1. Ngu kutxani Jesu a ti pimanisile valondeteli vakwe ni tinvuta?

JESU a pimanisile wuxaka wu a ku nawo ni valondeteli vakwe ni wuxaka awu wu kuho ka m’dyisi ni tinvuta. (Joh. 10:14) A ti ya ta pfisiseka, tinvuta ta mziva m’dyisi wa tona ni ku ta engisa dipswi dakwe. Muendi mmwani a ti woni to a ti ya ditshuri. Ene a womba tiya: “Hi ti lava kufilimara tinvuta to kari, se hi zamile ku ti dhana kasi ku ti tshuketa hafuhi. Kambe tona kha ta hi londisa nguko ti si ma zivi mapswi athu. Se ku to hoka txifanyana txa m’dyisi wa tona, mbimo yi a nga ti dhana tona ti to khata ku mlondisa.”

2-3. (a) Valondiseli va Jesu va nga kombisisa ku txani ti to va engisa dipswi dakwe? (b) Hi na bhula ngu txani ka yiya ni ayi yi londiselako?

² A ti ti nga hanywa ngu muendi wule ti hi khumbutisa mapswi aya Jesu a nga ma womba mayelano ni tinvuta takwe i ku vagondiswa vakwe. Ene a wombile tiya: ‘Ti na engisa dipswi dangu.’ (Joh. 10:16) Kambe Jesu a nzumani. Ti kotekisa kutxani ku hi engisa dipswi dakwe? Nzila ya lisima yo kombisa ti to ha engisa dipswi da m’dyisi wathu, ngu thumisa tigondo takwe ka wutomi wathu.—Mat. 7:24, 25.

³ Ka gondo yiya ni ayi yi londiselako hi na bhula ngu tigondo to kari ta Jesu. Nga ha hi no tiwona ngu kona ku ni ti Jesu a hi gondisako to kha ha fanela kumaha ni timwani a ti a hi gondisako to hi fanete kumaha. Hi na khata ngu kubhula ngu timhaka timbidi a ti Jesu, kota m’dyisi wamnene a hi gelako to hi fanete kuleka ku ti maha.

4. Ngu kuya ngu dibhuku da Luka 12:29, nji txani txi nga hi mahako hi ‘kanakana’ mwendo ku hi vilela?

⁴ Lera Luka 12:29. Jesu a kuzetile valondeteli vakwe ti to va si ‘kanakani’ mwendo kuvilela ngu ta silaveko sa nyama sa ditshiku ni ditshiku. Athu ha tiziva ti to sialakanyiso sa Jesu nza wutxhari ni ku mbimo yotshe nzinene. Se hi lava ku si thumisa, hambiketo mbimo yimwani ti nga karata kumaha toneto. Ngu kutxani?

5. Ngu kutxani vamwani va txi vilela ngu silaveko sa nyama sa ditshiku ni ditshiku?

 ⁵ Vamwani va nga karateka ngu ti to va na dya txani, va na ambala txani mwendo ku va na zumba hayi ni timwani. Ti nga maha va txi hanya ka matiko ya ku ku ni wusiwana ngutu. Ti nga va karatela kumana male ayi yi lavekako kasi kukhatalela mwaya wawe. Ti nga maheka kambe msungo wa mwaya wu di luzile, se mwaya wu sala wu si nga ni wo wu xayisa. Mtungo wa COVID-19 ni wona ti nga maha wu di mahile ti to vamwani ve luzekelwa ngu mithumo mwendo timwani to ti hanyisa ngu tona. (Ekl. 9:11) Ngako u di humeletwe ngu timweto to fana ni tiya, mwendo sikarato simwani, u nga mahisa kutxani ti to u londisa mkongomiso wa Jesu wa ti to u si vileli?

6. Txhamusela a ti ti nga mahekela Mpostoli Pedro.

⁶ Ditshiku dimwani Mpostoli Pedro ni vapostoli vamwani va ti mu ngalavani khe ka linene la Galileya, ku txi peka moya wa hombe ngutu se ve wona Jesu a txi tsimbila txitimwi ka mati. Pedro a to womba tiya: “I di awe, Mkoma, ni dhane ni txi ta kwako ngu txitimwi ka mati.” Se Jesu a to m’ramba a txi khene “ngono,” Pedro a to huma mu ka dibhoti e “tsimbila txitimwi ka mati a txi ya ka Jesu.” Kambe wona ti ti nga gwita ti maheka. “Txikhati txi a nga pfa diphuho kuvhukuka, a to telwa  ngu dizowa, e khata kubhwabhwamela, e peka huwa, a txi khene: ‘Mkoma, ni huluse!’” Jesu a to gwimba diwoko dakwe e mu ndinda. Mbimo yi Pedro a nga ti wonetela Jesu, a ti koti kutsimbila txitimwi ka mati. Kambe mbimo a nga khata kuwonetela kupeka ka mavimbi a to thava ngutu e khata kukanakana se e bheka.—Mat. 14:24-31.

7. Hi nga gonda txani ka txikombiso txa Mpostoli Pedro?

⁷ Hi nga gonda ka txikombiso txa Mpostoli Pedro. Mbimo yi Mpostoli Pedro a nga huma mu ka dibhoti e khata kutsimbila mmatini, ene a sa rinzela ti to a nga thuka e tsulupetwa e khata kubhwabhwamela. Ene a ti lava ku simama e tsimbila txitimwi ka mati kala kuza e manana ni Jesu. Kambe ene a tandekile kuwonetela Jesu. Athu kha ti lavi hi va ni likholo kasi kutsimbila txitimwi ka mati, kambe ha manana ni sikarato asi si no duka likholo lathu. Kambe ngako u hi txi leka kuveka mapimo ka Jehovha ni ka sithembiso sakwe hi na khata kubhwabhwamela ngu didhawa da moya. Ti si nga ni mhaka ni ti to sikarato si hi no manana naso nza hombe kuhokela hayi, hi fanete hi simama hi veka mapimo ka Jehovha ni ti to ene a nga sikota ku hi vhuna. Hi nga ti mahisa kutxani toneto?

8. Nji txani txi no hi vhuna ti to hi si karateki ni kuvilela ngu silaveko sathu sa ditshiku ni ditshiku?

⁸ Hi nga wuyelwa ngako hi txi va ni themba i si nga kukanakana. Khumbula ti to Jehovha Tate wathu wa lirando wa hi tsanisekisa ti to a na khatalela silaveko sathu sa nyama sa ditshiku ni ditshiku ngako hi txi thangetisa silaveko sathu sa moya. (Mat. 6:32, 33) Ene a ziwa ngu kuhetisisa sithembiso sakwe. (Dhewut. 8:4, 15, 16; Mas. 37:25) Jehovha wa khatalela sinyana ni mafilori, eto ti hi gondisa ti to ene a na khatalela silaveko sathu. (Mat. 6:26-30; Vaf. 4:6, 7) I ku ti to, a na hi ninga sa kudya ni so ambala. Kufana ni vaveleki ava va khatalelako vanana vawe ngu kona ha ka lirando li va ku nalo ngu vona, lirando li Jehovha a ku nalo ngu ngathu li mu susumetela ku e khatalela silaveko sa vathu vakwe. Tsaniseka ti to Jehovha a na hi khatalela!

9. Hi gonda txani ka experiyensia ya mpatwa wuwa?

⁹ Wona experiyensia yi kombisako nzila yi Jehovha a khatalelako ngu yona silaveko sathu sa nyama. Mpatwa wumwani wu ku ka mthumo wo sawuleka wa mbimo yotshe, wu tekile mmovha wa wona kasi ku wu ya teka vanathu vo kari ava va zumbako ka wukhalo wu kukhalako vathu ava va nga tutuma yimbi ka ditiko dawe kasi ku veta mitshanganoni. Mwamna wa kona a womba tiya: “Msana ka mitshangano hi rambile vanathu vale ti to hi ta dya navo mndiwo, kambe hi txi ngadi hi txi tsula hi tumbute ti to hi si nga ni sakudya.” Se kumahekile txani? Ene a tshumela a womba tiya: “Mbimo yi hi nga hoka mtini hi ti ya mana maplastiko mambidi a sakudya si nga ti vekilwe hatxikeni. Kha hi ti zivi to mba mani va nga ta veka sakudya sileya, Jehovha ngene a nga hi khatalela.” Ku di pindile masiku nyana o kari mmovha wawe wu gohekile. Vona va txi wu thumisa mmovha wule kasi ku ve txhumayela ngu wona. Kambe va si nga ni male yo wu lungisa. Mbimo yi mmovha wu nga ti ka ofisina yo kari kasi ku wu lungiswa, ku humelete dijaha dimwani di wotisa tiya: “Mbwa mani mmovha wuwa?” Mwanathu a to womba ti to i ti wakwe ni ku wu txi la ku lungiswa. Se dijaha dile di to womba tiya: “Kha ku na txikarato msikati wangu wa wu lava mmovha wo nga tiya, wa kori yo nga tontiya, se u nga ni xavisela ngu male muni?” Se mwanathu wule ni dijaha dile va to xaviselana mmovha. Mwanathu wule a mani male ayi yi nga txi laveka kasi kuxava mmovha wumwani. Ene a womba tiya: “Ni tsakile ngutu ta tinene ditshiku dile, atiya hi nga ti do maheka basi, kambe i Jehovha a nga maha ti to ti humelela.”

10. Dibhuku da Masalmo 37:5 di hi kuzeta ku hi maha txani?

 ¹⁰ Ngako hi txi engisa m’dyisi wathu wamnene ni kwa mbi vilela ngu silaveko sa ditshiku ni ditshiku hi nga tsaniseka ti to Jehovha a na hi khatalela. (Lera Masalmo 37:5; 1 Pedro 5:7) Khumbula ti ti nga wombwa ka  paragrafu 5. Ti nga maha Jehovha a di hi vhunile ka silaveko sa ditshiku ni ditshiku ngu kuthumisa msungo wa mwaya mwendo patrao wathu awu a nga txi hi holela. Ngako msungo wa mwaya se wu si thumi Jehovha a na simama e hi vhuna ngu tinzila timwani. Konkuwa he wone timwani a ti m’dyisi wathu wamnene a hi kuzetako ku hi leka ku ti maha.

11. Ngu kuya ngu dibhuku da Matewu 7:1, 2 ngu tihi ti Jesu a nga womba to hi leka ku ti maha? Ngu kutxani atiya i ti txikarato kwathu?

¹¹ Lera Matewu 7:1, 2. Jesu a txi ti ziva ti to vathu vo mbi hetiseka va ni txikarato txo sola-sola vamwani. Ngu mhaka ya toneto ene a wombile tiya, “mi nga lamuleni.” Ti nga maha hi txi maha mizamo yotshe yi hi yi kotako kasi ku hi si lamuli vamwani. Hambiketo, nga ha hi tizivako ngu kona, kha yi ngaho thonvu yo mbi na mafina, se ngako u txi tiwona nga mbimo yimwani wa khala-khala ngu simaho sa vamwani u fanete kumaha txani? Engisa Jesu, u maha totshe ti u nga ti kotako kasi ku u leka kulamula.

12-13. Hi gonda txani ka nzila yi Jehovha a nga ñola ngu yona Dhavhidha?

¹² Ngako hi txi alakanyisisa ngu txikombiso txa Jehovha hi nga wuyelwa ngutu. Ene a lavetela ti i ku ta tinene ka m’thu. Hi ti wona tiya ka nzila yi a nga divalela ngu yona mkoma Dhavhidha awu a nga mahetela sigoho sa hombe. Ngu txikombiso, ene a mahile wugango ni Bhatesebha e tshumela e maha ti to mwamna wakwe e dawa. (2 Sam. 11:2-4, 14, 15, 24) Ngu mhaka yeto, Dhavhidha a tisile xanisa ya hombe ka mwaya wakwe kupata ni vasikati vakwe. (2 Sam. 12:10, 11) Dikhambi dimwani Dhavhidha a kombisile kwa mbi engisa Jehovha mbimo yi a nga rumisa ti to kumahwa bhalela ya masotxhwa a ditiko da Israyeli. Ti nga maha ene a di mahile eto ngu konaha ka kutigela ni kuthemba ngutu dibutho dakwe da yimbi. Yi vile yihi wuyelo ya kona? Kona mu ka 70.000 wa Vaisrayeli va datwe ngu mtungo!—2 Sam. 24:1-4, 10-15.

¹³ I di ti to awe u ti hanya ka timbimo ta Israyeli, u ndi na mu wonisa kutxani Dhavhidha? Ina awe u ndi na m’lamula kota m’thu wu a si fanelwiko ngu wuxinji wa Jehovha? Jehovha kha mu wona ngu nzila eyo, ene a vekile mapimo ka kuthembeka kwakwe ni to ene a di ti sote. Ngu toneto Jehovha a mu divalete Dhavhidha ka sionho sakwe sa hombe. Jehovha a txi ti ziva to Dhavhidha a txi mu randa ngutu ni ku a ti lava kumaha ti i ku tatinene. Ha bonga ngutu a ku Jehovha a si mahi nyalamuli, kambe a lavetela a ti i ku ta tinene kwathu.—1 Vafu. 9:4; 1 Mak. 29:10, 17.

14. Ngu tihi ati ti vhunako Makristu ti to ma si lamuli vamwani? Ningela txikombiso?

¹⁴ A ku Jehovha a si zumbeliko kuwonetela tiphazamo tathu ni kwa mbi hi lamula nyalamuli, nanathu hi lava kumaha ati ti fanako. Kha hi lavi kuzumbela kuwona tiphazamo ta vanathu, kambe he zameni kuwona a ti i ku ta tinene kwawe. Ta hehuka ngutu kuwonetela tiphazamo ta vanathu ni kutshumela hi va sola-sola. Kambe m’thu wu a nga vitwa ngu didhawa da moya hambi a txi wona tiphazamo ka vanathu, ene a na va wona i di vathu va vanene, ni ku a na thumisana kwati navo. Atiya hi nga ti fananisa ni dirigwi da dhayimana a di di sise wilelwa di tshuriselwa. M’thu wu a ku ni wuzivi, kha na kugwitela ko wona wurigwi wule wa dona basi ngu hahanze, kambe ene wa tiziva ti to msana ko vanzelwa di politxhelwa mndani mule ku ni thomba. Kufana ni Jehovha ni Jesu,  nanathu kha hi lavi kugwitela ko wona ta hahanze dwe kambe hi lava kuwona tifanelo tatinene ka m’thu.

15. Kualakanyisisa ngu ti vanathu va mananako nato ti nga hi vhunisa kutxani ti to hi si va lamuli?

¹⁵ Nji txani tximwani txi nga hi vhunako ti to hi si lamuli vamwani? Zama kualakanyisisa ngu ti va mananako nato ka wutomi wawe. Wona txikombiso txiya. Ditshiku dimwani Jesu a di ha dithepeleni a woni noni ya txisiwana ayi yi nga maha miningelo ngu simaleana sa sidotho. Ene kha wotisa tiya: “Ngu kutxani ene a di ningete ngu male ya yidotho ngutu?” Hahanze ko veka mapimo ka mtengo wa male ayi noni yile yi nga ningela, Jesu a alakanyisisile ngu ti ti nga maha ti to e ningela male yile ya yidotho ni timwani a ti a mananako nato ka wutomi wakwe. Se a to mu ndunduzela ngu ti a nga ti kota kumaha.—Luka 21:1-4.

16. Hi gonda txani ka a ti Veronica a nga ti womba?

¹⁶ He wone txikombiso txa mwanathu Veronica atxi txi no hi vhuna kuwona lisima la kuxolisisa a ti vanathu va mananako nato. Dibanzani kwakwe ku ni mwanathu wa txisikati awu a zumbako kumweko ni mwanana wakwe wa mfana, kambe a singako ni mwamna wakwe. Veronica a womba tiya: “Ni txi ti wona nga vanathu vale va si pateki ngutu ka mithumo ya dibanzani. Se ni txi va wona ngu da japisa. Kambe ni humile thembwe ni mwanathu wule wa txisikati, ene a ni txhamusete sikarato asi a mananako naso ngu kona ha ka mwanana wakwe a wu a lwalako ngu  malwati a nyokani. Ene a maha totshe ti a ti kotako kasi kukhatalela mwanana wakwe ngu didhawa da nyama ni ngu didhawa da moya. Mbimo yimwani ngu konaha ka txikarato txa dihanyo da mfana wakwe ta sunga ku e xalela mitshangano ka dibanza dimwani.” Veronica a gwita a txi womba tiya: “Phela ni si ti zivi ti to ene a ti ni txikarato txa hombe txo nga tiya. Konkuwa na m’bonga ngutu ni ku na ninga lisima totshe ti a ti mahako kasi ku simama e thumela Jehovha.”

17. Dibhuku da Jakobe 2:8 di hi gela ti to hi maha txani, hi nga ti mahisa kutxani toneto?

¹⁷ Hi fanete kumaha txani ngako hi txi tumbula ti to hi lamute mwanathu wo kari? Tinene kukhumbula ti to athu hi fanete kuranda vanathu. (Lera Jakobe 2:8.) Ni ku hi fanete kumaha mkombelo ka Jehovha hi kombela ti to e hi vhuna hi leka kulamula vamwani. Msana keto hi fanete hi maha a ti hi nga ti kombela ka Jehovha, ni kuteka dizambo do va ni mabhulo kasi ku hi mziva kwati mwanathu wule hi mu sola-solako. Hi nga mkombela ti to hi huma nayo thembwe mwendo ku mu ramba ku hi ta susula hotshe. Mbimo yi hi yako hi txi mziva mwanathu eneyo hi na va hi txi londisa txikombiso txa Jehovha ni txa Jesu, i ku kuwona ta tinene kwakwe. Ngu nzila yoneyo hi na va hi txi engisa txirumo txa m’dyisi wamnene txa ti to hi leka ku lamula vamwani.

18. Hi nga ti kombisisa kutxani ti to ha engisa dipswi da m’dyisi wamnene?

¹⁸ Nga ha nvuta ya ditshuri yi engisako m’dyisi wa yona, valondeteli va Jesu ni vona va engisa dipswi dakwe. Ngako hi txi maha totshe ti hi nga ti kotako kasi ku hi si karateki ngu silaveko sa ditshiku ni ditshiku ni kuleka ku lamula vamwani, Jehovha ni Jesu va na hi katekisa. Ti si nga ni mhaka ni to hi lumba “mtxhambi wa wudotho” mwendo “timwani tinvuta”, hi fanete kusimama hi engisa dipswi da m’dyisi wamnene. (Luka 12:32; Joh. 10:11, 14, 16) Ka gondo ayi yi londiselako hi na ta bhula ngu timhaka timbidi a ti Jesu a nga gela valondiseli vakwe ti to ve ti maha.