Jesu a gondile tifanelo ati ti nga mvhuna ti to e ti kota kuva mthumi kulothi wamnene mbimo yi a nga thumisana ni vathu hamafuni. Hi nga wuyeliswa kutxani ngu txikombiso txa Jesu? Ngako hi txi xolisisa khakwati txikombiso txakwe hi nga tumbula matshina mararu a milayo, a ya ma nga hi vhunako ti to hi va vathumi kulothi va vanene. Matshina oneyo ma na hi vhuna ti to hi sakulela wumoya wa wumwewo ni kuthumisana.

Mthumi kulothi wamnene wa ninga lisima vathumi kulowe ni ku kha lweli ku tigela. Jesu a gondile ku tiveka hahatshi ka Tate wakwe. Hambi ku Jehovha i ku ene basi a fanelwako kudhanwa ku Mvangi, ene kha leka kuwomba mthumo wu Jesu nene a nga wu maha kota mthumi kulowe. A tiya hi ti wona ka mapswi ya Jehovha a nga ma womba o khene: “A hi vangeni m’thu ngu txifananiso txathu.” (Gen. 1:26) Jesu a tsakile ngutu ngu nzila yi Jehovha a nga ti veka ngu yona hahatshi.—Mas. 18:35.

Mbimo yi a nga ti hamafuni, Jesu a kombisile ku ti veka hahatshi. Mbimo yi a nga dhumiswa ngu totshelele a nga ti tikota ku ti maha, ene a ningete wudhumo ka wu a fanelwako ngu wona i ku Jehovha. (Marku 10:17, 18; Joh. 7:15, 16) Jesu a thumisanile ngu kudikha ni vagondiswa vakwe, ni ku hahanze ko va teka kota sithumi a txi va konta kota vangana. (Joh. 15:15) Ene a vekile ni ku va sambisa mikondo kasi ku va gondisa ku ti veka  hahatshi. (Joh. 13:5, 12-14) Nanathu hi fanete ku ninga lisima vathumi kulothi, i si nga ku thangetisa tathu. Ngako hi txi kombisa ‘txithavo ka mmwani ni mmwani’ hi si lweli ku lava kudhumiswa hi na sikota kuhokelela ta tingi.—Var. 12:10.

M’thu wo tiveka hahatshi wa ti ziva ti to “mithumo yi tsaniswa ngu madhota a mangi.” (Mav. 15:22) Ti si nga ni mhaka ni experiyensia mwendo wusikoti wathu, hi fanete kukhumbula ti to kha ku nga ni m’thu wu a zivako totshe hamafuni. Hambi Jesu a txi vekisa ti to hi nga totshe a nga txi ti ziva. (Mat. 24:36) Ngu toneto, ene a ti lava kuziva mawonelo a vagondiswa vakwe hambi ku va nga sa hetiseka. (Mat. 16:13-16) Se vagondiswa vakwe va txi tipfa va di txhusekile kuzumba hafuhi ni nene. Ngu ha fanako ngako hi txi khumbula to nanathu ku ni mu hi tandekako kona ngu kutumelela mawonelo a vamwani hi na va ni kudikha ni vamwani ni ku hi na humelela ka mithumo yathu.

Ti ni lisima ngutu ku madhota me etetela txikombiso txa Jesu ka mhaka yiya mbimo yi ma thumisanako. Ona ma fanete me khumbula ti to moya wo sawuleka wu nga thuma ka didhota dimwani ni dimwani. Ona ma fanete kumaha ti to ka mitshangano yawe mmwani ni mmwani e tipfa a di txhusekile kuningela mawonelo akwe, ma txi maha toneto ona ma na maha sisungo asi si no vhuna dibanza.

Mthumi kulothi wamnene wa kombisa wunene a txi thumisana ni vamwani. Ene wa kuluveta kupfisisa. Jesu a vile ni mikhanjo ya yinene yo wona nzila yi Tate wakwe a kombisako ngu yona wumbilu. Ngu txikombiso, Jehovha a mu rumete ti to e ta khulula vathu ka lifo hambi ku va nga txi fanelwa ngu lona.—Joh. 3:16.

Jesu a si ti karatiseli, ene a vhunile mmweyo wamsikati wa Mufenekiya hambi ku ene a nga ti ko rumelwa dwe ka nyumba ya ka Israyeli. Ene a kombisile wunene ka vagondiswa vakwe ngu ku va komba tinzila ti to ve maha a ti va nga ti si na kusikota. (Mat. 15:22-28) Pedro a mu lambile hakubasani, hambiketo Jesu adi ti emisete ku mdivalela. Ngu kutsimbila ka mbimo, Jesu a kombisile wunene ka Pedro ngu ku mu ninga wutixamuleli wa hombe. (Luka 22:32; Joh. 21:17; Mith. 2:14; 8:14-17; 10:44, 45) Txikombiso txa Jesu txi ti veka hakubasani ti to hi fanete ku ‘wunene wathu wu ziwa ngu votshe vathu’ ngu kwambi ti karatisela.—Vaf. 4:5.

 Ngako hi txi ziva kudinganisela hi na si kota kutsimbitisana ni siemo kasi kuthuma ngu kudikha ni vathu va tixaka totshe. Jesu a txi thumisana kwati ni votshe vathu ha ko za valala vakwe ve mu lumbeta ku khona i ti “mngana wa vakhupisi ni vaonhi” i ku va va nga txi engisa a ti a nga txi gondisa. (Mat. 11:19) Ina hi nga sikota kuetetela txikombiso txa Jesu? Wona txikombiso txa mwanathu wu a dhanwako ku i Louis, awu a nga heta malembe o tala a txi thuma ka wuwoneleli wa txigava ni kuthuma khe Bhetele ni vathu vo hambana-hambana. Ene a womba tiya: “Ni zama kufananisa vathu va ni thumako navo ni diseta adi di akwako ngu marigwi o hambana-hambana. Ngako u txi ma veketela kwati marigwi oneyo ti nga koteka ku u aka diseta do thwim. Se nanani ni zama kumaha kutxitxa kasi ku ni vhuneta ko maha to diseta di va di di nga thwim i si nga do gombonyoka.” Hi nga wona txikombiso a txiya txa txinene!

Hi nga mana mikhanjo yo tala yo kombisa wunene dibanzani kwathu. Hi nga maha toneto ngu ku huma thembwe ni vanathu va mtxawa wathu. Hi nga thuma ni vahuweleli ava va ku ni wutixamuleli wo hambana ni wathu mwendo va kuva ni titanga to hambana ni tathu. Hi nga maha mizamo yo lava kudinganisela kasi ku hi ti kweleketa ni vamwani ka nzila a yi va txhumayelako ngu yona, kasi ku ni vona ve mana litsako ka mthumo wo txhumayela.

Mthumi kulothi wamnene wa “ziva kuabana ni vamwani.” (1 Tim. 6:18) Mbimo yi Jesu a nga ti thumisana kumweko ni Tate wakwe, ene a ti woni to Jehovha kha sisa-sisa to maha. Mbimo yi Jehovha a nga “gwimba nzuma” Jesu ‘a ti tiho’ se a gondile to tala kwakwe. (Mav. 8:27) Ngu msana, Jesu a gondisile vagondiswa vakwe “totshe ti a nga ti engisa ka Tate wakwe.” (Joh. 15:15) Hi txi wona nzila yi Jehovha a nga thumisana ngu yona ni Jesu ti maha ti to nanathu hi lava kuva va va nga tiemisela kuabana ni vamwani wuzivi ni experiyensia yathu ni vathumi kulothi. Se mthumi kulothi wamnene kha kombisi ku va ni likungo ngu kwa mbi abana ni vamwani wuzivi ngu kulwela ku lava kuthangela. Hahanze keto, ene a na abana ni vamwani a ti a nga ti gonda.

Hi nga tshumela hi abana ni vamwani mapswi o va tsanisa. Ta tsakisa ngutu ngako mwanathu a txi tiha mbimo yo ta bonga ti txi huma mbiluni ngu mizamo a yi hi yi mahako. Jesu a ti hile mbimo yo ndunduzela vathumi kulowe ngu ta tinene a ti va nga ti timaha. (Fananisa ni Matewu 25:19-23; Luka 10:17-20.) Ene a tshumete eva gela ti to vona “va na maha mithumo ya hombe yo pinda” yakwe. (Joh. 14:12) Ka wusiku wakwe wo gwita hamafuni Jesu a ndunduzete vagondiswa vakwe ngu kuva gela tiya: “Anu mi vathu va va nga timisela kumweko ni nani ka sotshe siduko sangu.” (Luka 22:28) Ti ha kubasani ti to vagondiswa vakwe va tsakile ngutu ngu mapswi yawa ni ku ti va mahile ve ti emisela kumaha mthumo. Nanathu ngako hi txi tiha mbimo yo ndunduzela vathumi kulothi, ngu ditshuri va na tsaka ni ku va na wuyelwa ngutu.

Mwanathu mmwani a dhanwako ku i Kayode a womba tiya: “Mthumi kulothi wamnene kha ti lavi e va wo hetiseka, kambe ene a thuma ngu litsako ni ku maha ti to mthumo wu hehuka ka vale a thumako navo.” Ina awe u mthumi kulothi wamnene? Ti ngo txani u wotisa mawonelo ka vanathu ava u thumako navo kasi u va gela ti to va ti pfisa ku txani ku thuma ni nawe. Ngako va txi womba to va tsaka kuthuma ni nawe nga ha vapostoli va Jesu va nga tipfa ngu kona va txi thuma ni Jesu u na womba u di tsani ku fana ni Mpostoli Paulo a wu a nga khene: “Aniko ho lava ku vhunetela litsako lanu.”—2 Vak. 1:24.