Ina u nga sikota kuxamula siwotiso siya si ku mu ka Muwoneleli wa 2019?

Txi la kuwomba txani txitsaniso txa Txizimu atxi txi ku: “Otshe matxhari ale ma longiselwako ku kuwukela, kha ma na mbi humelela”? (Isaya 54:17)

Hi nga themba to Jehovha a na hi vhikela ka “kufuteta ka vaxanisi.” (Isaya 25:4, 5) Valala vathu va na mbi thuka ve hi xanisa kala kupinduka.—w19.01, maphepha 6-7.

Nzila yi Txizimu txi nga ñola ngu yona Vakanana ni Vaisrayeli va va nga si engisi, yi kombisisa kutxani kululama ka txona?

Jehovha a bhasopisile Vaisrayeli atxi khene a na lamula ava va xanisako vavasikati ni vanana vo mbi na vanyamne. Ene a katekisile vathu vakwe mbimo yi va nga ti thembeka kwakwe ni kuñola vamwani ngu kululama.—w19.02, maphepha 22-23.

Hi nga maha txani ngako hi ti ka wukhalo wu m’thu wu i singako fakazi a mahako mkombelo?

Hi nga malala hi kombisa txixonipho, kambe hi na mbi seketela ngu “amen”; nem hi na mbi ñolana mawoko ni vamwani. Hi nga ti mahela mkombelo wathu wa mbiluni.—w19.03, diphepha 31.

Ngu kutxani kuxanisa vanana ngu ta mataho i di txionho txa hombe?

Kuxanisa mwanana ngu ta mataho njionho ka wu a nga xaniswa, ka dibanza, ka wukoma wa ditiko ni ka Txizimu. Amu wukoma wu wombako to kufanetwe kumangalwa timhaka tiya, madhota ma nga maha toneto.—w19.05, maphepha 9-10.

Hi nga ma txitxisa kutxani mahanyelo athu?

U nga sikota ngu kumaha tiya: Womba-womba ni Jehovha. Tixolisise upune. Alakanyisisa ngu va u hetako mbimo u di navo.—w19.06, diphepha 11.

Hi nga maha txani ti to hi ti lulamisela ku ta xaniswa?

Ti lava hi tsanisa lirando lathu ngu Jehovha. Hi tsaniseka ti to Jehovha wa hi randa ni ku kha na mbi thuka e hi leka. Hi Lera Bhiblia ditshiku ni ditshiku ni kumaha mkombelo mbimo yotshe. Hi tsaniseka ti to makatekwa a Mfumo wa Txizimu ma na ta. Hi vekisa ha msungo mibhalo yi hi yi dhundako ni tindando to dhumisa.—w19.07, maphepha 2-4.

Hi nga mahisa kutxani kasi ku hi vhuna maxaka athu ti to me huluka?

Nda lisima kukombisa kukhatala, kuveka txikombiso txa txinene, kutimisela ni kuva ni wunene.—w19.08, maphepha 15-17.

Hi humula ngu nzila yihi nga ti Jesu a nga thembisa ka Matewu 11:28?

Hi ni vawoneleli va vanene, vangana vavanene ni mthumo wo tsakisa ka yotshe.—w19.09, diphepha 23.

Jehovha a nga hi ningisa kutxani kuxuva kuthuma? (Vaf. 2:13)

Mbimo yi hi lerako Dipswi da Txizimu ni ku alakanyisisa, txona txi nga hi ninga mtamo, kunavela kumaha kudhunda ka txona ni mtamo. Txi hi ninga moya wo sawuleka ti to hi tshukwatisa wusikoti awu hi ku nawo.—w19.10, diphepha 21.

Hi nga mahisa kutxani sisungo sa sinene?

Ku ni mtxhanu wa tinzila: Kukombela wutxhari ka Jehovha. Kumaha wuxolisisi. Kuxolisisa txivangelo. Kuva ni makungo o kongoma. Kutumela txiemo txathu.—w19.11, maphepha 27-29.

Ina mbimo yi Sathani a nga gela Evha ti to kha na mbi fa ngako a txi dya m’hando wa mndonga wo ziva ta tinene ni to biha, a ti la kuwomba to moya kha wu fi?

Ti nga maha a si wombi tona. Sathani a gete Evha to a si na kufa, kha womba to ngako Evha a txi dya m’hando wu va nga tsimbiswa, a ndi na nga a to fa kambe didhawa dimwani di txi hanya. Wukhongeli wotshe wa makuhu wu lovisilwe ngu mbimo ya Ndambi ya masiku a Nowa. Ngu toneto, gondo ya ti to moya kha wu fi, ti nga maha yi ti khatile msana ko va Ndambi yi di pindile. Mbimo yi Txizimu txi nga vhinganyisa tidimi khe Bhabheli.—w19.12, diphepha 15.