Mhaka yi yi manekako ka Dhewuteronome 22:25-27, kha yi veki mapimo ka ku ninga mnando wamwamna, nguko ene se a ni mnando ka mhaka yiya. Se mlayo wuwa wu thuma ko kombisa to dihorana kha di nga ni mnando. He woneni mhaka ngu hafuhi.

Ka tindimana msana kuwombwa-wombwa ngu dijaha adi di nga otela ni dihorana do wutwa “didhoropani.” Ngu kumaha toneto, dijaha diya se di ni mnando wo maha wugango, nguko ka mbimo yileya, ngako dihorana di di wutilwe, ti txi fana ni kuva di di txhadhile. Se kuwombwa txani ngu dihorana? Didungula di kombisa to “dihorana kha da peka huwa” didhoropani. I ti ku di to peka huwa, vamwani va di di lamulete. Kambe di to malala. Aku di nga mbi peka huwa, dona di ni mnando wo maha wugango, i si nga dijaha dileya basi.—Dhewut. 22:23, 24.

Kambe Mlayo wu ti khatalela timhaka timwani: “Se ngako wamwamna wo kari a txi mana mbiri yo wutwa, thembweni, a txi yi pfinya, e otela nayo, sekoko eyo wa dijaha a nga otela nayo a na fa ekha; kambe u nga mahe txilo ka mbiri, yona kha yi nga ni txionho, txi yi ningako fanelo ya kufa. Nguko ayiya mhaka ya fana ni ya wamwamna, wule a wukelako muakelani wakwe a txi m’daya. Nguko koko a mani wule wa mbiri txitingani; se mbiri yile yo wutwa yi pekile huwa, kambe kha ka maneka m’thu wo yi lamulela.”—Dhewut. 22:25-27.

Ka mhaka yiya, valamuli va ti sawula kukholwa ka dihorana. Ngu nzila yihi? Ku ti alakanywa to “mbiri yile yo wutwa yi pekile huwa, kambe kha ka maneka m’thu wo yi lamulela.” Ngu toneto yi sa maha wugango. Kambe dijaha di ti ni mnando wo pfinya ni kumaha wugango ngu kuotela nado.

Ngu toneto, hambi ku mlayo wu emelako kwa mbi na mnando ka dihorana, mhaka yi kongomile yi txi dijaha di ni mnando wo pfinya kumweko ni kumaha wugango. Hi nga tsaniseka to valamuli va ti ‘xolisisa, ve wonisisa ni kuwotisisa kha kwati’ mhaka ve tshumela ve maha txisungo ngu kuya ngu mlayo wa Txizimu.—Dhewut. 13:14; 17:4; Eks. 20:14.