GONDO 17
Tsaniseka ti to u wa lisima masoni ka Jehovha!
‘MKOMA wa tsakiswa ngu vathu vakwe.’—MAS. 149:4.
NDANDO 108 Txizimu i lirando
ATI HI NO TI GONDA *
Tate wathu wa nzumani ‘wa tsakiswa’ ngu mmwani ni mmwani wathu (Wona paragrafo 1)
1. Ngu tihi ati Jehovha a ti wonako ka vathu vakwe?
HI NGA wona kutsakisa ka tona kuziva ti to Jehovha Tate wathu ‘wa tsakiswa ngu vathu vakwe.’ (Mas. 149:4) Jehovha a wona tifanelo tathu, wusikoti wathu se e hi tshuketisa kwakwe. Ngako hi txi simama hi di thembekile kwakwe ene a na simama e va hafuhi ni nathu kala magwito.—Joh. 6:44.
2. Ngu kutxani vamwani ti txi va karatela kukholwa ti to Jehovha wa va randa?
2 Vanathu vamwani va nga womba va txi: ‘Jehovha wa randa vathu vakwe kota mtxawa kambe kha ni kholwi ti to ani nokha a nga ni randa.’ Nji txani txi mahako vathu ve pimisa tiya? Oksana * awu a nga xaniswa i ti ngadi mwanana a womba tiya: “Ni tsakile ngutu mbimo yi ni nga bhabhatiswa ni ku tshumela ni va nyaphandule, kambe ku di pindile 15 wa malembe ni khatile kukhumbula ati ni nga xanisiswa tona. Ni pimisile ti to Jehovha kha swi a txi ni randa ni ku kha ni fanelwi ngu kurandwa ngu ngene.” Yua awu i ku nyaphandule awu nene a nga xaniseka i ti ngani mwanana a womba tiya: “Ni ti ningetete ka Jehovha nguko ni txi lava ku mu tsakisa kambe ni si kholwi ti to ene wa ni randa.”
3. Hi na bhula ngu txani ka gondo yiya?
3 Kufana ni Makristu aya hi nga womba-womba ngu ona, awe wa mu randa Jehovha kambe ti nga maha u txi kana-kana ti to ene wa kuranda. Ngu kutxani u di fanete u tsaniseka ti to Jehovha wa kuranda ngu ditshuri? U nga maha txani ti to u xula kukana-kana aku u nga vako u di nako? Hi na xamula siwotiso siya.
U NGA KANA-KANE TI TO JEHOVHA WA KURANDA
4. Ngu kutxani ti di ni phango kukana-kana ti to Jehovha wa hi randa?
4 Lirando li ni mtamo ngutu. Ngako hi txi tsaniseka ti to Jehovha wa hi randa ti na hi vhuna ku hi mthumela ngu mbilu yathu yotshe hambi hi txi manana ni sikarato. Ngako u txi kana-kana ti to Jehovha wa khatala ngu ngawe “mtamo wako wu nava wudotho.” (Mav. 24:10, NM) Ngako hi txi kana-kana ti to Jehovha wa hi randa hi luza likholo ka Jehovha se hi na ti ningela manzani ka Sathani.—Vaef. 6:16.
5. Ku mahikile txani ngu vanathu ava va nga ti kana-kana ti to Jehovha wa va randa?
5 Vanathu vamwani vo thembeka va hote ngu didhawa da moya ngu kona ha ko kana-kana. Mwanathu mmwani awu i ku didhota a dhanwako ku i James a khene: “Hambiku ni nga ti thuma Bhetele ni ku ni txi wu tsakela mthumo awu ni nga ti wu maha wo vhuneta ka lidimi limwani. Ni txi ti wotisa to ina Jehovha ngu ditshuri wa tsakela mthumo wangu kani, mbimo yimwani ni si kholwi to ngu ditshuri Jehovha wa engisa mikombelo yangu.” Eva awu nene a ku ka mthumo wa mbimo yotshe a khene: “Ni ti woni to kukana-kana ti to Jehovha wa kuranda ti ni phango nguko ti ku maha u hola ngu didhawa da moya. Atiya ti ku maha u si tsakeli sakudya sa moya se u si tsakeli kuthumela Jehovha.” Michael awu i ku didhota a thumako kota nyaphandule a khene: “Ngako u si kholwi ti to Jehovha wa kuranda, wuxaka wako ni nene wu na hola.”
6. Hi nga maha txani ngako hi txi kana-kana ti to Txizimu txa hi randa?
6 Sikombiso siya si tiveka hakubasani ti to ti ni phango kukana-kana ti to Jehovha wa hi randa. Se hi nga maha txani ngako hi txi khata kukana-kana ti to Jehovha wa hi randa? Hi fanete ku yi tshotsha kule mialakanyo yoneyo ngu txikuluveta. Hi nga kombela ti to Jehovha e vhaleta “mialakanyo” yo karateka ngu ‘kuthutha ka Txizimu, kupindako wotshe wuzivi, ku no veketa timbilu tanu ni mialakanyo.’ (Mas. 139:23; Vaf. 4:6, 7) Khumbula ti to khu nga wekha. Hambi malanda mamwani o thembeka ma wonisana ni txikarato txonetxo. Malanda o thembeka a kale ni ona ma vile ni kukana-kana ti to Jehovha wa ma randa. Konkuwa e wone to hi nga gonda txani ka txikombiso txa mpostoli Paulo.
HI NGA GONDA TXANI KA MPOSTOLI PAULO
7. Ngu sihi sikarato asi Paulo a nga wonisana naso?
7 Ina mbimo yimwani wa thuka u karateka ngu kuva ni mithumo yo tala ayi u si kotiko ku yi maha yotshe? I di toneto u na txi pfisisa txiemo txa Paulo, ene a txi karateka nguko a ti fanete ku e “khatalela otshe mabanza.” (2 Vak. 11:23-28) Ina wa zumba u sa tsaka ngu kona ha ka malwati ya u ku nawo? Paulo a txi xaniswa ngu “m’pa ha mmidini” awu ti wonekako nga i ti malwati o kari a nga ti nawo, se a txi lava kukalamuka ka ona. (2 Vak. 12:7-10) Ina wa thuka u guma mtamo ngu kona ha ka kwa mbi hetiseka kwako? Paulo a ti maha toneto. Ene a ti khene: “Dikhombo dangu!” ngu kona ha ka kwa mbi hetiseka kwakwe.—Var. 7:21-24.
8. Ngu tihi ti nga vhuna Paulo ku e wonisana ni sikarato sakwe?
8 Hambiku a nga txi manana ni siduko, Paulo a simamile e thumela Jehovha. Nji txani txi nga mninga mtamo? Ene a ti ni likholo lo tsana ka mtirulo. Ene a txi khumbula txithembiso txa Jesu a txi txi ku khene: “Votshe va va no kholwa kwakwe [Jesu] va si lovi, aniko va na mana wutomi wo mbi guma.” (Joh. 3:16; Var. 6:23) Paulo i ti mmweyo wa ava va nga ti kombisa likholo ka mtirulo. Ene a txi tsaniseka ti to Jehovha a di ti emisete kudivalela mmwani ni mmwani hambi ava va nga maha sionho so thisa kale bhasta va di tisote.—Mas. 86:5.
9. Hi gonda txani ka mapswi a Paulo aya ma ku ka Vagalatiya 2:20?
9 Mpostoli Paulo a ti ni likholo ka Txizimu txi nga mu vhuna ngu kuthumisa Jesu Kristu. (Lera Vagalatiya 2:20.) Wona mapswi o tsanisa aya Paulo a nga womba. Paulo a ti khene: ‘Mwanana wa Txizimu , awu a nga ni randa, a txi ti ningela ngu ngani.’ Paulo a si tipfi nga m’bihi ha ko za Txizimu txi si mu randi. Ene kha pimisa a txi: Ta pfala ku Jehovha e randa vanathu, kambe to a nga ni randa ani kha ni kholwi. Paulo a khumbutisile Varoma a txi: “Kristu a tumete ku hi fela athu hi di ngadi vaonhi.” (Var. 5:8) Txizimu kha txi khedhi m’thu!
10. Hi gonda txani ka dibhuka da Varoma 8:38, 39?
10 Lera Varoma 8:38, 39. Paulo a txi themba mtamo wa lirando la Txizimu. Ene a bhate ti to ova “txihi ni txihi, kha txi na mbi si kota ku hi hambanisa ni lirando la Txizimu.” Paulo a txi tiziva ti to Jehovha a kombisile kutimisela mbimo yi a nga ti thumisana ni Israyeli. Ene a txi ti ziva ti to Jehovha a ti mu kombile wuxinji. Hi nga khathu Paulo a txi lava kuwomba tiya: ‘Ni nga kana-kanisa kutxani ti to Jehovha wa ni randa kuveti ene a rumete mwanana wakwe ti to e ta ni fela?’—Var. 8:32.
Ati i ku ta lisima ka Jehovha ngu ti hi ti mahako konakuwa ni ti hi no ta maha mbimo ayi yi tako i si nga tiphazamo ati hi nga maha kale (Wona paragrafo 11) *
11. Hambiko Paulo a nga ti mahile sionho asi si nga bhalwa ka 1 Timoti 1:12-15, ngu kutxani a nga txi kholwa ti to Txizimu txa mu randa?
11 Lera 1 Timoti 1:12-15. Ku ni mbimo yi mpostolo Paulo a nga ti ti sotela ngu sionho sakwe sa kale. Kha ti xamalisi a ku mpostoli Paulo a nga khene ene i ti wo “thanga” ko maha sionho. Paulo na a si se gonda ditshuri ti mxanisi wa Makristu ni ku ma beta jele, e tshumela e seketela kudwa ka mamwani. (Mith. 26:10, 11) Alakanya nzila yi a nga vako a di tipfile ngu yona mbimo yi a nga ti mana vaphya va i ku Makristu ava a nga seketela kudawa ka vaveleki va ona. Paulo a txi ti sola ngu sionho sakwe, kambe a ti ti ziva ti to mati bhasta me thekela kha marolelwi. Ene a txi tsaniseka ti to Kristu a mu fete se a bhate ngu kuhkolwa a txi: “Ngu mtamo wa kateko ya Txizimu ni phindukile ni maha txi ni ku txona.” (1 Vak. 15:3, 10) Hi gonda txani? Tsaniseka ti to Kristu a fite ngu mhaka yako ni ku a thute mkhanjo wa ti to u va ni wuxaka wo tsani ni Jehovha. (Mith. 3:19) Ati i ku ta lisima ka Jehovha ngu ti hi ti mahako konkuwa ni ti hi no ta maha mbimo ayi yi tako i si nga tiphazamo ati hi nga maha kale. Ti si nga ni mhaka ni ti to hi ti mahile se hi ti Makristu mwendo nem. —Isaya 1:18.
12. Mapswi ya ma ku ka 1 Johani 3:19, 20 ma nga hu vhunisa kutxani ngako hi txi tipfa hi si nga va txilo?
12 Hambi u txi kholwa ti to lifo la Jesu li nga terula sionho sako u nga womba tiya: ‘Ani kha ni faneleki.’ Ngu kutxani? Ngu mhaka ya kwa mbi hetiseka kwathu. Mbilu yathu yi nga hi kanganyisa hi tipfa hi si nga va txilo hi txi tipfa hi si faneleki kurandwa. (Lera 1 Johani 3:19, 20.) Ngako eto ti txi maheka hi lava kukhumbula ti to “Txizimu nja hombe kupinda timbilu tathu.” Kha hi tumeleli mbilu yathu yi hi kanganyisa yi hi maha hi tipfa hi si nga va txilo. Hahanze ko tipfa hi si nga va txilo, hi fanete kutiwona nga ti Jehovha a hi wonisako tona. Ti to hi maha toneto, hi fanete kugonda Bhiblia ditshiku ni ditshuku, hi khongela mbimo yotshe ni ku ti ha mbimo yo va ni vanathu. Ngu kutxani kumaha tiya i di ta lisima?
KUGONDA BHIBLIA, MKOMBELO NI VANGANA TI NGA KUVHUNA
13. Kugonda Bhiblia ti nga hi vhunisa kutxani? (“Wona dibhokiso di di ku: Va vhunisilwe kutxani ngu Bhiblia.”)
13 Gonda Bhiblia ditshiku ni ditshiku se u na wona tifanelo tatinene ta Jehovha. U na pfisisa to ene wa kudhunda. Ngako u txi alakanyisisa ngu Mibhalo ditshiku ni ditshiku ti na kuvhuna kupfisisa kwati ni “kukawuka” mbilu yako ni mialakanyo yako. (2 Tim. 3:16) Didhota dimwani di dhanwako ku i Kelvin adi di nga ti tipfa i si nga da txilo di womba tiya: “Kulera ni kualakanyisisa ngu dibhuku da Masalmo 103 di ni vhuni ku ni alakanyisisa kha kwati ni kupfisia ati Jehovha a ni wonisako tona.” Evha awu hi nga bhula ngene a womba tiya: “Magwito ka ditshiku ni tiha mbimo yo alakanyisisa ngu ti Jehovha a ti pfisako tona. Atiya ti ni ninga kudikha mbiluni ni aka likholo langu.”
14. Mkombela wu nga ku vhunisa kutxani?
14 Khongela yotshe mbimo. (1 Vat. 5:17) Wungana wu tsaniswa ngako ku di mabhulo. Ti ngu ha kufanako ni wungana wathu ni Jehovha. Ngako hi txi womba ati ti hi karatako, ati hi tipfisako tona, ati hi ti pimisako ka Jehovha ngu kombelo hi kombisa ti to ha mthemba ni ku ha tiziva ti to wa hi randa. (Mas. 94:17-19; 1 Joh. 5:14, 15) Yua awu a hi nga bhule ngene a khene: “Kha ni gwiteli ko womba ati ni nga maha ditshuku donedo dwe.” Kambe ni tula mbilu yangu ka Jehovha ni womba ti ni tipfisako tona. Eto ti ni maha ni wona Jehovha kota Tate awu a ku ni lirando awu a randako vanana vakwe i si nga ku mu wona kota xefe.”—Wona dibhokiso di di ku: “ Ina u khala kulera?”
15. Jehovha a kombisisa kutxani ti to wa khatala ngu ngathu?
15 Tihe mbimo yo va ni vanathu. Vona i ningo ayi yi tako ngu ka Jehovha. (Jak. 1:17) Tate wathu wa mzumani wa kombisa ti to wa khatala ngu ngathu ngu ku hi ninga mwaya wa moya i ku vanathu ava va ‘randako yotshe mbimo.’ (Mav. 17:17) Ka dipapilo di Paulo a nga bhalela Makristu a khe Kolosa a wombile ti to i ti ona ma nga ti mu ‘thavelela.’ (Vakl. 4:10, 11) Hambi Jesu a tumete txivhuno vangana vakwe ni txa tingelozi ni ku a txi tsakete txivhuno txonetxo.—Luka 22:28, 43.
16. Ku va ni vangana vo thembeka ti hi vhunisa kutxani kutshuketa hafuhi ni Jehovha?
16 Ina wa tumela txivhuno txa vanathu va dibanzani? Kugela ti ti ku karatako mngana awu a nga vitwa kha ti wombi ti to wo va mpweka, kambe ti nga kuvhikela. James awu hi nga bhula ngu ngene a womba tiya: “Kuva ni wungana ni vanathu ava va nga vitwa ta ni vhikela. Ngako ni txi tipfa ni si nga wa txilo vangana vonewo va riya nzeve ni ku tshumela ve ni tsanisekisa ti to va ni dhunda. Eto ti ni vhuna kuwona ti to Jehovha ngu ditshuri wa ni randa ni ku wa khatala ngu ngani.” Ti ni lisima ku va ni wungana ni vanathu va dibanzani.
U NGA DIVALI TI TO JEHOVHA WA KURUNDA
17-18. I mani awu hi fanelako ku mu engisa? Ngu kutxani?
17 Sathani a lava ti to awe u leka kumaha ati i ku tatinene. Ene a lava ti to u kholwa ti to Jehovha kha ku randi ni ku kha hi faneleki ku mthumela. Nga ha hi nga ti wona ngu kona, eto hi nga ditshuri.
18 Jehovha wa kuranda, awe u wa lisima masoni kwakwe. Ngako u txi mu engisa awe u na “zumba lirandoni kwako” ngu ha kusingako ni magwito kufana ni Jesu. (Joh. 15:10) Se u nga engise Sathani mwendo kutumelela mbilu yako yi kuxenga. Hahanze keto engisa Jehovha awu a wonako votshe i di va lisima. Tsaniseka ti to ene wa ‘tsakiswa ngu vathu vakwe’ kupata ni nawe!
NDANDO 141 Txidiwukiso txa wutomi
^ par. 5 Vanathu vamwani ti nga va karatela kukholwa ti to Jehovha wa randa. Ka gondo yiya hi na wona to hi nga tsanisekisa kutxani ti to Jehovha wa randa mmweyo ni mmweyo wathu. Hi na tshumela hi wona ti to hi nga xulisa kutxani kukana-kana aku hi nga vako hi di nako ka ti to Jehovha wa hi randa.
^ par. 2 Matina mamwani ma txitxilwe.
^ par. 67 TXHAMUSELO YA MFOTA: Na asi se gonda ditshuri Paulo a xanisile Makristu ni ku ma beta jele. Mbimo yi a nga ta gonda ditshuri ene a txitxile ni ku a kuzetile Makristu kulowe, ti nga maha vamwani ka ona i ti maxaka ya ava a nga ti va xanisile.
