1-2. Ngu kuya ngu dibhuku da Masalmo 34:8 ti lava hi maha txani ti to hi tumbula to Jehovha mbwa mnene?

ALAKANYA u txo ningwa sakudya a si u si khaliko kudya. Awe u nga gonda to kari ngu sakudya soneso hambi kupfa mbhumulo wa sona hambi kuwotisa vamwani to va wu wonisa kutxani mndiwowo. Kambe ko va ni nzila yimweyo basi ayi u nga tsanisekako ngu yona to wa si dhunda sakudya soneso mwendo ahim him, i ku kusidya upune.

² Ditshuri ti to hi nga ti kota ku ziva ti to Jehovha mbwa mnene ku hokela hani ngu kulera Bhiblia, kulera mabhuku athu hambi kupfa maexperiyensia a vanathu vamwani ava va nga ma wona makatekwa a Jehovha. Kambe athu hi nga sikota ku pfisisa khakwati nzila yi Jehovha i ku mnene ngu yona ngako hi txi ‘duketa’ hipune. (Lera Masalmo 34:8.) Alakanyisisa ngu txikombiso txiya, alakanya u txi lava ku belela mthumo wa mbimo yotshe. Ti to u ti hokelela toneto ti lava u hehukisa wutomi wako, ti nga maha u di khatile kulera ngu themba yi Jesu a nga yi womba ti to ngako u txi thangetisa mfumo Jehovha a na hi ninga sotshe si hi si lavako. Ti nga maha awe u si khali kupfa kuhetiseka ka txithembiso txiya. (Mat. 6:33) Hambiketo awe u nga veka themba ka txithembiso txonetxo u hungula magastu, u hungula maora u hetako u txi thuma se u veka mapimo ka mthumo wo txhumayela. Nga ku u txi maha toneto u na ti pfisisa upune ti to Jehovha wa khatalela silaveko sako. Se ‘duka’ u na tiwona upune ti to Jehovha mnene.

3. Ngu kuya ngu dibhuku da Masalmo 16:1, 2 mba mani ava va amukelako makatekwa a Jehovha?

³ Jehovha “mbwa mnene ka votshe” hambi ka vale va si m’thumeliko. (Mas. 145:9; Mat. 5:45) Kambe ka vale va m’thumelako ngu mbilu yawe yotshe va mana makatekwa o tala. (Lera Masalmo  16:1, 2.) Wona mamwani ka makatekwa aya Jehovha a hi ningako.

4. Ngu yahi makatekwa ya Jehovha a ningako vale va txitxako mahanyelo va maha ti a ti lavako?

⁴ Mbimo yi hi khatako ku thumisa a ti Jehovha a hi gondisako hi wona to wutomi wathu wa tshukwala. Ngu txikombiso, mbimo yi hi nga khata kugonda Bhiblia ni ku randa Jehovha ene a hi vhuni kuxula mahanyelo a walo aya ma nga ti hi hambanisa ni nene. (Vakl. 1:21) Mbimo yi hi nga tiningetela ka Jehovha ni kutshumela hi bhabhatiswa ene a hi ningile makatekwa, mamwani a kona i ku yawa: Livhalo lo basa ni kuva ni wungana nayo.—1 Pedro 3:21.

5. Mthumo wo txhumayela wu ku vhunisa kutxani ku pfisisa ti to Jehovha mbwa mnene?

⁵ Ngako hi txi pateka ka mthumo wo txhumayela hi na tipfisisa khakwati ti to Jehovha mbwa mnene. Vo tala kwathu hi na ni dizowa. Ti nga maha mbimo yi u nga ti se va Fakazi ya Jehovha u txi womba tiya: “Ani na mbi thuka ni sikota ku txhumayela m’thu wu ni si m’ziviko.” Kambe nyamsi awe wa ti kota kumaha toneto mbimo yotshe. Ngu kuvhunwa ngu Jehovha konkuwa awe wa ti dhunda kutxhumayela, i si nga eto dwe mbimo yi u txhumayelako wa txi wona txivhuno txa Jehovha. Ngu txikombiso mbimo u mananako ni mkaneti Jehovha wa kuvhuna u simama u di thuthile. Ngako u txi mana m’thu wu a tsakelako ene wa kuvhuna ku u mana m’bhalo awu u no wu thumisa. Hambi i di ti to wukhalo wu u txhumayelako ka wona kha va tsakeli Jehovha wa ku ninga mtamo ti to u simama.—Jer. 20:7-9.

6. Ngu tihi timwani ti kombisako to Jehovha mbwa mnene?

⁶ Nzila yimwani ayi Jehovha a hi kombisako wunene wakwe ngu hi trenara ti to hi va vatxhumayeli va vanene. (Joh. 6:45) Ngu txikombiso, ka mitshangano ya hagari ka divhiki hi gonda tinzila to txhumayela ni ku hi kuzetwa ku ti thumisa tinzila toneto hi txi txhumayela vamwani. Makhatoni ti nga maha hi thava nyana ku thumisa mamahelo oneyo a maphya. Kambe nga ku hi txi maha toneto hi na wona to hi nava ni wuyelo ya yinene amu hi txhumayelako kona. I si nga eto dwe, mitshangano yathu ya dibanza kumweko ni mitshangano ya hombe yi hi kuzeta ti to hi zama kuthumisa tinzila timwani to txhumayela ngu tona. Atiya nga maha ti lava ti to hi leka miti yathu ya yinene ti to hi ya zumba kumwani hi txhumayela. Kambe nga ku hi txi maha toneto ti na maha ti to Jehovha a hi katekisa. Konkuwa he wone makatekwa mamwani hi nga ma manako ngako hi txi thumisa tinzila timwani to txhumayela, ti si nga ni siemo sathu. Msana keto hi na wona ti to hi nga maha txani kasi ku hi hokela makungo oneyo.

7. Ngu yahi makatekwa hi ma manako nga ku hi txi maha mizamo yo andisa mthumo wathu wo txhumayela?

⁷ Wungana wathu ni Jehovha wa kula. Wona txikombiso txa mwanathu mmwani awu i ku didhota a dhanwako ku i Samuel. * Ene ni msikati wakwe va thumela Colômbia vona se i ti va nyaphandule va mbimo yotshe dibanzani khawe, kambe va txi la ku andisa mthumo wawe wo txhumayela. Se va mahile txisungo txo ya vhuneta ka dibanza dimwani adi di nga ti lava txivhuno. Ti to ve maha kutxitxa koneko ti lavile va hehukisa wutomi. Samuel a womba tiya: “Athu hi londisete ati Dibhuku da Matewu 6:33 di ti wombako se hi emile ku xava silo si i nga si nga sa lisima, kambe a ati ti nga hi karatela nguto ngu leka nyumba yathu. Yona yi ti akilwe ngu nzila ya yinene ni ku yi ti tshurile ngutu.” Ka txiavelo txa txiphya mpatwa wule wu tumbute ti to va ti lava ve hanya ngu male ya yidotho nguto kuhambana ni yi va nga ti yi tolovete kale. Samuel a womba tiya: “Hi woni ti to Jehovha a ti katekisa dizambo dimwani ni dimwani adi hi nga ti di teka ni ku a ti xamula mikombelo yathu. Hi  pfisisile to Jehovha a txi tsaka ngu ngathu ni ku hi txi li pfisisa lirando lakwe ngu ngathu.” Ngako ku di ni tinzila ti u nga andisako ngu tona mthumo wako wo txhumayela teka dizambo. U txi maha toneto u na kulisa wungana wako ni Jehovha ni ku ene a na khatalela sotshe silaveko sako.—Mas. 18:25.

8. U gonda txani ka txikombiso txa Ivan ni Viktoria?

⁸ Hi na mana litsako la hombe. Ivan ni Viktoria va ti thuma kota vanyaphandule khe Quirguistão. Vona va sawute kuhehukisa wutomi ti to ve tikota kuthuma ka txiavelo tximwani ni tximwani ni tximwani kupata ni ka mthumo wo aka. Ivan a womba tiya: “Ani ni txi thuma nguto ka projeto yimwani ni yimwani hi nga ti avelwa yona. Hambi ku hi nga ti karate magwito ka ditshiku athu hi ti tsakile ni ku dikha ngu kuziva ti to hi thumisile mtamo wathu kasi ku seketela mfumo. Hi txi tshumela hi mana litsako nguko hi txi maha vangana vo tala ni ku hi txi maha timwani to tsakisa a ti hi no mbi ti divala.”—Marku 10:29, 30.

9. Ngu tihi ti vamwani ava va ku ni sikarato sa hombe va nga ti kota ku ti hokelela ti txi ta ka mthumo wo txhumayela ni ku ku va wuyetwe ngu txani?

⁹ Athu hi nga mana litsako ka mthumo wathu ka Jehovha hambi hi txi manana ni sikarato sa hombe. Ngu txikombiso, Mirreh awu i ku noni a hanyako ka ditiko dimwani da Africa a ti thuma kota dhokodhela. Kambe mbimo yi a nga reformara a khatile kuthuma kota nyaphandule. Mirreh a ni malwati a hombe aya ma mahako ti mkaratela kutsimbila, ene o gwenta kuthuma di ora dimwedo dwe, ngako a txi txhumayela ngu mti ni mti. Kambe ngako a txi txhumayela ngu txikarinyana wa heta mbimonyana. Ene a ni maendo o tala ni sigondo sa Bhiblia maendo mamwani ni sigondo a si maha ngu telefone. Ngu tihi ti kuzetako Mirreh e simama e engetela mthumo wakwe ka Jehovha? Ene a womba tiya: “Ani na mranda ngutu Jehovha kumweko ni Jesu Kristu. Ngu toneto mbimo yotshe ni kombela Jehovha e ni vhuna to ni maha to tala ngu ha ni nga kotako ngu kona ka mthumo wakwe.”—Mat. 22:36, 37.

10. Ngu kuya ngu dibhuku da 1 Pedro 5:10, Jehovha a ninga txani ka vale va ti emiselako ku maha to tala ka mthumo wakwe?

¹⁰ Hi mana ku trenarwa ngu Jehovha. Kenny awu a thumako kota nyaphandule khe Maurício a ti wone to eto ditshuri. Mbimo yi a nga gonda dhitshuri ene a lekile univhersidhadhe e belela mthumo wa mbimo yotshe. Ene a womba tiya: “Ani ni zama kuva ni mawonelo a mprofeti Isaya awu a nga khene: ‘Ngani wuwa ni rumi ani!’” (Isaya 6:8) Kenny a thumile ka maprojeto o tala o aka ni ku a thumile ko vhuneta ko hunduluxela mabhuku ngu lidimi lakwe. Ene a womba tiya: “Ani ni amukete trenamento ayi ni nga txi yi lava kasi ku hetisisa siavelo sango.” Kambe Kenny kha ya gwitela ko gonda ku ziva mthumo dwe. Ene a engetela a womba tiya: “Ni gondile kuwona to ngu hayi ni nga ti tandeka kona ni tifanelo ati ti lavako ni ti sakulela kasi ku ni thumela kwati Jehovha.” (Lera 1 Pedro 5:10.) Ina awe u nga ti emisela ku ti ningela ti to u amukela trenamento ya Jehovha?

11. Ngu yihi mizamo yimwani ayi vanathu va txisikati va nga yi maha khe Koreia do Sul ti to ve txhumayela ni ku yi vile yihi wuyelo? (Wona mfota wa kapa.)

¹¹ Hambi vahuweleli ava va ku ni experiyensia ni vona ti lava ve trenarwa ka matxhumayelelo mamwani. Ka mbimo ya mtungo wa COVID-19 madhota a dibanza da khe Koreia do Sul ma bhate tiya: “Vanathu vamwani ngu kona ha ka malwati mwendo kukumba va txi pimisa ti to ti si na kukoteka ku ve txhumayela. Kambe konkuwa vona va sikota kutxhumayela ngu ku thumisa videoconferência. Vanathu vararu va ku ni malembe o pinda 80 va gondile ku thumisa komputadhori konkuwa va txhumayela ditshiku ni ditshiku.” (Mas. 92:14, 15) Ina wa tilava ku andisa mthumo wako wo txhumayela u duka u wona ti to Jehovha mbwa mnene? Idi toneto wona ti u  nga ti mahako ti to ti kuvhuna ku hokelela makungo oneyo.

12. Jehovha a thembisa kuninga txani vale va m’thembako?

¹² Gonda ku themba Jehovha. Ngako u txi mthemba ni ku maha totshe ti hi nga ti kotako Jehovha wa thembisa ku hi ni nga makatekwa o tala. (Mal. 3:10) Fabiola mwanathu wu a zumbako Colômbia a ti wone ti to Jehovha ngu ditshuri wa katekisa. Ene a ti la kuthuma kota nyaphandule msana kova adi bhabhatisilwe. Kambe vanana vakwe va vararu kumweko ni mwamna wakwe va txi dependerwa ngu male yi a nga txi hola. Kambe mbimo yi a nga lava kuthavisa reforma ene a khongete nguto ka Jehovha e kombela txivhuno txakwe. Fabiola a womba tiya: “Ngu tolovelo ti teka mbimo yo lapha kasi ku reforma yi huma kambe ya mina kha ya swela yi humile ngu txima dwe, atiya ma vile masingita a Jehovha.” Ku di pindile mitxima yi mimbidi Fabiola a khatile kuthuma kota nyaphandule. Konkuwa a ni kona mu ka 70 wa malembe ni ku a thuma kota nyaphandule kudingana 20 wa malembe. Ka mbimo yoneyo ene a vhunile 8 wa vathu ti to ve hokelela bhabhatiso. Fabiola a womba tiya: “Hambi ku mbimo yimwani ni nga txi karateka, mbimo yimwani ni txi tipfa ni txi guma mtamo kambe Jehovha a txi ni vhuna ditshiku ni ditshiku kasi ku ni londisa txiemiso txango.”

13-14. Ngu sihi sikombiso asi si nga kuvhunako ti to u themba Jehovha ni ku andisa mthumo wako wo txhumayela?

¹³ Etetela vale va nga themba Jehovha. Bhiblia yi tate ngu sikombiso sa vathu ava va nga maha  mizamo ya hombe ti to ve thumela Jehovha. Vo tala ka vona ti lavile ku ve khata ku maha txo kari kasi ku ve amukela makatekwa a vona ka Jehovha. Ngu txikombiso, Abrahamu “a tsute a si zivi ti to a ya hayi,” kambe ene a mani makatekwa msana kova a ti rurile. (Vaheb. 11:8) Jakobe nene a amukete makatekwa a Jehovha msana kova a di lwite ni ngelozi. (Gen. 32:24-30) Ni ku mbimo yi ditiko da Israyeli di nga lava ku bela ka Ditiko da Txithembiso vona va sikoti kutxhatuka mnambo wule wa Jordhani msana kova vaphaxeli va di betile mikondo mu ka mnambo.—Jox. 3:14-16.

¹⁴ Ku ni sikombiso simwani sa va mwanathu sa ti mbimo ta ngweno ava va nga kombisa kuthemba Jehovha ni kusimama va engetela mthumo wawe kwakwe. Ngu txikombiso mwanathu mmwani a dhanwako ku i Payton ni msikati wakwe Diana va txi ti dhunda ngutu kugonda kasi ku andisa mthumo wawe wo txhumayela. Vona va txi lera sikombiso si ku ka mlongoloko awu wu ku khene: “Eles se ofereceram.” * Vona va womba tiya: “Mbimo yi hi nga txi lera ngu sikombiso sa vanathu vonevo ti txi fana ni ku hi txi wona m’thu a txidya sakudya so tshamba. Mbimo yi hi nga txi ya hi txi si wonetela sa kudya soneso se ti hi maha hi lava kuduka hi ‘wona to MKOMA mbwa mnene.’” Ngu ku tsimbila ka mbimo Payton ni Diana va rurile ve ya thumela ka wukhalo wu nga ti ni txilaveko. Ina awe u khala ku tiha mbimo yo gonda ngu sikombiso asi si manekako ka mlongoloko awu wu ku khene Eles se ofereceram? Ina u khala ku xalela mavhidhio ya ma ku: Pregação em Territórios Isolados—Austrália e Pregação em Territórios Isolados—Irlanda aya ma ku ka jw.org? Sikombiso asi si manekako ka milongoloko yiya si nga kuvhuna kuwona tinzila to andisa mthumo wako ka Jehovha.

15. Ngu kutxani i di ta lisima kusawula vangana va vanene?

¹⁵ Langa vangana va vanene. Athu hi nga sikota kuduka mndiwo wu hi si khali kudya nga ku hi di ni ava va wu dhundako. Ngu ha kufanako nga ku hi txi zumba ni vathu ava va thumisako wawe kasi ku thumela Jehovha ti na hi maha ti to hi lava ku engetela mthumo wathu wo txhumayela. Ti na hi maha hi lava ku engetela mthumo wathu ka Jehovha. Eto ngu ati ti nga maheka ka Kenny kumweko ni msikati wakwe Veronica. Kenny a womba tiya: “Vangana vathu ni va ha mwayani kwathu va hi kuzetile ti to hi duketa tinzila timwani to andisa mthumo wathu ka Jehovha. Kumaha wungana ni vathu ava va thangetisako mfumo ti hi mahile hi lava ku duketa tatingi.” Konkuwa Kenny ni Veronica va thuma kota va nyaphandule vo sawuleka Sérvia.

16. Ngu kuya ngu txidinganiso txa Jesu ka Dibhuku da Luka 12:16-21 ngu ku txani hi di fanete ku ti emisela kasi ku ti tona so kari?

¹⁶ Ti nga lava u ti tona so kari. Kha hi wombi to ti to hi na ti tona sotshe kasi kuthumela Jehovha. (Ekl. 5:19, 20) Kambe ngako hi txo tumelela kuthava ti hi tsivela ku andisa mthumo wathu ka Jehovha hi na wela ka phazamo ayi yi nga maha ngu dijaha dile ka txikombiso txa Jesu. Dijaha donedo di ti karateka ngutu ngu kulava wutomi wa tshuku se di leka kuthumela Txizimu. (Lera Luka 12:16-21.) Mwanathu mmwani wa França a dhanwako ku i Christian a womba tiya: “Ani ni si mahi ta boti ti to ni thumela Jehovha hambi kuxayisa mwaya wangu.” Ene ni msikati wakwe va sungile kuva vanyaphandule. Kambe ti to ve hokelela makungo oneyo ti lavile ve leka mithumo yawe. Ti to ve ti hanyisa vona va tute mthumonyana wa ma limpeza se vona va txi eneliseka ngu si va nga txi si mana. Ina mizamo yi va nga yi maha yi va wuyelisile? Christian a womba tiya: “Konkuwa ha dhunda ngutu ku txhumayela ni ku ha tsaka ngutu kuwona sigondo sathu si txi gonda ngu Jehovha.”

17. Txi txani atxi txi nga hi tsivelako ku hi gonda matxhumayelelo a maphya?

 ¹⁷ Tiemisele ku gonda tinzila timwani to txhumayela. (Mith. 17:16, 17; 20:20, 21) Nyaphandule mmwani a dhanwako ku i Shirley wa Estados Unidos ti lavile e gonda matxhumayelelo a maphya ngu kona ha ka mtungo wa COVID-19. Makhatoni ene atxi thava kutxhumayela ngu telefone. Kambe msana kova va di endetwe ngu muwoneleli wa txigava Shirley a ti ta mana trenamento. Kukhukhela koneko ene wa txhumayela ngu mamahelo awa. Shirley a womba tiya: “Makhatoni ni txi thava kambe konku na ti dhunda ku txhumayela ngu kuthumisa telefone. Ha ti kota ku txhumayela vathu vo tala kupinda nga ku hi txi txhumayela ngu mti ni mti!”

18. Ngu tihi ati ti no kuvhuna ngako ku txi txitxa siemo ka maplano athu o thumela Jehovha?

¹⁸ Maha plano ni ku tshumela u yi hetisisa. Nga ku u txi manana ni sikarato khongela ka Jehovha u gwita u thumisa wusikoti wako wo pimisa kasi kumaha txo kari. (Mav. 3:21) Sonia awu i ku nyaphandule a vhunetako ka grupu yimwani ya lidimi ya Txiromani khe Europa a womba tiya: “Ani ni dhunda kubhala maplano angu ka diphepha ngu msana ni teka diphepha donedo ni di kolara ka wukhalo awu wu wonekako. Ka dirumaru da mina ni vekile diphepha adi di ku ni mdhezenyo wu ku ni tinzila timbidi. Ngako ni txi la kumaha txisungo ni khata ngu ku wona mdhezenyo wuwa ni pimisa tiya ‘txisungo txi ni lavako ku tximaha txi na ni yisa ka nzila yihi?’” Ngako Sonia a txi manana ni sikarato ene a zama ku va ni mawonelo a manene. Ene a womba tiya: “Ngako ku txi va ni ku txitxa ka siemo ni zama kuwona to siemo soneso si na fana ni mmuru awu wu no ni vhalela mwendo si na fana ni dibhulaho adi di no ni vhuna ku hokelela makungo angu. Kambe totshe ti na ya ngu ti to na va ni mawonelo a manene mwendo nem.”

19. Ngu tihi a ti hi fanelako ku ti emisela kumaha?

¹⁹ Jehovha wa hi katekisa ngu tinzila to tala. Athu hi nga ti kombisisa kutxani to ha bonga makatekwa oneyo Jehovha a hi ningako? (Vaheb. 13:15) Hi nga maha totshe hi nga ti kotako ti to hi dhumisa ditina dakwe. Zama ku la tinzila ta tiphya to andisa mthumo wako ka Jehovha. U txi maha toneto Jehovha a na ku katekisa ngutu. Ngu toneto tiemisele ku ditshiku ni ditshiku u ‘duketa upune u txi ti wona to MKOMA mbwa mnene.’ U txi maha toneto u na fana ni Jesu awu a nga khene “sakudya sango ngu kumaha kuranda ka wule a nga ni ruma ni ku hetisisa mthumo wakwe.”—Joh. 4:34.