Kombisa wumbilu ka “votshe vathu”
MBIMO yi Jesu a nga gondisa vagondiswa vakwe nzila yo txhumayela mahungu a manene, a va gete ti to mbimo yimwani vathu va na mbi engisela. (Luka 10:3, 5, 6) Toneto ta maheka ni nyamsi hi txi txhumayela. Vathu vamwani hi va manako va nga hi ñola kubiha mwendo ve lava ni ku hi peka. Ngako va txi maha toneto, ti nga thuka ti hi karatela kukombisa wumbilu ni kulava ku va txhumayela.
M’thu wa wumbilu a wona txilaveko ni txikarato txa vamwani, e va pfela wusiwana, se e lava ku va vhuna. Kambe ku nga maheka txani ngako hi txo gumelwa ngu wumbilu ka vathu va hi va manako hi txi txhumayela? Hi na mbi hiseka, i ku ti to, hi na mbi ti tsakela ku va txhumayela, se hi na mbi va vhuna. Hi nga fananisa kuhiseka kwathu ni mndilo. Mndilo wu tura ngu moya. Ta fana ni kuhiseka kwathu ku nga simama hi di ni wumbilu!—1 Vatesalonika 5:19.
Hi nga wu kombisisa kutxani wumbilu hambi ti txi karata? He gondi ka sikombiso siraru sa sinene, i ku Jehovha, Jesu ni mpostoli Paulo.
ETETELA WUMBILU WA JEHOVHA
Se kupinda malembe o tala ngutu vathu va txi womba makuhu ngu Jehovha. Kambe ene a ni “wunene ka vale va si ziviko kubonga ni ka vale va tshofu.” (Luka 6:35) A wu kombisisa kutxani wumbilu wakwe? Wa timiselela votshe. Jehovha a lava ti to “votshe vathu” ve huluka. (1 Timoti 2:3, 4) Hambiku Txizimu txi nyenyako wubihi, vathu mba lisima ka txona se kha txi lavi ti to kufa hambi ni wamweyo.—2 Pedro 3:9.
Jehovha wa tiziva ti to Sathani txipila txo kholwisa vathu makuhu. (2 Vakorinto 4:3, 4) Vamwani va gondisilwe makuhu mayelano ni Txizimu i di ngadi vanana. Se mapimiselo awe ni matipfelo awe, ma nga thuka me maha ti karata ku ve tumela ditshuri. Kambe Jehovha wa ti tsakela ku va vhuna. Hi ti zivisa kutxani?
Ngu txikombiso, alakanya nzila yi Jehovha a nga ti pfa yona ngu vathu va dhoropani ka Ninivha. Hambiku i nga ti sigevenga, Jehovha a gete Jona a txi khene: “Se ani na mbi va ni ku dipfela Didhoropa da Hombe da Ninivha, a di di ku ni kupinda 120.000 wa vathu, ava va si ziviko kuhambanisa diwoko dawe da txinene, ni diwoko dawe da txibhabha?” (Jona 4:11) Jehovha a va pfete wusiwana vathu vonevo, hambiku va nga ti si zivi txilo ngu ngene. Se a rumete Jona ti to e ya va txharihisa.
Ha va pfela wusiwana vathu kufana ni Jehovha. Vona mba lisima. Kufana ni Jehovha, hi tsakela ku va vhuna ve gonda ditshuri ngu ngene hambi ti txi woneka nga va na mbi di amukela.
ETETELA WUMBILU WA JESU
Kufana ni Jehovha, Jesu a pfete wusiwana vathu “nguko va ti ti karate ni kurereka, nga tinvuta to mbi na m’dyisi.” (Matewu 9:36) Jesu a ti pfisisile ti to ngu kutxani va di rerekile. Nguko vagondisi vawe va wukhongeli va ti va xanisa ni kuva gondisa makuhu. Vathu vo tala va ti ya ve ya engisela Jesu a txi gondisa, kambe hi nga votshe va nga va valondeteli vakwe. Toneto Jesu a txi ti ziva, kambe a simamile e va gondisa timhaka to tala.—Marku 4:1-9.
U nga godholi ngako m’thu a si tsakeli ka dikhambi do khata
Ngako siyemo sa wutomi si txi txitxa, vathu vo tala va tumela kuengisela mahungu a manene
Ngako vathu va si tsakeli madungula athu, ti lava hi pfisisa ti to i mhaka muni. Ti nga maha va di ni mawonelo o biha ngu Bhiblia, mwendo va txi wona vathu va va tigelako ku Makristu va txi maha timhaka to biha. Vamwani va to pfa makuhu ngu tigondo tathu. Futhi vamwani ti nga maha ve thava ti to maxaka awe mwendo vaakelani vawe va na va poyila loko va txi bhula ni nathu.
Vathu vamwani va hi va manako ti nga maha va di manani ni sikarato. Kim i ku murumiwa a womba ti to vathu va vangi ka wukhalo wawe va to huluka yimbi ni ku va mwalaletwe ngu silo sawe sotshe. Kha va na themba. Va karatekile ni ku a walo va mthembako. Mbimo yotshe vathu va wukhalo wuwa va duketa ni kulekisa Tifakazi kutxhumayela. Dikhambi dimwedo Kim a dhumetwe a di thembweni.
Hambiku vathu va nga ti mu xanisa, Kim a si kotisile kutxani kusimama e kombisa wumbilu? Mbimo yotshe a zama kukhumbula Mavingu 19:11, yi yi ku khene: “Mapimo a manene ma sisa kuhenya ka m’thu.” Ngako a txi pimisa ati ti nga humelela vathu va wukhalo wule, ti mu vhuna ku va pfela wusiwana. Futhi hi nga votshe va a va manako va ku ni tihanyi. Ene wa va mana vathu vo tsakela.
Hi nga ti wotisa tiya: ‘I ti ku kha ni nga Fakazi, ni ndi na txani ngako ni txi txhumayelwa ngu Tifakazi ta Jehovha?’ Ngu txikombiso, ngako hi di pfite makuhu ngu Tifakazi, kutilava nathu hi ndi na lamba. Se hi ndi na lava kukombiswa wumbilu. Jesu a ti khene hi fanete hi ñola vamwani ngu nzila yi hi lavako kuñolwa ngu yona. Se, ti lava hi pfisisa matipfelo a vamwani, hi va laphisela mbilu hambi ti txi karata.—Matewu 7:12.
ETETELA WUMBILU WA PAULO
Mpostoli Paulo a kombisile wumbilu, hambi ka vathu va va nga ti ti maha sigevenga a txi va txhumayela. Ngu kutxani? Nguko a khumbute kale kwakwe. A ti khene: “Kale ni nga ti mruketeli ni mxanisi ni m’thu wa tshofu. Aniko ni mani divalelo, nguko atileya ni ti mahile ngu kusisalelwa ni wuhedheni wangu.” (1 Timoti 1:13) Paulo a ti zivile ti to Jehovha ni Jesu va mu kombile wuxinji wa hombe. A ti va pfisisa vathu va va mu lambisako kutxhumayela, nguko nene a pindile ngu ka tona.
Mbimo yimwani Paulo a ti mana ava va kholwako ngutu ka tigondo ta makuhu. A ti pfisile kutxani ngu toneto? Ka Mithumo 17:16 hi gonda ti to mbimo yi a nga ti Atena, ene, a ‘pandisekile ngu kuwona didhoropa di di tate ngu sithombe si si khozelwako.’ Hambi keto, Paulo a thumisile sona sile si nga ti mu henyisile kota nzila yo gondisa vathu. (Mithumo 17:22, 23) Ene a txitxile nzila yi a nga ti txhumayela ngu yona, se e womba-womba ngu nzila yimwani ni vathu va makhalo o hambana-hambana ti to ene e ‘hanyisa vamwani ngu totshelele tinzila’.—1 Vakorinto 9:20-23.
Nathu, ngako hi txi txhumayela vathu va va ko mbi tsakela mwendo ava va kholwako ka ta walo, hi nga maha ati Paulo a nga maha. Hi nga thumisa ati hi ti zivako ngu vona ti to hi va vhuna ve mana ‘mahungu a manene a wunene.’ (Isaya 52:7) Mwanathu wa txisikati a dhanwako ku i Dorothy a khene: “Ka wukhalo wathu, vo tala va gondisilwe ti to Txizimu txi ni tshofu ni ku txi dhunda kulamula vathu. Na va ndunduzela nguko va kholwako ti to Txizimu txiho se ni gwita ni va komba ati Bhiblia yi ti wombako ngu lirando la Jehohva ni sithembiso sakwe sa mbimo yi yi tako.”
“XULA KUBIHA NGU WUNENE”
Ngako magwito ma ku hafuhi, ha tiziva ti to vathu “va na ya masoni ngu kumaha wubihi.” (2 Timoti 3:1, 13) Kambe hi nga lekeni wumbilu wathu ngu mhaka ya nzila yi va angulako ngu yona. Jehovha a nga hi ninga mtamo wo “xula kubiha ngu wunene.” (Varoma 12:21) Jessica awu i ku nyaphandule, mbimo yimwani a mana vathu vo tigela ve tshumela ve hi poyila ni kupoyila madungula ya hi txhumayelako. A khene: “Ta godholisa. Ngako ni txi lava kukhata dibhulo, ni maha mkombelo ngu mbiluni ni kombela Jehovha ti to e ni vhuna ni wona m’thu wule nga ti ene a mu wonisako tona.” Eto ti vhuna Jessica kuveka mapimo akwe ka nzila yo vhuna m’thu i si nga kuwona matipfelo akwe basi.
Hi simama hi xota ava va lavako kumana ditshuri
Mbimo yimwani, vamwani va na tumela kugonda ditshuri
He duketeni kutsanisa vanathu mbimo yi hi ku navo thembweni. Jessica a khene ngako a di thembweni ni vamwani va va nga mana to mbi tsakisa, a duketa kwa mbi veka mapimo akwe ka tona. Ene a duketa kubhula ngu ta tinene, to fana ni wuyelo ya yinene yo txhumayela hambi vamwani va si tsakeli.
Jehovha wa tiziva ti to mbimo yimwani kutxhumayela ta wuya. Kambe wa tsaka ngutu ngako hi txi etetela wuxinji wakwe! (Luka 6:36) Kambe, hi nga ti to Jehovha mbimo yotshe a no zumba a txi kombisa wumbilu ni ku timisela dwe. Ha tsaniseka ti to ene wa tiziva ti to magwito a na ma tisa ditshiku. Kala kona kheya, kutxhumayela kwathu nga txikuluveta. (2 Timoti 4:2) Ngu toneto, he simameni hi txhumayela ngu kuhiseka ni kuva ni wumbilu wa ditshuri ka “votshe vathu.”
