1. Vo tala nyamsi va veka mapimo ka txani?

 TI NGA maha u di woni ti to vathu vavangi nyamsi va khatala ngutu ngu vona vapune kupinda kukhatala ngu vamwani. Ngu txikombiso vathu vamwani va thumisa ma redes sociais kasi ku tiguleta ni kukombisa ati va ti mahako. Se ngu toneto, hi nga va vangi va dhumisako Jehovha Txizimu. Ka gondo yiya, hi na wona to ti womba txani kudhumisa Jehovha ni ku njitxani txi fanelako ku hi kuzeta kumaha toneto. Hi na tshumela hi gonda ti to hi nga mningisa kutxani Jehovha txithavo txi txi mfanelako, ni ku i ngu nzila muni a no dhumisa ditina dakwe ka mbimo yi yi tako.

TIWOMBA TXANI KUDHUMISA JEHOVHA?

2. Jehovha a kombisisile kutxani wudhumo wakwe ka Mmango wa Sinayi? (Wona ni mfota wa kapa.)

² Bhiblia yi kombisa ti to Jehovha Txizimu txo guleka. A kombisile wudhumo wakwe msana kova Vaisrayeli va di hulukisilwe wukhumbini khe Egipta. Pimisa ngu tximahakalo txiya: Timiliyoni ta Vaisrayeli ti tshanganile ka Mmango wa Sinayi kasi kuengisa sileletelo sa Txizimu txawe. Mmango wu fenengetwa ngu direfu. Ngu txikuluveta kupfala kudekadeka ka hombe, singwalangwanda, kudhindela ni kudhuma ka hombe ka mpundu. (Eks. 19:16-18; 24:17; Mas. 68:8) Alakanya nzila yi Vaisrayeli va nga xamala ngu yona mbimo yi Jehovha a nga kombisa ngu yona wudhumo wakwe.

3. Tiwomba txani kudhumisa Jehovha?

³ Athu ko, ina hi nga dhumisa Jehovha? Ina, hi nga mdhumisa. Nzila yo maha toneto, ngu womba-womba ni vamwani ngu mtamo wakwe ni tifanelo takwe ta tinene. Hi nga tshumela  hi dhumisa Jehovha ngu ku mbonga ngu totshe ti hi ti mahako ngu kona ha ka mtamo wakwe. (Isaya 26:12) Mkoma Dhavhidha txikombiso txa txinene txa m’thu wu a nga dhumisa Jehovha. Ka mkombelo wakwe awu a nga wu maha hagari ka dibanza da Israyeli, ene a wombile tiya: “Wudhumo ni mtamo, ni nduma, ni kuxula, ni wuhombe, nzako MKOMA; nguko sotshe si si ku nzumani ni ha mafuni nzako.” Msana kova Dhavhidha a di hetile mkombelo wakwe, “wotshe msengeletano wu to dhumisa MKOMA.”—1 Mak. 29:11, 20.

4. Jesu a mdhumisisile kutxani Jehovha

⁴ Mbimo yi Jesu a nga ti hamafuni a dhumisile Tate wakwe ngu kugela vathu ti to i ti ene a nga ti mninga mtamo wo maha sidiwukiso. (Marku 5:18-20) Jesu a tshumete e dhumisa Jehovha ngu nzila yi a nga ti womba-womba ngu yona mayelano ni Tate wakwe ni ngu nzila yi a nga txi ñola ngu yona vamwani. Ka dikhambi dimwani Jesu a txo gondisa disinagogani. Hagari ka vale a nga txi va gondisa ku ti ni wamsikati a nga txi xuphwa ngu madhimoni kudingana 18 wa malembe. Ngu kukuzetwa ngu wuxinji wakwe, a tshuketete wule wamsikati e mgela tiya: “U hanyisilwe ka malwati ako ndiyangu.” Se Jesu a to msanzeka manza, se ngu txikuluveta mmidi wakwe wu to ololoka ni ku “a khatile kudhumisa Txizimu,” mmidi wakwe wu tshumelete ka txiemo txa txinene! (Luka 13:10-13) Wamsikati wuleya a ti ni sivangelo sa singi so dhumisa Jehovha, se nathu hi ni sivangelo so maha toneto.

NJI TXANI TXI HI KUZETAKO KUDHUMISA JEHOVHA?

5. Ngu sihi sivangelo si hi ku naso so kombisa txixonipho ka Jehovha?

⁵ Hi dhumisa Jehovha nguko ha mxonipha ngutu. Hi ni sivangelo so tala so hi mxonipha. Jehovha Txizimu txa mtamo wotshe, mtamo wakwe kha wu gwitelwi. (Mas. 96:4-7) Wuzivi wakwe wa woneka ka silo si a nga simaha. Ene Txisima txa wutomi wathu. (Mtu. 4:11) Ene mbwo thembeka. (Mtu. 15:4) Totshe ati a ti mahako ta humelela ni ku mbimo yotshe wa hetisisa sithembiso sakwe. (Jox. 23:14) Kha ti xamatisi kuva mprofeti Jeremiya a di wombile tiya ngu Jehovha: “Hagari ka totshe tixaka ta vamatiko ni ka mifumo yawe yotshe, lambi kha ngaho wu a fanako ni nawe”! (Jer. 10:6, 7) Ngu ditshuri hi ni sivangelo sa sinene so xonipha Tate wathu wa nzumani. Kha hi ngo xonipha Jehovha dwe, kambe ha mranda ngu kona ha ka tifanelo takwe ta tinene.

6. Ngu kutxani hi txi randa Jehovha?

⁶ Hi dhumisa Jehovha nguko ha mranda ngutu. Wona tifanelo ta tingi ta Jehovha ati ti hi mahako hi mranda. Ene a ni wumbilu. (Mas. 103:13; Isaya 49:15) Ngako hi txi karateka, ene wa kupfa kupanda aku hi ku pfako. (Zak. 2:8) Wa hi vhuna ku hi mziva ni kutshumela hi va vangana vakwe. (Mas. 25:14; Mith. 17:27) Wa tiveka hahatshi; “a di kona txitimweyo ene wa nama kasi kuwona asi si ku nzumani ni si si ku hahatshi ha mafuni, wa wusa sisiwana si huma lithuluni.” (Mas. 113:6, 7) Kha ngaho wu a ku ni txivangelo txo mbi dhumisa Txizimu txathu.—Mas. 86:12.

7. Ngu wuhi mkhanjo wa lisima awu hi ku nawo?

⁷ Hi dhumisa Jehovha nguko hi lava ti to vamwani ve mziva. Vathu va vangi kha va di zivi ditshuri mayelano ni Jehovha. Ngu kutxani? Nguko Sathani a vhate mapimo awe ngu kuwombawomba makuhu mayelano ni Jehovha. (2 Vak. 4:4) Sathani a kholwisa vathu ti to Jehovha a ni tshofu, kha khatali ni ku ngene a vangako kuxaniseka hamafuni. Kambe athu ha di ziva ditshuri ngu Txizimu txathu! Se hi ni mkhanjo wo gela vamwani ati Jehovha aku ngu tona ni ku va vhuna ti to ni vona ve mu  dhumisa. (Isaya 43:10) Masalmo 96 a veka mapimo ko dhumisa Jehovha. Mbimo yi hi no bhula ngu mapswi ya ma ku ka Masalmo yawa, pimisa ngu tinzila ti u nga ningelako ngu tona Jehovha wudhumo wu wu mfanelako.

HI NGA MNINGISA KUTXANI JEHOVHA WUDHUMO WU WU MFANELAKO?

8. Ngu yihi nzila ayi hi nga yi thumisako kasi kudhumisa Jehovha? (Masalmo 96:1-3)

⁸ Lera Masalmo 96:1-3. Hi nga dhumisa Jehovha ngu ti hi tiwombako mayelano ni nene. Ka tindimana tiya, vathu va Jehovha va rambwa ku ve ‘embelela ka MKOMA,’ ve “dhumisa ditina dakwe,” ve “dhumisa kuhanyisa kwakwe,” ni ku ve “huwelela nduma yakwe ka yotshe mifumo.” Totshe tiya, tinzila ti hi nga ti thumisako kasi kudhumisa Tate wathu wa nzumani. Vajudha vo thembeka ni Makristu o khata, kha va thava kugela vamwani mayelano ni totshe timhaka ta tinene a ti Jehovha a nga ti va mahete ni kuemela nduma yakwe. (Dhan. 3:16-18; Mith. 4:29) Hi nga va etetelisa kutxani?

9-10. Ngu tihi ati u ti gondako ka txiperiyensia txa Angelena? (Wona ni mfota.)

⁹ A hi wone txikombiso txa mwanathu watxisikati wu a dhanwako ku i Angelena, a a zumbako Estados Unidos. Ene a ve ni txibindi ni ku a wombawombile mayelano ni Jehovha mthumoni kwakwe. Kota ku i ngadi mthumi wamphya, ene ni vangana vakwe ava ni vona va nga txo khata kuthuma ka empreza yileya va rambilwe ti to veya ka mtshangano. Ka mtshangano wonewo, votshe va ti fanete kukontarela vamwani mayelano ni ta wutomi wawe. Angelena a lulamisete mifota ayi yi nga txi kombisa litsako li a nga ti nalo kota Fakazi ya Jehovha. Di si se hoka dikhambi dakwe do womba-womba, kolega wakwe a wombile to a ti kulisilwe ngu Tifakazi ta Jehovha. Ene a khatile kuwombawomba kubiha ngu ti hi ti kholwako. Angelena a womba tiya: “Ni khatile kuthava. Kambe ni pimisile tiya: ‘Ina ni fanete kumalala ni mleka e womba-womba kubiha ngu Jehovha? Mwendo ni fanete kuwomba txo kari kasiku ni emela Jehovha?’”

¹⁰ Mbimo yi kolega wakwe a nga gwita kuwombawomba Angelena ngu mbiluni a mahile mkombelo wo koma. Se ngu wunene ene a wombile tiya: “Makulelo ako ma fana ni angu. Nani ni kulisilwe ngu mwaya wu i ku Tifakazi  ta Jehovha ni ku na simama ni va Fakazi ya Jehovha ni nyamsi.” Hambiku a nga txi thava, Angelena a simamile a di thuthile, ene a kombile vakolega vakwe mifota yakwe ni ya vangana vakwe va txi thumela Jehovha ngu litsako ni ku ngu txixonipho a va txhamusete a ti a ti kholwako. (1 Pedro 3:15) I ve yihi wuyelo? Mbimo yi Angelena a nga gwita kuwombawomba, dijaha dileya se di ti thuthile. Di tshumete di womba ti to di ti ni siperiyensiya sa sinene ngu kuva di ti kulisilwe ngu Tifakazi ta Jehovha. Angelena a womba tiya: “Jehovha wa fanelwa ngu kuemelwa. I lungelo ya hombe ngutu kulwela ditina dakwe.” Nathu hi ni lungelo yo dhumisa Jehovha, hambi i di ti to vamwani va mtxhipisa.

11. Makristu a ditshuri, ma londisisile kutxani ditshina da mlayo di ku ka Masalmo 96:8?

¹¹ Lera Masalmo 96:8. Hi nga dhumisa Jehovha ngu silo sathu sa lisima. Vakhozeli va ditshuri mbimo yotshe va ti khozela Jehovha ngu nzila yoneyo. (Mav. 3:9) Ngu txikombiso, Vaisrayeli va mahile misengo kasi kuwuseta dithempele. (2 Vafu. 12:4, 5; 1 Mak. 29:3-9) Vamwani va vagondiswa va Jesu va ningete “silo sawe” ngu kuthumela Jesu ni vapostoli vakwe. (Luka 8:1-3) Makristu o khata ni ona ma mahile miningelo kasi kuvhuna vanawe. (Mith. 11:27-29) Nyamsi, nathu hi nga dhumisa Jehovha ngu kuthumisa miningelo yathu yo ti dhundela.

12. Miningelo yathu yi nga dhumisa Jehovha ngu nzila muni? (Wona ni mfota.)

¹² Wona txiperiyensia atxi txi kombisako ti to miningelo yathu ya dhumisa Jehovha. Ngu 2020 khe Zimbabwe ku ve ni nzala ya hombe. Vathu vo tala va txi xupheka ngu kupwata sakudya kupata ni mwanathu wu a dhanwako ku i Prisca. Hambiku a nga txi wonisana ni nzala, Prisca a simamile ni txiemiso txakwe txo txhumayela otshe makwarta ni masexta. Vavhizinyo vakwe va mtxhepetile ngu ku a nga txi tsula ka mthumo wo txhumayela ve mgela tiya: “U na tsimbila u oma ngu nzala.” Prisca a txi tsaniseka ti to mbimo yotshe Jehovha a ndi na m’khatalela. Ngu toneto mbimo yotshe a txi xamula atxi: “Jehovha gwita a no leka malanda akwe.” Ngu txikuluveta kutile txivhuno atxi txi nga txi ta ngu ka sengeletano yathu. Ngu kona ha ka miningelo yathu, Prisca a mani sakudya ni simwani asi a nga txi si lava. Vavhizinyo va Prisca va xamate ngutu ni ku va wombile tiya: “Txizimu txako gwita txi no kuleka, se nathu hi lava kugonda  mayelano ni txona.” Sete wa vavhizinyo wakwe va khatile kuxalela mitshangano.

13. Mahanyelo athu ma nga ningisa kutxani wudhumo Jehovha? (Masalmo 96:9)

¹³ Lera Masalmo 96:9. Hi nga dhumisa Jehovha ngu mahanyelo athu. Vaphaxeli ti txi lava ve samba ve basa kasiku ve ya thuma dithempeleni ka Jehovha. (Eks. 40:30-32) Nathu hi fanete ku hi basa, i si nga ngu didhawa da nyama dwe, kambe ngu kuvayilela kumaha totshe ati Jehovha a ti nyenyako. (Mas. 24:3, 4; 1 Pedro 1:15, 16) Bhiblia yi womba ti to hi fanete hi maha mizamo yo xivila “m’thu wa kale” ni mahanyelo akwe, kambe hi ambala “m’thu wamphya.” Eto ti txhamusela ti to hi fanete kumaha totshe ati hi nga ti kotako kasi ku hi gonda kupimisa ni kuhanya ngu nzila ayi yi kombisako ti to hi etetela Jehovha ni tifanelo takwe ta tinene. (Vakl. 3:9, 10) Ngu kuvhunwa ngu Jehovha, hambi vathu ava va ku ni mahanyelo o biha ni tihanyi, va nga txitxa ve ambala m’thu wamphya.

14. U gonda txani ka txiperiyensia txa Jack? (Wona ni mfota.)

¹⁴ Wona txiperiyensia txa Jack, awu i nga ti txigevenga txa hombe a ha koza ve mninga txibongo txo Didhimoni. Ngu mhaka ya wugevenga wakwe, Jack a gemetwe lifo. A txi nga txi emela ditshiku do e dawa, Jack a tumete kugonda Bhiblia ni mwanathu awu a nga txi endela jele yi a nga ti ka yona. Ti si nga ni mhaka ni mahanyelo akwe a kale, Jack a ambate m’thu wamphya ni ku ngu kutsimbila ka mbimo a bhabhatisilwe. Jack a ti txitxile ngutu a ha ko tigwardha timwani ta jele, ti dite mbimo yi ti nga txi satisana nayo ka ditshiku adi a nga fa ngu dona. Mmweyo wa vathumi va jele a wombile tiya: “Jack i ti txigevenga txa hombe ngutu txa wukhalo wuwa. Kambe konku mmweyo wa va va tshuku.” Ka divhiki adi di nga londisela msana ka kuva Jack a di datwe, vanathu va tshumete Jele kasi ku ya tsimbitisa mitshangano, se va mani txibotxhwa atxi txi nga ta xalela mitshangano ngu dikhambi do khata. Nji txani txi nga maha txibotxhwa txileya txi xalela mitshangano? Txona txi xamatisilwe ngutu ngu nzila yi Jack a nga di txitxile ngu yona, se txi txi lava kumaha to kari kasiku txi mana kukhozela Jehovha. Ti hakubasani ti to mahanyelo athu ma nga ninga wudhumo Tate wathu wa nzumani!—1 Pedro 2:12.

 JEHOVHA A NA DHUMISA NGU NZILA MUNI DITINA DAKWE KA MBIMO AYI YI TAKO?

15. Jehovha a na dhumisisa kutxani ditina dakwe ka mbimo ayi yi tako? (Masalmo 96:10-13)

¹⁵ Lera Masalmo 96:10-13. Mavhersikulo awa o gwita a Masalmo 96 ma txhamusela Jehovha kota Mlamuli ni Mkoma wo lulama. I ngu nzila muni Jehovha a no dhumisa ditina dakwe ka mbimo ayi yi tako? Ngu kuthumisa wulamuli wakwe. I si nga kale ene a na lovisa Bhabhilona wa hombe, nguko wa nyenyezisa ni kugondisa makuho mayelano ni ditina dakwe. (Mtu. 17:5, 16; 19:1, 2) Ava va no wona kuloviswa ka Bhabhilona wa Hombe ti nga maha ve ti pata ni nathu ka wukhozeli wa ditshuri. Ngu magwito ka Armagedhoni, Jehovha a na lovisa Sathani ni mafu akwe, votshe vale va mu wukelako ni kuruketela ditina dakwe. Kambe a na hulukisa avale va mu randako ni ku muengisa, va tshumelako ve ti guleta ngu kudhumisa ditina dawe. (Marku 8:38; 2 Vat. 1:6-10) Msana ka txiduko txo gwita atxi txi no maheka msana ka 1.000 wa malembe a kufuma ka Kristu, Jehovha a nava a di basisile ditina dakwe da magwito. (Mtu. 20:7-10) Ka mbimo yoneyo, “mafu ma na tala ngu kuziva kudhumisa MKOMA, ku nga tile mati ma fenengetisako tona linene.”—Hab. 2:14.

16. U ti emisete kumaha txani? (Wona ni mfota.)

¹⁶ Alakanya ngu nzila yi ti no ta tsakisa ngu yona mbimo yi votshe vathu va no ta ninga wudhumo awu wu fanelako ditina da Jehovha. Kambe ku si se hoka ditshiku donedo, hi lava kulondola yotshe mikhanjo ayi hi ku nayo kasiku hi dhumisa Txizimu txathu. Kasi kujunyatisa mhaka yiya, Mmidi awu wu Fumako wu sawute Masalmo 96:8 kota ndimana yathu ya dilembe da 2025: “Vekelani MKOMA txithavo txi txi fanelako ditina dakwe.”