1. Ngu tihi ti vamwani va ti mahako ti to ve thumela Jehovha ngu ha va nga kotako ngu kona?

 AKU MAGWITO ma yako ma txi tshuketa ku ni to tala ti hi nga ti mahako. (Mat. 24:14; Luka 10:2; 1 Pedro 5:2) Hotshethu hi lava kuthumela Jehovha ngu ha hi nga tikotako ngu kona. Vanathu vo tala va engetela mthumo wawe wo txhumayela. Vamwani va thuma kota va nyaphandule va mbimo yotshe, vamwani va lava kuthuma Bhetele mwendo ka mthumo wo aka. Vanathu vamwani va maha ti va nga ti kotako ti to ve thuma kota madhota mwendo malanda a wuthumeli. (1 Tim. 3:1, 8) Jehovha wa tsaka ngutu a txi wona sithumi sakwe si txi ti emisela ku mthumela nga ha si ti kotako ngu kona!—Mas. 110:3; Isaya 6:8.

2. Ku nga maheka txani nga ku hi si ti koti ku hokelela makungo o kari a moya?

² Mbimo yimwani hi nge sikoti ku hokelela makungo aya hi ma lavako ngu mbimo ayi hi nga txi lava ngu yona. Ngu toneto hinga karateka nyana. Mbimo yimwani hi nga guma mtamo nguku se hi di kute ngu tanga, se hi si ti koti ku hokelela makungo o kari, mwendo ku di ni to kari ati ti hi tsivelako ku ma hokelela makungo oneyo. (Mav. 13:12) Eto ngu ati ti nga maheka ni mwanathu Melissa. * Ene ati ti lava ku thuma Bhetele mwendo kuya ka txikolwa txa vatxhumayeli va Mfumo. Ene a womba tiya: “Kha ni nga ni ta nga yo ni nga prenxera petisawu, eto kha ti na ku koteka kwangu. Mbimo yimwani eto ta ni maha ni karateka.”

3. Ngu tihi ti vaphya vamwani ti nga lavako ve tshukwatisa ti to ve amukela malungelo?

 ³ Ka vaphya vo tala txihinga txi ngava tximwani. Vona va ngava va di ni wuzivi va di txharihile ni ku va di ni mtamo wo thuma. Kambe ti nga maha ti txi lava ve gonda kutimisela ni kuva ni txixonipho. Ngako u txi veka mapimo ko sakulela tifanelo ati ti lavekako u na mana malungelo aya u ma lavako ni ku ona ma nga hoka ngu mbimo ya ku nem u sa yi rinzela. Wona ati ti nga humelela ka Nick, mbimo yi a nga ti ni 20 wa malembe ene a karatekile ngu ku a nge mbi sawulwa kota ku thuma kota dilanda da wuthumeli. Ene a womba tiya: “Ani ni txi pimisa ti to devhe ni na ni txikarato.” Kambe Nick kha godhola ene a mahile ti a nga ati ti kota ka malungelo ya a nga ti nawo. Konku ene a thuma kota txiro txa Komisawu ya Bhetele.

4. Ngu tihi ti hi no ti wona ka gondo yiya?

⁴ Ina awe khwa tsaka ngu kuva u sa tikota ku hokelela malungelo mamwani a moya? Idi toneto bhula ni Jehovha u m’gela ati u ti pfisako tona. (Mas. 37:5-7) I singa eto dwe u nga bhula ni vanathu ava va nga vitwa kasi ku ve ku gela nzila yi u nga tshukwatisako ngu yona mthumo wako ka Jehovha u tshumela u maha ti u nga ti kotako kasi ku thumisa sialakanyiso sakwe. Ngako u txi maha toneto ti nga maha u amukela malungelo aya u ma lavako mwendo ku hokelela makungo o kari. Hambi keto nga ha ti nga maheka ngu kona ni mwanathu Melissa awu hi nga bhula ngu ngene ti nga maha malungelo oneyo u si na ku sikota ku ma hokelela. I di toneto u nga simamisa kutxani u va ni litsako? Gondo yiya yi na xamula siwotiso siraru asi si no hi vhuna kuwona to hi nga li manisa ku txani litsako (1) ngu tihi ati ti tisako litsako? (2) U nga engetelisa kutxani litsako lako? (3) Ngu yahi makungo a ya hi nga ti vekelako ona ti to hi engetela litsako?

5. Hi fanete hi veka mapimo ka txani ti to hi mana litsako? (Ekleziyaste 6:9)

⁵ Dibhuku da Ekleziyaste 6:9, di txhamusela ati ti nga hi tiselako litsako. (Yi lere.) M’thu awu a tsakiswako ngu si a si “wonako ngu maso” a ninga lisima a si a ku naso i ku tiya, ene wa tsaka ka txiemo a txi a ku ka txona. Kambe awu a xengwako ngu kunavela a zumba atxi xota asi a sinako ku sikota ku si hokelela. Hi gonda txani? Ti to hi va ni litsako hi fanete hi veka mapimo ka si hi ku naso ni ka makungo aya hi nga ti kotako ku ma hokelela.

6. Ngu txihi txidinganiso txi Jesu a nga txi womba ni ku hi na gonda txani?

⁶ Ina ngu ditshuri ta koteka ku hi va ni litsako ngu si hi ku naso? Vathu vo tala va womba ti to ti nge koteki, ngu ku txani? Ngu ku ngu ku tsimbila ka mbimo hi lava ku gonda ni ku maha ta tiphya. Kambe ditshuri ngu di do ti nga koteka ku va ni litsako. Nga ha hi nga ti wona kona kha hi na ku gwitela ko tumelelana ni ti ti ‘wonwako ngu maso’ dwe, kambe hi la tshumela hi tsakiswa mwendo ku eneliseka ngu ti hi ti kotako ku timaha konkuwa. Nguku txani hinga wombako toneto? Ti to hi mana xamulo ya txiwotiso txonetxo hi na xolisisa txidinganiso atxi Jesu a nga txi womba txa matalenta atxi txi ku ka Matewu 25:14-30. Hi na wona to hi nga gonda txani mayelano ni ku va ni litsako ni kutshumela hi li engetela ngu ti hi ti kotako ku timaha konkuwa.

7. Txhamusela txidinganiso txa Jesu txa matalenta.

⁷ Ka txidinganiso txa matalenta Jesu a wombawombile ngu wamwamna awu a nga ti la ku enda. Na a si se ku enda ene a dhanile sithumi sakwe e ta ni nga mmwani ni mwani matalenta kasi ku e maha mabhindu. * Ene a ti ziva ti to  sithumi sakwe si ti ni wusikoti wo hambana, ngu toneto a ningile 5 wa matalenta ka mmweyo e tshumela e ninga matalenta 2 ka mmwani ni talenta yimweyo ka wa wuraru. Sithumi si sa simbidi si thumile ngutu kambe awu wo gwita kha maha txilo ngu matalenta aya a nga ti ningilwe. Ngu toneto mlungo wakwe a m’hingile.

8. Ti nga maha txithumi txo khata txi di ti pfisile kutxani ngu matalenta ya txi nga ningwa?

⁸ Txithumi txo khata ti nga maha txi di tsakile ngutu mbimo yi txi nga amukela 5 wa matalenta kasi ku txi maha dibhindu. Eyo i ti male ya yingi ngutu ni ku ti txi kombisa ti to mlungo wakwe atxi m’themba. Ani txithumi txa wumbidi txona ko ina txi godhote ngu ku txi nga mba amukela matalenta o tala kufana ni txithumi txo khata? Txi ti pfisile kutxani?

9. Ngu tihi ti Jesu a nga womba mayelano ni txithumi txa wumbidi? (Matewu 25:22, 23)

⁹ Lera Matewu 25:22, 23. Jesu kha ya womba ti to txithumi txa wumbidi txi swirekile ngu ku txi nga amukela matalenta mambidi dwe. Ni ku Jesu kha womba to txithumi txile txi zumbile txi txi khala-khala txi txi womba tiya: ‘Kha ni kholwi ti to mlungo wangu a to ni ninga sona siya dwe. Phela ani na thuma ngutu ku fana ni txithumi txile txi nga ningwa 5 wa matalenta. A ku mlungo wangu a si ni ninge lisima i tshuku ni kelela mali yiya ni huma ka tona ni ti mahela tangu.’

10. Ngu tihi ti txithumi txa wumbidi txi nga maha ngu matalenta ya txi nga ti ningilwe?

¹⁰ Kufana ni txithumi txo khata txithumi txa wumbidi ni txona txi wu tekete ha msungo mthumo wu txi nga ti ningilwe ni ku txi mu thumete ngutu mlungo wakwe. Kota wuyelo ene a  tikoti ku bhindula matalenta ya a nga ti ningilwe. Ene a haketwe ngu ku ti ningetela kakwe ka mthumo. Mlungo wakwe kha gwitela ko tsakela mthumo wa txithumi txakwe basi kambe a tshumete e mu ninga mithumo yimwani!

11. U nga maha txani ti to u engetela litsako?

¹¹ Ngako hi txi thuma ngu yotshe mbilu yathu ka txiavelo tximwani ni tximwani txi hi ningwako ka sengeletano wa Jehovha hi na mana ngutu litsako. “Ti ningetele” ka mthumo wo txhumayela u maha ti u nga ti kotako ka mithumo yimwani ya dibanza. (Mith. 18:5; Vaheb. 10:24, 25) Tsula mitshanganoni u di lungisete u tshumela u ya ni ningela tixamulo ta tinene. Maha kwati sienge si u ningwako ka mitshangano ya hagari ka divhiki. Ngako madhota ma txi ku kombela ku u maha mthumo wo kari dibanzani maha ngu txikuluveta ni ku thembeka. U nga thuki u pimisa ti to kha ti vhuni txilo kumaha mthumo wu u ningwako wona dibanzani. Londola mkhanjo wumwani ni wumwani kasi ku tshukwatisa wusikoti wako. (Mav. 22:29) Ngako u txi tiningetela u kuluveta kumaha mthumo u na kula, ni ku litsako lako li na engeteleka. (Vag. 6:4) Phela ti na ku hehukela ku u mana litsako nga ku vamwani va txi amukela malungelo aya u txi navela kuva nawo.—Var. 12:15; Vag. 5:26.

12. Ngu tihi a ti Melissa ni Nick va nga timaha ti to ve engetela litsako lawe?

¹² Wa mkhumbula Melissa awu a nga ti lava ku thuma Bhetele ni kuya ka Txikolwa txa Vatxhumayeli va Mfumo? Ene kha sikota kumaha toneto kambe wona ti a nga womba: “Ani ni txi thuma ngutu ka mthumo wa nyaphandule ni ku ni txi maha totshe ni nga txi tikota ti to ni txhumayela ngu tinzila to tala, eto ti ni maha ni va ni litsako.” Hani Nick awu a nga mba sawulwa kuthuma kota dilanda da wuthumeli a mahile txani? Ene a womba tiya: “Ani ni txi veka mapimo ka malungelo a ya ni nga txi nawo o fana ni ku hiseka ka mthumo wo txhumayela ni ku ningela tixamulo mitshanganoni. Ni tshumete ni prenxera petisawu yo thuma Bhetele ni ku rambilwe dilembe di di nga londisela.”

13. I na va yihi wuyelo ngako hi txi tiningetela ngu mbilu yathu yotshe ka malungelo ya hi ku nawo konkuwa? (Ekleziyaste 2:24)

¹³ Nga ku u txi ti ningetela ngu mbilu yotshe ka malungelo a ya u ku nawo konkuwa ina ti nga koteka kuamukela malungelo mamwani mbimo yi yi tako? Ina ti nga koteka nga ha ti nga maheka ngu kona ngu Nick. Kambe i di ti to txiemo txako txi fana ni txa Melissa awe u nga simama u va ni litsako ni ku eneliseka. (Lera Ekleziyaste 2:24.) Kambe txa lisima ngutu litsako lako li na tiswa ngu kuziva ti to mkoma wako Jesu wa tsaka ngutu ngu yotshe mizamo a yi u yi mahako.

14. Ina ti bihile ku tivekela makungo a moya? Txhamusela

¹⁴ I di ti to se konkuwa ha maha totshe ti hi nga ti kotako ka mthumo wa Jehovha, ina ti womba ti to kha ha fanela ku hi ti vekela makungo? Ahim-him! Hi fanete hi ti vekela makungo a moya. Ngu kutxani? Nguko ona ma hi vhuna ku hi tshukwatisa mthumo wathu wo txhumayela, wo gondisa ni kutshumela me hi vhuna ku vhuna vanathu vamwani. Kambe ti to hi hokela makungo wonewo hi fanete hi tiveka hahatshi. Hahanze ko pimisa ngu ngathu dwe hi fanete hi veka mapimo ko thumela vamwani.—Mav. 11:2; Mith. 20:35.

15. Ngu yahi makungo aya ma nga engetelako litsako lako?

¹⁵ Ngu yahi  makungo aya u nga ma hokelelako! Kombela Jehovha ti to e kuvhuna kuwona makungo a ya u nga sikotako ku ma hokelela. (Mav. 16:3; Jak. 1:5) Ina awe u nga ti kota ku va nyaphandule wo vhuneta mwendo wa mbimo yotshe mwendo ku thuma Bhetele mwendo ka  mthumo wo aka? Ina u nga engetela ka mthumo wo txhumayela ngu ku gonda lidimi limwani mwendo kutxitxa u ya ka ditiko dimwani! Ti to u ziva to tala mayelano ni mhaka yiya lera kapitulo 10 ka dibhuku adi di ku Organizados para Fazer a Vontade de Jeová, mwendo kubhula ni madhota a dibanzani kwako. * Ngako u txi maha mizamo hokela makungo aku litsako lako li na kula ni ku votshe va na tiwona.

16. U nga maha txani nga ku u si ti koti ku hokelela makungo o kari?

¹⁶ Hinga maha txani ngako konkuwa hi si ti koti kuhokelela makungo a ya ma nga wombwa msana? Hi nga ti vekela makungo aya hi nga tikotako ku ma hokelela. Vona mamwani ka ona.

17. Ngu kuya ngu 1 Timoti 4:13, 15 mwanathu awu a nga bhabhatiswa a nga maha txani ti to eva mgondisi wa mnene?

¹⁷ Lera 1 Timoti 4:13, 15. Ngako u di dijaha di nga bhabhatiswa u nga maha txo kari kasi ku tshukwatisa nzila yi u womba-wombako ngu yona ni ku gondisa. Ngu kutxani? Ngu ko ‘kutiningetela’ ko lera ku womba-womba ni ku gondisa u na vhuna ava va kuengiselako. Zama ku tivekela makungo o gonda ni ku tekelela ati ti ku ka dibhuku di ku: Hisekela kulera ni kugondisa. Gonda gondo yimweyo ngu yimweyo u duketa ku timaha u di mtini u tshumela u ya ti thumisa mbimo yi u vekako miwomba-wombo yako. U nga tshumela u kombela txivhuno ka mlayeli wo vhuneta mwendo madhota aya “ma thumelako ku txhumayela dipswi ni ku gondisa.” * (1 Tim. 5:17) U nga gwiteli ku veka mapimo ka nzila yo tshukwatisa wusikoti wako dwe, kambe tshumela u vhuna va engiseli vako ku ve  tsanisa likholo lawe ni ku va kuzeta ku ve maha txo kari. U txi maha toneto u na engetela litsako lako ni la ava va ku engisako.

18. Nji txani txi nga kuvhunako ti to u tshukwatisa wusikoti wako wo txhumayela?

¹⁸ Hotshethu hi ni lungelo yo txhumayela ni ku maha vagondiswa. (Mat. 28:19, 20; Var. 10:14) U nga maha txani nga ku u txi la ku tshukwatisa wusikoti wako ka mthumo wuwa wa lisima? Ti vekele makungo ni ku tshumela u thumisa a ti u ti gondako da dibhuku da Hisekela kulera ni kugondisa. U nga tshumela u mana sialakanyiso so kari ka Mahanyelo athu a Wukristu ni Mthumo wo Txhumayela ni ka sikombiso sa mabhulo mavhidhio aya ma kombisako ka mtshangano wa hagari ka divhiki. Zama kuthumisa otshe mawonelo u ma manako u wona to ngu yahi ma humelelako. Nga ku u txi londisa mamahelo oneyo awe u na va mgondiswa wamnene ni ku tshumela u mana litsako la hombe ali li si dinganiswiko ni txilo.—2 Tim. 4:5.

19. U nga maha txani ti to u sakulela tifanelo ta Wukristu?

¹⁹ U nga divale ti to ati i ku ta lisima ngutu ngu sakulela tifanelo ta moya ati ti tsakisako Txizimu. (Vag. 5:22, 23; Vakl. 3:12; 2 Pedro 1:5-8) U nga mahisa kutxani toneto? Ngu txikombiso, alakanya u txi la ku engetela likholo lako u nga maha txani? Ti nga va tinene kulera mabhuku athu a ya ma womba-wombako ngu nzila yo kulisa likholo. Mavhidhio o tala ma ku ka JW Broadcasting^® ma ni matimu a vanathu va txiwamna ni va txisikati, ava va nga kombisa likholo la hombe mbimo yi va nga txi wonisana ni sikarato. Mbimo yi u xalelako mavhidhio oneyo ni kuzama ku etetela sikombiso sawe ti na ku vhuna ngutu.

20. Hi nga maha txani ti to hi engetela litsako lathu ni ku hi si karateki ngutu?

²⁰ Ngu ditshuri hotshethu ha tilava ku maha ngu ha hi nga kotako ngu kona ka mthumo wa Jehovha. Ka mafu a maphya hi na mthumela ngu nzila yo hetiseka. Na yi si se kuhoka mbimo yoneyo hi la ku londola mkhanjo wumwani ni wumwani wu hi wu manako, hi txi maha toneto hi na mana litsako la hombe ni ku hi na mba karateka. Ni ku ta lisima ngutu hi na dhumisa ni ku pfalisa tate wathu Jehovha i ku “Txizimu txa makatekwa, mwendo txa litsako.” (1 Tim. 1:11) Se hi na sikota ku tsaka ngu malungelo a ya hi ku nawo konkuwa.