Tixamulo ta siwotiso sa vagondi
Ngu yahi mawonelo aya Tifakazi ta Jehovha ti fanelako ku va nawo mayelano ni masite ni maaplikativho ya kunamorara?
Jehovha a lava ti to vathu va va nga tsaka ve tidila ngu litsako ni ku ve hetisisa txixambanyo txawe ngu wutomi wawe wotshe. (Mat. 19:4-6) Ngako u txi lava kutxhadha u nga maha txani ti to u mana m’thu wo vitwa ngu didhawa da moya ti to u txhadha nayo? Kota M’vangi wathu, Jehovha wa tiziva ati hi nga mahako ti to hi humelela ko namorara ni ku tshumela hi txhadha. Hi na wona matshina a milayo o kari.
Kukhata hi fanete ku pfisisa ati Bhiblia yi ti wombako ngu ngathu. Bhiblia yi womba tiya: “Se mbilu mkanganyisi kupinda sotshe sile, yi sinile; i mani a no yi ziva kani?” (Jer. 17:9) Mbimo yi vathu vambidi va zivanako ve khata kunamorara matipfelo awe ma nga kula nguto aha ko za mmwani ni mmwani efa ngu mkwanu, ahawa ti nga mahako ti to va si alakanyi khakwati. Ngako vathu va txi maha txisungo txo lava kutxhadha ngu kona ha ka matipfelo dwe kha ti toloveli kutsimbila kwati. (Mav. 28:26) Ngu toneto hi nga wutxhari ku mbimo yi u ku ngadi u khata kunamorara u tekela ku womba to no fa ngu ngawe, mwendo ku maha sixambanyo so kari kambe mi si se zivana khakwati.
Mavingu 22:3 yi womba tiya: “Wo pfisisa wa wona phango e sisala; aniko avale vo divala va pinda ngu kona ve xaniswa.” Ngu yihi phango yi yi kuho ko thumisa masite ni maaplikativho o namorara? Dikhombo da kona vamwani va gondile ngu nzila yo panda ka vathu va vanga zivana navo nguku thumisa masite, kumbe maaplikativho yo namorara ava vanga sakana ni matipfelo awe. Vathu vamwani vo biha va tula tikonta ta falsu kasi kuzweta vathu ava va nga mbi txhariha ve va bela male. Mbimo yimwani yi vathu vo biha va va kanganyisako vamwani va tigela ti to Tifakazi ta Jehovha.
Masite mamwani ni maaplikativho o namorara ma thumisa maprograma a komputadhori, maprograma oneyo ma womba ti to ma nga sikota ku tshanganisa vathu ava va panelanako. Ina ti nga va wutxhari ku themba makomputadhori ti to hi humelela ko tekana? Ina maprograma a makomputadhori ma nga fananiswa ni matshina a milayo a Bhiblia?—Mav. 1:7; 3:5-7.
Ditshina dimwani di ku ka dibhuku da Mavingu 14:15 di womba tiya: “Txiphukuphuku txi tumela otshe mapswi, aniko m’thu wo txhariha a xolisisa otshe mapswi.” U si se ku maha txisungo txa ti to i mani u no txhadha nayo mi fanete kuzivana kha kwati ti nga karata ku ziva kwati i di m’thu wu u nga mu manana ka internet. Hambi i di ti to ma bhalelana mamesaji ni kurumelelana mifota, ina u nga ti kota ku ziva kwati m’thu eneyo! Vamwani ava va nga ti pimisa ti to va mani m’thu wa ditshuri va ta wika msana mbimo yi va nga mziva to i mani, mbimo yi va nga manana khohe ngu khohe.
M’bhali mmwani wa masalmo a wombile tiya: “Kha ni zumbi ni va va randako makuhu, kambe kha ni tsimbili ni vakanganyisi.” (Mas. 26:4) Vamwani va ti wona ti sa biha kuwomba makuhu ka ti va bhulako ku mba mani kasi kudhaneta vamwani. Va sisa ati vona i ku tona ngu ditshuri mwendo kwambi ti kombisa mbimo yi va ku ka internet. Hambiku vathu vamwani va nga wombako ti to tifakazi ta Jehovha ina wa tsaniseka ti to va bhabhatisilwe? Ina mbo vitwa ngu didhawa da moya? Ina va ni wuxaka vo tsana ni Jehovha? Ina va xonipwa dibanzani? Ina vathu vonevo hi nga sikombiso sa walo mwendo “vangana vo biha.” (1 Vak. 15:33; 2 Tim. 2:20, 21) Ina va txhatxhekile ku va nga txhadha ngu kuya ngu Bhiblia! Ti lava u mana tixamulo ta siwotiso soneso kambe ti nga karata ku ti mana nga ku hi si mani mwanathu awu amu zivako khakwati awu a nga wombako to kari ngu ngene. (Mav. 15:22) Ditshuri ti to txithumi txo thembeka ka Jehovha txi nge thuki txi pimisa ku va “ha dikangeni kumweko ni va va si kholwiko.”—2 Vak. 6:14; 1 Vak. 7:39.
Aku hi wonako ti to ku ni tiphango kuthumisa maaplikativho mwendo masite o namorara, ina ku ni tinzila timwani a ti hi nga ti thumisako kasi kuzivana ngu tona ati ti nga hi kongomisako ka txhadho wo tumeleleka? Se hi nga manisa kutxani m’thu wa mnene awu hi nga txhadhako nayo. Loko ti txi tumelelwa kutshangana wukhalo wumwewo vanathu vanga sikota ku zivana mbimo yi va mananako mitshanganoni, masembleya, makongresu ni mitshangano yimwani.
Mbimo yi mi yako mi txi zivana mi na wona ti to ina makungo anu ni ti mi ti lavako ta yelana kani
Ngako ti si koteki ku tshangana wukhalo wumwewo ngu sivangelo so fana ni COVID-19 hi thumisa sithumiswa sa eletroniko ti to hi xalela mitshangano kona ku ni mikhanjo yo hi nga zivana ni va mwanathu va va nga mbi tekwa. Hi di mitshanganoni hi nga sikota kuwona nzila yi va mahako ngu yona sienge sawe, miwomba-wombo ni nzila yi va kombisako likholo lawe ngu tixamulo tawe. (1 Tim. 6:11, 12) Msana ka mitshangano ta koteka ku hi bhula kasi ku hi zivana kwati. Mbimo yi vanathu va tshanganako ngu kuthumisa sithumiswa sa eletroniko, ti nga koteka kuwona nzila yi mwanathu eneyo a thumisanako ngu yona ni vanathu ni kutumbula to a zumbisile ku txani! (1 Pedro 3:4) Ngu kutsimbila ka mbimo mi na ya mi zivana khakwati se mi na tumbulana makungo anu ni ku wona ti to ina ma panelana kani.
Ngako ava va lavako kunamorara va txi thumisa matshina a milayo a Bhiblia a ti to ve xola m’thu wu va mu lavako va na wuyelwa ngu mkhanjo wo wona ku hetiseka ka mapswi ya ma ku khene: “Awule a manako msikati [wamwamna] a mana txilo txatxinene, kambe a mani kukatekiswa ngu MKOMA.”—Mav. 18:22.
