1. Nji txani atxi hi nga txi mahako kasi kutsakisa Jehovha?

 ALAKANYA u txo ninga m’thu wu u mdhundako ngutu ningo ya lisima ngutu. U nga ti pfisa kutxani ngaku a txo yi teka e ya yi veka a si yi thumisi aha koza e yi divala? Ditshuri ti to khu na kutsaka. Kambe u nga tsaka ngaku m’thu eneyo a txi thumisa ningo ayi u nga mninga ni kukombisa ti to wa yi tsakela. Ngu tihi ati hi ti gondako? Jehovha a hi ningile Mwanana wakwe ngu ku a hi randako. Ene wa tsaka ngaku hi txi komisa kubonga ngu ningo yoneyo ya lisima ni ngu lirando lakwe ali li nga mkuzeta ku e hi ninga mterulo.—Joh. 3:16; Var. 5:7, 8.

2. Hi na bhula ngu txani ka gondo yiya?

² Ngu kutsimbila ka malembe hi nga thuka hi divala kubonga ngu ningo ya lisima ayi Jehovha a nga hi ninga i ku mterulo. Kambe ngaku hi txo maha toneto, ti nga fana ni ku hi txo teka ningo yoneyo yo tshura ya Txizimu hi yi veka ka wukhalo wo nem kha hi yi woni, mwendo ku hi yi divala. Kasiku hi vayilela kumaha toneto, ti lava ku yotshe mbimo yi wuseta kukombisa kubonga ngu ti Txizimu ni Kristu va nga hi mahela. Ka gondo yiya, hi na wona ti to hi nga ti mahisa kutxani toneto. Hi na wona ti to hi wuyelwa ngu nzila muni ngu mterulo konku ni ku hi nga wuyelwa ngu nzila muni ka mbimo ayi yi tako. Hi na tshumela hi wona ti to hi nga kombisisa kutxani kubonga lirando la Jehovha, ngutu-ngutu ngu mbimo ya Txialakanyiso.

HI WUYELISWA KUTXANI KONKU

3. Hi wuyeliswa kutxani ngu mterulo konku?

³ Se ha wuyelwa ngu mterulo wa Kristu. Ngu txikombiso, ngu konaha ka mterulo, Jehovha wa divalela sionho sathu. Ene kha  sinziswi ku e hi divalela, kambe o ti lava. Kasi kukombisa kubonga, m’bhali wa masalmo a embelete a txi: “Nguko awe, MKOMA, u wamnene, wa divalela.”—Mas. 86:5; 103:3, 10-13.

4. Jehovha a ningete mterulo kasiku ku wuyelwa va mani? (Luka 5:32; 1 Timoti 1:15)

⁴ Vamwani kwathu hi nga thuka hi pimisa ti to kha hi fanelwi ngu kudivalelwa ngu Jehovha. Kuwomba ditshuri, hotshethu kha hi fanelwi. Mpostoli Paulo a txi pimisa ti to a si “fanekelwi ngu kudhanwa ngu ditina da mpostoli.” Kambe ene a tshumete atxi: “Ngu mtamo wa kateko ya Txizimu ni phindukile ni maha txi ni ku txona.” (1 Vak. 15:9, 10) Ngaku hi txi tisola ka sionho sathu, Jehovha wa hi divalela. Ngu kutxani? I si nga ngu ku ti hi fanelako, kambe nguku Jehovha a hi randako. Ngaku u txi tipfa u si faneleki kudivalelwa ngu Jehovha, khumbula ti to Jehovha kha nga ningela mterulo para vathu vo hetiseka, kambe a wu ningete kasiku kuwuyelwa vaonhi ava va ti solako.—Lera Luka 5:32; 1 Timoti 1:15.

5. Ina to sunga ku m’thu e divalelwa ngu Jehovha nguku a ku ni malembe o tala a txi mthumela? Txhamusela.

⁵ A walo awu a fanelako kupimisa ti to, to sunga ku e divalelwa ngu Jehovha nguku a ku ni malembe amangi a txi mthumela. Ti hakubasani ti to Jehovha wa ti khumbula totshe ati hi mmahelako. (Vaheb. 6:10) Ene a hi ningile Mwanana wakwe kota ningo ya mahala i si nga para ku hi hakela ngu mthumo awu hi mu mahelako. Ngaku hi txi pimisa ngu nzila yoneyo, hi nga va hi txo womba to ti sa fanela kuva Jesu a di hi fete.—Wona ni Vagalatiya 2:21.

6. Ngu kutxani mpostoli Paulo a di thumile ngu kuhiseka ka mthumo wa Jehovha?

⁶ Paulo a txi ti ziva ti to hambiku a nga di mahile to tala ka mthumo wa Jehovha, ti si sungi ku Jehovha e m’divalela. Se ngu kutxani a di hisekile ngutu ka mthumo wa Jehovha? Ene a si lavi kukombisa ti to wa fanelwa ngu kudivalelwa, kambe a txi lava kukombisa kubonga wunene wu Jehovha a nga mmahela. (Vaef. 3:7) Kufana ni mpostoli Paulo, ha simama hi thumela Jehovha ngu kuhiseka, i singa ngu ku hi lavako kukombwa wuxinji, kambe ngu ku hi lavako kukombisa kubonga.

7. Ngu yihi nzila yimwani ayi yi nga wuyelwako ngu yona ngu mterulo konku? (Varoma 5:1; Jakobe 2:23)

⁷ Nzila yimwani yo wuyelwa ngu mterulo konku, ngu va ni wuxaka wa hafuhi ni Jehovha. a Nga ha hi nga ti wona ngu kona ka gondo ayi yi nga pinda, hi velekilwe hi si nga ni wuxaka ni Txizimu. Kambe ngu kona ha ka mterulo, athu hi nga va ni “kudikha ni Txizimu” ni kuva ni wuxaka wa hafuhi natxo.—Lera Varoma 5:1; Jakobe 2:23.

8. Ngu kutxani hi di fanete kukombisa kubonga ka Jehovha ngu lungelo ya mkombelo?

⁸ Nzila yimwani yo hi va ni wuxaka wa hafuhi ni Jehovha i lungelo yo maha mkombelo. Jehovha kha njo engisa basi mikombelo ayi hi yi mahako hi di mitshanganoni, kambe wa engisa mkombelo wu mmwani ni mmwani awu mahako a di ekha. Mbimo yi hi mahako mkombelo hi pumba kuvilela. Kambe eyo hi nga yona basi wuyelo ya mkombelo. Wu tshumela wu tsanisa wuxaka wathu ni Txizimu. (Mas. 65:2; Jak. 4:8; 1 Joh. 5:14) Mbimo yi a nga ti hamafuni, Jesu mbimo yotshe atxi maha mkombelo nguku a txi ti ziva ti to Jehovha a txi muengisa ni ku eto ti ndi na m’vhuna ku e va ni wuxaka wo tsana ni Tate wakwe. (Luka 5:16) Ha bonga ngutu ngu kuziva ti to ngu kona ha ka digandelo da Jesu, ta koteka ku hi va vangana va Jehovha ni kutshumela hi womba-womba nayo ngu mkombelo.

 WUMANGWANA WO TSAKISA AWU HI NGA VAKO NAWO NGU KONAHA KA MTERULO

9. Mterulo wu na wuyelisa vakhozeli vo thembeka va Jehovha ka mbimo ayi yi tako ngu nzila muni?

⁹ Vakhozeli vo thembeka va Jehovha va na wuyeliswa kutxani ngu mterulo ka mbimo ayi yi tako? Va na mana wutomi wo mbi guma. Vathu vavangi va pimisa ti to eto ti nge koteki nguku kukhukhela kale timiliyoni ta vathu ta fa. Kambe txikongomelo txo khata txa Jehovha ngu vathu i di ti to ve hanya ngu ha ku si gumiko. I singa ku Adhamu a nga onha, kha ngaho a ndi no pimisa ti to kha ti koteki ku hi hanya ngu ha ku si gumiko. Hambi i di ti to hi ti wona ti si koteki kuhanya ngu ha ku si gumiko konku, hi nga kholwa ka toneto nguko ha ti ziva ti to Jehovha a hakete mtengo wa hombe, i ku wutomi wa mwanana wakwe, kasiku hi hanya ngu ha ku si gumiko.—Var. 8:32.

10. Ngu tihi ti vasawuleki ni tinvuta timwani va ti emelako?

¹⁰ Hambiku wutomi wo mbi guma i ku timhaka ati hi no ti mana mbimo ayi yi tako, Jehovha a lava ti to hi pimisa ngu tona konku. Vasawuleki va emela wutomi wo tsakisa nzumani, mbimo yi va no fuma mafu kumweko ni Jesu. (Mtu. 20:6) Kasi tinvuta timwani ti emela ku ta hanya ka paradhise hamafuni, a ha va no mbi ta va ni kupandiseka mwendo kuxaniseka. (Mtu. 21:3, 4) Ina awe u mmweyo wa tinvuta timwani, u emelako wutomi wo mbi guma hauni? Wuyelo ya wutomi wo mbi guma hamafuni, kha ha fanela ku yi wonela hahatshi. Jehovha a mahile vathu ti to ve hanya ngu ha ku si gumiko hamafuni. Se kuhanya ngu ha ku si gumiko hamafuni, ti na ta hi ninga litsako lo hetiseka.

11-12. Ngu yahi makatekwa aya hi nga ma emelako hi no ta ma mana ka paradhise? (Wona ni mifota.)

¹¹ Alakanyisisa ngu ti wutomi wu no ta va ngu tona ka paradhise hamafuni. Awe khu na mbi ta karateka ngu malwati mwendo lifo. (Isaya 25:8; 33:24) Jehovha a na ta hetisisa yotshe minavelo yako. Ngu tihi ti u tsakelako ku ta gonda ka mafu a maphya? Ina u tsakela ku ta gonda mayelano ni sihari, wutxenje ni kudhezenyara? Kha ti kanakanisi ti to ka mafu a  maphya hi na ta lava vathu ava va ti zivako kuaka ni kudima. Ku na ta tshumela ku laveka vathu vo lulamisela sakudya, vo maha tifarameti, vo maha majaradhi ni kutshumela ve ma khatalela. (Isaya 35:1; 65:21) Mbimo yi u no hanya ngu ha ku si gumiko u nava ni mbimo yo maha totshe timhaka tiya ni timwani.

¹² Ti na tsakisa ngutu kuamukela a va va no wuswa ka vakufa. (Mith. 24:15) Alakanyisisa kambe ngu nzila yi to tsakisa ngu yona kugonda to engeteleka mayelano ni Jehovha ngu kuxolisisa simaha sasingi asi a nga si vanga. (Mas. 104:24; Isaya 11:9) Txo tsakisa ngutu ka totshe ngu ti to hi na ta khozela Jehovha hi si nga ni txionho. Ina u nga luza kuhanya wutomi wo tsakisa ka paradhise ngu kulava kuhanya wutomi wa mbimonyana awu wu tsakisako awe dwe? (Vaheb. 11:25) Ahim him! Phela makatekwa yawa, nga lisima ngutu kupinda tximwani ni tximwani atxi u nga txi manako ka mafu yawa konku. Khumbula ti to mafu a paradhise hi nga mbimo yotshe i no va themba ya mbimo ayi yi tako. I na va timhaka ati hi no ta hanya ka tona ditshiku ni ditshiku. Totshe tiya ti koteka ngu ku Jehovha a nga hi randa a ha koza e hi ninga mterulo.

NGU TIHI ATI U NGA TI MAHAKO KASI KUKOMBISA KUBONGA?

13. Hi nga kombisisa kutxani kubonga lirando la Jehovha? (2 Vakorinto 6:1)

¹³ Ngu tihi ati hi nga ti mahako kasi kubonga Jehovha ngu ningo ya mterulo? Ngu kutsaniseka ti to ku mthumela ngu txona tximaha txa lisima ngutu ka wutomi wathu. (Mat. 6:33) Phela Jesu a fite “kasiku votshe va va hanyako, va si swi va txi ti hanyela vona ngu txawe, aniko ve hanyela awule a nga va fela, a txi tshumela e wuka ka vakufa ngu kota yawe.” (2 Vak. 5:15) Ngu ditshuri athu kha hi lavi kuluza wunene wa kwa mbi hi fanela awu Jehovha a nga hi komba wona.—Lera 2 Vakorinto 6:1.

14. Hi nga li kombisisa kutxani likholo ka mkongomiso wa Jehovha?

¹⁴ Hi nga tshumela hi kombisa kubonga lirando la Jehovha ngu ku mthemba ni kutshumela hi londisa mkongomiso wakwe. Ngu nzila muni? Ngaku hi txi lava kumaha sisungo, mayelano ni txikolwa mwendo mthumo wu hi fanelako ku wu sawula, kukhata hi fanete kuxolisisa ati Jehovha a lavako ku hi ti maha. (1 Vak. 10:31; 2 Vak. 5:7) Ngaku hi txi maha sisungo asi si tsimbitisanako ni kuranda ka Jehovha, likholo lathu ni wuxaka wathu nayo si naya masoni si kula. Ni ku themba yathu yo hanya ngu ha ku si gumiko yi naya masoni yi tsana.—Var. 5:3-5; Jak. 2:21, 22.

15. Hi nga kombisisa kutxani kubonga lirando la Jehovha ngu mbimo ya Txialakanyiso?

¹⁵ Ku ni nzila yimwani yo kombisa ti to ha bonga lirando la Jehovha. Hi nga maha toneto ngu mbimo ya Txialakanyiso. Hahanze ko ti mahela makungo yo hi ta maneka ka Txialakanyiso hi nga ramba vamwani kasiku ni vona ve ta maneka. (1 Tim. 2:4) Txhamusela ava u va  rambako ati ti no ta maheka ka Txialakanyiso. U nga tshumela u va komba vhidhiyo ayi yi ku Ngu ku txani Jesu a di fite? ni yi yi ku Khumbula lifo la Jesu ka jw.org. Madhota ma nga tshumela me ramba ava va nga hola ngu didhawa da moya. Alakanya ngu litsako ali li kuho hamafuni ni nzumani ngaku ava va ngadi hote ngu didhawa da moya ve tshumela ve ti tshanganisa ni mtxhambi wa Jehovha. (Luka 15:4-7) Hahanze ko losa basi ava u va zivako, losa ni va i ku nga di vaphya mwendo ava ku pindako mbimo va si xaleli mitshangano. Va mahe ve tipfa va di amukelekile!—Var. 12:13.

16. Ngu kutxani hi di fanete kumaha to engeteleka ka mthumo wa Jehovha ngu mbimo ya Txialakanyiso?

¹⁶ Ina u nga maha ati ti nga engeteleka ka mthumo wa Jehovha ngu mbimo ya Txialakanyiso? Kumaha toneto i nzila yimwani yo kombisa kubonga ngu totshe ati Txizimu ni Kristu va nga hi mahela. Mbimo yi hi yako masoni hi tiningetela ka mthumo wa Jehovha, hi na wona nzila yi a hi vhunako ngu yona ni ku themba yathu kwakwe yi naya masoni yi tsana. (1 Vak. 3:9) Hahanze keto, tsaniseka ti to wa londisela programa ya kulera ka Bhiblia mayelano ni txialakanyiso yi ku ka txibhukwana atxi txi ku Kuxolisisa Mibhalo ditshiku ni ditshiku mwendo ka txibhukwana txa mitshangano ya hagari ka divhiki. U nga tshumela u thumisa programa yoneyo kasi ku u ti mahela gondo yako upune mwendo gondo ya mwaya.

17. Ngu tihi ati ti tsakisako Jehovha? (Wona dikwadro adi di ku “ Tinzila to kombisa kubonga lirando la Jehovha.”)

¹⁷ Ti nga maha txiemo txako txi si ku tumeleli kumaha totshe ati hi nga ti wona ka gondo yiya. Khumbula ti to Jehovha kha fananisi ati u ti mahako ni ti vamwani va ti mahako. Ene wa bonga lirando ali u ku nalo ngu ngene. Wa tsaka ngaku u txi kombisa kubonga ngu ningo yi a nga kuninga yona, i ku mterulo.—1 Sam. 16:7; Marku 12:41-44.

18. Ngu kutxani hi txi bonga Jehovha Txizimu ni Jesu Kristu?

¹⁸ Mterulo ngu wona basi wu mahako ti to hi divalelwa sionho sathu, hi va ni wuxaka wa hafuhi ni Jehovha, ni kuva ni themba ya wutomi wo mbi guma. Mbimo yotshe a hi kombiseni kubonga ngu lirando la Jehovha ali li nga mkuzeta ti to e hi ninga makatekwa oneyo. (1 Joh. 4:19) A hi tshumeleni hi bonga Jesu ngu kuva a di hi randile aha koza e ningela wutomi wakwe kasiku hi va ni wutomi wo mbi guma!—Joh. 15:13.