Ti nga maha a si wombi tona. Sathani kha womba to ngako Evha a txi dya m’hando wu va nga tsimbiswa, a ndi na nga a to fa kambe moya wu txi hanya (ati nyamsi va wombako to moya kha wu fi) se e simama e hanya wukhalo wumwani. Ngu kuthumisa mnyoka, Sathani a tsanisekisile Evha to hambi va txo dya m’hando wule, ‘Lambi! Kufa kha va na mbi fa!’ Ene a va hembete a txi khene va ndi na simama ve hanya, ve tidila ngu wutomi wo tsakisa ha mafuni, va si kongomiswi ngu Txizimu.—Gen. 2:17; 3:3-5.

I di ti to gondo ayi yi gondiswako nyamsi ya ti to moya kha wu fi kha yi khukheli Edheni, se yi khatete hani? Kha hi nge wombi ngu kutsaniseka. Ati hi ti zivako ngu ti to wukhongeli wotshe wa makuhu wu lovisilwe ngu mbimo ya Ndambi ya masiku a Nowa. Kuwalo wukhongeli ni wa wumwewo wa makuhu wu nga sala, nguko ku to huluka Nowa ni mwaya wakwe basi.

Ngu toneto, gondo ya ti to moya kha wu fi, ti nga maha yi di khatile msana ko va Ndambi yi di pindile. Mbimo yi Txizimu txi nga vhinganyisa tidimi khe Bhabheli, vathu va to hangalaka ni “mafu otshe,” se ti nga maha va di vite ni mapimo a ti to vathu va ni moya wu wu si fiko. (Gen. 11:8, 9) Ti si nga ni mhaka ni ti to gondo yoneyo ya makuhu yi khatete hani, hi nga tsaniseka ti to Sathani i ku ene, “tate wa makuhu,” ngene a kongomisako vathu ni ku wa tsaka a txi wona makuhu onewo ma txi hangalaka ni ditiko dotshe.—Joh. 8:44.