1-2. Hi na bhula ngu txani ka gondo yiya?

U TIPFISA kutxani ngako u txi verela so kari kambe asi si hoki ngu mbimo yi u nga ti si rinzete. Ina wa henya? Ti nga maha u tipfisa ngati Mavingu 13:12 yi ti wombako ti ku khene: “Ku verela ko swela ka karalisa mbilu.” Kambe ngako u txi tumbula ti to, silo sa wena kha sa hoka ngu mpimo ngu sivangelo so pfisiseka? Eto ti nga kuvhuna ti to u rinzela ngu kutimisela.

² Ka gondo yiya, hi na wona matshina a milayo a Bhiblia, aya ma no hi vhuna ku hi “verela” ngu kutimisela. (Mika 7:7) Hi na tshumela hi wona siemo simbidi a si si lavako ku hi rinzela Jehovha e maha txo kari. Ngu magwito, hi na wona makatekwa aya Jehovha a no ninga valeya va rinzelako ngu kutimisela.

3. Mavingu 13:11 yi hi gondisa txani?

³ Dibhuku da Mavingu 13:11 di hi gondisa txivangelo txo timisela. Dona di womba tiya: “Thomba yo manwa ngu wukanganyisi yi na boxa, aniko awule a yi manako ngu kuthuma, [mwendo kudotho-kudotho] a na engetelwa.” Ngu tihi tiya ndimana yiya yi hi gondisako? M’thu wo txhariha a maha takwe ngu kutimisela, kudotho-kudotho se e mana wuyelo ya yinene.

4. Mavingu 4:18 a hi vhuna kupfisisa txani?

⁴ Mavingu 4:18 yi hi gela tiya: “Nzila ya vo lulama yi fana ni kuwoninga ka wuronga ku woningako kambe ni kambe di za di hetiseka kutxa.” Mapswi a ma ku, “nzila ya vo lulama” ti yelana ni nzila yi Jehovha a vhunako vathu vakwe kupfisisa sikongomelo sakwe kudotho-kudotho. Ndimana yiya yi tshumela  yi hi vhuna ku pfisisa nzila Mkristu a mahako ku txitxa ka wutomi wakwe kudotho-kudotho kasi ku e tipfananisa ni kudhunda ka Jehovha. Kukula ngu didhawa da moya kha ti maheki ngu mbimonyana, ti teka mkama. Ngako hi txi gonda ni kutshumela hi thumisa silayelo asi si mu ka Bhiblia ni asi hi si manako ka sengeletano ya Jehovha, hi na sikota to kudotho-kudotho hi etetela txikombiso txa Kristu. Hi na tshumela hi txi ziva kwati Txizimu. A hi woneni txikombiso txo kari txi Jesu a nga txi womba kasi ku hi pfisisa mhaka yiya.

5. Ngu txihi txidinganiso atxi Jesu a nga txi womba?

⁵ Jesu a thumisile txidinganiso txo kari kasi kutxhamusela nzila yi mbewu ya Mfumo yi kulako ngu yona kudotho-kudotho ka timbilu ta vathu va va dhundako tatinene. Ene a wombile tiya: “Mbewu yona ya mila yi txi kula na ene a si ti zivi. Mafu mapune ma milisa mbewu, kukhata ku huma ditshina, ngu msana ku rumbuka diphumbu, se ngu magwito ku velekwa diphumbu do tala ngu timbewu.” (Marku 4:27, 28) Ngu tihi ti Jesu a nga txi womba tona? Ene a ti txhamusela ti to kufana ni mbewu ayi yi kulako kudotho-kudotho. Kukula ka m’thu ngu didhawa da moya, awu a amukelako mahungu a manene ni kona ku maheka kudotho-kudotho. Mbimo yi txigondo txa Bhiblia txi tshuketako hafuhi ni Jehovha, hi na khata ku wona ku txitxa aku txi ku mahako ka wutomi wa txona. (Vaef. 4:22-24) Hi fanete hi khumbula ti to Jehovha ngene a mahako ti to mbewu yoneyo yi kula.—1 Vak. 3:7.

6-7. Hi gonda txani ka nzila yi Jehovha a nga vangisa tona mafu?

⁶ Jehovha a maha totshe ngu kutimisela. Ngu nzila yoneyo ene a maha totshe ti lavekako a txi alakanya ku dhumisa ditina dakwe ni kuvhuna vamwani. Ngu txikombiso wona nzila yi Jehovha kudotho-kudotho a nga lulamisela ngu yona mafu ti to e vhuna vathu.

⁷ Wona ti Bhiblia yi ti wombako mayelano ni nzila yi Jehovha a nga vanga ngu yona mafu, yona yi wombawomba ngu ku veka “tipimo” ni ku zimeka “tiphande” ni ku tshumela  kuvekwa “dirigwi do khata.” (Jobe 38:5, 6) Yona yi tshumela yi womba ti to Jehovha a vekile mbimo yo e wonisisa ati a nga ti maha. (Gen. 1:10, 12) Ina wa alakanya nzila yi tingelozi ti nga tipfisa tona mbimo yi ti nga txi wona Jehovha a txi wumba ditiko kudotho-kudotho? Tona ti xamate ngutu! Ha koza ti kulungela “ngu kutsaka ngutu.” (Jobe 38:7) Hi gonda txani? Jehovha a tekile mazana-zana a malembe ti to e hetisa mthumo wakwe, kambe kuva a di mahile totshe kudotho-kudotho ti vhunile. Mbimo yi a nga ema e wonisisa ti a nga ti ti vangile, a ti wonile ti to “tinene ngutu.”—Gen. 1:31.

8. Ngu tihi ati hi no tiwona konku?

⁸ Nga ha hi nga tiwona ngu kona milayo ya Dipswi da Txizimu, yi hi vhuna kuwona lisima la kutimisela. Konkuwa hi na wona siemo simbidi amu ti lavako hi kombisa kurinzela Jehovha.

9. Ngu ka txihi txiemo ti nga lavako hi rinzela Jehovha?

⁹ Ti nga lava hi rinzela Jehovha ku e xamula mikombelo yathu. Mbimo yimwani hi nga kombela Jehovha ku e hi vhuna kuwonisana mwendo ku xula kutandeka ko kari, ti nga maha hi wona nga Jehovha wa swela ku xamula mikombelo yoneyo. Ngu txani Jehovha a txi nga kha xamuli ngu txikuluveta mikombelo yathu?

10. Ti txi ta ka mkombelo ngu kutxani ti txi lava hi timisela?

¹⁰ Jehovha wa engisa khakwati mikombelo yathu. (Mas. 65:2) Hi txi maha mikombelo Jehovha a ti wona i di txikombiso txa likholo. (Vaheb. 11:6) Ngako hi txi maha mkombelo Jehovha wa riya nzeve e lava kuwona ti to ina mkombelo wathu wu huma mbiluni. Ene a tshumela e wona ti to ina ha maha mizamo yo maha madingano ni ti hi ti kombelako. (1 Joh. 3:22) Ngu nzila yoneyo ngako hi txi khongela ka Jehovha hi kombela txivhuno txo xula kutandeka ko kari ti nga lava hi timisela ni ku maha mizamo kasi kutxitxa. Jesu a hi vhunile ku pfisisa ti to yimwani ka mikombelo yathu yi si na ku xamulwa ngu txikuluveta. Ene a hi kuzetile tiya: “Kombelani mi na ningwa, lavani mi na si mana, gogotani mi na tulelwa, nguko mmwani ni mmwani a kombelako a na ningwa awu a lavako wa si mana ni wule a gogotako a na tulelwa.” (Mat. 7:7, 8) Ngako hi txi londisa txialakanyiso txa Jesu ni ‘kusimama hi khongela’ hi nga tsaniseka ti to Tate wathu wa nzumani wa hi engisa ni ku a na xamula mikombelo yathu.—Vakl. 4:2.

11. Dibhuku da Vahebheru 4:16 di nga hi vhunisa kutxani ngako hi txi wona nga mikombelo yathu ya swela kuxamulwa?

¹¹ Hambiko mbimo yimwani ti nga wonekako nga mikombelo yathu ya swela ku xamulwa, Jehovha a thembisa to a na xamula ngu “mbimo yi yi fanekelako.” (Lera Vahebheru 4:16.) Ngu toneto ngako hi txi wona nga Jehovha wa swela kuxamula mikombelo yathu kha ha fanela ku m’lumbeta. Ngu txikombiso, ku pinda malembe o tala vanathu va txi khongela ti to Mfumo wa Txizimu wu ta hamafuni wu heta sikarato. Phela Jesu a wombile to hi fanete hi wu kombelela. (Mat. 6:10) Ti nga va wupumbu ku tumelela ti to likholo lathu li hola ngu kona ka ti to magwito ma si hoki ngu mbimo yi athu hi nga ti yi rinzete! (Vaheb. 2:3; Mat. 24:44) Hi fanete hi rinzela Jehovha ni kukhongela hi txi themba to ene a na xamula mikombelo yathu. Magwito ma na ta ngu mbimo yi a nga yi veka, nguko ha ti ziva to Jehovha se a sawute “ditshiku da kona ni txikhati” a txi a no tisa magwito. Mbimo yi ma no hoka magwito ku na va i di mbimo ya yinene ya kona.—Mat. 24:36; 2 Pedro 3:15.

12. Ngu txihi txiemo tximwani ti nga lavako hi timisela?

 ¹² Ti nga lava hi rinzela ngu kutimisela ti to Jehovha e tisa wulamuli ngu kululama. Vathu va mafu awa va xanisa vamwani ngu kuya ngu lixaka lawe, m’dhawuko wawe ni ditiko dawe. Vathu vamwani va xaniswa ngu kona hawa ka wulema wawe. Tifakazi to tala ta Jehovha ta xaniswa ngu kona hawa ka likholo lawe ali li nga seketela mu ka Bhiblia. Ngako hi txi xaniswa hi fanete hi khumbula mapswi a Jesu aya ma ku khene: “Awule a no zumba a di tsani kala magwito a na hanyiswa.” (Mat. 24:13) Se u na maha txani ngako u txi tumbula ti to ku ni mwanathu wo kari dibanzani awu a nga maha txionho txa hombe? Msana ko va madhota ma di zivisilwe ina u na rinzela u ti lekela manzani kwawe u txi themba ti to Jehovha a na ti lulamisa? Ngu tihi ti madhota ti nga lavekako me ti maha ngako m’thu a di mahile txionho txa hombe? A hi ti woneni.

13. Ngu tihi ti Jehovha a lavako ti to madhota me ti maha ngako m’thu a di mahile txionho txa hombe?

¹³ Ngako madhota ma txi tumbula ti to ku ni mwanathu a nga maha txionho txa hombe dibanzani, ona ma khongela me kombela “wuzivi wu wu tako ngu txitimwi” ti to me wona timhaka nga ti Jehovha a ti wonisako tona. (Jak. 3:17) Txikongomelo txa madhota ngu ti to me ‘tshumeta muonhi ka nzila yakwe ya kutimela.’ (Jak. 5:19, 20) Vona va maha totshe ti va nga tikotako ti to ve vhikela dibanza, ni kuthavelela ava va nga xaniswa. (2 Vak. 1:3, 4) Mbimo yi madhota ma lulamisako txionho txa hombe, ma fanela kuziva kwati ati ti nga maheka, eto ti nga teka mbimo. Vona ma fanete kukhongela ni kuvhuna muonhi ngu milayo ayi yi nga seketelwa mu ka Bhiblia ni kutshumela ve m’tsayisa “ngu wululami.” (Jer. 30:11) Mbimo yimwani ma nga woneka nga mo swela kululamisa txikarato, kambe madhota kha ma lavi kututumela kumaha txisungo. Ngako madhota ma txi lulamisa mhaka ngu nzila ya yinene, dibanza dotshe da wuyelwa. Hambi loko madhota ma txi maha totshe ngu kulondisa mkongomiso wa Jehovha, ava va nga gohelwa va nga simama va di pandisekile. Idi ti to ngu toneto ti ku humelelako, u nga maha txani ti to u si pandiseki ngutu?

14. Ngako u di henyisilwe ngu mwanathu, ngu txihi txikombiso txa mu ka Bhiblia txi nga kuvhunako?

¹⁴ Ina u khala ku mahelwa wubihi ngu m’thu, mwendo ngu mwanathu wo kari? Bhiblia yi  nga kuvhuna. Dipswi da Txizimu di ni sikombiso sa vathu asi si nga hi vhunako ku hi rinzela ku Jehovha e lulamisa txikarato txo kari. Ngu txikombiso Josefa kha tumelela kuxaniswa ngu vakomwakwe ti mmaha e va ni txiviti. Ngu txikombiso hambi ku Josefa a nga xaniswa ngu vakomwakwe, ene kha tumelela tiphazamo tawe ti mmaha e va ni txiviti. Hahanze keto ene a simamile e veka mapimo ko thumela Jehovha, se Jehovha a mu katekisile ngu kona hawa ka kutimisela ni kutsanisela kwakwe. (Gen. 39:21) Ngu kutsimbila ka mbimo Josefa a sikotile kudivalela vakomwakwe, se Jehovha a mu katekisile. (Gen. 45:5) Kufana ni Josefa, nathu hi nga thaveleleka ngako hi txi tshuketa hafuhi ni Jehovha ni kuleka ene e lulamisa txikarato ngu mbimo ya kona.—Mas. 7:17; 73:28.

15. Nji txani atxi txi nga vhuna mwanathu to e wonisana ni txikarato txi a nga ti manana natxo?

¹⁵ Hi nga ti to hotshethu hi na humelelwa ngu wubihi wa hombe wo nga awu wu nga humelela Josefa, kambe ngako hi txi mahelwa wubihi hi na pandiseka. Ti singa ni mhaka ni ti to m’thu a nga hi henyisa i mwanathu mwendo nem, hi nga wuyelwa ngako u txi lulamisa txikarato txonetxo ngu kuthumisa matshina ya milayo ya Bhiblia. (Vaf. 2:3, 4) Wona txikombiso txa mwanathu mmwani wa txisikati ene a pandisekile ngutu mbimo yi a nga tumbula ti to mthumi-kulowe a txi wombawomba makuhu ngu ngene. Ene kha telwa ngu magugu, hahanze keto ene a tekile mbimo yo e alakanyisisa ngu txikombiso txa Jesu. Mbimo yi a nga txi ruketelwa, Jesu a si tshumeteli. (1 Pedro 2:21, 23) Ku alakanyisisa ngu txikombiso txa Jesu ti mvhunile ti to a si karateki ngu ti ti nga ti mahekile. Kambe ngu kutsimbila ka mbimo, ene a zivile ti to mthumi-kulowe a txi wonisana ni malwati a hombe se a txi wonisana ni txitrese. Mwanathu wule a gwitile e pimisa ti to ti nga maha mthumi-kulowe ati a nga womba kha njo womba ngu txikongomelo txa ku mu henyisa. Kuva mwanathu a di tsanisete kuñolwa ngu nzila yo biha, ti m’vhunile ti to e va ni kudikha ni litsako.

16. Ngako u txi wonisana ni wubihi wo kari nji txani txi nga ku thavelelako? (1 Pedro 3:12)

¹⁶ Ngako u txo wonisana ni wubihi, mwendo sikarato simwani si kutiselako kupanda khumbula  to Jehovha a hafuhi ka vale “va ku kupandisekani ka mbilu.” (Mas. 34:18) Khumbula ti to Jehovha wa kuranda ngu kutimisela ka wena ni ku m’gela kukarateka kwako. (Mas. 55:22) Ene Mlamuli wa votshe vathu. Ni ku wa wona totshe. (Lera 1 Pedro 3:12.) Ngako u txi wonisana ni txikarato txo kari atxi u si na ku txi kota ku txi lulamisa, i tshuku kurinzela Jehovha e lulamisa.

17. Ngu txihi txi tsanisekiso atxi Jehovha a hi ningako ka Dibhuku da Isaya 30:18?

¹⁷ I singa kale Jehovha a na katekisa hotshethu ngu kuthumisa Mfumo wakwe. Dibhuku da Isaya 30:18 di womba tiya: “Ngu mhaka yeto Mkoma a na verela ku mi mahela wumbilu kambe ngu kumaha keto a na guletwa kasi ku m’pfela wusiwana nguko Mkoma Txizimu txo dinganisa. Va katekile votshe vale va thembako kwakwe.” Votshe ava va timiselako ve rinzela Jehovha va na mana makatekwa o tala konakuwa ni ka mbimo ayi yi tako.

18. Ngu yahi makatekwa aya hi ma rinzelako?

¹⁸ Mbimo yi vathu va Txizimu va no bela ka mafu a maphya, va na mbi swa ve mana txivangelo txo ve karateka kufana ni ti ti mahekako nyamsi. Wotshe wubihi kupandiseka si na va si di pindile. (Mtu. 21:4) Ka mbimo yoneyo ti nambi lava hi rinzela ngu kukaratela nguko sotshe si hi si lavako si na va si diho. (Mas. 72:16; Isaya 54:13) Eyo ma na va makatekwa o tala ya Jehovha!

19. Jehovha a hi lulamisela para txani konkuwa?

¹⁹ Na yi si se hoka mbimo yoneyo, totshe ti hi ti mahako to hi xula kutandeka ko kari, mwendo kusakulela mahanyelo a Wukristu, Jehovha o hi lulamisela to hi ta hanya ka mafu a maphya ka Mfumo wakwe. U nga gume mtamo, u nga godhole. Jehovha a hi thembisa wumangwana wo tsakisa. Ngu toneto he tiemiseleni ku hi simama hi rinzela Jehovha ngu kutimisela a txi hetisisa mthumo wakwe!