1. Ngu tihi ati hotshethu hi navelelako maxaka athu?

MWANATHU wu a dhanwako ku i Paulina * a khene: “Mbimo yi ni nga khata kugonda ditshuri, ni ti lava to votshelele mwayani kwangu ve ta bela Paradhise, ngutu-ngutu mwamna wangu Wiliyamu, ni mwanana wathu wa dizambi. Ni ti tsakela ku ve thumela Jehovha.” Ina awe u ni maxaka aya ma kombi se thumela Jehovha? Ti nga maha u tipfa kufana ni Paulina.

2. Ngu sihi siwotiso asi hi no bhula ngu sona?

² Athu hi nge sinzisi maxaka athu kuamukela mahungu a manene, kambe hi nga va vhuna ku ve tsakela madungula a Bhiblia. (2 Tim. 3:14, 15) Ngu kutxani hi txi txhumayela maxaka athu? Hi nga maha txani to hi kombisa kukhatala? Hi nga maha txani kasi ku hi vhuna maxaka athu me thumela Jehovha? Dibanza dathu di nga vhunisa kutxani?

3. Ngu kuya ngu 2 Pedro 3:9, ngu kutxani ti txi lava hi txhumayela maxaka athu?

³ I si nga kale Jehovha a na fuvisa mafu awa. Se, ku no huluka dwe ava va ku “ni fanelo ya wutomi wo mbi guma”. (Mith. 13:48) Hi heta mbimo yo tala ni mtamo hi txi txhumayela vathu va hi si va ziviko, se kha ti xamalisi aku hi navelako kuwona maxaka athu ma txi thumela Jehovha kumweko ni nathu. Tate wathu wa lirando Jehovha “kha ti lavi ti to ni wammweyo a txi lova, aniko a lava ti to votshe ve hunduluka.”—Lera 2 Pedro 3:9.

4. Ngu yihi phazamo hi nga thukako hi yi maha hi txi txhumayela maxaka athu?

 ⁴ Ti lava hi khumbula to ku ni nzila ya yinene ni yi i si ngako ya yinene ko txhumayela mahungu a manene. Mbimo yi hi txhumayelako vathu hahanze hi tolovela ku va ni txixonipho, kambe hi nga thuka hi maha ngu kugangela mbimo yi hi txhumayelako maxaka athu.

5. Ti lava hi khumbula txani na hi se txhumayela maxaka athu?

⁵ Wungi wathu ti nga maha hi txi ti sola ngu nzila yi hi nga txhumayela ngu yona maxaka athu, ni ku hi nga thuka hi wona nga kha ha ti maha ngu nzila ya yinene. Mpostoli Paulo a layile Makristu a txi khene: “Kuwomba-womba kwanu ku na ve ko tsakisa yotshe mbimo, na ku di lungilwe ngu m’nyu, ti to mi ziva ti mi fanelako kuxamulisa tona m’thu ni m’thu.” (Vakl. 4:5, 6) Ti lava hi khumbula txialakanyiso txiya mbimo yi hi txhumayelako maxaka athu. Ngako hi si mahi toneto, hi nga thuka hi va swira i si nga ku va vhuna.

6-7. Womba txikombiso txa ti to ngu kutxani ti txi laveka kukombisa kukhatala ngu mngana wa wukati a wu a si thumeliko Jehovha?

⁶ Kombisa kukhatala. Paulina wu a nga wombwa khe msana a khene: “Makhatoni ni txo lava ku ani ni mwamna wangu hi bhula ngu timhaka ta moya dwe. Hi si bhuli ngu timwani.” Kambe, mwamna wakwe Wiliyamu a si zivi to tala ngu Bhiblia nem a si pfisisi txilo ka ti msikati a nga ti womba-womba ngu tona. Ka mwamna ti txo woneka nga Paulina o pimisa ngu ta wukhongeli basi. Se a txi pimisa to msikati a kanganyisilwe ngu wukhongeli awu wu ku ni phango.

 ⁷ Paulina wa tumela to a ti heta mbimo yo tala a di ni vanathu mitshanganoni, thembweni ni ka mibusonyana. Ene a khene: “Yimwani mbimo Wiliyamu a ti wuya mtini e ta zumba ekha.” Ta pfala aku Wiliyamu a nga ti mu xuva msikati ni mwanana. Phela vathu ava msikati a nga ti heta mbimo yo tala navo, Wiliyamu a si va zivi, ni ku ti ti woneka nga se i ti va lisima ngutu kupinda ene. Se Wiliyamu a ti lava ku ve daya wukati. Paulina nga a di mahile txani kukombisa to wa khatala ngu mwamna wakwe?

8. Ngu kuya ngu 1 Pedro 3:1, 2, nji txani atxi txi nga gwesako timbilu ta maxaka athu?

⁸ Veka txikombiso txa txinene. Ati hi mahako ti tolovela ku va tona ti gwesako maxaka athu kupinda ati hi wombako. (Lera 1 Pedro 3:1, 2.) Paulina a gwitisile ku ti tumbula to eto ditshuri. Ene a khene: “Ni ti ti ziva to Wiliyamu a txi hi randa ni ku ene a si lavi kudaya wukati. Kambe kudhukisela kwakwe ku ni mahile ni wona to ti lava ni maha ati Jehovha a ti wombako ngu wukati. Hahanze ko bwabwata ngutu, ti txi lava ni veka txikombiso txa txinene ka mahanyelo angu.” Paulina se a lekile kusinzisa Wiliyamu kubhula ngu timhaka ta moya mbimo yotshe, kambe e khata kubhula nayo ngu timwani ta wutomi. Wiliyamu a woni msikati se i ti wo rula, ni ku mwanana wawe se a ti engisa. (Mav. 31:18, 27, 28) Mbimo yi Wiliyamu a nga wona kutxitxa ka mwaya wakwe ngu mhaka ya Bhiblia a tulekile mbilu se e khata kupimisa kugonda Bhiblia.—1 Vak. 7:12-14, 16.

9. Ngu kutxani ti txi lava hi tsanisela?

⁹ Tsanisela mbimo yi u zamako kuvhuna maxaka ako. Jehovha wa hi vekela txikombiso  txa txinene. Ene a ninga vathu mkhanjo wo ve engisa mahungu a manene “ditshiku ni ditshiku” ti to ve mana wutomi. (Jer. 7:25) Mpostoli Paulo a gete Timoti ti to e tsanisela a txi vhuna vathu. Ngu kutxani? Nguko, a txi maha toneto a ndi na ti hanyisa ni kutshumela e hanyisa ava va mu engisako. (1 Tim. 4:16) Aku hi dhundako maxaka athu, hi lava ku me ziva ditshuri di di ku mu ka Bhiblia. Ngu mbimo mapswi ni simaho sa Paulina si ve ni wuyelo ya yinene ka mwaya wakwe. Konkuwa mwamna wakwe nene a thumela Jehovha. Vona mbanyaphandule ni ku Wiliyamu a thuma kota didhota.

10. Ngu kutxani ti txi lava hi timisela?

¹⁰ Timisela. Mbimo yi hi txitxako mahanyelo hi hanya ngu milayo ya Txizimu, maxaka athu ti nga ma karatela ku hi pfisisa. Txo khata va na wona to kha hi swi hi sengela navo ka sihena sawe sa wukhongeli ni ku kha hi beleli ta politika. Vamwani va nga thuka ve hi henyela. (Mat. 10:35, 36) Kambe kha ti lavi hi va tsukula. Ngako hi txi leka ku va vhuna ve pfisisa ati hi ti kholwako, hi nga va se hi di va lamute kota vathu vo mbi faneleka kumana wutomi wo mbi guma. Jehovha a ningile Jesu mthumo wo lamula i si nga athu. (Joh. 5:22) Ngako hi txi timisela, maxaka athu ma nga thuka me engisa mahungu a manene.—Wona di bhokiso di di ku: “ Thumisa site yathu ti to u gondisa.”

11-13. U gonda txani ka nzila yi Alice a nga ñola ngu yona vaveleki vakwe?

¹¹ Vana ni wunene kambe u si thavi. (Mav. 15:2) Wona txikombiso txa Alice. Mbimo yi a nga gonda ditshuri a ti zumba ka wukhalo wumwani kule ni vaveleki vakwe ava va nga txi dhunda politika ni ku va si kholwi to Txizimu txi ho. Ene a ti woni to ngu txikuluveta ti txi lava e gela vaveleki vakwe timhaka ta tinene ati a nga ti gonda. Ene a khene: “Loko u txo swela kugela vaveleki vako ngu ti se u kholwako ka tona, va na henya ngutu.” Ene a va bhalete dipapilo e va wotisa mawonelo awe ngu mhaka yo kari ayi a nga wona to yi na va tsakisa, kufana ni lirando. (1 Vak. 13:1-13) Ene a bongile vaveleki vakwe ngu ku va mu khatalelako, e tshumela e va ninga so maha. Mbimo yi a nga txi pfuxela vaveleki vakwe, a ti vhuneta mame wakwe mithumo ya ha mtini. Makhatoni vaveleki vakwe kha va tsaka mbimo yi Alice a nga va gela ngu ti a nga ti kholwa ka tona.

¹² Mbimo yi Alice a nga ti mtini ni vaveleki vakwe, a simamile e lera Bhiblia ditshiku ni ditshiku. Alice a khene: “Atiya ti vhunile mame kuwona to Bhiblia i ti ya lisima kwangu.” Se, tate wa Alice a khatile kugonda to kari ta Bhiblia kasi kupfisisa kwati ati Alice a nga ti ti kholwa, ni kutshumela e lava kukaneta Bhiblia. Alice a khene: “Ni mu ningile Bhiblia ni ku ni ti bhate ka yona to kari ati ni nga ti ti gondile.” I ve yihi wuyelo? Hahanze ko kaneta Bhiblia, tate wa Alice a gwesilwe ngutu ngu ti a nga lera ka Bhiblia.

¹³ Hi fanete hi va ni wunene hi si thavi, hambi ti txi lava hi tsanisela sikarato. (1 Vak. 4:12) Ngu txikombiso Alice ti lavile e tsanisela kukanetwa ngu mame wakwe. Alice a khene: “Mbimo yi ni nga bhabhatiswa, mame wangu a ni gete ku khene se ‘ti si rwayi.’” Se Alice a mahile txani? Ene a khene: “Hahanze ko sisa ati ni kholwako ka tona, ngu txixonipho ni txhamusete ti to ni mahile txisungo txo va mmweyo wa Tifakazi ta Jehovha, ni ku na mbi tshumelela msana.  Ni zamile kutsanisa mame to na mu randa ngutu. Hotshethu hi to dila ka ditshiku donedo hi gwita hi bhika sakudya so tshamba. Kukhukhela koneho, mame ati ti wona to Bhiblia yi txi tshukwatisa mahanyelo angu.”

14. Ngu kutxani ti si lavi hi tumelela maxaka ku me hi lekisa kuthumela Jehovha?

¹⁴ Ti nga teka mbimo ti to vaveleki vathu ve pfisisa ti to kukhozela Jehovha nda lisima ngutu kwathu. Ngu txikombiso, mbimo yi Alice a nga sawula kuleka mthumo wu vaveleki vakwe va nga ti mu sawulete e thuma kota nyaphandule, mame wakwe a tshumete e dila kambe. Kambe Alice a tsanisete. Ene a khene: “Ngako u txo tumelela ati maxaka ma ti lavako, ona ma nga kutshunda kumaha sisungo ka timwani. Kambe, ngako u txi va ni wunene u si thavi, vamwani va nga kuengisa.” Eto ngu ti nga humelela Alice. Konkuwa vaveleki vakwe mbanyaphandule ni ku tate wakwe a thuma kota didhota.

15. Ngu kuya ngu Matewu 5:14-16 ni 1 Pedro 2:12, “mithumo ya yinene” yi ma vhunisa kutxani maxaka athu?

¹⁵ Jehovha a ndinda vathu ngu kuthumisa “mithumo ya yinene” ya dibanza da Wukristu. (Lera Matewu 5:14-16; 1 Pedro 2:12.) Ngako mngana wako wa wukati i singa Fakazi, ina wa va ziva vamwani va dibanzani kwanu? Paulina wule hi nga bhula ngu ngene, a rambile vanathu va dibanzani kasi ku mwamna wakwe Wiliyamu e ta va ziva. A txi khumbula nzila yi mwanathu mmwani a nga mu vhuna ngu yona kuwona mahanyelo a Tifakazi, Wiliyamu a khene: “A kombete ditshiku dotshe mthumoni kwakwe ti to hi ta xalela bholwa. Ngu mbiluni ni ti khani ‘kasi  hi nga ti to mbimo yotshe o tendera ta wukhongeli!’”

16. Ngu kutxani hi di fanete hi ramba maxaka athu ti to me ta xalela mitshangano?

¹⁶ Nzila ya yinene ngutu yo vhuna maxaka athu ngu va ramba mitshanganoni. (1 Vak. 14:24, 25) Aku Wiliyamu a nga ti si nga ni mbimo ngu mhaka ya mthumo, mtshangano wu a nga xalela do khata Njialakanyiso nguko i ti mbimo ya yidotho. Ene a khene: “Kha na tipfisisa to ku ti womba-wombwa ngu txani, kambe ni xamalisilwe ngutu ngu vathu va kona. Va ni tete ve ta ni losa, hi ñolana mtxhanu. Vona mbathu va vanene.” Ku ni mpatwa wumwani awu wu nga ti vhunile Alice ni mwanana wakwe va di mitshanganoni ni thembweni. Se mbimo yi Wiliyamu a nga lava kupfisisa ati Alice a nga ti kholwa ka tona, a kombete mwamna wa kona to e gonda nayo Bhiblia.

17. Ina hi fanete hi tipfa mnando ngako maxaka athu ma si tumeli ditshuri? Kambe, ngu kutxani hi sa fanela kukarala hi txi vhuna maxaka athu?

¹⁷ Hi navela to otshe maxaka athu me thumela Jehovha. Hambi keto, ku si nga ni mhaka ni mizamo yathu yo va vhuna ti to ve thumela Txizimu, ti nga maha va si di lavi ditshuri. Ti di ngeto, hi nga tiningeni mnando ngu mhaka ya txisungo txawe. Phela, hi nge sinzisi m’thu ti to e tumela ditshuri. Kambe, u nga kalale nzila yi mahanyelo ako ma nga vhunako ngu yona maxaka ako, mbimo yi ma ku wonako to u na ni litsako aku u thumelako Jehovha. Va mahele mkombelo. Womba-womba navo ngu nzila ya yinene. U nga tshumelele msana! (Mith. 20:20) Tsaniseka to Jehovha a na katekisa mizamo yako. Ngako maxaka ako ma txi kuengisa, ma na huluka!