1. Ngu kutxani bhabhatiso i di dizambo da lisima? (Wona mfota wu wu ku makhatoni.)

VATHU va makhulu-khulu va bhabhatiswa dilembe ni dilembe. Kambe kutala ka vona mbaphya. Ni ku ti nga maha va di veleketwe ditshurini. Ina u mmweyo wawe? Idi ti to inna, u sawute nzila ya yinene. Mkristu mmwani ni mmwani a fanete e bhabhatiswa. Ni ku kubhabhatiswa ta laveka ti to e kota kuhanyiswa ni kumana wutomi wo mbi guma.—Matewu 28:19, 20; 1 Pedro 3:21.

2. Ngu kutxani u sa fanela kuthava ku tiningetela ka Jehovha?

² Phela u txi bhabhatiswa, Jehovha a na ku katekisa ngu tinzila to tala. Kambe nawe u ni wutixamuleli wo tala. Ngu nzila yihi? Ka ditshiku di u nga bhabhatiswa ngu dona, mwanathu wu a nga ningela m’wombawombo wa bhabhatiso a ku wotisile tiya: “Ngu txiseketelo txa digandelo da Jesu Kristu,  u ti sote ka siwonho sa wena ni ku tiningetela ka Jehovha ti to u maha kudhunda kwakwe?” U xamute u txi inna. Awe u thembisile kuranda Jehovha ni ku mthumela ngu ha u nga kotako ngu kona wutomi wako wotshe. Ina u fanete u tisola ka txithembiso txiya txa lisima? Ahim-him! Nguko awe khu na mbi tisola u txi leka wutomi wako wu kongomiswa ngu Jehovha. Ava va si m’ziviko Jehovha va maha txienge txa ditiko da Sathani. Ene kha na mhaka ni Jehovha. Ene wa tsaka a txi kuwona u txi leka themba yako yo hanya kala kupinduka ni kutshuralela Jehovha.

3. Jehovha a ku katekisile ngu nzila yihi nguku u nga tiningetela kwakwe?

³ Alakanya nzila yi Jehovha a nga kukatekisa ngu yona nguku u nga tiningetela kwakwe ni ku bhabhatiswa. Aku u nga ningetela wutomi wako kwakwe, u nga womba u di tsani u txi khawe: “MKOMA a ni nani, kha ni thavi txilo, m’thu a nga ni maha txani kani?” (Masalmo 118:6) Txi walo txa lisima ngutu kupinda kuva didhawani ka Txizimu ni kuziva ti to txona txa tsaka ngu ngawe.

4, 5. a) Ngu kutxani ku tiningetela i di wutixamuleli wa m’thu apune? b) Ngu sihi sikarato si Makristu otshe ma nga tshanganako naso?

⁴ U nga teki wuxaka wako ni Jehovha u wu fananisa ni telefone fixo ayi vaveleki vako va nga yi xava ti to mi yi thumisa. Hambi vaveleki va txo leka kuthumela Jehovha, wutixamuleli wo simama u thembeka kwakwe mbwako. Ngu kutxani eto i di ta lisima kwako? Phela awalo wu a zivako nzila yi likholo lathu li no dukwa ngu yona mbimo yi yi tako. Ngu txikombiso, ti nga maha u di bhabhatisilwe u di ngadi m’dotho. Kambe ngu kutsimbila ka mbimo u nga tshangana ni sikarato mwendo u si nge ngadi u tsaka kufana ni kukhatani. Mphya mmwani a ti khene: “Mphya a nga sikota kutsanisela siduko i di ngadi mwanana, so fana ni kupateka ka m’buso wo tshanganisa malembe ngu kufela dibholo. Kambe a ngako a txi kulanyana a nga thuka e xulwa ngu minavelo ya ta mataho, ngu toneto a fanete e tsaniseka ti to kuengisa milayo ya Jehovha nda lisima mbimo yotshe.”

⁵ Phela hi nga vaphya basi ava va no manana ni sikarato. Hambi va va nga bhabhatiswa i di vahombe va nga dukwa likholo. Siduko soneso si nga va sa mngana wa wukati, dihanyo mwendo mthumoni. Ti singa ni mhaka ni tanga yathu, hotshethu ti na lava hi thembeka ka Jehovha ka siemo so hambana-hambana.—Jakobe 1:12-14.

6. a) Ngu tihi ti u fanelako ku ti khumbula ngu txithembiso txako? b) U nga gonda txani ka Vafilipiya 4:11-13?

⁶ Ti to u zumba u di thembekile, mbimo yotshe khumbula ti to txithembiso txi u nga txi maha, u mahete Mkoma wa Hombe ti to u na mthumela ku singa ni mhaka ni txi txi humelelako, hambi i di ti to vangana mwendo vaveleki vako kha va mthumeli. (Masalmo 27:10) Kambe ka siemo sotshe, tsaniseka ti to Jehovha a na kuvhuna ti to u xayisa txithembiso txako kwakwe.—Lera Vafilipiya 4:11-13.

7. Ti womba txani kuthumela kuhanyiswa kwako ngu “txithavo ni kudhudhumela”?

⁷ Jehovha a lava ti to u va mngana wakwe. Kambe ti lava mizamo ti to u xayisa wungana wonewo wo tsana ni kuthumela  kuhanyiswa kwako. Vafilipiya 2:12 yi khene: “Thumani ngu txithavo ni kudhudhumela mi thumela kuhanyiswa kwanu.” Eto ti womba ti to hi fanete kumaha totshe ti hi kotako ti to hi zumba hafuhi ni Jehovha ni kusimama hi thembeka ku singa ni mhaka ni ti ti nga humelelako. Kha ta enela kutumela basi ti to hi na maha. Khumbula ti to hambi va va ku ni malembe va txi thumela Txizimu vamwani va lekile kuthembeka kwawe. U nga maha txani ti to u simama u thumela kuhanyiswa kwako?

8. Kuengisela Jehovha ti pata txani? Ni ku ngu kutxani i di ta lisima?

⁸ Ti to hi va vangana va Jehovha, hi fanete kubhula nayo ni ku mu engisela. Nzila yimwani yo engisela Jehovha ngu lera Bhiblia. Eto ti pata kugonda ni kualakanyisisa ngu Dipswi da Txizimu ni mabhuku ya ma nga seketelwa ka dona. Kugonda Bhiblia kha ti fani kuvekisa to kari ti to u ya maha sikambelo txikolwani. Kambe ti fana ni dipfhumba ahawa u tumbulako timhaka ta tiphya mayelano ni Jehovha. U txi maha eto u na tshuketa hafuhi ka Txizimu, se ni txona txi na tshuketa hafuhi kwako.—Jakobe 4:8.

9. Ngu sihi sithumiswa si si nga kuvhuna ka gondo yako upune?

⁹ Sengeletano ya Jehovha yi hi ningile sithumiswa so tala asi si nga kuvhunako ka txiemiso txako txa gondo. Ngu txikombiso, ka site ya jw.org ku ni sienge si si ku:  “Adolescentes” ni “Exercícios Bíblicos” sona si nga kuvhuna kuthumisa ati u ti gondako ka simahakalo si si nga bhalwa ka Bhiblia. Ku ni mkongomiso wa gondo ka txienge txi txi ku: “O Que a Bíblia Realmente Ensina?” Sithumiswa siya si nga kuvhuna kuaka likholo lako ni kubhulela vamwani ati u ti kholwako. Ka gondo yako upune u nga tshumela u mana timhaka timwani, ka msungo mhaka wu wu ku “Os Jovens Perguntam — Como tornar a leitura da Bíblia agradável?” ka Despertai! de Abril de 2009. Kugonda ni kualakanyisisa nda lisima ti to u thumela kuhanyiswa kwako.—Lera Masalmo 119:105.

10. Ngu kutxani i di ta lisima kumaha mkombelo?

¹⁰ Hi engisela Jehovha ngu kugonda Bhiblia, ni ku hi bhula nayo ngu kumaha mkombelo. Kha ha fanela ku teka mkombelo kota mkhuwo wo lwela kumana to kari. Phela mkombelo i nzila ya yinene yo wombawomba ni M’vangi wathu. Alakanya ngu tiya: Jehovha a lava kuengisa ati u lavako ku tiwomba! (Lera Vafilipiya 4:6.) Se ngako u txi tipfa u di karatekile, Bhiblia yi womba ti to “veka wutomi wako manzani ka MKOMA.” (Masalmo 55:22) Timiliyoni ta vanathu ti vhunwi ngu kuthumisa txialakanyiso txiya. Se nawe txi nga kuvhuna!

11. Ngu kutxani u di fanete kubonga Jehovha mbimo yotshe?

¹¹ Kambe, kha ha fanela kumaha mkombelo ka Jehovha ngu kulava kuvhunwa basi. Bhiblia ya hi alakanyisa yi txi: “Kombisani kubonga kwanu.” (Vakolosa 3:15) Mbimo yimwani hi nga karateka ngutu ngu sikarato sathu ha ko za hi si woni ni silo sa sinene asi hi ku naso. Kambe duketa tiya: Ditshiku ni ditshiku alakanya silo siraru sa lisima asi u nga bongako sona, se gwita u bonga Jehovha ngu silo soneso. Mphya wu a dhanwako ku i Abigail, awu a nga bhabhatiswa a di ni 12 wa malembe a khene: “Phela Jehovha ngene basi a fanelwako ngu kubongwa kupinda m’thu mmwani ni mmwani ha mafuni. Hi fanete hi m’bonga ngu kona ha ka sotshe si a hi ningako sona.” Mbimo yimwani Abigail wa ti wotisa txiwotiso txiya: “Ngako ni txi wuka ni mixo se ni mana asi ni nga si bonga ka Jehovha dwe, ni ndina va ni txani!” * (Wona txhamuselo ya hahatshi.)

12, 13. U ti wonisile kutxani ti to Jehovha mbwa mnene? Ni ku ngu kutxani i di ta lisima kualakanyisisa ngu nzila yi a kuvhunako ngu yona?

¹² Jehovha a vhuni Mkoma Dhavhidha ti to e tsanisela siemo so karata. Dhavhidha a wombile ngu kukongoma a txi khene: “Duketani mipune mi txi ti wona to MKOMA mbwa mnene; a katekile m’thu wule a thembako ene.” (Masalmo 34:8) Ndimana  yiya yi kombisa ti to ti lava hi wona wunene wa Jehovha hipune. Mbimo yi u gondako Bhiblia ni mabhuku athu ni kuxalela mitshangano, u gonda nzila yi Txizimu txi vhunako ngu yona vamwani ti to ve zumba va di thembekile. Kambe mbimo yi wuxaka wako ni Jehovha wu yako wu txi kula, u na ti wona upune ati Jehovha a ku vhunisako tona. Ina wa yi wona nzila yi Jehovha i ku wa mnene ngu yona kwako?

¹³ Mkristu mmwani ni mmwani a woni wunene wa Jehovha ngu nzila yo sawuleka. Ene ahi rambile ti to hi tshuketa hafuhi kwakwe ni Mwanana wakwe. Jesu a ti khene: “A walo wu a si kotako kuta kwangu, ngako a sa dhanwa ngu Tate wu a nga ni ruma.” (Johani 6:44) Ina wa tipfa ti to Jehovha a ku dhani kasiku u va hafuhi nayo? Mwendo u alakanya ti to ‘Jehovha a dhani vaveleki vako se nawe ti lava u va londisela?’ Khumbula ti to mbimo yi u nga tiningetela ka Jehovha u bhabhatiswa, u vite ni wuxaka wo sawuleka nayo. Bhiblia yi hi gela tiya: “Ngako m’thu a txi randa Txizimu, eyo wa ziwa ngu txona.” (1 Vakorinto 8:3) Mbimo yotshe xonipha wukhalo wu Jehovha a ku ningako wona ka sengeletano yakwe.

14, 15. Mthumo wo txhumayela wu nga kuvhunisa kutxani ti to u tsanisa likholo lako?

¹⁴ U tshumete u wona wunene wa Jehovha mbimo yi a nga ku ninga txibindi txo txhumayela vamwani, thembweni mwendo txikolwani. Kambe ti nga thuka ti ku karatela kutxhumayela vagondi kuloni. Mwendo ku u nga karateka ngu nzila yi va no xamula ngu yona. Kutilava u nga thuka u thava kutxhamusela ati u ti kholwako masoni ka mtxawa wa vangana. Kambe nji txani txi txi nga kuvhunako?

¹⁵ Alakanya mayelano ni ti to ngu kutxani u txi kholwa ka ti u ti kholwako. Ngako mkongomiso wa gondo wu wu manekako ka jw.org wu txi maneka ngu lidimi lako wu thumise. Txienge txiya txi nga kuvhuna ti to u alakanyisisa ngu ti u ti kholwako, ngu kutxani u txi ti kholwa ni ku u nga va txhamuselisa kutxani vamwani ti u ti kholwako. Se ngako u txi tsaniseka ngu ditshuri ni ku lungiselela kwati, u na lava kugela vamwani ngu Jehovha.—Jeremiya 20:8, 9.

16. Nji txani txi txi nga kuvhunako ti to u va ni txibindi txo txhumayela?

¹⁶ Hambi i di ti to u lulamiselete kwati, ti nga maha u thava kutxhumayela. Mwanathu wa txisikati wu a nga bhabhatiswa a di ni 13 wa malembe kambe konkuwa a ku ni 18 wa malembe a khene: “Na ti ziva ati ni ti kholwako, kambe mbimo yimwani ta ni karatela ku ti womba ngu mapswi.” Ngu toneto ene a duketa kuwomba-womba ngu ditshuri ngu nzila ya mtumbuluko. A tshumete a txi khene: “Vangana vangu kha va thavi kubhula ngu ti va timahako. Nani ni zama kumaha ti ti fanako. Mbimo yi hi bhulako ni womba to fana ni tiya ‘ditshiku dimwani ni ti tsimbitisa gondo ya Bhiblia  ni . . . ’ Se ni simama ni mhaka yi hi nga ti bhula ngu yona. Hambiku mbimo yimwani mhaka yoneyo yi si gwesiko ngu ku kongoma ta Bhiblia, vamwani va xamala se ve lava kuziva ti yi mahiswako tona gondo yoneyo. Mbimo yimwani va ni wotisa siwotiso. Mbimo yi ni mahako eto, se tiya ti ni hehukela. Ni ku ni tipfa ni di tsakile!”

17. Ngu tihi timwani ti ti nga kuvhunako kubhula ni vamwani?

¹⁷ Mbimo yi vamwani va wonako ti to khu va xanzi ni ku wa va xonipha, ti na va hehukela kuxonipha ati u ti kholwako. Olivia awu a ku ni 17 wa malembe a nga bhabhatiswa ti ngadi mwanana a khene: “Phela ni ti thava ti to ni txo beta timhaka ta Bhiblia ka mabhulo athu, vathu va na ni teka nga ni to oma msungo.” Ene a khatile ku va ni mawonelo o hambana. Hahanze ko pimisa ngutu ngu dizowa, a alakanyile tiya: “Vaphya vo tala kha va zivi txilo ngu Tifakazi ta Jehovha. Ngathu hokha hi ku Tifakazi. Mahanyelo athu ma nga va gwesa. Hi nga maha txani ngako hi di ni dizowa mwendo hi txi thava kuwomba-womba ngu likholo lathu? Ti nga maha va si khatali ngu ngathu. Ti nga maha va si anguli ngu nzila ya yinene ngako hi si tsaniseki ngu ti hi ti tumelako. Kambe loko hi txi womba-womba ngu kutsaniseka mabhulo athu va ma na tsakela ni ku va na hi xonipha.”

18. Ngu tihi ti u nga timahako ti to u thumela kuhanyiswa kwako?

¹⁸ Se hi ti woni ti to mbutixamuleli wa lisima kuthumela kuhanyiswa kwako. Ti to u maha toneto, ti lava u gonda ni kualakanyisisa ngu Dipswi da Txizimu, u maha mkombelo ka Jehovha ni kualakanyisisa kwati ngu tinzila ti ene a kuvhunisako tona. Kumaha eto ti na kuvhuna ti to u tsaniseka to Jehovha i mngana wako. Futhi u na tshumela u bhula ni vamwani ngu ti u ti kholwako.—Lera Masalmo 73:28.

19. Ngu kutxani i di ta lisima kuthumela kuhanyiswa kwako?

¹⁹ Jesu ati khene: “Ngako m’thu a txi lava ku ni londisa, a na ti leke apune, e pakata txihambano txakwe, a txi ni londisa.” (Matewu 16:24) Ngu ditshuri, Mkristu wu a lavako kulondisa Jesu a fanete ku tiningetela ka Jehovha ni ku bhabhatiswa. Eyo ngu ona makhato a wutomi wa konkuwa ni ku eto ti na ku kongomisa ka wutomi wo mbi guma ka mafu a maphya a Txizimu. Ngu toneto, maha totshe ti u nga ti kotako ti to u thumela kuhanyiswa kwako!