Solomoni tate wa Robhowamu a fumile Israyeli 40 wa melembe. (1 Vafumeli 11:42) Mbimo yi tate wakwe a nga fa, Robhowamu a yite Sikemi a txi khukhela Jerusalema ti to e ya va mkoma. (2 Makronika 10:1) Ina a ti thava ku va mkoma? Phela Solomoni a ti ziwa ngu wutxhari wakwe wa hombe. Se yi ti hokile mbimo ya ku Robhowamu e kombisa ku a ti nawo wutxhari wo lamula timhaka to karata.

Vaisrayeli va ti wona va txi xaniswa, se va rumete mitumi ka Robhowamu ku ya m’gela ati va ti lavako: “Tate wako a nemetisile dikange dathu, awe koko, konkuwa, hehukisa mthumo wo karata wa tate wako, ni mrwalo wo nemela wule a nga hi khoneka, se athu hi na kuthumela.”​—2 Makronika 10:3, 4.

Mhaka yiya yi txi karata ka Robhowamu. I ti ku ene a to maha ti vathu va nga txi ti lava, ene ni mwaya wakwe ni votshe ava va nga ti zumba wukomani, va ndi na luzekelwa ngu si va nga ti si tolovete. Ngako a txi lamba, vathu va ndi na mu wukela. Se a mahile txani? Kukhata a ti ya bhula ni madhota ya ma nga ti thuma ni tate wakwe. Ma m’gete ti to e engisa ati vathu va ti lavako. Kambe a gwitile e ya bhula ni vafana kulowe ni ku a ñote vathu ngu nzila ya tshofu. Ene a va gete tiya: “Tate wangu a nemetisile mrwalo wanu, kambe ani ni na engetela ku wunemeta kambe; tate wangu a mi tsayisile ngu sisephu, kambe ani ni na mi tsayisa ngu tihume.”​—2 Makronika 10:6-14.

Ina wa yi wona gondo? Nyamsi, hi ni vathu va hombe ava i ku kale va txi thumela Jehovha, se va nga hi vhuna kumaha sisungo sa sinene. He va engiseni.​—Jobe 12:12.

Konkuwa Robhowamu a sengeleta dibutho dakwe da yimbi ku ya lwa ni va va nga bhayiza. Se Jehovha e rumela mprofeti Simeyi ku ya m’gela  tiya: “Kha mi na mbi kwelela mi txi ya wukela vananu, i ku vanana va ka Israyeli; m’thu ni m’thu a na tshumele e tsula mtini kwakwe, nguko ani ngani ni nga maha mthumo wuwa.”​—1 Vafumeli 12:21-24. *—Wona txhamuselo ya hahatshi.

Ina Robhowamu ti mu hehukete kuengisa Jehovha? Vathu va ndi na alakanya txani ngu ngene kota mkoma wa mphya? Ene se a ti va gete ku a na va tsayisa “ngu tihume,” kambe konkuwa a si na ku kota txilo ka ti ti nga ti maheka! (Fananisa ni 2 Makronika 13:7.) Hambi keto, ku si nga ni mhaka ni ti vathu va nga ti pimisa tona ngu ngene, mkoma ni dibutho dakwe “va to engisa dipswi da MKOMA, va to tshumela madingano ni kuwomba ka MKOMA.”

Hi gonda txani? Mbimo yotshe ndinene kuengisa Jehovha hambi vathu va txi hi poyila. Mbimo yotshe Txizimu txi na hi katekisa hi txi engisa.​—Dhewuteronome 28:2.

Ina Robhowamu a yi mani kateko ngu kuengisa kwakwe? Ina, a fumile tixaka ta Judha ni Bhenjamini, e tshumela e aka madhoropa a maphya ka wukhalo wawe. A tsanisile madhoropa “e ma tsanisa ngutu.” (2 Makronika 11:5-12) Txa lisima ngutu ngu ti to, ku ni mbimo yi a nga engisa milayo wa Jehovha. Aku vale va digumi da tihunzu va nga khata kukhozela sifananiso, vo tala va yite Jerusalema ti to ve ya seketela Robhowamu ni wukhozeli wa ditshuri. (2 Makronika 11:16, 17) Aku Robhowamu a nga engisa Jehovha, mfumo wakwe wu tsani.

Mbimo yi mfumo wa Robhowamu wu nga tsana, a mahile timhaka to thisa. A lekile kuengisa milayo ya Jehovha, e khozela sizimu sa walo! Ngu kutxani? Ina txisungo txakwe txi kuzetetwe ngu mame wakwe awu i nga ti Muamoni? (1 Vafumeli 14:21) Owe, kambe ditiko di londisile txikombiso txakwe txo biha. Se Jehovha a tumelete Mkoma Sisake, wa Egipta ti to e teka madhoropa o tala ka mfumo wa Judha hambiku Robhowamu a nga ti tsanisile madhoropa onewo!​—1 Vafumeli 14:22-24; 2 Makronika 12:1-4.

Timhaka ti onhekile ngutu mbimo yi Sisake a nga hoka Jerusalema, Robhowamu i di mkoma. Ka mhaka yiya, mprofeti Simeyi a gete Robhowamu ni madhota akwe mapswi aya ma tako ngu ka Txizimu: “Anu mi ni lekile, nani ni mi lekile manzani ka Sisake.” Ina Robhowamu a engisile? A engisile ngu nzila ya yinene! Bhiblia yi khene: “Sekoko vathangeli va Israyeli va to ti veka hahatshi, va txi khona: ‘MKOMA a lulamile.’” Hambi keto, Jehovha a xayisile Robhowamu, se Jerusalema kha xaselwa.​—2 Makronika 12:5-7, 12.

Msana keto, Robhowamu a simamile e fuma Judha. Na a si se fa, vanana vakwe a va ningile so tala. Ene a ti lava ti to va si sali ve wukela mfo wawe Abhiya, awu a nga ndi no va mkoma. (2 Makronika 11:21-23) Ngu kumaha toneto, Robhowamu a kombisile wuzivi kupinda mbimo yi i nga ti mfana.

Hambiku Robhowamu a nga maha timhakanyana ta tinene, Bhiblia yi womba tiya mayelano ni mfumo wakwe: “A to maha ta kwambi lulama.” Ngu kutxani? Nguko ene “kha lava MKOMA ngu mbilu yakwe yotshe.” Se Jehovha kha m’tsakela.​—2 Makronika 12:14.

Hi nga gonda txani ka wutomi wa Robhowamu? Mbimo yimwani a ti engisa Txizimu. Ene a mahete vathu va Jehovha timhakanyana ta tinene. Kambe i si nga mngana wa Jehovha, ni ku a si khatali ngu ku m’tsakisa. Ene a lekile kumaha ta tinene e khozela sizimu sa walo. U nga thuka u xamala: ‘Ina mbimo yi Robhowamu a nga tumela kualaywa ngu Jehovha, ngu ditshuri a ti ti sote ka sionho sakwe ni ku lava kutsakisa Txizimu? Mwendo nguko vamwani va nga womba ti to a na mahi toneto?’ (2 Makronika 11:3, 4; 12:6) Ene a gwitile e maha to biha. Ene a si fani ni Mkoma Dhavhidha, kokwani wakwe! Dhavhidha nene a mahile sihoxo. Kambe ngu mbilu yotshe a ti sote ka  sionho sakwe. Ka wutomi wakwe wotshe, ene a ti randa Jehovha ni wukhozeli wa ditshuri.​—1 Vafumeli 14:8; Masalmo 51:1, 17; 63:1.

Hi nga gonda to tala ka mhaka yiya. Ta tsakisa ngako vathu va txi khatalela timwaya tawe ni kumahela vamwani ta tinene. Kambe ti to hi tsakelwa ngu Jehovha, ti lava hi mu khozela ngu nzila yi yi mu tsakisako hi tshumela hi va ni wuxaka wo tsana ni nene.

Ti to hi ti kota, ti lava hi kulisa lirando ka Jehovha. Mndilo wu tura wu di ni tikhuni, se nathu hi nga kulisa lirando lathu ngu Txizimu ngu kugonda Bhiblia ditshiku ni ditshiku, hi alakanyisisa ngu ti hi nga gonda ni kukhutalela mkombelo. (Masalmo 1:2; Varoma 12:12) Se lirando lonelo li na hi kuzeta kutsakisa Jehovha ka totshe ti hi ti mahako. Li na hi kuzeta kutisola ngako hi txi maha sionho, ni kukombela divalelo ka Jehovha. Ngu toneto, hi na mbi fana ni Robhowamu, kambe hi na simama hi thembeka ka wukhozeli wa ditshuri.​—Judha 20, 21.