1-2. Ngu txihi txikombiso atxi txi nga hi vhunako kupfisisa mapswi ya ma ku ka 1 Pedro 2:21?

ALAKANYA u txo tsimbila amu ku ku ni mamina. Kambe ku ni m’thu wu a wu zivako kwati wukhalo wonewo, se e thangela masoni kwako ti to e kukongomisa. Mbimo yi a tsimbilako a siya mikondo msana kwakwe ti to u yi londisa. Mbimo yimwani ti nga maha e thangela e kusiya! Kambe khu na mbi thava. Hahanze keto, awe u na zama kukanda aha a nga kanda kona kasiku u si kandi mamina.

² Kota Makristu a ditshuri, hi tsimbila ka wukhalo awu wu ku ku ni mamina, i ku ditiko diya da Sathani. Kambe Jehovha a hi ningile mkongomisi wa wunene, i ku Jesu Kristu mwanana wakwe, awu hi nga londiselako mkondo wakwe. (1 Pedro 2:21) Pedro a fananisa Jesu ni mkongomisi. Kufana ni mkongomisi awu hi nga bhula ngu ngene ka txikombiso, Jesu nene a hi siyete mkondo wakwe kasi ku hi wu londeta. Konkuwa he bhule ngu siwotiso siraru asi si londiselako: Ti womba txani kulondeta mkondo wa Jesu? Ngu kutxani hi di fanete ku wu londeta? Ni ku hi nga mahisa kutxani?

3. Ti womba txani kulondeta mkondo wa m’thu?

³ Ti womba txani kulondeta mkondo wa m’thu? Amu ka Bhiblia, mapswi ya ma ku ‘kutsimbila’ ni “mkondo,” mbimo yimwani ma nga womba mahanyelo a m’thu. (Gen. 6:9; Mav. 4:26) Nzila yi m’thu a hanyako ngu yona, yi nga fananiswa ni mkondo wakwe awu a wu siyako a txi tsimbila. Se kulondeta  mkondo wa m’thu ti womba kutekelela txikombiso txakwe ni ku mu etetela.

4. Ti womba txani kulondeta mkondo wa Jesu?

⁴ Se ti womba txani kulondeta mkondo wa Jesu? Ngu mapswi o koma, tiwomba kutekelela txikombiso txakwe. Ka m’bhalo wu wu nga ñola msungo mhaka, Pedro a wombile ngu txikombiso txa txinene txa Jesu txa kutimisela kuxaniseka, kambe ku ni tinzila timwani to tala ati hi nga etetelako ngu tona Jesu. (1 Pedro 2:18-25) Athu hi nga etetela totshe ti Jesu a nga ti maha ka wutomi wakwe, ti patako ati a nga womba ni ti a nga timaha.

5. Ina ti nga koteka ku vathu va va nga mbi hetiseka ve londeta mkondo wa Jesu? Txhamusela.

⁵ Aku hi ku vathu vo mba hetiseka, ina hi nga sikota kulondeta mkondo wa Jesu? Ina ti nga koteka. Athu hi nge sikoti kulondeta mkondo wa Jesu ngu kuhetiseka. Kambe ngako hi txi maha totshe ti hi ti kotako ti to hi kanda amu Jesu a nga kanda hambi ku hi nga mbi hetiseka, hi na hetisisa mapswi a mpostoli Johani aya ma ku khene: “Hi fanete kutsimbila nga ti ene Jesu a nga tsimbitisa tona.”—1 Joh. 2:6.

6-7. Ngu kutxani kulondeta mkondo wa Jesu ti nga hi tshuketisako hafuhi ni Jehovha?

⁶ Kulondeta mkondo wa Jesu ti hi tshuketisa ka Jehovha. Ngu kutxani? Txo khata: Jesu a hi vekete txikombiso txa txinene txo hanya ngu nzila yi yi tsakisako Jehovha. (Joh. 8:29) Se ngako hi txi londisa mkondo wa Jesu hi na tsakisa Jehovha. Ni ku hi nga tsaniseka to Tate wathu wa nzumani a na tshuketa ka vale va mahako mizamo yo mtsakisa.—Jak. 4:8.

⁷ Txa wumbidi: Jesu a etetete Tate wakwe ngu kuhetiseka. Ngu toneto Jesu a nga khene: “Awule a ni wonako, a woni Tate.” (Joh. 14:9) Mbimo yi hi etetelako Jesu ka nzila yi a nga ti  ñola ngu yona vamwani, yo fana ni wuxinji wu a nga wukombisa ka dijaha di di nga di ni tshekela, wumbilu wu a nga wu kombisa ka wamsikati wule a nga ti ni lingole-ngole ni wumbilu wu a nga txi kombisa ava va nga ti xaniseka, hi nava hi txi etetela Jehovha. (Marku 1:40, 41; 5:25-34; Joh. 11:33-35) Ngako hi txi tekelela Jehovha hi na tshuketa hafuhi kwakwe.

8. Txhamusela to ngu kutxani kulondeta mkondo wa Jesu ti nga hi vhunako.

⁸ Kulondeta mkondo wa Jesu ti na hi vhuna ku hi si tsulupetwe ngu mafu awa a Sathani. Ka wusiku wakwe wo gwita ha mafuni hawa, Jesu a wombile tiya: “ni di xute ditiko.” (Joh. 16:33) Ene a ti lava kuwomba to kha leka mialakanyo yakwe yi jikiswa ngu mithumo ni mapimiselo a ditiko diya. Jesu kha thuka e divala a ti ti nga mu maha eta ha mafuni hawa, i ku ku ta sawulekisa ditina da Jehovha. Athu ko? Ka mafu awa, ku ni to tala ati ti nga hi tsulupetako. Kambe kufana ni Jesu, hi lava kuveka mapimo ka kumaha kuranda ka Jehovha. Ngako hi txi maha eto, nathu hi na ‘xula’ ditiko.—1 Joh. 5:5.

9. Hi fanete hi maha txani ti to hi simama ka nzila yi yi yisako wutomini?

⁹ Kulondeta mkondo wa Jesu ti nga hi maha hi va ni wutomi wo mbi guma. Mbimo yi dijaha dimwani da tithomba di nga wotisa to di nga maha txani ti to di mana wutomi wo mbi guma, Jesu a xamute tiya: “Ngono u txi ni londisa.” (Mat. 19:16-21) Jesu a gete tiya Vajudha ava va nga si kholwi ti to ene i ti Kristu, a ti khene: “Tinvuta tangu . . . ta ni londisa. Ani na ti ninga wutomi wu wu si gumiko.” (Joh. 10:24-29) Mbimo yi Nikodhemo awu i nga ti txiru txa dibanza da wuxuxisi, mbimo yi a nga kombisa kutsakela tigondo ta Jesu, Jesu a wombile tiya: “Votshe va va no kholwa kwakwe” va ndina “mana wutomi wo mbi guma.” (Joh. 3:16) Hi nga kombisa ti to hi ni likholo ka Jesu ngu kumaha ati a nga hi gondisa, ni kutekelela txikombiso txakwe. Ngako hi txi maha toneto, hi na simama hi di ka nzila yi yi yisako wutomini.—Mat. 7:14.

10. Ti womba txani “kuziva” Jesu? (Johani 17:3)

¹⁰ Na hi si se khata kulondeta mkondo wa Jesu, hi fanete hi mu ziva. (Lera Johani 17:3.) Kha ti ngaho ku hi nga khathu se ha mu “ziva” kwati Jesu. Tilava hi simama hi gonda ngu ngene. Hi fanete kusimama hi va ni wuxaka ni nene, hi gonda tifanelo takwe, hi gonda mapimiselo akwe, ni ti a nga txi hanyisa tona. Ti si nga ni mhaka ni mbimo yi hi ku nayo hi txi thumela Jehovha, hi fanete kusimama hi “ziva” Jehovha ni Jesu.

11. Hi nga gonda txani ka Tievhangeli ta mune?

¹¹ Ti to hi kota kuziva mwanana wakwe, Jehovha a mahile to kubhalwa Tienvhangeli ta mune amu ka Bhiblia. Tievhangeli toneto, ti ni wutomi ni mthumo wo txhumayela awu  Jesu a nga wu maha. Matimu onewo, ma kombisa ati Jesu a nga womba, a nga maha, ni ti a nga txi tipfisa tona. Mabhuku onewo, ma hi vhuna ku hi “alakanya” txikombiso txa Jesu. (Vaheb. 12:3) Hi nga womba ti to ona ma ni mkondo awu Jesu a nga hi siyela ti to hi wu londeta. Ngako hi txi xolisisa kwati Tievhangeli tiya, hi na mziva kwati Jesu. Kota wuyelo hi na sikota kulondeta kwati mkondo wakwe.

12. Hi nga maha txani ti hi wuyelwa ngu kugonda Tievhangeli?

¹² Ti to hi wuyelwa ngu Tievhangeli tiya, kha ha fanela hi gwitela ko lera dwe. Hi fanete hi tiha mbimo yo gonda ni kualakanyisisa ngu ti hi ti gondako. (Fananisa ni Joxuwa 1:8.) Konkuwa, he woni mamahelo a mambidi aya ma nga hi vhunako kualakanyisisa ngu ti hi ti gondako ka Tievhangeli, ni kutshumela hi ti thumisa.

13. U nga maha txani ti to timaha nga wo wona ati u ti gondako?

¹³ Txo khata, zama kuwona ati u ti gondako ka Tievhangeli. Thumisa mialakanyo yako kasi kuwona, kuengisa ni kupfa ati ti nga txi maheka. Kasi ku u tikota kumaha toneto, maha wuxolisisi ngu kuthumisa tifarameti ati sengeletano ya Jehovha yi hi ningako. Mbimo yi u gondako xolisisa timwani to engetela, to fana ni ti ti nga maheka msana ni ti ti nga londisela. Zama kuwona titxhamuselo timwani to yelana ni ti u ti gondako. Fananisa ati u ti gondako ni ti ti ku ka Tievhangeli timwani. Ti nga maha m’bhali wa Evhangeli yo kari, a ti txhamusete to tala kupinda m’bhali mmwani.

14-15. Hi nga maha txani kasi kuthumisa ati hi ti gondako ka matimu a Jesu?

¹⁴ Txa wumbidi, thumisa ati u ti gondako ka Tievhangeli ka wutomi wako. (Joh. 13:17) Msana kova u di gondile to kari amu ka Tievhangeli, tiwotise tiya: ‘Ngu yihi gondo ni nga yi hapha, ayi ni nga yi thumisako ka wutomi wangu? Ni nga yi thumisisa kutxani gondo yiya ti to ni vhuna m’thu mmwani?’ Alakanya ngu m’thu wu u nga mvhunako ni mbimo ya yinene yo m’vhuna ngu yona, u m’gela ati u nga gonda.

 ¹⁵ Konkuwa he xolisisi to hi nga ma thumisisa kutxani mamahelo awa a mambidi. Hi na xolisisa matimu a noni ya txisiwana ayi Jesu a nga yi wona dithepeleni.

16. Ngu tihi ati noni yi yi nga wombwa ka Marku 12:41 yi nga maha?

¹⁶ Zama kuwona ati ti nga ti maheka. (Lera Marku 12:41.) I ti 11 ka Nisan ka dilembe da 33 E.C. ku txo txhota divhiki ti to Jesu efa. Jesu a hetile ditshiku dotshe a txi txhumayela dithepeleni. Vathangeli va wukhongeli va ti mkaneta ngutu. Msananyana ka kona va ti mu wotisile to a ti wu mana hani mtamo wo maha sixamatiso. Vamwani va zamile ku msungelela ngu siwotiso. (Marku 11:27-33; 12:13-34) Konkuwa Jesu a jikile eya ka didhawa dimwani da dithepele, aha kumanekako kona wukhalo wa vavasikati, ngu koneho ati mawona mabhokiso a miningelo. Se a to khalahatsha e khata kuwonetela vathu va txi maha miningelo. Ene a woni vathu vo tala vo ganya va txi betela male yo tala. Ti nga maha ati hafuhi aha koza epfa male yi txi ngele-ngele yi txi betwa mu ka mabhokiso.

17. Txhamusela ati ti nga mahwa ngu noni ati ti nga bhalwa ka Marku 12:42.

¹⁷ Lera Marku 12:42. Msana ka mbimonyana, Jesu e wona wamsikati wo kari. Ene i ti, “wamsikati wa txisiwana, wa noni.” (Luka 21:2) Txa wutomi txi ti m’bhedhela, ene ti txi mkaratela kumana sakudya. Kambe a ti ya beta miningelo, asi lavi kuwonwa ngu m’thu, ti nga maha simalyana si a nga beta si sa maha ku ngetxee. Jesu a ti woni ti to i ti male muni a nga ti betile, i ti ma lepta mambidi a nga ti betile, i nga ti male ya yidothu ngutu ka mbimo yoneyo. Male yoneyo yi si eneli hambi kuxava txindile tximwetxo, i nga ti txinyana txa bharato ngutu.

18. Ngu kuya ngu Marku 12:43, 44, ngu tihi ti Jesu a nga womba mayelano ni noni?

¹⁸ Lera Marku 12:43, 44. Jesu a renderile ngutu ngu noni yile. Se a to dhana valondeteli vakwe e va gela ngu ta noni yile atxi khene: “Awu wa noni, wa txisiwana, a vekile mu ka msengo male ya yingi ngutu kupinda votshe.” E tshumela e txhamusela atxi: “Votshe vamwane [ngutu ngutu vale vo ganya] va vekile male, na yi txi khukhela kutalelwani kwawe; kasi ene, kupwatani kwakwe, a ningete sotshe simaleana si a nga ti naso, asi a nga ti fanela kuhanya ngu sona.” Mbimo yi noni yile yi nga ningela yotshe male yi yi nga ti nayo, yi ti themba to Jehovha a na khatalela silaveko sa yona.—Mas. 26:3.

19. Ngu tihi ti hi ti gondako ka ti Jesu a nga womba mayelano ni noni yile ya txisiwana?

¹⁹ Thumisa ati u ti gondako ka wutomi wako. Tiwotisi tiya: ‘Ngu tihi ti u nga tigondako ngu ti Jesu a nga ti womba ngu noni yile ya txisiwana?’ Alakanya ngu noni yileya, yona yi ti tilava kumaha mningelo wa hombe ka Jehovha. Kambe yi mahile ti yi nga tikota, yi ningete Jehovha ati ti nga ti mtamoni ka yona. Ni ku Jesu a txi tiziva to miningelo yile i di ya lisima masoni ka Jehovha. Ahawa, hi mana gondo ya lisima kwathu hotshethu, Jehovha wa tsaka ngako hi txi tikarata ni ku mthumela ngu mbilu yotshe. (Mat. 22:37; Vakl. 3:23) Ngako hi txi ti tsitsirita ni kuthumisa mbimo, mtamo wathu ka wukhozeli wa Jehovha, ti patako kutxhumayela ni kuya mitshanganoni, Jehovha wa tsaka.

20. U nga thumisisa kutxani ati u nga ti gonda ka noni ayi ya txisiwana? Womba txikombiso.

²⁰ Hi nga thumisisa kutxani ati hi nga tigonda ka noni? Alakanya ngu vanathu ava u nga va tsanisekisako ti to Jehovha wa tsaka ngu ti va ti mahako. Ngu txikombiso, ina u nga alakanya ngu mwanathu awu a nga kumba, mwendo  a ku ni malwati awu a ti pfako mnando mwendo a ti wonako a si mahi ta boti nga ha a nga ti tilava ngu kona? Mwendo u nga alakanya ngu mwanathu awu aku ni malwati a hombe, awu a si tikotiko ku ta xalela mitshangano yathu ka Nyumba ya Mfumo divhiki ni divhiki? U nga va vhuna vanathu vonevo, ngu kuwomba mapswi ya ma ‘akisanako.’ (Vaef. 4:29) U nga va bhulela tigondo to tsakisa a ti u nga ti mana ka noni ayi ya txisiwana. Mapswi ako, aya ma akako ma nga va tsanisekisa ti to Jehovha wa tsakiswa ngu ti va tikotako kutimaha ka mthumo wakwe. (Mav. 15:23; 1 Vat. 5:11) Ngako u txi ndunduzela vamwani ngu ku va mahako ati va nga tikotako, ti si nga ni mhaka ni ti to tingi mwendo tidotho, u londeta mkondo wa Jesu.

21. Ngu tihi ti u nga ti emisela kumaha?

²¹ Ha bonga kuva Jehovha a di hi ningile Tievhangeli tiya tiwomba-wombako ngu wutomi wa Jesu, tona ta hi vhuna ku mu etetela ni kulondeta mkondo wakwe.Ti ngo txani u maha gondo ya m’thu apune mwendo wukhozeli wa mwaya ngu kuthumisa Tievhangeli tiya. Kambe, u nga divale ti to, kasi ku u wuyelwa ngu ti u no tigonda, zama kuwona ati ti nga txi maheka, ni kutshumela u thumisa ati u ti gondako ka wutomi wako. Kuengetela keto, kha ha fanela kugwitela ko etetela ati Jesu a nga maha dwe, kambe hi fanete kumaha ati Jesu a nga womba. Ka gondo yi yi londiselako, hi na ta gonda ngu ti Jesu a nga womba a ti hafuhi ni kufa.