1. Ngu txihi txivangelo atxi txi hi mahako hi tsaka?

HA TSAKA hi txi pfa to malanda a Txizimu ma woninga! Ka dilembe do pinda vathu va Jehovha va gondete Bhiblia vathu va va pindako 10.000.000. Ni ku timiliyoni ta vathu ava va tsakelako va tile ka Txialakanyiso ni ku va gondile ngu ningo ya Jehovha ya lirando ya mtirulo.​—1 Johani 4:9

2, 3. a) Nji txani txi si hi vhaleliko kuwoninga? b) Hi na bhula ngu txani ka msungo wuwa?

² Ha mafuni kotshe ku ni Tifakazi ta Jehovha. Tona ti womba-womba tidimi to hambana. Kambe eto kha ti hi vhaleli kudhumisa Jehovha ngu wumwewo. (Mtuletelo 7:9) Ku singa ni mhaka ni mu hi zumbako kona, lidimi lathu, hi nga woninga “nga malambu ha mafuni.”​—Vafilipiya 2:15.

³ Mthumo wathu, wumwewo wathu wa Wukristu ni nzila yi hi zumbako hi di wonelete ngu yona, totsheleleto ti dhumisa Jehovha. Hi nga woningisa kutxani ka timhaka toneto ta tiraru?​—Lera Matewu 5:14-16.

4, 5. a) Hahanze ko txhumayela dwe, hi li kombisisa kutxani liwoningo lathu? b) Ngu yihi wuyelo yo kombisa txingana ka vathu? (Wona mfota wu wu ku makhatoni.)

⁴ Nzila ya hombe yo woninga ngu txhumayela ni kugondisa Bhiblia. (Matewu 28:19, 20) Ngu 1925 direvhista da Muwoneleli da Txingiza di wombile tiya: ‘Ka masiku awa a magwito, a walo a nga thembekako ka Mkoma ngako a txi leka mikhanjo yo leka liwoningo li woninga.’ Di tshumete di txi: “M’thu a fanete e maha toneto ngu kutxhumayela votshe vathu ni kuhanya ngu kuya ngu tinzila ta liwoningo.” I singeto dwe, mahanyelo athu ma dhumisa Jehovha. Vathu vo tala va hi wona mbimo yi hi txhumayelako. Ngako hi txi va sekela, hi va losa ngu kutsaka, ti va vhuna ti to ve va ni mawonelo a manene ngu ngathu ni Txizimu atxi athu hi txi khozelako.

⁵ Jesu a gete vagondiswa vakwe a txi khene: “Ngako mi txi wulela nyumbani, yi loseni [losani va mwaya, Tradução do Novo Mundo].” (Matewu 10:12) Ka makhalo aya Jesu a nga ti txhumayela ka ona, vathu va ti tolovete kugela wu a bwakako mtini kwawe e bela nyumbani. Nyamsi eto kha ti swi ti txi thuma ka makhalo o tala. Ngako vathu va txi wona m’thu wo mbi m’ziva a di ha diphangoni kwawe va karateka mwendo ve henya. Kambe ngako hi di ni txingana, vathu va nga tsaka. Ina u ti tumbute ti to ngako u txi txhumayela ngu txikarinyana, vathu va tsana kuteka mabhuku ngako hi txi va sekela ni ku va losa ngu lirando? Ti nga maha ve tshumela ve lava ni kubhula!

6. Mpatwa wumwani wu maha txani ti to wu txhumayela ngu kuhiseka?

⁶ Mpatwa wumwani wa ditiko da Inglaterra, kha wu ngadi wu sikota kutxhumayela ngu mti ni mti nguko valwalako. Se vona va veka meza ya mabhuku hafuhi ni mtini kwawe. Aku va zumbako hafuhi ni txikolwani, va veka mabhuku aya ma no tsakisa ava va tako ve ta teka vanana vawe. Vaveleki vo tala va teka mabhuku, kupata ni ya o khene Os Jovens Perguntam volume 1 ni 2. Nyaphandule mmwani wa txisikati wa tolovela ku va seketela. Vaveleki va va pindako va ti wona ku ene a ni txingana ni ku mpatwa wule wu lava kuvhuna vamwani. Mmwani wawe a khatile kugonda Bhiblia.

7. U nga va vhunisa kutxani valuveli va wukhalo wanu?

⁷ Ka masiku a ngweno, vathu vo tala va sungekile kurura ditikoni kwakwe ve ya va valuveli ka ditiko dimwani. Awe u nga va vhunisa kutxani ti to ve gonda ngu Jehovha? U nga khata ngu kugonda ku va losa ngu lidimi lawe. U nga tshumela u thumisa aplicativo ya JW Language ti to u gonda kuwomba mapswi aya ma nga mahako ve ema ve lava kubhula ni nawe. U nga gwita u va komba tivhidhiyo ni mabhuku ngu lidimi lawe ka jw.org.​—Dhewuteronome 10:19.

8, 9. a) Mtshangano wa Mahanyelo a Wukristu wu hi vhunisa kutxani? b) Vaveleki va nga va vhunisa kutxani vanana vawe ti to ve tshukwatisa tixamulo tawe mitshanganoni?

 ⁸ Jehovha a hi ninga sotshe si si lavekako ti to hi txhumayela ngu nzila ya yinene. Ngu txikombiso, ati hi ti gondako ka mtshangano wa Mahanyelo a Wukristu ni Mthumo wathu wo Txhumayela, ti hi vhuna ti to hi si kana-kani kumaha maendo o wuyela ni kukhata sigondo sa Bhiblia.

⁹ Ngako vathu va txi khata kuta mitshanganoni, va xamatiswa ngu kupfa vanana va txi xamula. U nga gondisa vanana vako ti to va txi xamula va si mahi ngu kulera. Vathu vamwani va ndindilwe ve ta ka ditshuri mbimo yi va nga pfa vanana va txi txhamusela likholo lawe ngu mapswi o hehuka.​—1 Vakorinto 14:25.

10. Wukhozeli wa mwaya wu nga tivhunisa kutxani timwaya ti to ti va ni wumwewo?

¹⁰ Ngako hi txi ti karata ti to mwaya wathu wu thuma ngu wumwewo ngu kudikha, hi dhumisa Jehovha. Ngu txikombiso, ngako mi di vaveleki, zamani ti to mbimo yotshe mi va ni Wukhozeli wa Mwaya wa ni minova. Timwaya ta tingi ti xalela ti di kumweko JW Broadcasting, se ngu msana ve bhula ngu ti to va nga ti thumisisa kutxani ati va nga gonda. U nga divali ti to ati ti gondiswako vanana va vadotho ngutu, ta hambana ni ta  va vahombiyana. Mahani totshe ati mi nga ti kotako ti to votshe ve wuyelwa ka wukhozeli wa mwaya.​—Masalmo 148:12, 13.

11-13. U nga mahisa kutxani ti to u vhuna dibanza di va ni wumwewo?

¹¹ Ngako u di mphya, u nga maha ti to votshe dibanzani ve tipfa va txi tsakelwa. U nga mahisa kutxani? Nzila yimwani ngu maha wungana ni vanathu va se va nga kula. Va wotise ti to va vhunwa ngu txani kusimama ve thumela Jehovha kudingana malembe o tala. Vona va nga kugondisa tigondo ta lisima. Toneto ti na va tsanisa, kumweko ni nawe! Se hotshethu, mwendo hi vaphya mwendo hi va hombe hi nga amukela ngu manza mambidi va va khatako kuta mitshanganoni. Hi nga va losa, hi seka navo, hi va komba ko khalahatsha, ni ku va zivisa ka vamwani. Maha ti to va si tipfi va di mwalate.

¹² Ngako u di avetwe kutsimbitisa mtshangano wa mthumo, u nga vhuna va va nga kula ti to ve simama ve woninga ngutu. Va ninge wukhalo wu wu no va hehukela. Va avele ni vaphya. Vanathu vo tala va va nga kula, va ku ni sikarato sa dihanyo, mbimo yotshe va godhola nguko va si ti kotiko kutxhumayela nga ti va nga ti mahisa tona kale. Kambe va nga tipfa va txi tshukwala ngako va txi ziva ti to wa va khatalela ni ti to wa txi pfisisa txiemo txawe. Ku singa ni mhaka ni malembe o tala va txi thumela Jehovha, wunene wako wu nga va tsanisa ti to ve simama ve txhumayela ngu kuhiseka.​—Levhi 19:32.

¹³ Vaisrayeli va ti khozela Jehovha va di votshe. M’bhali wa Masalmo a ti khene: “Eto ti tshambisako tona ni kutsakisa, ngako maxaka ma txi hanya kumweko ngu kupfana!” (Lera Masalmo 133:1, 2.) Ene a fananisile wumwewo wuwa ni mafura u tola, aya ma hehukisako mmidi wathu ni ku hi ninga m’bhumulo wa wunene. Ngu nzila ayi yi fanako, hi nga tsakisa vanathu ngu kuva ni mabhulo o tsakisa ni wunene. Eto ti maha ti to dibanza di va ni wumwewo wo tsana. U nga zama kuziva kwati vanathu va dibanzani.​—2 Vakorinto 6:11-13.

14. U nga mahisa kutxani ti to liwoningo lako li woninga aha u zumbako kona?

¹⁴ Liwoningo lako li nga woninga ku si nga ni mhaka ni mu u ku kona. Wunene wako wu nga maha ti to vaakelani vako ve lava kugonda to tala ngu Jehovha. Ti wotise: ‘Vaakelani vangu va alakanya txani ngu ngani? Ina mti wangu wu basile? Ina vaakelani vangu va wu tsakela? Ina na ti dhunda kuvhuna vaakelani?’ Wotisa vanathu vamwani ti to wunene wawe ni txikombiso txawe txa txinene txi ma gwesile ngu nzila yihi maxaka, vaakelani, vathumi kulowe mwendo vagondi kulowe.​—Vaefesu 5:9.

15. Ngu kutxani hi di fanete kuzumba hi txi wonelela?

¹⁵ Ti to hi zumba hi txi woninga ngutu, ti lava hi txharihela timbimo ti hi hanyako ka  tona. Makhambi o tala Jesu a gete tiya vangondiswa vakwe: “Wonelelani.” (Matewu 24:42; 25:13; 26:41) Ngako hi txo wona nga ‘kuxaniseka ka hombe’ ku ngadi kule, hi nga luza mikhanjo yo vhuna vamwani ti to ve gonda ngu Jehovha. (Matewu 24:21) Hahanze ko woninga ngutu, liwoningo lathu li nga khata kupfhupela kudotho-kudotho mwendo li nga tshumela li timeka.

16, 17. U nga maha txani ti to u zumba u di wonelete?

¹⁶ Hi fanete kuzumba hi txi wonelela, ngutu-ngutu konkuwa. Siemo sa mafu si ya si karata ngutu. Kambe ha tiziva ti to magwito ma na ta ngu mbimo yi Jehovha a nga yi sawula. (Matewu 24:42-44) Ka mbimo yiya, hi fanete hi timisela ni kuveka mapimo athu ka mbimo yi yi tako. Lera Bhiblia ditshiku ni ditshiku, u nga thuke u leka kumaha mkombelo ka Jehovha. (1 Pedro 4:7) Gonda ka vanathu va va ku ni malembe va txi thumela Jehovha. Ngu txikombiso u nga gonda simahakalo sa wutomi wa vanathu, so fana ni si si ku ka msungo wa mhaka wuwu ku khene: “Setenta anos ‘agarrando a aba da veste de um judeu’”, ka  Sentinela de 15 de abril de 2012, maphepha 18 kala 21.

¹⁷ Zumba u di bhisi ngu kuthumela Jehovha. Thumela vanathu vamwani, ni kuheta mbimo u di navo. U txi maha toneto u na tsaka, ni ku mbimo yi na nga yo puruma. (Vaefesu 5:16) Ka malembe o tala aya ma nga pinda, malanda a Jehovha se ma hetisisile to tala. Ni nyamsi, hi bhisi ngutu kupinda kale. Mthumo wa Jehovha wu kula ngu nzila yo nem hi sa yi emela. Liwoningo lathu li woninga ngutu!

18, 19. Madhota ma wu vhunisile kutxani mpatwa wumwani ti to wu thumela Jehovha ngu kuhiseka?

¹⁸ Jehovha wa hi tumelela ku hi mu thumela hambi hi txi thuka hi maha sihoxo. Ti to e hi vhuna, a hi ningile ‘tiningo ati i ku vathu,’ i ku madhota a dibanza. (Lera Vaefesu 4:8, 11, 12.) Se ngako madhota ma txi kuendela, londola mbimo yawe ngu kugonda ka wuzivi ni txialakanyiso txawe.

¹⁹ Ngu txikombiso, mpatwa wumwani wa Inglaterra wu ti ni sikarato ka wukati wawe, se wu kombete txivhuno ka madhota mambidi. Msikati a ti wona ti to mwamna kha khatali ngu timhaka to thumela Jehovha. Mwamna a ti tipfa nga ene kha sikoti kugondisa ni ku a tumete ti to a si mahi malulamiselo a wukhozeli wa mwaya mbimo yotshe. Madhota ma va vhuni ti to ve alakanya ngu txikombiso txa Jesu. Ma vhuni mwamna ti to e etetela nzila yi Jesu a nga khatalela ngu yona vagondiswa vakwe. Se msikati va m’vhuni ti to e laphisela mbilu mwamna wakwe. Madhota ma tshumete me ningela mawonelo o kari a nzila yi va nga mahisako tona wukhozeli wa mwaya ni vanana vawe va vambidi. (Vaefesu 5:21-29) Mwamna a zamile ku va msungo wa wunene wa mwaya. Madhota ma m’vhunile ti to a si karali ni kuthemba moya wa Jehovha. Lirando ni wunene wu madhota onewo ma nga wu kombisa, ngu ditshuri wu vhuni mwaya wonewo!

20. Ngu yihi wuyelo yo leka liwoningo lako li woninga?

²⁰ “A katekile wule a thavako MKOMA awu a londetako tinzila takwe.” (Masalmo 128:1) U na tsaka ngako u txi leka liwoningo lako li woninga. Ngu toneto, gondisa vamwani ngu Txizimu, maha totshe ti u nga ti kotako ti to u vhuna mwaya wako ni dibanza ku va ni wumwewo, ni kuzumba u di wonelete. Vamwani va na wona txikombiso txako txa txinene, ni ku va na lava kudhumisa Tate wathu, Jehovha.​—Matewu 5:16.