1. Ngu tihi ati Jehovha a nga kumahela?

TI MAHISILE kutxani ku awe u va mmweyo wa Tifakazi ta Jehovha? Kukhata ti nga maha u di pfite “mahungu a manene” ka vaveleki vako, vathumi kuloni mwendo vagondi kuloni. Ti nga maha kambe u to txhumayelwa mtini kwako. (Marku 13:10) Msana keto, mmweyo wa vahuweleli a ti emisete kuheta mbimo ni nawe u txi gonda Bhiblia. Mbimo yi u nga ti gonda Bhiblia u khatile kuranda Jehovha ni kutshumela u wona to nene wa kuranda. Ngu toneto Jehovha a kundidete kwakwe, akuwa se u ku mgondiswa wa Kristu u ni themba yo ta mana wutomi wo mbi na magwito. (Joh. 6:44) Kha ti kanakanisi ti to awe wa bonga Jehovha ngu kuva a di thumisile m’thu mmwani ti to e ta kugondisa ditshuri ni kuva a di kutumelete ti to u va txithumi txakwe.

2. Hi na bhula ngu txani ka gondo yiya?

² Aku se hi zivako ditshuri hi ni lungelo yo vhuna vamwani ni vona ti to ve ta tsimbila ka nzila ayi yi yisako wutomini. Ti nga hi hehukela kutxhumayela ngu mti ni mti kambe hi tipfa ti txi karata kukhata ni kutsimbitisa gondo ya Bhiblia. Ina ngu toneto u ti pfisako tona? I di toneto, gondo yiya yi na kuvhuna ngutu. Hi na bhula ngu ati ti hi susumetelako ku hi maha vagondiswa. Hi na tshumela hi wona kambe sikarato asi hi nga tshanganako naso asi si nga hi mahako hi thava kutsimbitisa sigondo. Kukhata he wone ti to ngu kutxani hi sa fanela kuva vatxhumayeli dwe kambe hi va vagondisi va mahungu a manene.

3. Ngu kutxani hi txi txhumayela?

³ Mbimo yi Jesu a nga ti ha mafuni a ningile valondeteli vakwe  sirumo simbidi. Kukhata ene a va gete to ve txhumayela mahungu a manene a Mfumo ni ku va komba ati va nga ti fanela kumahisa tona. (Mat. 10:7; Luka 8:1) Ngu txikombiso, Jesu a lulamisete vagondiswa vakwe ati va nga ti fanete kumaha ngako vathu va txi tumela mwendo kulamba mahungu a Mfumo. (Luka 9:2-5) Ene a profetile ti to mthumo wo txhumayela wu ndi nava wa hombe, ngu toneto a gete vagondiswa vakwe ti to va ndi na ningela “wufakazi ka yotshe mifumo.” (Mat. 24:14; Mith. 1:8) Ti si nga ni mhaka ni ti vathu va hi ñolisako tona kota vagondiswa hi fanete kugela votshe vathu mayelano ni Mfumo wa Txizimu ni ti wu no ti maha.

4. Ngu kuya ngu dibhuku da Matewu 28:18-20, ngu txihi txirumo txa wumbidi atxi Jesu a nga ninga vagondiswa vakwe?

⁴ Ngu txihi txirumo txa wumbidi atxi Jesu a nga hi ninga? Ene a gete valondiseli vakwe ti to ve gondisa ava va tsakelako ti to ve vekisa sirumo asi ene a nga hi leleta sona. Kambe ina txirumo txiya txo txhumayela ni kugondisa txi tiya ka Makristu o khata dwe nga ha vamwani va wombako ngu kona? Ahim-him, Jesu a wombile ti to mthumo wuwa wu ndi na simama “kala kugumani ka mafu.” (Lera Matewu 28:18-20.) Ti woneka nga Jesu a ningete txirumo txiya mbimo yi a nga humelela ka vagondiswa ava va nga txi pinda kona mu ka 500. (1 Vak. 15:6) Ni ku ka dibhuku da Mtuletelo Jesu a ti vekile hakubasani ti to vagondiswa vakwe va fanete kuvhuna vamwani ti to ve gonda ngu Jehovha.—Mtu. 22:17.

5. Ngu kuya ngu dibhuku da 1 Vakorinto 3:6-9, Paulo a fananisile ngu nzila yihi mthumo wo txhumayela ni wo maha vagondiswa?

⁵ Mpostoli Paulo a fananisile mthumo wo maha vagondiswa ni wo dima, i ku ti to kha ha fanela kugwitela ko phaya dwe. Ene a khumbutisile Vakorinto a txi khene: “Ani ni phayile, Apolosi a si theletete mati . . . Anu mi wudimi wa Txizimu.” (Lera 1 Vakorinto 3:6-9.) Kota vathumi va “wudimi wa Txizimu” kha ha fanela kugwitela ko phaya timbewu dwe, hi fanete kutshumela hi ti theletela mati ni ku ti wonelela mbimo yi ti kulako. (Joh. 4:35) Ni ku athu ha tiziva ti to Jehovha ngene a mahako ti to timbewu ti kula.

6. Mbimo yi hi gondisako vathu hi fanete ku va vhuna ve maha txani?

⁶ Athu hi xoletela ava va ku ni “fanelo ya wutomi wo mbi guma.” (Mith. 13:48) Ti to hi vhuna vathu vonevo ve va vagondiswa hi fanete ku va vhuna ti to 1) ve pfisisa, 2) ve kholwa ni ku 3) ve thumisa ati va ti gondako amu ka Bhiblia. (Joh. 17:3; Vakl. 2:6, 7; 1 Vat. 2:13) Votshe dibanzani va nga vhuna txigondo ngu ku txi vekela txikombiso txa lirando ni ku va maha ve tipfa va txi amukeleka dibanzani. (Joh. 13:35) Awu a tsimbitisako txigondo ti nga lava e heta mbimo yo lapha ti to e vhuna txigondo txi xula “makungo a mipalavanya” i ku tigondo ta makuhu ati ti nga mila mikoluti. (2 Vak. 10:4, 5) Ti to m’thu e hokela ko bhabhatiswa ti nga teka mbimo yo tala ti to e maha kutxitxa aku ku lavekako. Hambi keto mizamo yoneyo nja lisima.

7. Nji txani txi hi susumetelako ti to hi pateka ka mthumo wo txhumayela ni kumaha vagondiswa?

⁷ Ngu kutxani hi txi sengemela ka mthumo wo maha vagondiswa? Txo khata, nguko ha mu dhunda Jehovha. Ngako u txi maha totshe ati u nga ti kotako ti to u engisa txirumo txo txhumayela ni kumaha vagondiswa, u tiveka hakubasani ti to wa txi randa Txizimu. (1 Joh. 5:3) Alakanya ngu tiya, lirando lako ngu Jehovha ngu lona li nga kususumetela ti to u txhumayela ngu mti ni mti. Toneto kha ti hehuki.  Alakanya ngu ditshiku do khata u nga peka ditimba ngu mti ni mti u txi txhumayela. Eto kha ta ku hehukela! Ti nga maha u di karatekile. Kambe u txi tiziva ti to i mthumo awu Jesu a lavako u wu maha. Ngu toneto u engisile txirumo txakwe. Ngu kutsimbila ka mbimo mthumo wo txhumayela wu yite wu txi kuhehukela. Se hi nga khathu txani ngu kutsimbitisa sigondo? Ina ta kukaratela kumaha toneto? Ti di ngeto, kombela Jehovha ti to e kuvhuna u xula txikarato txonetxo. Tsaniseka ti to Jehovha a na kuvhuna ni ku kuninga mtamo ti to u kota kukhata txigondo txa Bhiblia.

8. Ngu kuya ngu dibhuku da Marku 6:34, nji txani tximwani txi hi susumetelako kugondisa vamwani?

⁸ Txa wumbidi atxi txi hi susumetelako ku hi gondisa ditshuri, i lirando li hi ku nalo ngu vaakelani. Dikhambi dimwani Jesu ni vagondiswa vakwe va ti karate msana kuva va di hetile mbimo yo lapha va txi txhumayela. Vona va ti lava wukhalo wo dikha kasi ku ve ya humula, hambi keto txitshungu txi ti va londetela. Ngu kupfela wusiwana vathu vale Jesu a tshumete e “gondisa timhaka to tala.” (Lera Marku 6:34.) Ngu kutxani Jesu a di ti karatile ngu nzila yoneyo? Nguko Jesu a ti vekile wukhaloni wa vathu vonevo. Ene a wonile ti to va ti karatekile se a lavile ku va vhuna ngu ku va ninga themba. Kumaheka ati ti fanako ngu vathu. Ngu hahanze va nga woneka nga va tsakile, kambe vona va fana ni tinvuta ati ti si ngako ni m’dyisi ati ti lavako mkongomisi. Paulo a wombile ti to vathu vo fana ni vava va ka txiemo txo pwata Txizimu ni kwa mbi na themba. (Vaef. 2:12) Vona va ka ‘nzila ya kuanama yi yisa kulovani.’ (Mat. 7:13) Hi txi wona txiemo txa moya txa vathu va wukhalo wathu lirando ni wumbilu si na hi susumeta ku hi va vhuna. Nzila ya yinene yo va vhuna ngu ku va tsimbitisela gondo ya Bhiblia.

9. Ngu kuya ngu Vafilipiya 2:13, ngu txihi txivhuno atxi Jehovha a nga kuningako?

⁹ Kutshimbitisa gondo ya Bhiblia ti lava mbimo. Se ti nga maha i di toneto ti mahako vamwani ti va karatela kukhata gondo ya Bhiblia. Ngako etxo i di txikarato txako gela Jehovha a ti u ti pfisako tona. Mkombele e kuninga mixuvo yo mana m’thu wo mtsimbitisela gondo ya Bhiblia. (Lera Vafilipiya 2:13.) Mpostoli Johani wa hi tsanisekisa ti to Txizimu txa xamula mikombelo ayi yi tsimbitisanako ni kudhunda ka Txona. (1 Joh. 5:14, 15) Ngu toneto, tsaniseka ti to Jehovha a na kuvhuna ti to u va ni mixuvo yo sengela ka mthumo wo maha vagondiswa.

10-11. Ngu txihi txi nga ku tsivelako kutsimbitisa txigondo?

¹⁰ Athu hi txi tekela ha msungo txirumo txo maha vagondiswa hambiku mbimo yimwani hi mananako ni sikarato asi si nga hi mahako hi si tikoti kumaha nga ha hi nga ti lava ngu kona. He woneni simwani sa sikarato soneso ni nzila yo si xula.

¹¹ Siemo sathu si nga hi maha hi si hokeleli ati hi nga ti ti lavisa tona. Ngu txikombiso vahuweleli vamwani va kute ngu tanga mwendo kuxaniswa ngu malwati. Ina awe u ka txikarato txonetxo. I di toneto, alakanya ngu tigondo ati hi nga ti thavisa ka mtungo wuwa wa COVID-19. Hi gondile ti to ta koteka kutsimbitisa txigondo ngu kuthumisa telefone. Ngu toneto ti nga koteka kutsimbitisa gondo ya Bhiblia ti si sungi u huma mtini kwako. I si nga eto dwe, vamwani va tilava kuva ni gondo ya Bhiblia kambe kha va maneki ka mbimo yi hi tolovelako kuhuma ngu yona thembwe. Vamwani va maneka ni mixo ngutu mwendo ni wusiku ngutu. Ina awe u nga ti tsakela kutsimbitisa gondo ngu timbimo tiya? Alakanya  ngu Nikodemo ene a lavile kuwomba-womba ni Jesu ni wusiku ngutu se Jesu a tiemisete kuwomba-womba nayo ngu mbimo yoneyo.—Joh. 3:1, 2.

12. Ngu tihi ti nga hi tsanisako ti to hi nga sikota kuva vagondisi va vanene?

¹² Kutipfa u si na wusikoti wo tsimbitisa txigondo. Ti nga maha u txi tipfa nga u fanete kuengetela wuzivi mwendo wusikoti kota m’gondisi u si se khata kugonda Bhiblia ni m’thu. Ngako u txi tipfisa eto, wona silo siraru asi si nga kuvhunako. Txo khata, Jehovha a kuwona u di ni wusikoti wo gondisa vamwani. (2 Vak. 3:5) Txa wumbidi, Jesu awu a nga ‘ningwa mtamo wotshe nzumani ni ha mafuni’ a ku tumelete ti to u gondisa. (Mat. 28:18) Txa wuraru, awe u nga themba txivhuno txa vanathu. Jesu a txi gondisa ati a nga ti gondisilwe ngu Tate wakwe nanawe u nga maha ati ti fanako. (Joh. 8:28; 12:49) Kuengetela keto, u nga kombela muwoneleli wa mtxawa wako wa thembwe, nyaphandule mwendo muhuweleli awu a ku ni wusikoti ti to e kuvhuna kukhata ni kutsimbitisa gondo ya Bhiblia. Nzila yimwani yo xula kuthava ngu huma thembwe kumweko ni vanathu ava va ku ni wusikoti wo tsimbitisa sigondo ti to nawe u vhuneka.

13. Ngu kutxani ti txi lava hi tolovela mamahelo a maphya?

¹³ Kukarateka ngu mamahelo ni sithumiswa sa siphya. Nzila yi hi tsimbitisako ngu yona sigondo yi txitxile. Dibhuku adi hi di thumisako kutsimbitisa ngu dona sigondo konkuwa ngu di di ku: Hanya wutomi wo tsakisa kala kupinduka! Nzila ya kutilulamisela ni kutsimbitisa sigondo kha yi ngadi yi txi fana. Hi gonda ma paragrafu madotho, hi bhulisana ngutu ni txigondo. Mbimo yi hi gondisako, hi thumisa ngutu mavhidhio ni tifarameti timwani to gondisa ati ti ku ka JW Library^®. Ngako u si tikoti kuthumisa kwati tifarameti tiya, kombela mwanathu mmwani ti to e kuvhuna ti to u kota ku si thumisa. Athu vathu ta hi karatela kutxitxa ati hi nga ti tolovela. Ngu toneto kha ti hehuki kutolovela mamahelo a maphya. Kambe ngu kuvhunwa ngu Jehovha ni vamwani hi na sikota ku ti fananisa ni kutxitxa, se hi mana litsako mbimo yi hi tsimbitisako sigondo sa Bhiblia ni vamwani. Nga ha nyaphandule mmwani a nga womba ngu kona, mamahelo awa a maphya “ma tsakisa ka txigondo ni ka m’gondisi.”

14. Ngako hi txi thuma ka thembwe yo karata, ngu tihi ati hi fanelako ku ti alakanya ati ti ku ka 1 Vakorinto 3:6, 7 ati ti nga hi tsanisako?

¹⁴ Kuhanya amu ti si hehukiko kukhata gondo ya Bhiblia. Ti nga maha vathu va si ma tsakeli madungula aya hi ma txhumayelako. Nji txani atxi txi nga hi vhunako kuya masoni hi thuma hi di khululekile? Ka mafu awa a Sathani siemo sa vathu si nga txitxa ngu txikuluveta, se eto ti nga maha ti to vathu ava va nga ti si tsakeli kukhatani se va di ti emisete ku hi engisa. (Mat. 5:3) Vamwani va nga ti lamba kuteka mabhuku athu va nga txitxa ve tumela kugonda Bhiblia. Hi fanete kutshumela hi khumbula ti to Jehovha ngene nyamne wa kuelula. (Mat. 9:38) Jehovha a lava ti to hi simama hi phaya ni kutheletela mati, kambe ene ngene a mahako ti to ti kula. (1 Vak. 3:6, 7) Ngako konkuwa u si tsimbitisi gondo ya Bhiblia u nga godholi. Khumbula ti to Jehovha a na kutxhatxhazela ngu mizamo yako i si nga ngu mtengo wa vathu ava u va manako! *

15. Jehovha a tipfisa kutxani ngako m’thu a txi tumela ditshuri e tshumela e gela vamwani?

¹⁵ Jehovha wa tsaka ngako m’thu a txi tumela ditshuri e gwita e gela vamwani. (Mav. 23:15,  16) Ti hakubasani ti to Jehovha wa tsaka ngutu a txi wona ati ti mahekako nyamsi! Ngu txikombiso, hambiku hi ku ka mtungo awu wu dyisetako ha mafuni kotshe mthumo wa dilembe wa 2020 wo komba ti to kutsimbitisilwe sigondo asi si hokako mu ka 7.705.765, eto ti mahile ti to vathu va kona mu ka 241.994 ve tiningetela ni kubhabhatiswa. Se vagondiswa vonevo va vaphya va na tsimbitisa sigondo sa Bhiblia ni kumaha vagondiswa vamwani. (Luka 6:40) Ti hakubasani ti to Jehovha wa tsaka a txi hi wona hi txi pateka ka mthumo wo maha vagondiswa.

16. Ngu tihi ati hi nga zamako ku ti maha?

¹⁶ Kumaha vagondiswa ti lava mizamo ya hombe,kambe Jehovha a nga hi vhuna ku hi gondisa vathu ve mu thumela. Zama kumana m’thu wo mu gondela Bhiblia hambi i txo va mmweyo. Ngako hi txi tikaratela kukhata sigondo sa Bhiblia ni votshe ava hi va manako hi nga thuka hi mana vathu vo tsakela kugonda. Jehovha a na katekisa mizamo yoneyo.

17. Vanathu vo tala va tipfisa kutxani ngu mthumo wo txhumayela?

¹⁷ Kutxhumayela ni kugondisa vamwani i lungelo ya hombe ngutu! Mthumo wuwa wa hi tisela litsako. Mpostoli Paulo a vhunile vathu vo tala khe Tesalonika ve va vagondiswa va Jesu. Litsako a li a nga li mana ka mthumo wuwa li mmahile e womba tiya: “I mani mmwani, hahanze kwanu, awu i ku txithembo txathu, litsako lathu, m’bhoti wathu wa kupfaliswa masoni ka Mkoma wathu Jesu, ngu ditshiku da kuta kwakwe, kani? Kha ditshuri, anu mi kupfaliswa kwathu ni litsako lathu.” (1 Vat. 2:19, 20; Mith. 17:1-4) Ngu ha kufanako, vanathu vo tala nyamsi va li mana litsako ngu kona ha ka mthumo wuwa. Mwanathu Stéphanie awu ene kumweko ni mwamna wakwe va nga vhuna vathu vo tala ve bhabhatiswa a khene: “Kha ti ngaho ti tsakisako ngutu kupinda kuvhuna m’thu e ningetela wutomi wakwe ka Jehovha.”