1. Ngu kutxani hi txi womba ti to sotshe silo si lumba Jehovha? (Wona mfota wu wu ku makhatoni.)

SOTSHE silo si lumba Jehovha! “Nzuma ni nzuma ya tinzuma  . . . kumweko ni mafu ni sotshe si si kuho ka ona,” nzakwe. (Dhewuteronome 10:14; Mtuletelo 4:11) Aku Jehovha a nga wumba vathu, hotshethu hi thomba yakwe. (Masalmo 100:3) Kambe kukhukhela kale, ka votshe vathu, Txizimu txi sawute vamwani ti to ve txi lumba ngu nzila yo sawuleka.

2. Ngu kuya ngu Bhiblia mba mani ava va lumbako Jehovha ngu nzila yo sawuleka?

² Ngu txikombiso, Masalmo 135 yi womba-womba ngu vakhozeli vo thembeka va Jehovha va kale ka Israyeli kota “thomba yakwe.” (Masalmo 135:4) Hoseya a tshumete e womba ti to vamwani ava vo mbi i si nga Vaisrayeli va ndi na maha thomba ya Jehovha. (Hoseya 2:23) Toneto ti hetisekile mbimo yi Jehovha a nga khata kusawula ava i si ngako Vaisrayeli ti to ve fuma ni Jesu nzumani. (Mithumo 10:45;  Varoma 9:23-26) Vona va dhanwa ku “mfumo wo sawuleka.” Vona ‘mbathu va va lumbako Txizimu.’ (1 Pedro 2:9, 10) Kambe, kuwombwa txani ngu Makristu otshe o thembeka aya ma ku ni themba yo ta hanya ha mafuni kala kupinduka? Jehovha a khene ni vona i “vathu vangu” ni “vasawuleki vangu.”​—Isaya 65:22.

3. a) Nyamsi ngu yihi mitxawa yimbidi ayi yi ku ni wuxaka wo sawuleka ni Jehovha? b) Hi na bhula ngu txani ka msungo wuwa?

³ Nyamsi ku ni “mtxhambi wa wudothoanyana,” i ku vathu va va ku ni themba yo hanya nzumani, ni “timwani tinvuta,” i ku va va ku ni themba yo ta hanya kala kupinduka ha mafuni, se yotshe mitxawa ya yimbidi yi khozela Jehovha kota “mtxhambi wumwewo.” (Luka 12:32; Johani 10:16) Hi lava kukomba Jehovha ti to ha bonga ngu kuva ni wuxaka wo sawuleka nayo ni lungelo yoneyo yo sawuleka. Ka msungo wuwa hi na gonda ti to hi nga ti mahisa kutxani toneto.

4. Hi nga mu bongisa kutxani Jehovha nguko a hi tumelelako ku va ni wuxaka nayo? Jesu a mahisile kutxani?

⁴ Hi kombisa kubonga kwathu ka Jehovha mbimo yi hi tiningetelako kwakwe ni kubhabhatiswa. Kukhukhela koneho, votshe va nga ti wona ti to hi lumba Jehovha ni ku hi tiemisete ku mu engisa. (Vahebheru 12:9) Jesu a mahile to fana ni toneto mbimo yi a nga bhabhatiswa. Hambiku a nga velekelwa ka ditiko di se i nga ti da Jehovha, ene a tiningete apune ka Jehovha. Ti fana ni ku nga a ti ko khene: “Ni tsaka ngutu ngu kumaha kuranda kwako, Txizimu txangu.”—Masalmo 40:7, 8.

5, 6. a) Mbimo yi Jesu a nga bhabhatiswa, Jehovha a ti khene txani? b) Ngu txihi txikombiso atxi txi nga hi vhunako kupfisisa ati Jehovha a ti pfisako tona ngu kutiningetela kwathu?

⁵ Jehovha a ti pfisile kutxani mbimo yi Jesu a nga bhabhatiswa? Bhiblia yi khene: “Jesu msana ka kuva a di bhabhatisilwe a to huma ngu matini. Konako, nzuma yi to tuleka, se Jesu e wona Moya wa Txizimu, wu nga ti relela nga dituva txitimwi kwakwe. Senikoko, kupfala dipswi da kuta ngu nzumani, di txi: “Awuwa i Mwanana wangu wo randeka, awu ni tsakiswako ngutu ngu ngene.”” (Matewu 3:16, 17) Jesu se a ti lumba Txizimu. Kambe Jehovha a ti tsakile mbimo yi a nga wona ti to Jesu a ti ti emisete kuthumela Ene dwe, wutomi wakwe wotshe. Ni konku Jehovha wa tsaka ngako hi txi tiningetela kwakwe, ni ku a na hi katekisa.​—Masalmo 149:4.

⁶ Kambe silo sotshe si lumba Jehovha! Se athu hi nga mninga txani? Alakanya tate wu a nga phaya siluva so tala. Ditshiku dimwani mwanana wakwe e hapha tximwetxo e ya mninga. Phela hambiku sotshe i ku sakwe, tate wu a ku ni lirando a nga tsaka ngutu ngu ningo ya mwanana. Ti kombisa ti to mwanana wakwe wa m’randa. Txiluva atxi a nga ningwa ngu mwanana nja lisima kupala si simwani. Ngu kufana, Jehovha wa tsaka hi txi ningetela wutomi wathu kwakwe ngu ku ti tsakela.​—Eksodha 34:14.

7. Dibhuku da Malakiya di yi kombisisa kutxani nzila yi Jehovha a tipfako ngu yona ngu va va mthumelako ngu ku ti dhunda?

⁷ Lera Malakiya 3:16. Ngu kutxani i di ta lisima kuningetela wutomi wako ka  Jehovha ni kubhabhatiswa? Ditshuri ti to kukhukhela mbimo yi u nga velekwa, u lumba M’vangi wako, Jehovha. Kambe alakanya ati Jehovha a tsakisako tona ngako u txi tumela kufumwa ngu Ngene ni ku tiningetela kwakwe. (Mavingu 23:15) Jehovha wa va ziva ava va nga tiemisela ku mthumela, se ene a bhala matina awe ka “dibhuku da txialakanyiso.”

8, 9. Kulaveka txani ti to matina athu me bhalwa ka “dibhuku da txialakanyiso”?

⁸ Hi fanete hi maha txani ngako hi txi lava ti to ditina dathu di simama ka “dibhuku da txialakanyiso” da Jehovha? Malakiya a womba ti to hi fanete hi thava Jehovha ni kualakanyisisa ngu ditina dakwe. Ngako hi txo khozela silo simwani mwendo vathu, ditina dathu di na thaviswa ka dibhuku da Jehovha!​—Eksodha 32:33; Masalmo 69:28.

⁹ Kambe kha ta enela kuthembisa Jehovha kumaha kudhunda kwakwe ni kubhabhatiswa. Eto nda mbimo yimweyo dwe, kambe kukhozela Jehovha da wotshe wutomi wathu. Hi txi nga txi hanya, ditshiku ni ditshiku hi fanete hi kombisa ngu simaho ti to hi engisa Jehovha.—1 Pedro 4:1, 2.

10. Ngu kuhi kuhambana ka wule a thumelako Jehovha ni wu a si mthumeliko?

¹⁰ Ka msungo wu wu nga pinda hi gondile ti to vamwani va wombile ti to va khozela Jehovha, kambe va si thembeki kwakwe; i ku Kayini, Solomoni ni va ka Israyeli. Sikombiso soneso si hi gondisile ti to kuwomba ti to hi khozela Jehovha, kha ta enela. Ti lava hi nyenya to biha hi randa ta tinene. (Varoma 12:9) Jehovha a khene ku na va ni kuhambana “hagari ka wo lulama ni wo biha, hagari ka wule a thumelako Txizimu, ni wule a si txi thumeliko.”​—Malakiya 3:18.

11. Ngu kutxani hi sa fanela kuthava kukombisa ti to hi lumba Jehovha?

¹¹ Ha bonga aku Jehovha a nga hi sawula ti to hi va vathu vakwe! Kha ti karati kuwona ti to hi didhawani ka Jehovha kani. (Matewu 5:16; 1 Timoti 4:15) Tiwotise tiya: ‘Ina vamwani va tiwona ti to na thembeka ka Jehovha? Ina na thava kugela vamwani ti to ni Fakazi ya Jehovha?’ Alakanya ti Jehovha a henyisako tona ngako hi txi thava kugela vamwani to hi lumba ene.​—Masalmo 119:46; lera Marku 8:38.

12, 13. Ngu tihi ati vanathu vamwani va mahako ngu kutekelela moya wa mafu?

¹² Dikhombo da kona, hambi vanathu vamwani va tekelela “moya wa mafu.” Se, kha va hambani ngutu ni va va si khozeliko Jehovha. (1 Vakorinto 2:12) “Moya wa mafu” wu maha ti to vathu ve veka mapimo awe ka minavelo yawe yo lava tawe dwe. (Vaefesu 2:3) Ngu txikombiso, hambiku hi laywako, vamwani va ngadi va txi ambala ngu nzila yi i singako ya  yinene. Hambi va txi ya mitshanganoni, va ambala so manya ni so wonekela. Mwendo va sawula sitayela so nyenyeza sa misisi. (1 Timoti 2:9, 10) Ngu toneto, ti maneka ti txi karata kuziva ti to hi Tifakazi ta Jehovha mwendo ahim-him.​—Jakobe 4:4.

¹³ Ku ni tinzila timwani ati vanathu vamwani ti nga karatako kuwona ti to va hambana ni mafu. Ngu txikombiso, amu ka mibuso, vamwani va sinya ngu nzila ayi yi kakanisako ka Makristu. Vamwani va veka mifota yawe ka internet ni kubhala mawonelo awe aya ma kombisako mialakanyo yawe ya nyama. Ti nga maha va sa mana txitsayiso dibanzani ngu txionho txa hombe, kambe vona va nga kuzetela vanathu va va zamaku kuhambana ni mafu ti to ve maha to biha.​—Lera 1 Pedro 2:11, 12.

14. Hi fanete hi maha txani ti to hi vhikela wuxaka wathu wo sawuleka ni Jehovha?

¹⁴ Sotshe silo sa mafuni hawa, si mahetwe ku hi maha hi veka mapimo athu ka “kunavela ka mmidi, kunavela ka maso ni ku ti kulisa ngu tithomba.” (1 Johani 2:16) Athu kha hi fani ni vamwani, nguko hi lumba Jehovha. Hi ‘hambana ni to biha ni minavelo yo biha ya ditiko,’ ni ku hi “hanya ngu kutipimela ni kululama ni txithavo ditikoni muwa.” (Titosi 2:12) Wotshe wutomi wathu, mawomba-wombelo, madyelo, maselelo, maambalelo, mathumelo, ma fanete me woneka ti to hi lumba Jehovha.​—Lera 1 Vakorinto 10:31, 32.

15. Ngu kutxani ti txi lava hi ñola vanathu ngu lirando ni wunene?

¹⁵ Hi kombisa ti to hi ninga lisima wungana  wathu ni Jehovha ngu nzila yi hi ñolako vanathu ngu yona. Kufana ni nathu, ni vona va lumba Jehovha. Ngako hi si yi divali mhaka yoneyo, mbimo yotshe hi na va ñola ngu nzila ya yinene ni ya lirando. (1 Vatesalonika 5:15) Eto ti ni lisima ngu nzila yihi? Jesu a ti khene: “Ngu toneto, va no mi zivisa tona ti taku mi vagondiswa vangu: Ngako mi txi randana.”​—Johani 13:35.

16. Hi gonda txani ka Mlayo wa Mosi mayelano ni nzila yi Jehovha a randako ngu yona vathu vakwe?

¹⁶ Hi nga vhunwa ngu txani ti to hi ñola vanathu dibanzani ngu nzila ya yinene? Ngu txikombiso txa Mlayo wa Mosi. Dithepeleni ka Jehovha, ku ti ni siya asi si nga ti thumiselwa wukhozeli dwe. Mlayo wu ti kombisa kwati nzila yi Valevhi va nga ti fanete ve ñola siya soneso ngu yona, se awu a nga ti si wu londiseli a ti fanete kudawa. (Mitengo 1:50, 51) Se ngako Jehovha a nga ti khatala ngu siya si si nga ti thumiswa ka wukhozeli wakwe, ina kha kathali ngutu ngu nzila yi vathu va ñolako ngu yona ava va nga ti ningetela kwakwe, i ku vakhozeli vakwe vo thembeka? Ene a hi gela ti to hi va lisima kwakwe ngu ku khene: ‘Awule a mi gwesako, a gwesa pfhaka ya diso dangu.’​—Zakariya 2:8.

17. Jehovha a “riya nzeve a txi engisela” txani?

¹⁷ Malakiya a wombile ti to Jehovha wa “riya nzeve a txi engisela” nzila yi vathu vakwe va ñolanako ngu yona. (Malakiya 3:16) Jehovha “wa va ziva ava va m’lumbako.” (2 Timoti 2:19) Ene a tute maso ka simaho ni mapswi athu. (Vahebheru 4:13) Ngako hi si ñoli kwati vanathu, Jehovha wa ti wona. Kambe he tsanisekeni  ti to Jehovha wa wona yi nzila yi hi amukelako vapfhumba ngu yona, wuha wathu, kudivalela kwathu, ni wunene wathu.​—Vahebheru 13:16; 1 Pedro 4:8, 9.

18. Hi nga m’bongisa kutxani Jehovha nguko a nga hi sawula ku va vathu vakwe?

¹⁸ Hi lava kukomba Jehovha ti to ha mu bonga aku hi lumbako ene kota vathu vakwe. Ha tiziva ti to njisungo txa txinene ngutu kuva hi di tiningetete kwakwe. Hambiku hi hanyako “hagari ka liveleko lo soholoka,” hi nga simama hi ‘singa ni txisolo na hi di basile’ ni kuwoninga “nga malambu ha mafuni.” (Vafilipiya 2:15) Ngu toneto hi ti emisete kuvayilela txihi ni txihi atxi Jehovha a txi nyenyako. (Jakobe 4:7) Ni ku, ha va randa vanathu ni ku va xonipha nguko ni vona va lumba Jehovha.​—Varoma 12:10.

19. Jehovha a va hakela ngu nzila yihi ava va m’lumbako?

¹⁹ Themba ya mu ka Bhiblia ngu yiya: “MKOMA kha na mbi tshotsha vathu vakwe.” (Masalmo 94:14) Atiya hi nga makuho. Hambi ku txo humelela txani, Jehovha a na va ni nathu. Hambi hi txo fa, ene kha na mbi hi divala. (Varoma 8:38, 39) “Ngako hi txi hanya, hi hanyela Mkoma; ngako hi txi fa, hi fela Mkoma. Mwendo ha hanya, mwendo ha fa, hi lumba Mkoma.” (Varoma 14:8) Hi yi emete mbimo yi Jehovha a no wuyisa vangana vakwe vo thembeka ava va nga fa, ve ta tshumela ve hanya. (Matewu 22:32) Phela hambi konkuwa, ku ni makatekwa o tala a Tate wathu aya hi ti busako ngu ona. Nga ti Bhiblia yi wombako, “di katekile ditiko dile Txizimu i ku MKOMA wa dona; ni vathu vale txi nga va sawula kuva thomba ya txona.”​—Masalmo 33:12