Jesu a ndi na simama a di thembekile ti si nga ni mhaka ni ati ti nga ti mu humelela.—Marku 14:35, 36.

Ngu kutxani Jesu a di wombile mapswi yawa? Hi nge wombi hi di tsani ti to ngu kutxani, kambe he wone ati ti nga vako ti di mahile Jesu e womba mapswi yawa. *

Kuva Jesu a di wombile mapswi yawa ti nga maha a txo lava kujunyatisa ti to Jehovha a si na ku m’vhikela ti to a si dawi. Jesu ti txi lava e diha mtirulo ekha. Ene i ti m’thu wo hetiseka se ti txi lava e fa kasi ku ‘duka lifo, kasiku a txi hanyisa votshe vathu.’—Vaheb. 2:9.

Kuva Jesu a di wombile mapswi ya ma ku ma Masalmo ti nga maha a ti lava ti to vathu ve alakanyisisa ngu ndima yotshe ya 22. Ka timbimo ta Vajudha ti di tolovekile ku me veka  ha msungo mibhalo ya Masalmo. Kuva va di khumbutisilwe m’bhalo wumwewo dwe, ti da ma maha me khumbula ndima yotshe ya Masalmo onewo. I di ti to ngu tona tiya, ti nga maha Jesu a di vhunile Vajudha vo tala ve khumbula wuprofeti wo tala awu wu ka Masalmo awa, awu wu womba-wombako ngu ti ndi no humelela ngu ditshiku da kufa kwawe. (Mas. 22:7, 8, 15, 16, 18, 24) I si ngeto dwe, tindimana to gwita ta masalmo yawa ti womba-womba ngu kuguleka ka wukoma wa Jehovha awu wu ndi no anda ha mafuni kotshe.—Mas. 22:27-31.

Kuva Jesu a di wombile mapswi a Dhavhidha ti nga maha a ti lava kuwomba ti to ene a si na mnado. A si se fa, ti lavile e tsanisela kuxaniswa ni kulumbetwa ti to ene i ti m’ruketeli wa Txizimu. (Mat. 26:65, 66) Dihungo dakwe di xuxilwe ni wusiku ni ku kha ka londiselwa mlayo wa wuxuxisi. (Mat. 26:59; Marku 14:56-59) Ku va Jesu a di wombile mapswi yawa kota txiwotiso ti nga maha ati lava kuwomba ti to a sa maha ta walo ti to e faneleka kudawa ngu nzila yile.

Ti nga maha Jesu a txo khumbutisa vathu ti to hambiku Jehovha a nga tumelela Dhavhidha e xaniswa hi nga ti to Dhavhidha a to ko maha to biha. Ati Dhavhidha a nga womba kha ti kombisi ti to a ko mbi na likholo. Msana kova a di wombile mapswi yawa a kombisile ti to Jehovha a ndi na mu hulukisa ni ku Jehovha a mu katekisile. (Mas. 22:23, 24, 27) Ngu ha kufanako ku va Jesu “Mwanana wa Dhavhidha” a ti xanisilwe ka phande ya xanisa kha ti wombi ti to Jehovha a to ko mbi tsakela mwanana wakwe Jesu.—Mat. 21:9.

Ti nga maha Jesu a txo kombisa kukarateka ngu ku Jehovha a nga ti lekile ku mu vhikela kasi kukombisa ti to a nga simama a di thembekile. I si nga txikongomelo txa Jehovha ku Jesu e xaniseka ni kufa. Eto ti txi laveka ngu ku Jehovha a nga wukelwa. Jesu sa maha txilo txa walo, kambe ti lavile e xaniseka ni ku fa kasi kuxamula txiwotiso atxi Sathani a nga txi wusa. Ni kutshumela e ningela mtirulo kasi kuxava wutomi awu Adhamu a nga wu luza. (Marku 8:31; 1 Pedro 2:21-24) Atiya ti do koteka dwe ngu ku Jehovha a nga leka kuvhikela Jesu ngu mbimonyana.

Ti nga maha Jesu a ti lava kuvhuna vaengiseli vakwe ku veka mapimo ka txivangelo atxi txi nga Jehovha e tumelela ku e dawa ngu nzila yiya. * Jesu a txi ti ziva ti to nzila yi a ndi no fa ngu yona yi ndi na khuvekisa vo tala. (1 Vak. 1:23) Ngako valondeteli vakwe va txi veka mapimo ka txivangelo txa lifo lakwe, vona va si na kukhuvekiswa. (Vag. 3:13, 14) Vona va si na ku mu wona kota txigevenga, kambe kota m’hulukisi.

Ti si nga ni mhaka ni ti nga vako ti di mahile Jesu e womba mapswi yawa ene a txi pfisisa ti to ati ti nga ti mu humelela ti txi hetisisa kudhunda ka Jehovha. Msana kova a di wombile mapswi ya ma ku ka Masalmo, Jesu a ti khene: “Totshe ti hetisekile.” (Joh. 19:30; Luka 22:37) Ina, kuva Jehovha a di lekile kuvhikela Jesu ngu mbimonyana ti mahile ti to kuhetiseka totshe ati Jesu a nga tela tona ha mafuni. Ni ku ti mahile ti to kuhetiseka totshe ati ti nga bhalwa mayelano ni nene ka “ka Mlayo wa Mosi ni ka Vaprofeti ni mu ka Masalmo.”— Luka 24:44.