Ina u gondile kha kwati marevhista a Muwoneleli ya dilembe diya? I di toneto zama kuxamula siwotiso siya:

Ngu txihi txikombiso atxi Jehovha a hi ningako txa nzila yi hi fanelako kuñola ngu yona vavasikati?

Ene kha tekeli hahatshi vavasikati, ni ku kha ningi ngutu lisima vavamna kupinda vavasikati. Ene wa engisela kwati vavasikati ni kulava kuziva to va ti pfisa kutxani kumweko ni ti ti va karatako. Ni ku ene wa tsaniseka ti to va nga sikota kukhatalela txiavelo tximwani ni tximwani atxi va nga txi amukelako.—w24.01, paj. 15-16.

Hi nga yi londisisa kutxani ndimana ya Vaefesu 5:7 yi ku kha yona: “Mi nga pataneni navo”?

Mpostoli Paulo atxi hi alakanyisa ti to hi si ti pati ni vathu ava va hi kuzetako kwa mbi engisa Jehovha. Eto ti pata kuheta mbimo navo i si nga ngu kumanana navo kambe hambi ngu kumanana navo ka ma redes sociais.—w24.03, paj. 22-23.

Hi fanete ku ti wonela ka yahi matimu?

Kha ha fanela kuveka mapimo ka sitoriya asi si rumelwako ngu vanathu, vangana si sa khata ngu kuxolisiswa, mwendo ma email aya ma rumelwako ngu vathu ava hi si va ziviko ni vaapostata ava va ti mahako nga vo tsakela ditshuri.—w24.04, paj. 12.

Ngu thi ti hi ti zivako ni ti hi si ti ziviko mayelano ni nzila yi Jehovha a no lamula ngu yona mkoma Solomoni ni vathu ava va nga fa Sodhoma ni Gomora ni ka Ndambi ya Nowa?

Kha hi zivi ditshuri da ti to Jehovha a sungile ku va lovisa da magwito vathu vale. Kambe ati hi tsanisekako ta tona ngu ti to ene wa tiziva totshe ati ti patekako ni ku a ni wuxinji.—w24.05, paj. 3-4.

Ngu tihi ati hi nga tsanisekako ka tona ngu kuva Jehovha i di “Dirigwi”? (Dhewut. 32:4)

Hi nga lava wuthavelo ka Jehovha. Ene mbwo thembeka, mbimo yotshe wa hetisisa sithembiso sakwe. Ene kha txitxa txitxi, wuthu wakwe ni txikongomelo txakwe.—w24.06, paj. 26-28.

Nji txani txi nga hi vhunako kutolovela dibanza da diphya?

Tsaniseka ti to Jehovha a na kuvhuna kufana ni ku a nga vhuna malanda akwe ka mbimo ayi yi nga pinda. U nga fananisi dibanza dako da kale ni da diphya. Pateka ka mithumo ya dibanza da diphya ni kumaha vangana vavaphya.—w24.07, paj. 26-28.

Ngu tihi ti hi ti gondako ka sidinganiso siraru si manekako ka Matewu kapitulo 25?

Txidinganiso txa tinvuta ni txa tiphongo txi kombisa lisima lo va wo thembeka. Txidinganiso txa mavhirjem a mapimo ni ya siphukuphuku txi ti veka hakubasani ti to hi fanete kuzumba hi di lungile ni kuwonelela. Txidinganiso txa titalenta txi kombisa lisima lo thuma ngu kuhiseka ni kumaha ati hi nga ti kotako ka mthumo wathu.—w24.09, paj. 20-24.

I ti wuhi mpimo wa kudemba ka vharanda ya dithempele da Solomoni?

Ka 2 Makronika 3:4, tradhusawu yimwani yi womba ti to vharanda yi ti dembile konamu ka “120 wa mikono” mwendo ku yi ti ni 53 wa mametro a kudemba. Kambe ma tradhusawu o thembeka ma womba ti to i “20 wa mikono” mwendo 9 wa mametro ngu kudemba, ati ti ti kombako ti txi yelana kwati ni maseta a dithempele.—w24.10, paj. 31.

Ti womba txani ku dilanda da wuthumeli di va di di nga “teka msikati mmweyo dwe”? (1 Tim. 3:12)

Ti womba ku va a di txhadhile ni wamsikati wa mmweyo ni ku a si mahi wugango. Hahanze keto, ene kha fanela kunavela vamwani vavasikati.—w24.11, paj. 19.

Ngu kutxani hi txi womba ti to Johani 6:53 kha veki mlayo mayelano ni Txilalelo txa Mkoma?

Johani 6:53 a womba-womba ngu txilaveko txodya mmidi wa Jesu ni kusela mnoha wakwe. Jesu a wombile mapswi oneyo ngu dilembe da 32, a di Galileya atxi gela Vajudha ava va nga si se kuva ni likholo kwakwe. Kambe Txilalelo txa Mkoma txi mahekile khe Jerusalema se ku di pindile dilembe. Ahale, Jesu a wombawombile ni va a ndi no fuma navo nzumani.—w24.12, paj. 10-11.