1-2. Ngu kutxani mbimo yimwani hi nga humako mirongo?

 HOTSHETHU hi khala kuhuma mirongo. Mbimo yimwani hi nga huma mirongo ngu kuva ku di humelete to kari to tsakisa to fana ni kuvelekwa ka mwanana, kukhumbula to kari to tsakisa mwendo kutshangana ni mngana wu i ku kale hi di m’woni.

² Kambe timbimo to tala hi dila ngaku hi di pandisekile. Ngu txikombiso, hi nga dila ngaku m’thu mmwani a di hi henyisile mwendo hi txi lwala kumbe kulwalelwa mwendo kuluzekelwa ngu wu u m’dhundako. Ka timbimo toneto hi nga tipfa kufana ni mprofeti Jeremiya mbimo yi Jerusalema a nga dhumelwa ngu Vabhabhilona. Jeremiya ati khene: “Maso angu ma theketa mirongo ku txi nga mnambo . . . Mirongo yangu yi na thekela wusiku ni mitshikari yi si emi.”—Sid. 3:48, 49.

3. Jehovha a ti pfisa kutxani ngako a txi wona malanda akwe ma txi xaniseka? (Isaya 63:9)

³ Jehovha wa hi wona ngako hi txi dila hi txi wonisana ni siemo so karata. Bhiblia yi hi tsanisekisa ti to Jehovha wa ku wona kupandiseka aku malanda akwe ma wonisanako nako, ni txidilo txawe txo kombela ku vhunwa. (Mas. 34:15) Kambe ene kha njo kuwona dwe. Kufana ni mveleki wu aku ni lirando, ene wa karateka ngutu ngako a txi wona vanana vakwe va txi dila ni ku a tiemisete ku va vhuna.—Lera Isaya 63:9.

4. Sikombiso sa mu ka Bhiblia si hi gondisa txani mayelano ni Jehovha?

 ⁴ Ka Bhiblia Jehovha a kombisa nzila yi a nga xamula ngu yona kudila ka malanda akwe. Hi nga wona toneto ngako hi txi xolisisa txikombiso txa Ana, Dhavhidha ni Mkoma Ezekhiya. Ngu kutxani va di dite? Jehovha a xamulisile kutxani txidilo txawe txo lava kuvhunwa? Txikombiso txawe txi nga hi vhunisa kutxani ngako hi di ko dila?

KUDILA NGU MHAKA YO PANDISEKA

5. Ana a ti pfisile kutxani ngu txiemo txi a nga ti ka txona?

⁵ Ana a manani ni siemo so tala asi si nga ti mmaha e zumba a di pandisekile. Simwani sa kona, nguku mwamna wakwe a nga ti ni msikati mmwani i ku Penina. Ene a txi mu dhelela ngutu nguko Ana a si veleki kuve ene ati ni vanana vo tala. (1 Sam. 1:1, 2) Penina a txi zumbela ku mu dyisa khayi-khayi ngu mhaka ya ku a nga ti singa ni vanana. I di kova awe u ku ka txiemo txiya u di na maha txani? Ana a txi zumba a di pandisekile ‘a txi dila, a si dyi txilo’ ni ku phela a txo “dila ngutu.”—1 Sam. 1:6, 7, 10.

6. Nji txani txi Ana a nga maha kasi kumana thavelelo?

⁶ Ana a yi mani hayi thavelelo ya txiemo txakwe? Tximwetxo txa ti ti nga m’vhuna ngu kuva a di yite ditendani amu ku nga ti mahelwa kona wukhozeli wa ditshuri. Ti nga maha mbimo yi a nga hoka ati ya ema hafuhi ni txike txa ditenda. Se ene “a to maha mkombelo ka MKOMA na a txi dila ngutu.” Ene a to kombela Jehovha a txi khene: ‘Ngako ngu ditshuri u txi wona kuxaniseka ka txithumi txako, ni alakanye.’ (1 Sam. 1:10b, 11) Ana a phofulete Jehovha ta mbiluni kwakwe ngu mkombelo. Hi nga alakanya ngu nzila yi Jehovha a nga tipfa ngu yona a txi wona mwanana wakwe a txi dila a txi kombela kuvhunwa!

7. Ana a tipfisile kutxani msana kova a di gete Jehovha totshe ta mbiluni kwakwe?

⁷ Ana a gete Jehovha totshe ati ti nga txi mpanda ni ku Eli atxi mu engisela. Msana keto a tipfisile kutxani? Bhiblia yi womba tiya: “Wamsikati a to teka nzila yakwe e tsula, eya dya, aniko khohe yakwe yi si ngadi kambe yi xukuvala.” (1 Sam. 1:17, 18) Hambiku a ti ti nga ti mmaha Ana e pandiseka ti nga ti sa guma, ene a pepile. Ene a txi tsaniseka ti to Jehovha wa kuwona kupandiseka kwakwe ni ku a na m’vhuna. Ni ku Jehovha a mkatekisile ngu kumaha ti to ti koteka ku eva ni txirumbo.—1 Sam. 1:19, 20; 2:21.

8-9. Ngu kuya ngu Vahebheru 10:24, 25, ngu kutxani hi di fanete kuxalela mitshangano ya Wukristu? (Wona ni mfota.)

⁸ Hi gonda txani: Ina u tshangana ni siemo asi si ku mahako u zumba u di pandisekile? Ti nga maha u di fetwe ngu dixaka  mwendo mngana wa hombe. Timbimo toneto ti nga kumaha u lava kuzumba wekha. Kambe khumbula txikombiso txa Ana. Ene a tsute ditendani eya mana kuthavelelwa ni kutsaniswa, nawe u nga mana kuthavelelwa ngu kuya ka mitshangano ya Wukristu hambi u si tipfi kwati. (Lera Vahebheru 10:24, 25.) Ka mitshangano yathu u nga pfa tindimana ati ti ku thavelelako ka txiemo atxi u wonisanako natxo. Ngu kumaha toneto Jehovha a nga kuvhuna to u divala siemo soneso hambi i di ti to kha si se pinda.

⁹ Mitshanganoni hi mana vanathu ava va hi tsanisako ni ku hi komba lirando. (1 Vat. 5:11, 14) Wona txikombiso txa mwanathu awu i ku nyaphandule wo sawuleka awu a nga felwa ngu msikati wakwe. Ene a womba tiya: “Ani ni ngadi ni txi dila. Mbimo yimwani ni lava kuva nokha kasiku ni dila nguko na mxuva msikati wangu. Kambe ka mitshangano ngu kona ni manako kutsaniswa ngutu. Nguko na pfa tixamulo to tsanisa ta vanathu ni mapswi yo tsakisa aya va ni gelako. Ni di mitshanganoni kha ni karateki nem kha ni vileli.” Jehovha a nga thumisa vanathu kasiku e hi vhuna.

10. Hi nga txi etetelisa kutxani txikombiso txa Ana ngako hi di pandisekile?

¹⁰ Ana a tshumete e mana kuthavelelwa ngu kugela Jehovha totshe ti a nga ti tipfisa tona ngu mkombelo. Nawe u nga veka ‘kotshe kukarateka kwako ka Jehovha’ u txi tsaniseka ti to a na kuengisa. (1 Pedro 5:7) Mwanathu wa txisikati awu mwamna wakwe a nga dawa ngu makhamba a wombile tiya: “Ni karatekile ngutu aha ko ni si pimisi to ni nga tshumela ni mana litsako. Kambe ni mani kuthavelelwa ka Tate wangu wa lirando Jehovha. Mbimo yimwani ni si ma mani mapswi o txhamusela ati ni ti pfisako tona, kambe ene a txi ni pfisisa. Mbimo yi ni nga txi pandiseka ngutu ni kuvilela ani ni txi maha mkombelo ni kombela Jehovha ti to e ni ninga kurula. Se ngu mbimo yoneyo ni txi mana kurula aku ku nga ti ni vhuna ti to ni maha ati ni nga tilava kutimaha ditshiku donedo.” Mbimo yi u dilako u gela Jehovha ngu ti ti ku mahako u pandiseka, Jehovha nene wa pandiseka niku wa yi pfisisa nzila yi u tipfako ngu yona. Hambi i di to ati ti ku mahako u pandiseka kha ti gumi Jehovha a nga swilitela mbilu yako ni kutshumela e kuvhuna ti to u va ni kurula. (Mas. 94:19; Vaf. 4:6, 7) Niku ene a na hakela kutsanisela kwako.—Vaheb. 11:6.

KUPANDISEKA NGU KUXENGWA MWENDO KUKANGANYISWA

11. Dhavhidha a tipfisile kutxani mbimo yi a nga pfiswa kupanda ngu vamwani?

¹¹ Dhavhidha a wonisani ni sikarato so tala ka wutomi wakwe asi singa ti mmaha a zumba a txi dila. Ene a pfisilwe kupanda ngu vathu va a nga ti va themba. (1 Sam. 19:10, 11; 2 Sam. 15:10-14, 30) Aha koza a womba tiya: “Ni karate ngu kudila. Wusiku ni wusiku ni nakanisa m’bhedhu wangu ngu mirongo ni tata ngu mirongo, txikhigelo txangu.” Ngu kutxani Dhavhidha a di tipfisile tiya? Ene a txhamusela tiya: ‘Ngu mhaka ya votshe valala vangu.’ (Mas. 6:6, 7) Simaho so biha sa vathu vamwani si ti maha to Dhavhidha a zumba mbimo yotshe a txi dila.

12. Ngu kuya ngu dibhuku da Masalmo 56:8, ngu tihi ti Dhavhidha a nga ti tsaniseka ngu tona?

¹² Hambiku Dhavhidha a nga ti tshangana ni sikarato soneso, ene a txi tsaniseka ti to Jehovha wa m’dhunda. Ene ati khene: “Nguko MKOMA a engisile dipswi da kudila kwangu.”  (Mas. 6:8) Ka dikhambi dimwani ene a bhate mapswi aya ma manekako ka dibhuku da Masalmo 56:8. (Lera.) Mapswi onewo ma kombisa nzila yi Jehovha a khatalako ngu yona. Ene a tipfite nga Jehovha o sengeletela mirongo yakwe a mu ka txiya mwendo kubhala makhambi otshe ya a nga txi dila. Dhavhidha a txi tsaniseka ti to Jehovha wa kuwona ni ku wa khumbula kupanda ku a kupfako. Dhavhidha a txi tiziva ti to Tate wakwe wa nzumani kha ngo wona dwe kupanda ku a kupfako, kambe nene wa pandiseka.

13. Ngu tihi ti hi fanelako ku ti khumbula ngako vathu va txi hi xenga mwendo ku hi kanganyisa? (Wona ni mfota.)

¹³ Hi gonda txani: Ina u pfa kupandiseka ngu mhaka ya kuva u di xengilwe mwendo u di kanganyisilwe ngu m’thu wu u nga ti mthemba? Ti nga maha u txi pandiseka ngu kuva u di kanganyisilwe ngu m’thu wu u nga ti la kutxhadha nayo mwendo wu u nga txhadha nayo, mwendo mngana wako a di lekile kuthumela Jehovha. Mwanathu mmwani awu a nga lekwa ngu msikati wakwe eya ka vamwani a wombile tiya: “Ni ti jujekile msungo, ni ti pandisekile ngutu ni ku ni txi tipfa ni di txilotxotxo.” Ngako u txi wonisana ni txiemo txo fana ni txonetxo, tsaniseka ti to Jehovha kha na mbi thuka e ku leka. Mwanathu wule a wombile tiya: “Wungana wathu ni vathu wu nga guma, kambe wungana wathu ni Jehovha kha wu na mbi thuka wu di gumile. Ti singa ni mhaka ni ti ti nga humelelako, Ene ani nathu. Ene kha leki vathu va va mthembako.” (Mas. 37:28) U nga divale ti to Jehovha wa hi dhunda ngutu kupinda ti vathu va hi dhundisako tona. Hambi i di ti to u pfa kupandiseka ngu kuxengwa mwendo kukanganyiswa ngu vathu, Jehovha wa kukhatalela. (Var. 8:38, 39) Mhaka ngu yiya: Ti singa ni mhaka ni ti vathu va ku mahelako, Tate wako Jehovha wa kuranda.

14. Masalmo 34:18 a hi thembisa txani?

¹⁴ Ngako u txi wonisana ni kupandiseka ngu kuva u di xengilwe mwendo kukanganyiswa u nga thaveleleka ngu mapswi ya Dhavhidha aya ma ku ka Masalmo 34:18. (Lera.) Dibhuku dimwani di womba tiya: “Kupandiseka ka mbilu” kuwombwa “vathu vale va si nga ngadi ni themba.” Jehovha ava vhunisa kutxani avale va nga pandiseka mbilu? Kufana ni mveleki awu a ñoletako mwanana wakwe ngako a txi thava, Jehovha “a hafuhi” ni nathu ni ku a tiemisete ku hi vhuna ngako hi di pandisekile. Ene wa tilava kukondetela mbilu yathu ayi yi nga funyeka. Ni ku a tiemisete ku hi vhuna kasiku hi  tsanisela sikarato si hi wonanako naso.—Isaya 65:17.

KUPANDISEKA NGU KWA MBI NA THEMBA

15. Ngu kutxani Ezekhiya adi dite?

¹⁵ Mkoma Ezekhiya a di ni 39 wa malembe a khatile kulwala ngutu. Mprofeti Isaya a tsute eya m’gela mapswi a Jehovha a ti to a ndi na fa ngu mhaka ya malwati oneyo. (2 Vafu. 20:1) Ezekhiya a ti gumile themba ngu mhaka ya ti va nga mu gela. Ngu toneto, a dite ngutu e khizama e kombela ka Jehovha.—2 Vafu. 20:2, 3.

16. Jehovha a wu xamulisile kutxani mkombelo wa Ezekhiya?

¹⁶ Jehovha a m’pfete ngutu wusiwana Ezekhiya mbimo yi a nga txi dila, ngu toneto, a mthembisile a txi khene: “Ni engisile mkombelo wako, ni woni mirongo yako; sekoko ni na kukalamukisa.” Ngu kuthumisa mprofeti Isaya, Jehovha a thembisile Ezekhiya ti to a ndi na mu engetela wutomi ni ku mu hulukisa ka masotxhwa a Vasiriya.—2 Vafu. 20:4-6.

17. Jehovha ahi khatalelisa kutxani mbimo yi hi wonisanako ni sikarato sa malwati? (Masalmo 41:3) (Wona ni mfota.)

¹⁷ Hi gonda txani: Ina u wonisana ni malwati aya ma ti kombako ma si nga ni mrende? Gela Jehovha ngu mkombelo. Bhiblia yi hi tsanisekisa ti to “Tate wa wumbilu, Txizimu txa kotshe kuthavelela” a na hi thavelela ka sotshe sikarato sathu. (2 Vak. 1:3, 4) Nyamsi kha hi emeli ti to Jehovha e thavisa sotshe sikarato sathu kambe hi nga tsaniseka ti to a na hi khatalela. (Lera Masalmo 41:3.) Ngu kuthumisa moya wakwe wo sawuleka, Ene a nga hi ninga mtamo, wutxhari ni kurula kasiku hi wonisana ni sikarato sathu. (Mav. 18:14; Vaf. 4:13) Ene a tshumela e hi thavelela ngu ku hi ninga themba ya ti to mbimo yi yi tako otshe malwati ma na guma.—Isaya 33:24.

18. Ngu wuhi m’bhalo awu u nga wu mana awu wu kuthavelelako ka siemo so karata? (Wona dikwadru adi di ku “ Mapswi ya ma nga hi thavelelako ngaku hi txi dila.”)

¹⁸ Ezekhiya a tsanisilwe ngu mapswi ya a nga gelwa ngu Jehovha. Nathu hi nga tsaniswa ngu kugonda Bhiblia. Jehovha a veketile mapswi aya ma nga hi tsanisako ni ku hi thavelela ka siemo so karata. (Var. 15:4) Mwanathu mmwani wa txisikati wa África awu a nga tumbula to a ni malwati ya câncer, awu a nga ti zumbela kudila, a wombile tiya: “M’bhalo awu wu nga ni tsanisa ngutu Isaya 26:3. Hambiku Jehovha a no mbi hi thavisela sikarato sathu, ndimana yiya ya hi tsanisekisa ti to Jehovha a na hi vhuna ni ku hi ninga kurula kasiku hi tsanisela sikarato sathu.” Ina yi ho ndimana ayi awe u nga yi vekisa ayi yi ngaku tsanisako ngako u txi wonisana  ni siemo si wonekako nga kha ku nga ni themba?

19. Ngu tihi ti hi nga ti emelako ka mbimo yi yi tako?

¹⁹ Aku hi hanyako ka timbimo to gwita sikarato si na ya si engeteleka. Nga ha hi nga tiwona ngu kona ka txikombiso txa Ana, Dhavhidha ni Mkoma Ezekhiya, Jehovha wa kuwona kukarateka kwathu niku wa pandiseka. Ngu toneto, ngako hi txi wonisana ni siemo so karata hi lava kutulela mbilu yathu Jehovha ngu mkombelo. Hi nga thukeni hi ti hambanisa ni vanathu va dibanzani. Hi nga simama hi mana thavelelo ngu kugonda Bhiblia. Ni ku hi nga tsaniseka ti to ngako hi txi simama hi timisela, Jehovha a na hi hakela. Eto ti pata ni themba yo tsakisa ya mbimo yi yi tako ya ti to Jehovha a na ta bahulela yotshe mirongo tikhoheni kwathu. (Mtu. 21:4) Ngu toneto, hi na ta huma mirongo ya litsako dwe.