1-2. Mapswi ya ma ku ka dibhuku da Isaya 65:16, 17 ma nga hi vhunisa kutxani ti to hi si karali?

MSUNGO mhaka wa mtshangano wa 2017, wu ti womba tiya: “U NGA KARALI!” Mtshangano wuwa wu hi kombile tinzila to xula sikarato. Se kupinda muni wa malembe hi di xalete mtshangano wuwa, kambe kala konkuwa hi ngadi hi txi timisela sikarato ka mafu awa o biha.

² Ngu sihi sikarato si u nga manana naso mwendo u wonisanako naso konkuwa? Ngu felwa ngu dixaka mwendo mngana wako wa hombe? Mwendo u wonisana ni malwati? Ina u wonisana ni sikarato asi si tiswako ngu kukula ngu tanga? Ina u to manwa ngu tiphango ta mtumbuluko, wugevenga mwendo kukanetwa? Ti nga maha kambe u txi wonisana ni sikarato asi si nga tiswa ngu mtungo wa COVID-19. Hi di rinzete ngutu ditshiku di totshe tiya ti nova ti di pindile, ti si thuki ti maheka kambe!—Lera Isaya 65:16, 17.

3. Ngu tihi ati hi fanelako ku timaha konkuwa? Ngu kutxani?

³ Wutomi wa nemela ka mafu awa, ni ku hi nga thuka hi manana ni sikarato sa hombe ngutu ka mbimo yi yi tako. (Mat. 24:21) Ngu toneto, ti lava hi gondela kutimisela. Ngu kutxani? Nguko Jesu a ti khene: “Ngu kutimisela kwanu mi na hanyisa mimoya yanu mwendo wutomi wanu.” (Luka 21:19) Kuwona nzila yi vamwani va timiselako ngu yona sikarato so fana ni sathu ti nga hi vhuna ti to hi simama hi timisela.

4. Ngu kutxani hi nga wombako ti to Jehovha ngene txikombiso txa txinene txo timisela?

⁴ I mani awu i ku txikombiso txa txinene txo timisela? I Jehovha Txizimu. Ti nga maha ti txi ku xamalisa! Kambe u txi pimisa ngu tona u na wona ti to ku ni ti ngu ditshuri ti lavako e ti timisela. Mafu yawa ma mtamoni ka Sathani, ngu toneto ma tate ngu sikarato. Jehovha a ni mtamo wo a nga heta sikarato siya  ngu mbimonyana kambe ene a rinzela ku ta maha toneto mbimo ayi yi tako. (Var. 9:22) Jehovha wa simama e timisela atxi rinzela mbimo yi a nga yi vekisa ti to e ta lovisa wotshe wubihi. He wone 9 wa silo asi Jehovha a nga si sawula ku si timisela.

5. I ngu nzila yihi ditina da Txizimu di ruketelwako? U tipfisa kutxani ngu toneto?

⁵ Kurukwa ka ditina dakwe. Jehovha wa didhuna ditina dakwe ni ku a lava ti to vamwani ve di xonipha. (Isaya 42:8) Kambe, kupinda kona mu ka 6.000 wa malembe ditina dakwe di txi ruketelwa. (Mas. 74:10, 18, 23) Atiya ti khatile ka jaradhi ya Edheni mbimo yi Dhiyabhulosi ti wombako to “Mlumbeti” a nga lumbeta Txizimu atxi khene a txo tsimba Adhamu ni Evha silo sa sinene asi si ndi no va tisela litsako. (Gen. 3:1-5) Kala konkuwa Jehovha a ngadi a txi lumbetwa ti to a tona vathu ati va ti lavako. Jesu a ti karateka ngutu ngu makuhu aya ma nga txi bhamekelwa ka ditina da Tate wakwe. Ngu toneto, ene a gondisile vagondiswa vakwe ti to ve khongelisa tiya: “Tata wathu, u ku nzumani, ditina dako di na sawulwe.”—Mat. 6:9.

6. Ngu kutxani Jehovha a di lekile kupinda mbimo yo lapha a si lweli wukoma wakwe?

⁶ Kuwukelwa ka wukoma wakwe. Jehovha a ni fanelo yo fuma nzumani ni ha mafuni, ni ku nzila ayi a fumako ngu yona ngu yona i ku ya yinene ngutu. (Mtu. 4:11) Kambe Dhiyabhulosi a mahile ti to tingelozi ni vathu vamwani ve pimisa ti to Txizimu kha txi nga ni fanelo yo fuma. Se ti ndi na lava mbimo ti to Jehovha e kombisa ha kubasani ti to ene ngene a ku ni fanelo yo fuma. Ngu wutxhari Txizimu txi ningile mbimo yo lapha vathu kasi ve ti wona ti to ngako va txi ti fuma vapune va si nga ni Mvangi wawe kha va na kuhumelela. (Jer. 10:23) Kuva Txizimu txi txi timisela ti na koteka ti to mhaka yi lulamiswa da magwito. Votshe va na tiziva ti to i Mfumo wa Txizimu dwe awu wu nga tisako kudikha ka ditshuri ni kuzumbiseka ha mafuni.

7. Mba mani ava va nga wukela Jehovha? A na maha txani ngu vona?

⁷ Kuwukelwa ngu tingelozi timwani. Jehovha a vangile tingelozi kumweko ni vathu i di so hetiseka va si mahi tiphazamo. Se mmweyo wa vanana vakwe awu a nga hunduka e ti maha Sathani, ti wombako ku “Mkaneti,” a kuzetete Adhamu ni Evha ti to ve wukela Jehovha. Tingelozi timwani ni vathu vamwani va patanile ve wukela Jehovha. (Judha 6) Ngu msana vathu vamwani va ditiko da Israyeli i ku ditiko adi Txizimu txi nga ti di sawute va mu wukete ve gwita ve ya khozela sizimu sa makuhu. (Isaya 63:8, 10) I ti si nga mhaka ya msakano kuza yi henyisa Jehovha. Hambiketo ene wa timisela ni ku a na simama e timisela kala mbimo yi a no ta lovisa votshe va mu wukelako. Atiya ti na neha kutxhatxheka ka votshe vathu vo thembeka ava va simamako ve timisela wubihi wa mafu yawa. I ku ava va emako kumweko ni Jehovha!

8-9. Ngu yahi makuhu mamwani a Sathani Dhiyabhulosi? Ngu tihi ati athu hi ti mahako?

⁸ Kuhemba ka Sathani ka ditshiku ni ditshiku. Sathani a lumbetile Jobe ni otshe malanda o thembeka a Jehovha ngu kuwomba ti to ma mu thumela ngu kulava kuwuyelwa. (Jobe 1:8-11; 2:3-5) Kala nyamsi Sathani kha leki ku hi lumbeta makuhu. (Mtu. 12:10) Athu hi nga maha txienge txathu kukombisa ti to Sathani m’hembi ngu kusimama hi timisela sikarato hi ema hi di thembekile ka Jehovha nguko hi mu randako i si nga ngu kulava kuwuyelwa. Ngako hi txi etetela txikombiso txo timisela ta Jobe nanathu hi na katekiswa kufana ni nene.—Jak. 5:11.

⁹ Sathani a thumisa wukhongeli wa makuhu,  kasi kuwomba ti to Jehovha njigevenga ni ku ngene m’vangi wa kuxaniseka ka vathu. Vamwani va hokela ko womba ti to ngako mwanana a txi fa, Txizimu txi to mu teka kasi ku e ya va ngelozi nzumani. Atxiya njidhelelo txa hombe ka Jehovha! Athu ha mu ziva kwati. Ngako hi di ni txikarato txa malwati a hombe, mwendo kufelwa ngu dixaka athu kha hi thuki hi lumbeta Txizimu txathu. Kuhambana nito athu hi ni themba ya ti to ditshiku dimwani ene a na fuvisa malwati ni lifo. Athu hi gela votshe vathu ava va lavako kuengisa ti to Jehovha Njizimu atxi ti ku ni lirando la hombe. Ngu konaho hi na maha ti to Jehovha e ningela xamulo ka wule a mu vhukako.—Mav. 27:11.

10. Masalmo 22:23, 24 ma hi gondisa txani ngu Jehovha?

¹⁰ Kuxaniseka ka sithumi sakwe so dhundeka. Jehovha Njizimu txa wuxinji. Ene wa nyenya kuxaniseka aku ku vangwako ngu konaha ko tsimbiswa ka mthumo wathu, malwati ni kwa mbi hetiseka. (Lera Masalmo 22:23, 24.) Jehovha wa kupfa kupanda kwathu, ene wa tilava kuheta kuxaniseka kwathu ni ku a na maha toneto. (Fananisa ni Eksodha 3:7, 8; Isaya 63:9.) I si nga kale ene a “na bahulela yotshe mirongo tikhoheni [kwathu]; kha ku nambi swa ku txi maneka kambe lifo, hambi kudila, hambi tihuwa, hambi kupandiseka.”—Mtu. 21:4.

11. Ngu tihi ati Jehovha a ti pfisako tona ngu sithumi sakwe asi si nga fa?

¹¹ Lifo la vangana vakwe. Jehovha a ti pfisisa kutxani ngu vangana vakwe vo thembeka ava va nga fa? Ene a vilela kutshumela e va wona. (Jobe 14:15) Ina wa ti kota ku ti alakanya ati Jehovha a mu xuvisako tona mngana wakwe Abrahamu? (Jak. 2:23) Mwendo Mosi awu a nga txi bwabwata nayo “khohe ni khohe”? (Eks. 33:11) Ni ene a ti pfisa kutxani nguko asi ngadi a txi pfa Dhavhidha ni vabhali vamwani va masalmo va txi embelela tindando ta ku mu  dhumisa? (Mas. 104:33) Hambiku vangana vonevo va Txizimu va nga otela kufani, Jehovha kha va divala. (Isaya 49:15) Ene wa khumbula totshe ti va nga ti zumbisile tona. Ti womba ti to “ka txona votshe va hanya.” (Luka 20:38) Ene a na tshumela e va wusa ni ku a ta engisa mikombelo yawe yo huma mbiluni ni kuengisa mikombelo yawe. Ngako u di fetwe ngu dixaka dako kualakanyisisa ngu mhaka yiya ti nga ku thavelela.

12. Ka masiku athu ngu tihi ti karatako ngutu Jehovha?

¹² Kuxaniswa ka vathu ngu vabihi. Mbimo yi Adhamu ni Evha va nga wukela Jehovha ka Jaradhi ya Edheni, ene a txi ti ziva ti to txiemo ha mafuni txi ndi na karata. Jehovha wa nyenya wubihi, kwa mbi lulama ni wugevenga awu wu nga tala ha mafuni. Ene a ni wuxinji ngutu ni va vo mbi vawe, ava vo mbi na mtamo vo fana ni vo felwa ni tinoni. (Zak. 7:9, 10) Ka masiku athu ati ti karatako ngutu Jehovha ngu wona sithumi sakwe asi si xaniswako ni kubetwa jele. Mi nga tsaniseka ti to Jehovha wa mi randa motshenu mi timiselako kumweko nayo.

13. Ngu txihi txiemo txo nyenyeza a txi vathu va manekako ka txona ni ku Jehovha a na maha txani?

¹³ Mawonelo o biha a vathu ngu timhaka ta mataho. Sathani wa ti ziva ti to vathu va mahilwe ngu mfananiso wa Txizimu, kambe ene wa ti dhunda ku va xakela. Ka timbimo ta Nowa Txizimu txi to “wona ti to, kubiha ka vathu ka anda ha mafuni” se “MKOMA Txizimu a to tilaya ngu kuva a di mahile m’thu ha mafuni se a txi pfa kupandiseka mbiluni kwakwe.” (Gen. 6:5, 6, 11) Ina txiemo txi tshukwatwe? Ahim-him. Sathani wa giya a txi wona txiemo txo nyenyeza a txi vathu va nga txubwa ka txona, kupata ni kutinõla ko biha ngu ta mataho ni kumaha ta mataho ka vavasikati ngu txawe ni vavamna ngu txawe! (Vaef. 4:18, 19) Ene wa tsaka ngutu a txi kota kumaha txithumi txa Jehovha txi wela ka txionho txonetxo. I si nga kale Jehovha a na ti komba ti to Jehovha wa ma nyenya mahanyelo onewo a kutiñola ko biha ngu ta mataho, mbimo yi a no lovisa ava va lambako kutxitxa mahanyelo onewo.

14. Ngu tihi ti vathu va ti mahako ngu mtumbuluko wa Jehovha?

¹⁴ Kuloviswa ka mtumbuluko wakwe. Jehova a ningile vathu fanelo yo xayisa silo asi a nga si vanga. Kambe m’thu a fuma “mwani m’thu, kasi ku mxanisa” ni ku onha aha hi hanyako kona kumweko ni sihari. (Ekl. 8:9; Gen. 1:28) Vasiyentista vamwani va womba ti to ngu kona ha ka ti vathu va ti mahako kona mu ka 1 milwawu wa tixaka ta sihari si na va si di fuyile ka malembe nyana ya matako. Ngu toneto ta pfisiseka ti to ngu kutxani vathu va txi karateka ngu mtumbuluko. Kambe, hi nga pfa ti Jehovha a ti thembisako, ene a na “fuvisa avava va nga wonhisa mafu” ni kuhundula otshe mafu me va paradhise.—Mtu. 11:18; Isaya 35:1.

15-16. Ngu tihi ti ku susumetelako ku hi tsanisela kumweko ni Jehovha? Ningela txikombiso.

¹⁵ Hi nga pimisa totshe ati Jehovha a ti timiselako ngu malembe o tala. Jehovha a ndi na va a di hetile wubihi wotshe wa mafu ka txihi txikhati a nga ndi no txi lava. (Wona dibhokiso di di ku: “ Silo asi Jehovha a si timiselako.”) Kambe ku timisela kwakwe i kateko kwathu. Alakanya ngu txikombiso txiya. Alakanya ngu mwamna ni msikati ava va rinzelako kuveleka mwanana, kambe dhokodhela e va gela ti to mwanana wawe kha na mbi va ni wutomi wo hehuka ni ku kha na mbi hanya ngu mbimo yo lapha. Kuxayisa mwanana wuwa ku na va txikarato txa hombe, hambiketo vaveleki va mu amukela ngu lirando. Lirando lawe ngu mwanana wawe li va susumetela ti to ve tsanisela txikarato tximwani ni tximwani ti to ve mu ninga wutomi wa wunene ngu ha va kotako ngu kona.

 ¹⁶ Kufana ni mwanana wule votshe vanana va Adhamu ni Evha va velekilwe va sa hetiseka, hambi keto Jehovha wa va khatalela ngu lirando la hombe. (1 Joh. 4:19) Kambe ku ni kuhambana hagari ka vaveleki va ha ka txikombiso ni Jehovha. Jehovha a na sikota kuheta sotshe sikarato sa vathu, ni ku ene a vekile ditshiku adi a no timaha toneto. (Mat. 24:36) Lirando la Jehovha la hi susumetela ti to hi tsanisela kumweko ni nene kala magwito.

17. Txikombiso txa Jesu atxi txi nga txhamuselwa ka dibhuku da Vahebheru 12:2, 3 txi hi kuzetisa kutxani ti to hi simama hi timisela?

¹⁷ Jehovha ngene txikombiso txo hetiseka txa kutimisela. Jesu Kristu a mu etetete ngu ku hetiseka Tate wakwe. Ngu ku hi dhunda Jesu a tsanisete mapswi o nemela ni tingana mbimo yi a nga ti ka phande ya xanisa ahawa ha mafuni. (Lera Vahebheru 12:2, 3.) Txikombiso txa ku timisela ka Jehovha txi mahile ti to Jesu nene e tsanisela, se nanathu hi nga sikota ku tsanisela.

18. Ngu kuya ngu 2 Pedro 3:9 ngu yihi wuyelo yi kuho ngu kutimisela ka Jehovha?

¹⁸ Lera 2 Pedro 3:9. Jehovha wa yi ziva mbimo ayi i ku yona, to e heta wubihi ha mafuni hawa. Ngu kona ha ka kutimisela ka Tate wathu wa nzumani, ti kotekile kusengeleta dibutho da hombe da vathu, adi di hokako kona mu ka timiliyoni ti to di m’khozela ni ku m’dhumisa. Votshe va tsakile ngutu ngu ku Jehovha adi timisete yotshe mbimo yi ya ve za ve velekwa ve kula, ve gonda ngu ngene ni kutshumela ve tiningetela kwakwe. Mbimo yi yi tako Jehovha, a na tiveka ha kubasani ti to kutimisela txi vile txisungo txa txinene, mbimo yi a no hakela timiliyoni ta vathu ava va no va di tsanisete kala magwito!

19. Hi fanete kutiemisela kumaha txani? Ni ku ngu yihi txhatxhazelo hi no yi amukela?

¹⁹ Txikombiso txa Jehovha, txi hi vhuna ku hi tsanisela ngu litsako. Ti si nga ni mhaka ni kupanda ni ku xaniseka kotshe aku ku vangwako ngu Sathani, Jehovha wa simama eva “Txizimu txa makatekwa” mwendo txa litsako. (1 Tim. 1:11) Nanathu hi nga sikota kusimama hi timisela ngu litsako hi txi rinzela mbimo yi Jehovha a no sawulekisa ditina dakwe e emela wukoma wakwe e gumisa wotshe wubihi kumweko ni sikarato sotshe si hi mananako naso nyamsi. He tiemiseleni ku simama hi timisela hi si divali ti to Tate wathu wa nzumani nene wa timisela. Ngako hi txi maha toneto, hi na kuwona ku hetiseka ka mapswi ya ma ku khene: “A katekile m’thu wu a amukelako txiduko ngu kutimisela. Nguko, a di gwitile kudukwa, a na amukela m’bhoti wa wutomi, awu Mkoma a nga wu thembisa ka vale va m’randako.”—Jak. 1:12.