1. Hi txi pimisa ngu mtumbuluko wotshe wu Jehovha a nga wu vanga, ngu sihi siwotiso si hi nga ti mahako sona?

NGAKO hi txi wona wuhombe wa mtumbuluko awu Jehovha a nga wu maha, hi nga tipfa kufana ni mbhali wa masalmo Dhavhidha, awu a nga khongela a txi: “Ngako ni txi wonisisa nzuma, mthumo wa manza ako, ni mtxima ni tinyeleti, asi u nga si maha, ni pimisa ni txi khani; nji txani m’thu, kasiku u txi mu alakanya, kani? Ene m’thu wa nyama i mani, kasiku u txi mkhatalela kani?” (Mas. 8:3, 4) Kufana ni Dhavhidha nathu ha tiwona to hi hanya ka wukhalo wa wudotho wu txi dinganiswa ni tinyeleti kambe ha tsaka kuziva to Jehovha wa khatala ngu ngathu. Nga ha hi no tiwona ngu kona, Jehovha kha ya gwitela ku khatalela vathu vo khata Adhamu ni Evha basi, kambe a tshumete e va pata ka mwaya wakwe.

2. Ngu tihi ti Jehovha a nga ti emela to Adhamu ni Evha ve ti maha?

² Adhamu ni Evha i ti vanana vo khata va Jehovha va hamafuni, ni ku Jehovha i ti Tate wawe wa nzumani wa lirando. Ene a ti emete ti to mpatwa wuwa wu andisa mwaya. Txizimu txi va gete tiya: “Velekelani mi anda, mi tala ha mafuni, mi txi ma fuma.” (Gen. 1:28) Jehovha a ti lava ti to ve va ni vanana ni ku ve khatalela mafu kota m’ti wawe. I ti ku Adhamu ni Evha va to engisa ni ku tsimbitisana ni txikongomelo txa Jehovha ngu vona, vona ni liveleko lawe va di simamile ve va siro sa mwaya wa Jehovha ngu ha ku si gumiko.

3. Ngu ku txani hi nga wombako to Adhamu ni Evha va ti ningilwe wukhalo wa lisima ka mwaya wa Jehovha?

³ Adhamu ni Evha va ti ni wukhalo wa lisima ka mwaya wa Jehovha. Bhiblia yi womba ti to Txizimu txi mahile m’thu e va “hahatshi ka tingelozi.” (Vaheb. 2:7; Mas. 8:5) Ditshuri ti to Jehovha kha ninga vathu mtamo, wuzivi ni wusikoti wo fana ni wu a  nga ninga tingelozi. (Mas. 103:20) Kambe, vathu va “hahatshi” ka tingelozi i ku sivangwa sa mtamo ngutu. Hi nga wona kutsakisa ka tona, ngu ditshuri Jehovha a ningile vaveleki vathu vo khata wutomi wo tsakisa!

4. Ngako Adhamu ni Evha va nga mba engisa Jehovha ku humelete txani ngu vona, ni ku hi na bhula ngu txani ka gondo yiya?

 ⁴ To mba tsakisa ngu ti to, ngu kwambi engisa ka Adhamu ni Evha, vona va luzile wukhalo wawe ha mwayani ka Jehovha. Nga ha hi no ti wona ngu kona masoni ka gondo yiya, eto ti ve ni wuyelo yo mba tsakisa ka vatukulo vawe. Kambe txikongomelo txa Jehovha kha txa txitxa. Ene a lava ti to vathu va vo engisa ve va vanana vakwe ngu ha ku si ngako ni magwito. He woneni nzila yi Jehovha a nga kombisa ngu yona ti to wa hi ninga lisima. Hi na tshumela hi wona to hi nga maha txani konku kasi ku kombisa ti to ha ti lava ku va siro sa mwaya wa Txizimu. Ngu magwito hi na bhula ngu makatekwa aya vanana va Jehovha va hamafuni va no tidila ngu ona ngu ha ku si ngaku ni magwito.

5. Hi nga kombisa kutxani ti to ha txi bonga Txizimu ngu kuva txi di hi mahile ngu txifananiso txa txona?

⁵ Jehovha a hi ningile lisima nguku hi vanga ngu txifananiso txakwe. (Gen. 1:26, 27) Ngu kuva hi di vangilwe ngu txifananiso txa Txizimu, hi nga kota kusakulela ni ku kombisa tifanelo takwe to tala, to fana ni lirando wunene kuthembeka ni wululami. (Mas. 86:15; 145:17) Ngako hi txi sakulela tifanelo tiya, hi dhumisa Jehovha ni ku hi kombisa ti to ha m’bonga. (1 Pedro 1:14-16) Ngako hi txi hanya ngu nzila yi yi tsakisako Tate wathu wa nzumani ha mana litsako ni ku eneliseka. Aku hi ku ni tifanelo to fana ni ta Jehovha ta koteka ti to hi va lixaka la vathu ava a va lavako ha mwayani kwakwe.

6. Mbimo yi Jehovha a nga maha mafu, a kombisisile kutxani to vathu mba lisima?

⁶ Jehovha a hi lulamisete mti wo tshura. Ku di nga ti sate mbimo yo lapha ti to e vanga m’thu wo khata, Jehovha a lulamisete mafu ti to vathu ve ta zumba ka ona. (Jobe 38:4-6; Jer. 10:12) Aku Jehovha a khatalako ni wuha, a hi ningile silo sa singi ti to hi kota ku mana litsako. (Mas. 104:14, 15, 24) Jehovha a ti ti ninga mbimo ti to e wona ti a nga ti maha, se e “wona ti to ndinene.” (Gen. 1:10, 12, 31) Jehovha a ningile lisima vathu ngu kuva ninga “kufuma” sotshe so tshura si a nga si vanga hamafuni hawa. (Mas. 8:6) Txikongomelo txa Txizimu ngu ti to vathu vo hetiseka ve va ni litsako ngu ku khatalela sivangwa sotshe si Txizimu txi nga si vanga ngu ha ku singa ko ni magwito. Ina wa m’bonga Jehovha mbimo yotshe ngu txithembiso txiya txo tsakisa?

7. Dibhuku da Joxuwa 24:15 di ti kombisisa kutxani ti to m’thu a ni mkhululeko wo ti sawulela?

⁷ Jehovha a hi ningile ningo ya mkhululeko wo ti sawulela. Athu hi nga sawula ati hi ti lavako ku ti maha ka wutomi wathu. (Lera Joxuwa 24:15.) Txizimu txathu txa lirando txa tsaka ngaku hi txi sawula ku txi thumela. (Mas. 84:11; Mav. 27:11) Hi nga thumisa mkhululeko wathu wo ti sawulela ti to hi maha sisungo so tala sa sinene. He wone txikombiso txa txinene atxi Jesu a nga hi siyela.

8. Jesu a wu thumisisile kutxani mkhululeko wakwe wo ti sawulela?

⁸ Hi nga tekelela txikombiso txa Jesu ngu kuthangetisa silaveko sa vamwani ku pinda sathu. Ditshiku dimwani, Jesu ni vapostoli vakwe va ti karate ngutu, se va khukhile ve ya ka wukhalo wumwanyani wu nga ti rute ti to ve ya humulanyana. Se toneto kha ta koteka, vathu vo tala va to va londisa va txi lava ku gondiswa ngu Jesu. Se toneto kha ta m’henyisa Jesu. Ku hambana ni eto, Jesu a to va pfela wusiwana, se Jesu a mahile txani? A to “khata ku va gondisa  timhaka to tala.” (Marku 6:30-34) Ngako hi txi tekelela txikombiso txa Jesu ngu ku thumisa mbimo ni mtamo wathu ti to hi vhuna vamwani hi na tisa wudhumo ka Tate wathu wa nzumani. (Mat. 5:14-16) Hi tshumela hi kombisa ti to hi lava ku va siro sa mwaya wa Jehovha.

9. Ngu tihi ti vaveleki va fanelako ku ti khumbula?

⁹ Jehovha a ningile vathu wusikoti wo va ni vanana e tshumela e va ninga wutixamuleli wo ve va gondisa ti to ve mranda ni ku mthumela. I di ti to awe u mveleki ina wa yi bonga ningo yiya yo sawuleka? Hambiku Jehovha a nga ninga wusikoti wo tala ka tingelozi, kambe kha ya ti ninga lungelo yo veleka vanana. Ngu toneto vaveleki va fanete kuninga lisima lungelo yiya yo wunja vanana. Vaveleki va ningilwe lungelo yo sawuleka yo wunja vanana vawe ngu ku va laya ngu “sileleto ni tigondo ta Mkoma.” (Vaef. 6:4; Dhewut. 6:5-7; Mas. 127:3) Kasi kuvhuna vaveleki Jehovha ngu ku thumisa sengeletano yakwe wa humisa sithumiswa so tala asi si nga seketelwa mu ka Bhiblia so fana ni ma vhidhio wutxenje ni simwanyani si manekako ka site yathu. Ti ha kubasani ti to Tate wathu wa nzumani ni mwanana wakwe va khatala ngu vanana vathu. (Luka 18:15-17) Ngako vaveleki va txi themba Jehovha ve maha ti va ti kotako to ve kulisa vanana vawe, Jehovha wa tsaka. Vaveleki vonevo va ninga mkhanjo wo vanana vawe ve va txienge txa mwaya wa Jehovha ngu ha ku si gumiko.

10-11. Ngu tihi ti Jehovha a nga maha ti koteka ngu kona hawa ka mterulo?

¹⁰ Jehovha a ningete wutomi wa mwanana wakwe wa lisima ti to hi kota ku tshumela hi lumba mwaya wakwe. Nga ha hi nga ti wona ngu kona ka  paragrafu 4 Adhamu ni Evha va luzile wukhalo wawe ka mwaya wa Jehovha. Eto ti tshapete ni vatukulo vawe. (Var. 5:12) Aku Adhamu ni Evha va nga mba engisa Txizimu khakwenye va thavisilwe ka mwaya wa Jehovha, se ku ndi na maheka txani ngu vatukulo vakwe? Aku Jehovha a dhundako vathu a mahile malulamiselo a ti to votshe vale va engisako ve tshumela ve lumba txa mwaya wakwe. Ene a mahile atiya ti koteka ngu kuthumisa mterulo wa lifo la Jesu Kristu. (Joh. 3:16; Var. 5:19) Ngu kona hawa ka mterulo wa mwanana wa Txizimu wa matiwula ta koteka ti to vathu vo thembeka va 144.000, ve va vanana va Txizimu.—Var. 8:15-17; Mtu. 14:1.

¹¹ Hahanze ka vasawuleki ku ni timiliyoni ta vathu vo thembeka a va va mahako mizamo yo engisa Jehovha. Vona va ni themba yo va mwaya wa Txizimu msana ka kuva va di pindile ka txiduko txo gwita ku di pindile 1.000 wa malembe ya ku fuma ka Jesu. (Mas. 25:14; Var. 8:20, 21) Aku timiliyoni ta vathu vava va ku ni themba vona va dhana Jehovha Mvangi wawe kota “Tata” i di nga di konku. (Mat. 6:9) Vathu ava va no ta wuswa Paradhesi va na va ni mkhanjo wo gonda ti Jehovha a ti emelako ngu vona. Se ava va no sawula kuengisa Txizimu va na ta va ni lungelo yo lumba mwaya wa Jehovha.

12. Ngu txihi txiwotiso txi hi no xamula konku?

¹² Nga ha hi nga tiwona ngu kona Jehovha a kombisile ngu tinzila to tala, to a teka vathu i di va lisima. Jehovha a teka vasawuleki i di vanana vakwe ni ku wa tshumela e ninga mkhanjo avale va “dibutho da hombe” ti to ve va vanana vakwe ka mafu a maphya. (Mtu. 7:9) Hi nga maha txani konku kasi ku komba Jehovha to hi lava kuva siro sa mwaya wakwe ngu ha ku si gumiko?

13. Ngu tihi timwani ti hi nga ti mahako ti to hi kota kuva mwaya wa Jehovha ngu ha ku si gumiko? (Marku 12:30)

¹³ Thumela Jehovha ngu yotshe mbilu yako. (Lera Marku 12:30.) Ka totshe tiningo ti Jehovha a nga hi ninga ngu wunene wakwe, ya lisima ngutu wusikoti wo mkhozela. Athu hi  nga kombisa ti to ha mranda Jehovha, ngu ‘kuveketa milayo yakwe’. (1 Joh. 5:3) Tximwetxo txa sirumo si Jehovha a lavako to hi si engisa ngu txi Jesu a nga hi ninga txo maha vagondiswa ni ku va bhabhatisa. (Mat. 28:19) A tshumete e hi ninga txirumo txa ti to hi randana. (Joh. 13:35) Ava va engisako va nga simama ve va mwaya wa Jehovha wa hamafuni kotshe ngu ha ku si gumiko.—Mas. 15:1, 2.

14. Hi nga ti kombisisa kutxani ti to ha va randa vamwani? (Matewu 9:36-38; Varoma 12:10)

¹⁴ Kombisa lirando ka vamwani. Lirando i fanelo ya lisima ngutu ka totshe tifanelo ta Jehovha. (1 Joh. 4:8) Jehovha a hi randile na hi si se mziva. (1 Joh. 4:9, 10) Athu hi nga ti kota ku etetela Jehovha ngu ku randa vamwani. (Vaef. 5:1) Yimweyo ya tinzila to kombisa lirando ka vamwani, ngu va gondisa ngu Jehovha ku ti nga di ni mbimo. (Lera Matewu 9:36-38.) Ngu nzila yiya hi va ninga mkhanjo wo ni vona ve va siro sa mwaya wa Txizimu. Hambi msana ka kuva m’thu a di bhabhatisilwe, hi fanete ku simama hi mranda ni ku m’xonipha. (1 Joh. 4:20, 21) Hi nga ti mahisa ku txani eto? Yimweyo ya tinzila ngu kombisa ti to ha m’themba. I ku ti to, ngako a txo maha to kari hi si ti pfisisi to ngu kutxani a di ti mahile, kha hi nambi tutumela ku pimisa ti to a mahile eto ngu ku tialakanyela basi. Hahanze keto hi fanela kuwona mwanathu i di wa lisima hi tshumela hi mu wona i di wa tshuko ku hi pinda.—Lera Varoma 12:10; Vaf. 2:3.

15. Mba mani va hi nga va kombako wumbilu ni wunene?

¹⁵ Kombisa wunene ni wumbilu ka vathu votshe. Ngako hi txi lava kuva hagari ka vathu ava va ku ni fanelo yo dhana Jehovha kota Tate, hi fanete ku hanya ngu ti hi ti gondako amu ka dipswi da Txizimu. Ngu txikombiso Jesu a hi gondisile ti to, hi fanete ku kombisa wumbilu ni wunene ka vathu votshe kupata ni va i ku valala vathu. (Luka 6:32-36) Mbimo yimwani hi nga ti wona ti txi karata ku maha eto. I di ti to etxo txikarato txathu hi fanete kupimisa kufana ni Jesu hi tshumela hi mahisa ti ene a nga ti mahisa tona. Ngako hi txi maha totshe ti hi nga ti kotako ti to hi engisa Jehovha ni ku etetela Jesu, hi va hi txi komba Tate wathu wa nzumani ti to athu ha ti lava kulumba mwaya wakwe ngu ha ku si gumiko.

16. Hi nga vhikelisa kutxani nduma ya mwaya wa Jehovha?

¹⁶ Vhikela nduma ya mwaya wa Jehovha. Hagari ka mwaya ti tolovelekile ti to mwanana e lava kuetetela txikombiso txa mkomwakwe. Ngako mkoma wa kona a txi hanya ngu ku londisa mkongomiso wa Bhiblia, a na va txikombiso txa txinene ka mnanda wakwe. Se ngako a txi khata ku va ni mahanyelo o biha mnanda wakwe a na tekelela txikombiso txonetxo txa walo. Ku nga maheka ti ti fanako ka mwaya wa Jehovha. Ngu txikombiso, ngako Mkristu a nga ti thembekile e gwita e va mkaneti, e tshumela e va ni mahanyelo o biha, ni ku maha timwanyani to biha, ti nga maha vamwani ve tekelela txikombiso txakwe txa walo. Ava va mahako eto, va onha nduma ya mwaya wa vakhozeli va Jehovha. (1 Vat. 4:3-8) Hi fanete kuvayilela sikombiso sa walo, hi si tumeleli txilo txi hi hambanisa ni Tate wathu wa lirando wa nzumani.

17. Ngu yahi mapimo awa hi fanelako ku ma vayilela? Ngu kutxani?

¹⁷ Themba Jehovha i si nga silo sa mafu. Jehovha a thembisa ti to a na hi ninga sakudya, sa kuambala ni wukhalo wo otela ngako hi txi thangetisa Mfumo wakwe. (Mas. 55:22; Mat. 6:33) Hi txi khumbula eto hi na vayilela ku pimisa ti to silo sa mafu awa si nga hi vhikela ni ku hi ninga litsako a li li si gumiko. Athu ha ti ziva ti to hi ngo mana litsako la ditshuri ngu kumaha ku dhunda ka Jehovha basi. (Vaf. 4:6, 7) Hambi i di ti to siemo sa hi tumelela ku xava silo so tala, hi fanete kukhata ngu ku wona ti to ina hi ni  mbimo ni mtamo wo si khatalela kani, ina hi dhunda ngutu silo sa mafu awa? Hi fanete hi khumbula ti to Txizimu txi emete ti to hi va vathu ava va thumako ka mwaya wa txona. Eto ti womba ti to kha ha fanela kutumela txilo txi hi tsulupeta. Athu kha hi lavi kufana ni dijaha dilee di nga luza mkhanjo wo thumela Jehovha ni ku va mwanana wa Txizimu ngu mhaka yo dhunda tithomba ta mafu awa!—Marku 10:17-22.

18. Ngu yihi lungelo ni makatekwa aya vathu va va engisako va no va nawo?

¹⁸ Vathu vo thembeka va na va ni lungelo yo randa ni ku khozela Jehovha ngu ha ku si gumiko! Ava va ku ni themba yo hanya hamafuni, va na va ni litsako lo khatalela mafu awa Jehovha a nga va lulamisela ona kota mti wa vona. I singa kale na hi di hahatshi ka Mfumo wa Txizimu, mafu ni wutomi si na va si di wusetilwe. I singa kale Jesu a na heta sotshe sikarato asi si nga vangwa ngu kuva Adhamu ni Evha va di humile ka mwaya wa Txizimu. Jehovha a na tshumela e wusa timiliyoni ta vathu e tshumela e va ninga mkhanjo wo ve hanya na va di ni wutomi wo hetiseka ka mafu ya ma no hundulwa me va Paradhesi. (Luka 23:42, 43) Mbimo yi txienge txa mwaya wa Jehovha txa hamafuni txi no va se txi di hetisekile, mmweyo ni mmweyo wawe a na kombisa “wudhumo ni lisima” a li Dhavhidha a nga li womba.—Mas. 8:5.

19. Ngu tihi ti hi fanelako ku ti khumbula?

¹⁹ I di ti to awe u lumba “dibutho da hombe,” u ni themba yo tsakisa. Txizimu txa ku randa ni ku txi lava ti to awe u lumba mwaya wa txona. Ngu toneto maha totshe ti u nga ti kotako ti to u tsakisa Txizimu. Ditshiku ni ditshiku va na ni sithembiso sa Txizimu mu ka mialakanyo ni mbiluni kwako. Kombisa kubonga lungelo yi u ku nayo yo khozela Txizimu Tate wathu wa lirando wa nzumani, ni kuninga lisima themba yo dhumisa Txizimu ngu ha ku si gumiko!