1. Nji txani txi hi hambanisako ni sihari?

LIVHALO lathu i ningo yo sawuleka hi nga ningwa ngu Txizimu. Ngu lona li hi mahako hi si fani ni sihari. Adhamu ni Evha va ti nalo livhalo. Hi ti zivisa kutxani? Hi ti ziva nguko mbimo yi va nga ndaka mlayo wa Txizimu, va to ya barama. Tivhalo tawe ti ti peka.

2. Livhalo lathu li nga fana ni bússola ngu nzila yihi? (Wona mfota wu wu ku makhatoni.)

² Livhalo lathu kuwombwa matipfelo athu ya ma hi kongomisako ka ta tinene ni to biha ka wutomi wathu. Ngako livhalo li sa gondiswa kha kwati li nga fana ni bússola yi yi nga onheka (i ku mtxhini wu wu thumelako ku kombisa nzila ka vatsimbitisi va sitimela sa mati ni maganuni.) Txitimela txi nga pengiswa ngu mavimbi a linene. Kambe bússola ayi yi thumako kwati yi nga vhuna mtsimbitisi wa tximela ti to a si timeli. Ngu kufana, ngako hi txi gondisa kha kwati livhalo lathu, li nga hi kongomisa kwati.

3. Ngako livhalo li si gondiswi kwati ku nga humelela txani?

 ³ Ngako livhalo lathu li sa gondiswa kwati, li na mbi hi bhasopisa ka to biha. (1 Timoti 4:1, 2) Li nga hi kholwisa ti to “to biha ndinene.” (Isaya 5:20) Jesu a gete vagondiswa vakwe a txi khene: “Kambe ya ta mbimo yi, awu a no mi daya, a no pimisa ti to a thumela Txizimu.” (Johani 16:2) Eto ngu ti ava va nga daya Sitefani va nga ti pimisa tona. (Mithumo 6:8, 12; 7:54-60) Se kupinda mbimo yo lapha, vakhongeli vo tala va txi maha timhaka to biha to fana ni kudaya, va txi womba ti to va maha kuranda ka Txizimu. Kambe ngu ditshuri da kona, ati va mahako tona ti lwisana ni milayo ya Txizimu. (Eksodha 20:13) Se livhalo lawe li va xengile!

4. Hi nga ti zivisa kutxani ti to livhalo lathu kha li hi xengi?

⁴ Hi nga ti zivisa kutxani ti to livhalo lathu kha li hi xengi? Milayo ni matshina a kona ma “vhuna kugondisa, kulaya, ni kukawuka ni kutolovetisa tinzila to lulama.” (2 Timoti 3:16) Hi fanete hi gonda Bhiblia mbimo yotshe, hi alakanyisisa kwati ngu ti yi ti wombako, ni ku ti thumisa ka wutomi wathu. Hi txi maha toneto, hi na gonda kualakanya nga ti Jehovha a alakanyisako tona. Ngu toneto, hi nga tsaniseka ti to livhalo lathu kha li hi xengi. Konkuwa he bhuli ngu ti to hi nga yi thumisisa kutxani milayo ya Jehovha ni matshina a kona ti to hi gondisa livhalo lathu.

5, 6. Milayo ya Txizimu yi hi vhunisa kutxani?

⁵ Ti to hi vhunwa ngu milayo ya Txizimu, hi nga ku yi lera mwendo ku yi zivetela dwe. Ti lava hi yi randa ni ku yi xonipha. Bhiblia yi khene: “Vengani wubihi, mi randa wunene.” (Amosi 5:15) Kambe hi nga mahisa kutxani? Ti lava hi gonda kuva ni mawonelo a Jehovha. Ngu txikombiso, ngako u txi lwala, dhokodhela a txi kugela ti to ti lava u dya sakudya sa dihanyo, u txhukumisa mmidi, ni kutxitxa timwani ka wutomi wako. U txi londisela ti a nga kugela, ti na kuvhuna! Ina khu tsaki ngu sialakanyiso sa dhokodhela?

⁶ Ngu kufana, M’vangi wathu a hi ninga milayo ayi yi hi vhikelako ka wuyelo yo biha yo maha txionho yi tshumela yi tshukwatisa wutomi wathu. Ngu txikombiso, Bhiblia yi hi gondisa ti to hi si hembi, hi si kanganyisi, hi si pi, mwendo kumaneka ni txo maha atxi txi tsimbitisanako ni madhimoni. (Lera Mavingu 6:16-19; Mtuletelo 21:8) Ngako hi txi wona wuyelo ya yinene yo engisa milayo ya Jehovha, lirando lathu ngu ngene ni milayo yakwe la kula.

7. Sikombiso sa mu ka Bhiblia si hi vhunisa kutxani?

⁷ Kasiku hi gonda ti to ngu tihi ta tinene ni to biha, ina ti lava hi wona wuyelo yo funya milayo ya Txizimu? Ahim-him. Hi nga gonda ka tiphazamu ati va kale va nga ti maha. Sikombiso soneso si ho mu ka Bhiblia. Mavingu 1:5 yi khene: ‘Txhari ya engisa, ni kukula mu ka wutxhari.’ Wutxhari wonewo hi wu gonda ka Txizimu ni ku mbwa wunene ngutu! Ngu txikombiso, alakanya ati Dhavhidha a nga xuphekisa tona mbimo yi a nga mbi engisa Jehovha e maha wugango ni Bhate-Sebha. (2 Samuwele 12:7-14) Mbimo yi u lerako toneto ti wotise: ‘Dhavhidha a di mahile txani ti to e vayilela sikarato soneso? Ni txi thuka ni  manwa ngu tona nani, ni nga maha txani? Ngako ni txo dukwa kumaha wugango, ina ni nga fana ni Dhavhidha mwendo Josefa kani?’ (Genesisi 39:11-15) Ngako hi txi alakanyisisa kha kwati ngu wuyelo yo panda ya txionho, hi na ‘venga wubihi’ ngutu ta tinene.

8, 9. a) Livhalo li hi vhuna kumaha txani? b) Milayo ya Txizimu yi nga li vhunisa kutxani livhalo lathu?

⁸ Athu hi zumbela kule ni ti Txizimu txi ti vengelako. Kambe hi nga maha txani ngako hi di ka txiemo atxi ku si ngako ni mlayo wa Bhiblia wu wu nga kongoma? Hi na ti zivisa kutxani ati Txizimu txi ti lavako? Hi di tumelete Bhiblia yi gondisa livhalo lathu hi na maha txisungo txa wutxhari.

⁹ Aku Jehovha a hi dhundako a hi ningile matshina a milayo aya ma nga tsimbitisako livhalo lathu. A khene: “Ani ngani MKOMA, Txizimu txako, a wu a ku gondisako ti ti vhunako, ni ku kukomba nzila yi u fanelako kutsimbila ngu yona.” (Isaya 48:17, 18) Ngako hi txi alakanyisisa ngutu ngu matshina a milayo ya Bhiblia, hi tshumela hi ma tumelela ti to me gwesa mbilu yathu, hi nga lulamisa livhalo lathu. Toneto ti hi vhuna kumaha sisungo sa wutxhari.

10. Ditshina da mlayo nji txani? Jesu a ma thumisile ngu nzila yihi matshina a milayo a txi gondisa?

¹⁰ Ditshina da mlayo, ditshuri da makhato adi di tsimbitisako mipimiso yathu, di hi  vhuna kumaha sisungo sa sinene. Kuziva matshina a milayo ya Jehovha ti hi vhuna kupfisisa nzila yi a pimisako ngu yona ni ti to ngu kutxani a di vekile milayo yo kari. Jesu a thumisile matshina a milayo ti to e gondisa vagondiswa vakwe ti to mawonelo ni simaho si ni wuyelo. Ngu txikombiso, a gondisile ti to kuhenya ku nga maha ti to m’thu e daya ni ku mialakanyo yoneyo yo biha yi nga yisa ka wugango. (Matewu 5:21, 22, 27, 28) Ngako hi txi tumela kutsimbitiswa ngu matshina a milayo ya Txizimu, livhalo lathu li na gondiswa kwati, se hi na maha sisungo asi si dhumisako Txizimu.​—1 Vakorinto 10:31.

11. Ngu kuhi kuhambana aku ku nga manekako ka mhaka ya livhalo?

¹¹ Aku Makristu otshe ma gondisako livhalo la ona ngu Bhiblia, ti la kuwomba ti to ka totshe va na ni mawonelo o fana? Ahim-him. Ngu txikombiso, mhaka yo sela wusuke. Bhiblia kha yi wombi ti to kusela ti bihile, kambe yi hi txharihisa ti to hi si seli ngutu hi leva. (Mavingu 20:1; 1 Timoti 3:8) Kambe ina toneto ti lava kuwomba ti to Mkristu awu a si seliko ngutu, kha ti lavi e alakanya ngutu mbimo yi a mahako txisungo txakwe? Ahim-him. Hambi livhalo lakwe li txi mu tumelela kusela, a fanete e alakanya ngu livhalo la vamwani.

12. Varoma 14:21 yi nga hi vhunisa kutxani kuxonipha livhalo la vamwani?

¹² Paulo a kombisile ti to hi fanete hi xonipha livhalo la vamwani mbimo yi a nga khene: “Ti tshurile ngako u si dyi nyama, u si seli vhinya, u si mahi txilo txihi ni txihi txi khuvekisako mkwanu.” (Varoma 14:21) Se, hambiku ti nga mbi biha kusela wusuke, hi fanete hi ti emisela kuleka fanelo yathu ngako hi txi ziva ti to hi txi sela ti na karata livhalo la vanathu. Ti nga maha mwanathu mmwani i ti didevi, se mbimo yi a gonda ditshuri e sawula kuleka kusela. Hi ndina na tsakela ti to hi si mahi txilo atxi txi nga thukako txi mu phazamisa e tshumelela ka simaho sakwe sa kale. (1 Vakorinto 6:9, 10) Ngako a txo thuka e hi endela, ina hi nga m’sinzisa ku e sela, hambi a txi lamba? Ahim-him!

13. Timoti a ti kombisile ngu nzila yihi ti to wa xonipha livhalo la vamwani ti to e va vhuna ve tumela mahungu a manene?

¹³ Mbimo yi Timoti i nga ti ngadi mfana, a tumete kuyiswa wukwerani hambiku a nga txi tiziva ti to ta panda. Ene a txi ti ziva ti to wukwera i ti wa lisima ka Vajudha vale a nga ti lava ku va txhumayela. Kufana ni Paulo, Timoti a si ti lavi kuhenyisa vamwani. (Mithumo 16:3; 1 Vakorinto 9:19-23) Ina nawe u ti emisete ku ti karata ti to u vhuna vamwani?

14, 15. a) Hi nga mahisa kutxani ti to hi vitwa ngu didhawa da moya? b) Mkristu wu a nga vitwa a va ñolisa kutxani vamwani?

¹⁴ Mbimo yotshe ti lava hi ‘leka tigondo ta makhato a dipswi da Kristu’ kambe “hi ya masoni ni tigondo to hetiseka [“hi vitwa  ngu didhawa da moya,” Tradução do Novo Mundo]. (Vahebheru 6:1) Malembe ya hi ku nawo hi di tifakazi hi nga wona ma kombisako ti to hi vitute ngu didhawa da moya. Ti lava hi ti karata. Ti lava hi simama hi kula ka wuzivi ni ka kupfisisa kwathu. Ti lava hi lera Bhiblia ditshiku ni ditshiku. (Masalmo 1:1-3) Ngako hi txi lera Bhiblia ditshiku ni ditshiku, hi na yi pfisisa kwati milayo ya Jehovha ni matshina a kona.

¹⁵ Ngu wuhi mlayo wa hombe ngutu ka Makristu? Ngu lona lirando. Jesu a gete vagondiswa vakwe a txi khene: “Ngu toneto, va no mi zivisa tona ti taku mi vagondiswa vangu: Ngako mi txi randana.” (Johani 13:35) Lirando li dhanwa ku “mlayo wu i ku wa hombe” ni ku “ngu lona ditshina da mlayo.” (Jakobe 2:8; Varoma 13:10) Kha ti hi xamalisi aku lirando i ku la lisima ngutu nguko Bhiblia yi womba ti to “Txizimu, Lirando.” (1 Johani 4:8) Ka Txizimu, lirando li pinda matipfelo o kari. Txizimu txi kombisa lirando la txona ngu mithumo. Johani a ti khene: “Lirando la Txizimu li ti wonekisisile tiya kwathu: Txizimu txi rumete Mwanana wa txona wa mmweyo ekha ha mafuni, kasiku athu hi txi hanya ngu ngene.” (1 Johani 4:9) Ngako hi txi kombisa lirando ka Jehovha, ka Jesu, ka vanathu, ni ka vathu vamwani, hi kombisa ti to hi Makristu o vitwa.​—Matewu 22:37-39.

16. Ti mahisa kutxani ti to matshina a milayo me va ni lisima ngako hi txi vitwa ngu didhawa da moya?

¹⁶ Ngako hi di vitute ngu didhawa da moya, matshina a milayo ma na va a lisima ngutu kwathu. Mlayo wu thuma ka mhaka yo kari basi, kambe ditshina da mlayo  di thuma ka timhaka to hamba-hambana. Ngu txikombiso, mwanana ti nga maha a si ti pfisisi ti to ku va mngana wa vathu vo biha ti bihile, se vavekeki vakwe va fanete ve m’vekela milayo ti to yi m’vhikela. (1 Vakorinto 15:33) Kambe ti to mwanana e vitwa, ti lava e gonda kuthumisa matshina a milayo ya Bhiblia. Matshina onewo ma na mu vhuna kusawula vangana va vanene. (Lera 1 Vakorinto 13:11; 14:20.) Ngako hi txi alakanyisisa ngutu ngu matshina a milayo ya Bhiblia, livhalo lathu ni lona hi na li themba. Hi na ti pfisisa kha kwati ati Txizimu txi ti lavako ka txiemo tximwani ni tximwani.

17. Ngu kutxani hi nga wombako ti to hi ni sotshe so hi vhuna kumaha sisungo sa wutxhari?

¹⁷ Hi ni silo si si nga hi vhunako kumaha sisungo asi si tsakisako Jehovha. Amu ka Bhiblia hi mana milayo ni matshina a milayo aya ma hi vhunako ti to hi “lulamiselwa ka yotshe mithumo ya yinene.” (2 Timoti 3:16, 17) Matshina a milayo ya Bhiblia ma hi vhuna kuziva ati Jehovha a ti alakanyako. Kambe ti to hi ma mana ti lava hi ti karata. (Vaefesu 5:17) Ku ni simwani asi si nga hi vhunako ti to hi ma mana. So fana ni Índice das Publicações da Torre de Vigia, Guia de Pesquisa para Testemunhas de Jeová, Watchtower Library, BHIBHILIYOTEKA YA SITE YA WATCHTOWER ni aplicativo ya JW Library. Ngako hi txi thumisa silo soneso ka gondo yathu mwendo ka wukhozeli wa mwaya, hi na wuyelwa.

18. Ngu yihi wuyelo yo thumisa milayo ya Jehovha?

¹⁸ Ngako hi txi thumisa milayo ya Jehovha, wutomi wathu wa tshukwala ngutu! Masalmo 119:97-100 yi khene: “MKOMA, mlayo wako na wu randa ngutu! Na wu alakanyela otshe masiku. Sirumo sako yotshe mbimo si ni nani, se sa ni ninga kuziva ngutu kupinda valala vangu. Na pimisa ngutu kupinda votshe vagondisi vangu, nguko ni zumba ni txi alakanya ngutu ngu sileleto sako. Ngu toneto, na engisa ngutu kupinda madhota, nguko na xayisa sileleto sako.” Ngako hi txi heta mbimo hi txi alakanyisisa ngu milayo ya Jehovha ni matshina a kona, hi na maha sisungo ngu wutxhari ni kupfisisa. Ni ku ngako hi txi thumisa milayo ni matshina a kona ti to hi gondisa livhalo lathu, hi na va “ni wuthu wa kuhetiseka madingano ni mpimo wa txiemo txa kuhetiseka txa Kristu.”​—Vaefesu 4:13.