1. Ngu kutxani i di ta lisima ku hotshethu hi xalela Txialakanyiso txa lifo la Jesu dilembe ni dilembe?

 JEHOVHA a hi ningile ningo ya lisima mbimo yi a nga rumela mwanana wakwe kasiku e ta hi fela. Ngu mhaka ya mterulo wa Jesu Kristu, ti nga koteka ku hotshethu hi va ni wuxaka ni Jehovha Txizimu. Awe u nga tshumela uva ni themba yo hanya nguha ku si gumiko. Hi ni sivangelo so tala so hi bonga Jehovha awu a nga hi ninga mterulo nguku a hi randako. (Var. 5:8) Kasiku hi vhuna hi simama hi kombisa kubonga mterulo, Jesu a simekile Txialakanyiso txa lifo lakwe txi mahwako dilembe ni dilembe.—Luka 22:19, 20.

2. Hi na bhula ngu txani ka gondo yiya?

² Dilembe diya Txialakanyiso txi nava ngu Mlongiso, 12 ka Abril wa 2025. Kha ti kanakanisi ti to hotshethu ha ti lulamisela kasiku hi ta pateka. Ku txi nga txi txhota mavhikinyana kasi kuhoka ditshiku da Txialakanyiso ti nga va ta tinene ku tiha mbimo yo alakanyisisa a ngu ti Jehovha ni mwanana wakwe va nga hi mahela. Ka gondo yiya, hi na wona ti to mterulo wu hi gondisa txani ngu Jehovha ni Mwanana wakwe. Ka gondo ayi yi londiselako, hi na ta wona ti to hi nga wuyelwa ngu nzila muni ngu mterulo ni ku hi nga kombisisa kutxani kubonga.

 ATI MTERULO WU HI GONDISAKO NGU JEHOVHA

3. Ti kotekisa kutxani ti to lifo la m’thu wamweyo li khulula vathu vo tala ka txionho ni lifo? (Wona ni mfota.)

³ Mterulo wu hi gondisa mayelano ni wululami wa Jehovha. (Dhewut. 32:4) Ngu nzila muni? Wona tiya: Mbimo yi Adhamu a nga mbi engisa Jehovha, ene ahi siyete txionho ni lifo. (Var. 5:12) Kasiku hi hulukisa ka txionho ni lifo, Jehovha a rumete mwanana wakwe Jesu kasiku a ta hi terula. Kambe ti kotekisa kutxani ku digandelo da m’thu mmweyo wo hetiseka di terula vathu vo tala? Mpostoli Paulo wa txhamusela mhaka yiya: “Ngu toneto, kambe nga kuwa txieyiso txa m’thu mmweyo txi nga nyeta votshe vathu, kufana ni toneto, ngu kuengisisa ka m’thu wammweyo vavangi va na mahwa valulami.” (Var. 5:19; 1 Tim. 2:6) Ngu mapswi mamwani, Paulo a txi lava kuwomba ti to hotshethu hi vaonhi ni ku ha fa ngu mhaka ya wamwamna wo hetiseka a nga mbi engisa Txizimu. Se ku txi laveka wamwamna wo hetiseka ni wo engisa kasiku e hi khulula.

4. Ngu kutxani Jehovha a sa tumelela ti to vanana va Adhamu vo engisa ve hanya ngu ha ku si gumiko?

⁴ Ina ti txo sunga ku Jesu e fa kasiku e hi hulukisa? Jehovha asi na kuthumisa tinzila timwani kasiku vanana vo thembeka va Adhamu ve mana wutomi wo mbi guma? Ka vathu va kwambi hetiseka eyo i ti nzila ya yinene yo lulamisa txikarato. Kambe eto ti si na kukombisa wululami awu Jehovha aku nawo. Nguko ti ndi na woneka nga Adhamu kha maha txionho txa hombe ni ku vanana vakwe kha va onha. Kambe eto hi nga ditshuri.

5. Ngu kutxani hi txi tsaniseka ti to mbimo yotshe Jehovha a na maha ati i ku tatinene?

⁵ Hahanze keto, idiku Jehovha a sa ningela mtirulo e tumelela ti to vanana va Adhamu ve hanya ngu ha ku si gumiko hambiku va sa hetiseka, ti ndi na woneka nga Jehovha kha xoniphi milayo yakwe apune ya ti i ku ta tinene ni to biha. Vathu va sina ku ngadi ve mthemba, ni ku va ndi na karateka ngu ti to a si na ku ngadi e kombisa wululami ka timhaka timwani. Ngu txikombiso, vathu ti nga maha ve kana-kana ti to Jehovha a na hetisisa sotshe sithembiso sakwe. Kambe kha ha fanela hi karateka ngu toneto. Kuva Jehovha a di kombisile wululami hambi ti txi karata ngu kuningela Mwanana wakwe wamweyo, ti hi tsanisekisa ti to mbimo yotshe a na maha ati i ku ta tinene.

6. Ngu yihi fanelo yimwani ayi yi nga kuzeta Jehovha ti to e rumela mwanana wakwe? (1 Johane 4:9, 10)

⁶ Ku ni fanelo yimwani ya lisima ngutu yi nga kuzeta Jehovha ti to e rumela Mwanana wakwe kasiku e ta hi fela: Lirando ali a ku nalo ngu ngathu. (Joh. 3:16; lera 1 Johani 4:9, 10.) Jehovha a rumete Mwanana wakwe ti to a  ta hi fela nguko a lava ti to hi hanya ngu ha kusi gumiko ni ku hi lumba mwaya wakwe. Wona tiya: Mbimo yi Adhamu a nga onha, ene a si nga ngadi e lumba mwaya wa Jehovha. Kota wuyelo, mbimo yi hotshethu hi nga velekwa hi si nga ngadi hi lumba mwaya wa Txizimu. Kambe aku mterulo wu nga hakelwa votshe ava va kombisako likholo ka Txizimu ni ku txi engisa, ditshiku dimwani va na ta maha txienge txa mwaya wakwe. Kambe konku ta koteka ti to hi va ni wuxaka wo tsana ni Jehovha kumweko ni vanathu. Ngu ditshuri, Jehovha wa hi randa!—Var. 5:10, 11.

7. Nzila yi Jesu a nga xaniseka ngu yona yi hi vhunisa kutxani kupfisisa lirando la Jehovha?

⁷ Kasiku hi pfisisa lirando li Jehovha aku nalo ngu ngathu, hi fanete kupfisisa nzila yi ti nga mkaratela ngu yona kuningela Mwanana wakwe. Sathani a womba ti to kha di ngaho dilanda da Txizimu di nga simamako di di thembekile ngako di txi wonisana ni sikarato. Kasi kukaneta makuhu oneyo, Jehovha a tumelete ti to Jesu e xaniseka na a si se fa. (Jobe 2:1-5; 1 Pedro 2:21) Jehovha a woni vathangeli va wukhongeli va txi txhepeta Jesu, masotxhwa ma txi mkwapela ni kutshumela me m’gogotela ka phande ya xanisa. Jehovha a woni Mwanana wakwe Jesu a txi fa ngu nzila yo panda ngutu. (Mat. 27:28-31, 39) Jehovha a ti ni mtamo wo a ti emisile totshe ati ti nga humelela Jesu. Ngu txikombiso, mbimo yi vakaneti va nga khona: “I di ti to txa m’dhunda txi na m’hanyise konku,” Jehovha ngu ditshuri adi ti mahile toneto. (Mat. 27:42, 43) Kambe, idiku a ti ko maha toneto, Jesu a sa ningela wutomi wakwe kota mterulo ni ku hi sa va ni themba. Ngu toneto, Jehovha a tumelete ti to Mwanana wakwe e timisela sikarato kala kuza e fa.

8. Ina Jehovha a pandisekile mbimo yi a nga wona mwanana wakwe a txi xaniseka? Txhamusela. (Wona ni mfota.)

⁸ Kha ha fanela kupimisa ti to aku Jehovha i ku Txizimu txa mtamo wotshe, kha nga ni matipfelo. Ene a vangile vathu va ti ni wusikoti wo va ni matipfelo. Ni ku aku Bhiblia yi wombako ti to athu hi vangilwe ngu txifananiso txakwe, eto tiwomba ti to nene ani matipfelo. Bhiblia yi womba ti to Jehovha ‘a pandisekile mbilu.’ (Mas. 78:40, 41) Wona txikombiso txa Abrahamu ni Isaake. Jehovha a gete Abrahamu ti to e ningela mwanana wakwe wamweyo kota digandelo. Hi nga alakanya nzila yi Abrahamu a nga tipfa ngu yona mbimo yi a nga txi ti lulamisela kudaya mwanana wakwe. Pimisa ngu nzila ayi Jehovha a nga tipfa ngu yona mbimo yi a nga ti wona mwanana wakwe a txi xaniswa kala kuza e fa. Wona vhidhiyo ayi yi ku Etetela likholo lawe—Abrahamu, Txienge txa wumbidi ka jw.org.

9. Varoma 8:32, 38, 39 yi hi vhuna kupfisisa txani mayelano ni lirando la Jehovha ngu ngathu?

⁹ Mterulo wu hi gondisa ti to kha ngaho  mmwani a hi randako kupinda ati Jehovha ahi randisako tona, hambi maxaka athu mwendo vangana vathu va hombe. (Lera Varoma 8:32, 38, 39.) Kha ti kanakanisi ti to Jehovha wa hi dhunda ngutu kupinda ati athu hi ti dhundisako tona. Ina awe wa ti lava kuhanya ngu ha ku si gumiko? Jehovha wa tilava ngutu kupinda ati awe u ti lavisako tona. Wa ti lava kudivalelwa sionho sako? Jehovha wa tilava ngutu ku kudivalela kupinda ati awe u ti lavisako tona. Totshe ati Jehovha ati lavako ngu ti to u kombisa kubonga ngu ti ene a nga kumahela. Mterulo txikombiso txa lirando ali Jehovha ali pfako ngu ngawe. Ni ku ka mafu a maphya, hi naya gonda to engeteleka mayelano ni lirando la Jehovha.—Ekl. 3:11.

ATI MTERULO WU HI GONDISAKO TONA MAYELANO NI JESU

10. a) Ngu kutxani Jesu adi karatekile ngutu ngu mhaka ya lifo lakwe? b) I ngu nzila muni Jesu a nga basisa ditina da Tate wakwe? (Wona dikwadru adi di ku “ Kuthembeka ka Jesu kubasisile ditina da Jehovha.”)

¹⁰ Jesu a karatekile ngutu ngu ti vathu va ndi no pimisa ngu Tate wakwe. (Joh. 14:31) Jesu a karatekile ngutu nguko vathu va ndi na pimisa kubiha ngu Tate wakwe, nguko ene a ndi na dawa kota m’thu awu a nga si txi xoniphi Txizimu ni kuva txigevenga. Ngu toneto, a mahile mkombelo atxi khene: “Tata, ngako ti txi koteka, tshuketisa kopo yiya kule ni nani.” (Mat. 26:39) Ngu kuva adi thembekile ka Jehovha kala kuza e fa, Jesu a basisile ditina da Tate wakwe.

11. Jesu ali kombisisile kutxani lirando lakwe ngu vathu? (Johane 13:1)

¹¹ Mterulo wu tshumela wu hi gondisa ti to Jesu wa karateka ngutu ngu vathu, ngutu-ngutu ngu vagondiswa vakwe. (Mav. 8:31; lera Johani. 13:1.) Ngu txikombiso, Jesu a txi tiziva ti to timwani ta timhaka ati a ndi no timaha hamafuni ti ndi na mkaratela, to fana ni  kudawa. Kambe, Jesu a mahile totshe timhaka eto to karata, i singa nguko a nga ti rumilwe ngu Jehovha ku e ti maha, kambe nguku a nga txi randa vathu. Jesu a kombisile lirando la hombe ngu vathu ngu kuva txhumayela, e va gondisa ni kuva vhuna. Hambi ka ditshiku di a nga ndi no dawa ngu dona, Jesu a ti hite mbimo yo sambisa mikondo ya vapostoli vakwe, e va gondisa, e va tsanisa ni kuva thavelela. (Joh. 13:12-15) Hambi mbimo yi a nga ti ka phande ya xanisa, a ti ningile mbimo yo ninga themba txigevenga atxi txi nga ti didhawani kwakwe ngu ku txi gela ti to txi ndi nava Paradhise, ni ku a tshumete e kombisa kukhatala ngu mwamwakwe ngu kukombela Johani ti to e sala e mkhatalela. (Luka 23:42, 43; Joh. 19:26, 27) Jesu a kombisile lirando lakwe ngu vathu i singa ngu kuva fela dwe, kambe ngu kuva komba wunene.

12. Ngu tihi ati Jesu ahi mahelako nyamsi?

¹² Hambiku Jesu a nga fa “kumweko dwe,” a nga txi simama e hi mahela to tala. (Var. 6:10) Ngu nzila muni? Ene wa simama e thuma kasiku e hi ninga silo sasingi sa sinene, asi konku ti kotekako ku hi si mana ngu konaha ka mterulo. Wona ati a ti mahako konku. Ene a thuma kota Mkoma, Mprista wa Hombe ni msungo wa dibanza. (1 Vak. 15:25; Vaef. 5:23; Vaheb. 2:17) Ene a ñolekile ka mthumo wo pata vasawuleki ni dibutho da hombe, i ku mthumo awu wu no guma yi si se guma xanisa ya hombe. b (Mat. 25:32; Marku 13:27) Ene a tshumela e thumisa txithumi txo thembeka kasiku txi simama txi hi ninga asi hi si lavako ti to hi thumela Jehovha hi di thembekile. (Mat. 24:45) Ni ku mbimo yi a no fuma kudingana 1000 wa malembe a na simama e hi khatalela. Ngu ditshuri, Jehovha a ningete mwanana wakwe ngu kota yathu.

SIMAMA U GONDA TIMHAKA TA TIPHYA

13. Kualakanyisisa ku nga hi vhunisa kutxani ku hi gonda ngu lirando ali Jehovha ni Jesu va ku nalo ngu ngathu?

¹³ U nga simama u gonda mayelano ni lirando li Jehovha ni Jesu va ku nalo ngu ngathu ngako u txi simama u alakanyisisa ngu ti va nga hi mahela. Ku txi txhota mavhikinyana kasiku kuhoka ditshiku da Txialakanyiso ni msana kova txi di mahekile, u nga gonda khakwati mabhuku a Tievhangeli. U nga leri makapitulu a mangi ngu dikhambi da dimwedo. Hahanze keto, gonda kudotho-kudotho, maha wuxolisisi wa sivangelo simwani asi si nga hi mahako hi  randa Jehovha ni Jesu. Gela vamwani ati u nga ti tumbula mbimo yi u nga txi gonda.

14. Ngu kuya ngu Masalmo 119:97, kumaha wuxolisisi ti nga hi vhunisa kutxani kusimama hi gonda mayelano ni mterulo ni timwani? (Wona ni mfota.)

¹⁴ Ngako u di ni malembe a mangi u di bhabhatisilwe, ti nga maha u ti wotisa ti to ina ta koteka kugonda timhaka ta tiphya mayelano ni wululami wa Jehovha, lirando lakwe ni mterulo. Ditshuri ngu ti to mbimo yotshe kuni ta tiphya ati hi nga ti gondako mayelano ni timhaka toneto. Se u nga maha txani? Londola otshe madungula aya ma manekako ka mabhuku athu. Ngako u txi gonda timhaka ati u si ti pfisisiko kwati, maha wuxolisisi. U gwita u alakanyisisa ngu ti u nga ti mana ni ti ti kugelako tona ngu Jehovha, Mwanana wakwe ni lirando lakwe ngu ngawe.—Lera Masalmo 119:97.

15. Ngu kutxani hi di fanete kusimama hi xola tithomba ta mu ka Bhiblia?

¹⁵ U nga godholi ngako u si mani timhaka ta tiphya mwendo to xamatisa yotshe mbimo yi u gondako mwendo kumaha wuxolisisi. Pimisa ngu m’thu awu a zamako kumana oru. Makhambi a mangi, m’thu wu a lavako oru wa heta masiku a mangi mwendo maora a si se mana si orwana sa sidotho. Kambe ene kha godholi, wa simama e xota ngu kutimisela nguko txiphemunyana txa oru atxi a txi manako nja lisima ngutu kwakwe. Kambe ati hi ti gondako amu ka Bhiblia nda lisima ngutu kupinda oru. (Mas. 119:127; Mav. 8:10) Ngu toneto, simama u txi timisela u londisa txiemiso txako txa gondo ya Bhiblia.—Mas. 1:2.

16. Hi nga m’etetelisa kutxani Jehovha ni Jesu?

¹⁶ Mbimo yi u gondako, zama kuthumisa ati u ti gondako. Ngu txikombiso, etetela wululami wa Jehovha ngu kwambi na txisawusawu. Etetela lirando la Jesu ngu Tate wakwe, ngu kutiemisela kumaha ati Jehovha a ti lavako ni kuvhuna vamwani hambi ti txi karata kumaha toneto. Tshumela u etetela Jesu, ngu kugondisa vamwani kasiku ni vona veva ni mkhanjo wo ziva timhaka to xamatisa ati Jehovha ahi mahelako ni ku ve kombisa likholo ka mterulo.

17. Hi na ta bhula ngu txani ka gondo ayi yi londiselako?

¹⁷ Mbimo yi hi yako masoni hi gonda ngu mterulo, lirando lathu ngu Jehovha ni Jesu li naya masoni li engetela. Se lirando lawe ngu ngathu ni lona li naya msaoni li kula. (Joh. 14:21; Jak. 4:8) Ngu toneto, ahi londoleni sotshe si hi ku naso kasiku hiya masoni hi gonda ngu mtirulo. Ka gondo ayi yi londiselako, hi na ta gonda ngu makatekwa aya hi ma manako ngu kuva Jesu a di hi fete ni ngu nzila yi hi nga kombisako ngu yona kubonga ngu makatekwa oneyo.