1. Ngu tihi ti Jesu a nga gela vagondiswa vakwe mayelano ni magwito ni ku ngu txihi txialakanyiso txi a nga va ninga?

 MBIMO yi Jesu a nga ti hafuhi ni kufa, mune wa vagondiswa vakwe va m’wotisile tiya: “Hi gele mbimo yi ti no maheka ngu yona . . . ni txikombiso txa kuguma ka ditiko.” (Mat. 24:3) Ti nga maha vagondiswa vale va di ti wotisile ti to, va na yi zivisa kutxani mbimo yi Jerusalema ni dithepele si no loviswa ngu yona. Ka xamulo yakwe Jesu kha womba-womba ngu kuloviswa ka Jerusalema ni ka dithepele dwe, kambe “ni txikombiso txa kuguma ka ditiko” adi hi hanyako ka dona konku. Phela ngu mbimo ya magwito Jesu a ti khene: “Se ngu mhaka ya ditshiku da kona ni txikhati txa kona, awalo a ti zivako hambi tingelozi ta nzumani hambi ene mwanana, hahanze ka Tate.” A gwitile e alakanyisa votshe vagondiswa vakwe ti to, “ve rinzela” ni kusimama “ve wonelela.”—Marku 13:32-37.

2. Ngu kutxani i ngadi ta lisima ku Makristu o khata me zumba ma txi wonelela?

² Makristu a Vajudha ti txi lava me simama me wonelela; kasiku me kota kuhuluka. Jesu a gete vagondiswa vakwe ati va nga ti fanela kuwonelela ka tona kasi kuziva mbimo yi Jerusalema ni dithepele si ndi no loviswa ngu yona. A ti khene: “Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi.” Se ka mbimo yile, vona va ti fanete kuengisa txialakanyiso txa Jesu txo “ve thavela mimangoni.” (Luka 21:20, 21) Se ava va nga engisa txialakanyiso txonetxo va hulukile mbimo yi Varoma va nga lovisa Jerusalema.

3. Hi na bhula ngu txani ka gondo yiya?

 ³ Nyamsi hi hanya ka masiku o gwita ka mafu a Sathani. Se nathu ti lava hi simama hi ti pimela ni kuwonelela. Ka gondo yiya, hi na wona to hi nga mahisa kutxani kasiku hi dinganisela mbimo yi hi wonetelako simahakalo sa mafu, nzila yi hi nga ti wonelako ngu yona ni kuthumisa kwati mbimo yi yi nga sala.

4. Ngu kutxani i di ta lisima ngutu kwathu kuwona nzila yi simahakalo sa mafu awa si hetisisako ngu yona wuprofeti wa Bhiblia?

⁴ Nda lisima kuwonetela nzila yi simahakalo sa mafu awa si hetisisako ngu yona wuprofeti wa Bhiblia. Ngu txikombiso, Jesu a wombile ati ti ndi no humelela ati ti ndi no hi vhuna kuziva ti to magwito a mafu a Sathani ma hafuhi. (Mat. 24:3-14) Mpostoli Pedro a hi kuzetile kuveka mapimo ka kuhetiseka ka wuprofeti kasiku hi kota kutsanisa likholo lathu. (2 Pedro 1:19-21) Dibhuku do gwita da Bhiblia di khata ngu mapswi yawa: “Awuwa i Mtuletelo wa Jesu Kristu, awu Txizimu txi nga mninga, kasiku e kombisa ka sithumi sakwe ati ti fanelako kumaheka kunukunukuwa.” (Mtu. 1:1) Ha ti tsakela ngutu kuwona simahakalo si si mahekako ngweno ni nzila yi si hetisisako ngu yona wuprofeti wa Bhiblia. Ni ku mbimo yimwani ha ti navela kubhula ni vamwani ngu simahakalo soneso.

5. Ngu tihi ti hi fanelako ku ti vayilela ni ti hi fanelako ku ti maha? (Tshumela u wona mifota.)

⁵ Hi txi bhula ngu wuprofeti wa Bhiblia hi fanete kuvayilela kuthumisa mavali-vali. Ngu kutxani? Nguko athu kha hi lavi kuwomba timhaka ati ti nga onhako wumwewo dibanzani. Ngu txikombiso, ti nga maha hi pfa vafumi va mafu va txi womba ti to va nga sikota kulungisa txikarato txa ditiko do kari, ve tisa kudikha ni kuvhikeleka. Hahanze ko womba to mavali-vali oneyo ma hetisisa wuprofeti awu wu ku ka 1 Vatesalonika 5:3, ti lava hi tsimbitisana kwati ni madungula o gwita kuhumiswa. Ngako mabhulo athu ma di seketetwe ka mabhuku aya txithumi txo thembeka txi nga ma humisa, hi na vhuna dibanza to di simama di va ni wumwewo ngu “kupfanana ka moya ni mialakanyo ya mbilu.”—1 Vak. 1:10; 4:6.

6. Ngu tihi tigondo ti hi ti manako ka 2 Pedro 3:11-13?

⁶ Lera 2 Pedro 3:11-13. Mpostoli Pedro wa hi vhuna ti to hi va vo dinganisela mbimo yi hi xolisisako wuprofeti wa Bhiblia. Ene a hi kuzeta kusimama “hi rinzela kuhoka ka ditshiku da Txizimu.” Ngu kutxani? Hi nga ti to ho lava kuziva “ditshiku ni mbimo” adi Jehovha a no tisa ngu dona Armagedhoni, kambe hi lava kuthumisa mbimo yi yi nga sala kasi kukombisa “mahanyelo o sawuleka a wukhongeli.” (Mat. 24:36; Luka 12:40) Ngu mapswi mamwani, hi lava kusimama hi di ni mahanyelo a manene ni kutsaniseka ti to mizamo yi hi yi mahako ka mthumo wa Jehovha yi kombisa lirando li hi ku nalo ngu ngene. Kasi kuveka mapimo ka toneto, hi fanete kuzumba hi txi ti wonela athu hipune.

7. Hi nga kombisisa kutxani ti to ha ti wonela? (Luka 21:34)

⁷ Jesu a gete vagondiswa vakwe ti to va si ti woneli ka simahakalo sa mafu dwe, kambe ni vona vapune. Eto ti vekwa ha kubasani ka txialakanyiso txi txi nga wombwa ka Luka 21:34. (Lera.) Wona mapswi a Jesu aya ma ku: “Ti woneleni.” M’thu wu a ti wonelako a zumba a di tute maso ka ti ti nga onhako wungana wakwe ni Jehovha, ni ku a teka mazambo kasi ku ti vayilela. Ngu nzila yoneyo ene wa simama  ka lirando la Txizimu.—Mav. 22:3; Judha 20, 21.

8. Ngu txihi txialakanyiso atxi Paulo a nga txi ningela ka Makristu?

⁸ Mpostoli Paulo a gete Makristu ti to me ti wonela mapune. A gete Makristu a Efesu atxi: “Ti di ngeto wonisisani ta tinene mahanyelo anu; mi nga hanyiseni ku nga vathu va va si ziviko, aniko hanyani nga vathu va va zivako.” (Vaef. 5:15, 16) Sathani a zama kudaya wungana wathu ni Jehovha, ngu toneto Bhiblia yi hi alakanyisako ti to hi simama “hi lava kuziva kuranda ka Txizimu” kasiku hi kota ku ti vhikela ka marindi a Sathani.—Vaef. 5:17.

9. Hi nga ku zivisa kutxani kudhunda ka Jehovha?

⁹ Bhiblia kha yi kombisi totshe tiphango ti ti nga dayako wungana wathu ni Jehovha. Mbimo yimwani ti lava hi maha sisungo sa timhaka ati ti nga mbi wombwa ngu kukongoma amu ka Mibhalo. Kasiku hi maha sisungo sa wutxhari, ti lava hi pfisisa “kudhunda ka Jehovha.” Hi nga maha toneto ngu kugonda Bhiblia mbimo yotshe ni kualakanyisisa ngu yona. Mbimo yi hi pfisisako kudhunda ka Jehovha ni kusakulela “ku va ni mialakanyo ya Kristu,” hi na tsimbila kota “vathu vo txhariha,” hambi idi ti to kha ku nga ni mlayo wo kongoma wa ti hi fanelako ku ti maha ni ti hi si faneliko ku ti maha. (1 Vak. 2:14-16) Tiphango timwani ta hehuka ku ti wona; kasi timwani ti sisate.

10. Ngu tihi tiphango ati hi fanelako ku ti vayilela?

¹⁰ Tiphango timwani ti hi fanelako ku ti vayilela ti pata kusakana ngu kusihana, wudevi, mawomba-wombelo o biha, kuxalela mafilmi a mazunga, pornografiya mwendo kuxalela vathu va va ku simbwiri ni timwani to nga toneto. (Mas. 101:3) Phela Sathani mbimo yotshe a lava tinzila to daya wuxaka wathu ni Jehovha. (1 Pedro 5:8) Ngako hi si ti woneli, Sathani a nga phaya kwa mbi thembeka, mabava, txiviti, livengo, kutiguleta ni txitsikivi ka timbilu ni mialakanyo yathu. (Vag. 5:19-21) Phela matipfelo awa ma nga woneka nga kha ma nga ni mtamo makhatoni. Kambe ngako hi si teki mazambo o ma dula ngu txikuluveta, ona ma nga simama me kula kufana ni mndonga wu wu ku ni vheneno ni ku ma nga hi mahela sikarato.—Jak. 1:14, 15.

11. Ngu yihi phango yimwani ayi yi nga barama ayi hi fanelako ku yi vayilela ni ku ngu kutxani?

¹¹ Phango yimwani ayi yi nga barama ayi ti lavako hi yi vayilela, vangana vo biha. Pimisa ngu txiemo txiya. Awe u thuma ni m’thu awu i si ngako Fakazi ya Jehovha. Kambe awe u lava ti to mthumi kuloni e va ni mawonelo a manene ngu Tifakazi ta Jehovha, awe wa kombisa wunene ni kudhunda kuvhuna vamwani. Ni ku makhambi mamwani ma tsula mi ya susula motshe. Se ngu txikuluveta mi khata kumaha toneto mbimo yotshe. Se e khata mabhulo akwe a nzambwa, makhatoni awe wa zama ku ma vayilela. Ngu kutsimbila ka mbimo awe wa ya u ma tolovela mabhulo oneyo ha ko ma siswi me kuswira. Se ditshiku dimwani mi di txhayisile mthumoni e ku ramba ti to mi ya selanyana txo kari awe u tumela. Se awe wa khata kupimisa kufana ni nene. U alakanya ti to, ti nga teka mbimo muni ti to u va ni mahanyelo o fana ni akwe? Ditshuri ti to hi fanete kukombisa wunene ni txixonipho ka votshe, kambe hi fanete kukhumbula ti to vathu va hi hetako mbimo yo tala hi di navo va nga va ni mkuzetelo wa hombe ka wutomi wathu. (1 Vak. 15:33) Ngako hi txi ti wonela, nga ha Jesu a nga hi alakanyisa ngu kona, hi na vayilela vangana vo biha ava va si hanyiko ngu matshina a milayo a Jehovha. (2 Vak. 6:15) Hi txi maha eto hi na sikota kuwona phango hi tshumela hi yi vayilela.

12. Ngu tihi ti vagondiswa va Jesu va nga ti fanete kumaha va txi emela kuhoka ka magwito ka mbimo yile?

¹² Jesu a si lavi to vagondiswa vakwe ve zumba ngu mawoko va txi emela kuhoka ka magwito. Ene a va ningile mthumo. A va gete to va ti fanete kutxhumayela mahungu a manene “Jerusalema ni ka dotshe ditiko da Judheya ni Samariya, kala magemeta-mitshi ka ditiko.” (Mith. 1:6-8) Hi nga wona mthumo wa hombe awu Jesu a nga ti ningile vagondiswa vakwe! Ngu ku ti ningetela ka txiavelo txonetxo, vona va yi thumisile kwati mbimo yawe.

13. Ngu kutxani hi di fanete kuthumisa kwati mbimo yathu? (Vakolosa 4:5)

¹³ Lera Vakolosa 4:5. Ti to hi ti wonela, ti lava hi xolisisa nzila yi hi thumisako ngu yona mbimo yathu. Nguko ‘simahakalo so mba emelwa’ si nga humelela mmwani ni mmwani wathu. (Ekl. 9:11) Ni ku wutomi wathu wu nga txitxa hi sa ti emela.

14-15. Hi nga yi thumisisa kutxani mbimo yathu ngu nzila ya yinene? (Vahebheru 6:11, 12) (Tshumela u wona mifota.)

¹⁴ Hi nga thumisa kwati mbimo yathu ngu kumaha kuranda ka Jehovha ni kutsanisa wungana wathu nayo. (Joh. 14:21) Ti lava hi ‘zumba hi di tsani hi si xulwi ngu txilo hi khutala  hi ya masoni ka mthumo wa Mkoma.’ (1 Vak. 15:58) Hi txi maha eto hi di ngadi hi txi emela kuhoka ka magwito ti singa ni mhaka ni ti to i magwito a wutomi wathu mwendo magwito a mafu awa o biha, hi na mbi ti sola.—Mat. 24:13; Var. 14:8.

¹⁵ Nyamsi, Jesu a nga di e simama e kongomisa vagondiswa vakwe mbimo yi va simamako ve txhumayela mahungu a manene a Mfumo ha mafuni kotshe. Ene a mahile txienge txakwe. Jesu wa hi trenara nzila yi hi fanelako kutxhumayela ngu yona ngu kuthumisa sengeletano ya Jehovha, ni ku wa hi ninga tiferameti ati hi ti lavako kasiku hi kota kutxhumayela mahungu a manene. (Mat. 28:18-20) Athu hi maha txienge txathu ngu kutxhumayela ngu kuhiseka ni kugondisa ni kusimama hi wonelela, hi txi emela Jehovha e gumisa mafu awa a Sathani. Ngu kuthumisa txialakanyiso txi txi ku ka Vahebheru 6:11, 12, athu ha ñola hi tsana ka themba yathu “kala magwito.”—Lera.

16. Hi tiemisete kumaha txani?

¹⁶ Jehovha a vekile ditshiku ni mbimo ayi a no ta lovisa ngu yona mafu awa a Sathani. Mbimo yi ditshiku donedo di no hoka, Jehovha a na va a txi hetisisa wuprofeti wu wu nga bhalwa mu ka Bhiblia. Kambe, mbimo yimwani hi nga pimisa ti to ma swela kuhoka magwito. Hambiketo, ditshiku da Jehovha “kha di sweli!” (Hab. 2:3) Ahi ti emiseleni kusimama “hi verela ditshiku da Mkoma,” hi kombisa “kuverela ka Txizimu txa kuhanyiswa kwathu.”—Mik. 7:7.