1. Ngu tihi ati Jehovha a nga maha ka mmweyo ni mmweyo wathu?

JEHOVHA ngene a nga dhana mmweyo ni mmweyo wathu. (Joh. 6:44) Eto ta tsakisa ngutu. Jehovha a xoletete timbilu ta votshe vathu ha mafuni se e wona ti to awe u di mbilu ya yinene ayi yi nga tiemisela ku mranda. (1 Mak. 28:9) Jehovha wa kuziva, ene wa kupfisisa ni ku wa kuranda ngutu. Eto ta hi tsanisa ngu ditshuri!

2. Ngu kuya ngu txidinganiso txa Jesu, ngu tihi ti kombisako ti to Jehovha wa khatala ngu mmweyo ni mmweyo wathu?

² Jehovha wa kudhunda ngutu, ni ku wa dhunda votshe vanathu. Ti to hi pfisisa mhaka yiya, Jesu a fananisile Jehovha ni m’dyisi wa tinvuta. Ngako yimweyo ya ta 100 wa tinvuta takwe yi txi hambana ni mtxhambi yi mwalala, m’dyisi a maha txani? Ene a na ‘siya ti ta mtxhanu ni mune wa magumi ni mtxhanu wa tinvuta ni mune mimangoni, e tsimbila a txi lava ayi yi nga mwalala.’ Mbimo yi a manako ayi yi nga mwalala, kha na mbi yi ñola e yi peketela nguko yi nga ti mwalate. Kambe a na tsaka ngu ku a nga yi mana. Hi gonda txani? Hi gonda ti to mmweyo ni mmweyo wathu mbwa lisima ka Jehovha. Jesu a ti khene: “Tate wanu wa nzumani kha ti lavi ti to ni mmweyo wa va vavadotho e mwalala.”—Mat. 18:12-14.

3. Hi na bhula ngu txani ka gondo yiya?

³ Athu kha hi lavi kuziwa kota vanathu vale vo zumba ngu kuhenyisela vamwani. Se hi nga maha txani ti to hi si henyisi vamwani ni ku hi nga maha txani ngako vamwani va txi hi henyisa? Hi na xamula siwotiso soneso ko gondo yiya. Kambe ti to hi khata he bhule ngu ti to mba mani “vavadotho” ava va nga wombwa ka Matewu ndima 18.

4. Mba mani ava “vavadotho “ ava Jesu a nga va womba?

⁴ Ava “vavadotho” va nga wombwa ngu Jesu kuwombwa votshe vanathu. Hambiku vamwani va nga vako i di vahombe ngu tanga, vona “vanana vavadotho” nguko va tiveka hahatshi ve tumela kugondiswa ngu Jesu. (Mat. 18:3) Hambiku va nga kuliswa ka midhawuko yo hambana, ve va ni wuthu wo hambana, votshe va kombisa likholo ka Jesu Kristu. Ngu toneto, Jesu wa va randa ngutu.—Mat. 18:6; Joh. 1:12.

5. Jehovha a tipfisa kutxani, ngako m’thu a txi henyisa mmwani?

⁵ Votshe ava i ku “vavadotho” mba lisima ka Jehovha. Ti to hi yi pfisisa mhaka yiya e wone ati hi tipfisako tona ngu vanana. Vona mba lisima kwathu. Athu hi lava kuva vhikela nguko kha na wutxhari, kha na mtamo wo tivhikela nguko i nga ti vanana. Ngako i si ti lavi kuwona m’thu a di henyisilwe, ha pandiseka ngutu ngako hi txi wona m’thu a di henyisile mwanana. Ta fana ni Jehovha, ene a lava ku hi vhikela. Ngu toneto wa pandiseka ngako m’thu a txi henyisa mmwani ngutu-ngutu a txi henyisa mmweyo wa vathu vakwe!—Isaya 63:9; Marku 9:42.

6. Ngu kuya ngu 1 Vakorinto 1:26-29, vathu va ditiko va va wonisa kutxani vagondiswa va Jesu?

⁶ Ngu tihi timwani ti kombisako ti to vagondiswa va Jesu va fana ni vanana “vavadotho”? Vathu ha mafuni va wona vathu vo khalisa kutxani i di va lisima? Va wona i di va lisima, ava vo ganya, va tinduna ni vakoma. Kuhambana ni eto, vagondiswa va Jesu va wonwa i di wo mbi na lisima i di vathu vo mbi vhuna txilo. (Lera 1 Vakorinto 1:26-29.) Kambe Jehovha kha va woni ngu nzila yoneyo.

7. Jehovha a va wonisa kutxani vanathu?

⁷ Jehovha wa randa sotshe sithumi sakwe ti si nga ni mhaka ni ti to ngale si txi mu thumela mwendo i ngadi siphya ditshurini. Aku votshe vanathu i ku va lisima ka Jehovha ti ni fanelo ku ve va ni lisima kwathu nathu. Votshe vanathu va ni lisima kwathu nathu nguko “mmwani ni mmwani njihangu txa mkwawe.” (Var. 12:5) Ngu toneto hi fanete kuranda votshe vanathu i si nga vo kari dwe. Hi fanete kutiemisela kumaha totshe ati hi nga tikotako ti to hi vhikela ni kukombisa lirando vanathu. Ngako hi txi tumbula ti to ku ni awu hi nga mu henyisa, kha ha fanela kukhathu ti na pinda hi pimisa ti to ova ni txihenyisani a na ti wonela. Nji txani txi nga mahako m’thu e henya ngu txikuluveta? Ngu nzila ayi a nga kula ngu yona. Vamwani va tipfa i si nga va txilo ngu nzila ayi va nga kula ngu yona. Vamwani i nga ti vaphya ditshurini, kha va se kugonda nzila ya kuwonisana ni tiphazamo ta vamwani. Ti si nga ni mhaka ni ti to m’thu a henyiswa ngu txani hi fanete kumaha totshe ati hi nga tikotako ti to hi maha kudikha. I singeto dwe, m’thu awu a ku ni txihenyisani a fanete kutiziva ti to ani ni txikarato atxi a fanelako ku txi xula. Ene a fanete kuxula txikarato txonetxo ti to eva ni kudikha ati ti no maha ti to vamwani ni vona ve va ni kudikha.

8. Ngu tihi ati vathu va nga txi ti wona i di ta lisima ka timbimo ta Jesu?

⁸ Ngu kutxani Jesu a di fananisile vagondiswa vakwe ni vanana “vavadotho”? Nguko vagondiswa vakwe va mu mahete txiwotiso txiya: “I mani i ku wa hombe Mfumoni ka nzumani kani?” (Mat. 18:1) Va wotisile eto nguko Vajudha vo tala ka timbimo ta Jesu va txi wona sikhunja ni nduma kota silo sa lisima ngutu. Kuseketela mapswi onewo, wona ati m’bhali mmwani a ti wombako. Ene a womba tiya: “Ati vathu va nga txi ti wona i di ta lisima  ngutu ka wutomi, i ku ti lavela nduma ni kudhumiswa.”

9. Ngu tihi ati Jesu a nga gela vagondiswa vakwe ti to ve ti maha?

⁹ Jesu a txi tiziva ti to vagondiswa vakwe ti ndi lava ve thuma ngutu ti to ve wila ngu hatshina mkhuva wa kuphikizana awu wu nga txi fuma Vajudha. Ene a va gete tiya: “Awu i ku wa hombe, hagari kwanu, a na ti mahe wa m’dotho; awu i ku mthangeli, a na ti fananise ni wule i ku txithumi.” (Luka 22:26) Hi ti maha ‘vavadotho’ mbimo yi hi si pimisi to ‘ha pinda vamwani ngu wunene.’ (Vaf. 2:3) Ngako hi txi ti veka hahatshi hi na vayilela kukhuvekisa vamwani.

10. Ngu tihi ati Paulo a nga womba ati hi fanelako ku ti maha?

¹⁰ Votshe vanathu ku ni ti va hi palako ka tona. Kambe ti nga karata ku tiwona eto ngako hi si veki mapimo ka ta tinene ati va ti mahako. Hi fanete kukhumbula ati Paulo a nga bhalela Vakorinto to khene: “Kasi i mani wu a sawulako kani? Nji txani u ku natxo awe, txo va u sa maha ngu kuningwa kani? Se ngako u di ningilwe, nji txani u txi ti guleta, nga hi nga so si mana ngu kuningwa kani?” (1 Vak. 4:7) Hi fanete kuvayilela mlawu wo titxhaya phambeni, mwendo kupimisa ti to athu ha pala vamwani. Ngako mwanathu wo kari a txi veka kwati miwomba-womba mwendo ku ndiyathu yo kari yi txi tsimbitisa kwati sigondo sa Bhiblia ene a fanete kuningela wotshe wudhumo ka Jehovha.

11. Hi gonda txani ka txidinganiso txa mkoma ni txithumi txakwe?

¹¹ Msana ko va Jesu a di txharihisile vagondiswa vakwe, ti to va txi ti wonela ku va si henyisa vamwani, ene a wombile txidinganiso txa mkoma ni txithumi txakwe. Mkoma wule a divalete txikweneti txa hombe txithumi txakwe, atxi a nga txi dhevhwa. Msana keto, txithumi txile txi nga divalelwa, txi lambile kudivalela txithumi kulowe atxi txi nga txo dhevha simaleana sa boti. E txi teka e txi beta jele. Se mkoma a to teka txithumi txile txo mbi na wuxinji e txi khotela jele ni txona. Hi gonda txani ka txidinganiso txiya? Jesu a wombile tiya: “Tate wanu wa nzumani nene ngu tona tiya a no mi mahisa tona, ngako mi si divaleli ngu timbilu tanu m’thu ni m’thu ka muakelani wakwe, minandu yakwe.”—Mat. 18:21-35.

12. Ngako hi txi lamba kudivalela mwanathu wo kari ku nga maheka txani?

¹² Kuva txithumi txile txi sa kombisa wuxinji txi xuphekisile ni vamwani. Ngu kutxani? Txo khata, ene a kombisile wubihi txithumi kulowe ngu kutxisekela mkorani, kala txi dihela mnando. Txa wumbidi, a mahile ti to vamwani ava va nga wu wona wubihi wu txi nga wu maha ve xupheka. Se “sithumi kulowe, si di woni tiya, si to pandiseka ngutu mbiluni.” Ngako m’thu a txi hi mahela to biha hi lamba ku mu divalela ngu tihi ti no maheka? Txo khata, hi na va hi txi mu xanisa ngu kulamba ku mu divalela, hi na leka ku mu khatalela ni kuleka ku mu kombisa lirando. Txa wumbidi, hi maha ti to vamwani dibanzani ava va zivako ti to hi ni txikarato ni mwanathu wo kari ve karateka ni vona.

13. Hi gonda txani ka ti nga humelela Crystal?

¹³ Ngako hi txi divalela vamwani nathu hi na wuyelwa. Ndiyathu yimwani yi dhanwako ku i Crystal a ti woni to eto ditshuri. Ene a ti henyisilwe ngu mwanathu wo kari. Crystal a womba tiya: “Ene a txi womba-womba mapswi a ku ni thola, ha koza hambi hi di kutxhumayelani ni si tilavi ku hi ya maneka ka grupu yimweyo.” Crystal a txi tipfa nga a ti ni txivangelo txo zumba a di henyile, kambe kha zumba ni txiviti. Kuhambana ni eto, ene a  thumisile sialakanyiso sa mu ka Bhiblia asi si ku ka A Sentinela ya 15 ka Outubro wa 1999 ka msungo mhaka awu wu ku khene: “Perdoe de coração.” Ene a divalete mwanathu wule. Crystal a womba tiya: “Ni tumbute ti to ditshiku ni ditshiku hotshethu hi zama kuambala m’thu wamphya ni ku Jehovha wa hi divalela ti txi huma mbiluni. Konkuwa ni tipfa nga ni to rula disaka da sawuti. Se ni na ni litsako la hombe.”

14. Ngu kuya ngu dibhuku da Matewu 18:21-22 ngu txihi txikarato atxi mpostoli Pedro a nga ti natxo ni ku Jesu a xamute txani? Ni ku hi gonda txani ka xamulo ayi Jesu a nga ninga Pedro?

¹⁴ Ha tiziva ti to hi fanete kudivalela vamwani, eto ngu tona hi ta tinene ta kona, kambe kha ti hehuki. Mpostoli Pedro mbimo yimwani a txi tipfisa toneto. (Lera Matewu 18:21, 22.) Ngu tihi ati ti nga hi vhunako? Txo khata, alakanyisisa ngu nzila ayi Jehovha a hi divalelako ngu yona. (Mat. 18:32, 33) Athu kha ha fanelwa ngu kudivalelwa, kambe Jehovha wa hi divalela ti txi huma mbiluni. (Mas. 103:8-10) Ngu toneto nathu “hi fanete kurandana.” To sunga ku hi divalela vamwani. Vanathu va fanelwa ngu kudivalelwa ngu ngathu. (1 Joh. 4:11) Txa wumbidi, alakanyisisa ngu wuyelo yo divalela vamwani, hi txi divalela vamwani. Hi vhuna awu a nga hi henyisa, hi maha ti to dibanza di va ni kupfana ni kutsanisa wuxaka wathu ni Jehovha. Se hi rulela mrwalo. (2 Vak. 2:7; Vakl. 3:14) Ngu magwito khongela ka Jehovha. U nga tumeli ti to Sathani e phaya livengo hagari ka vanathu. (Vaef. 4:26, 27) Ti to hi si weli ka titshenga ta Sathani hi fanete hi kombela txivhuno ka Jehovha.

15. Ngu kuya ngu Vakolosa 3:13 ngu tihi ati hi fanelako kusimama hi ti maha ngako mwanathu wo kari a txi hi henyisa?

¹⁵ U na maha txani ngako mwanathu a di ku henyisile? Maha totshe ati u nga tikotako ti to u maha kurula. Womba-womba ni  Jehovha ngu mkombelo. Mkombele ti to e katekisa mwanathu awu a nga kuhenyisa ni ku e kuvhuna ti to u wona tifanelo takwe ta tinene i ku ati ti mahako ti to Jehovha a mu dhunda mwanathu eneyo. (Luka 6:28) Ngako ti txi kukaratela kutipata ni lure u txi mita, lava tinzila to mi khalahatsha mi bhula ngu tona. U nga ti vekele amu ko khawe mwanathu a to kuhenyisa khakwenye. (Mat. 5:23, 24; 1 Vak. 13:7) Mkombe ti to wa kholwa ku ene hi nga a to maha khakwenye. Hani ngako asi lavi kumaha kurula ko? Simama u mu “timisela.” U nga mu tsukule. (Lera Vakolosa 3:13.) Kambe txa lisima ngutu u nga zumbe ni txiviti nguko u nga henyisa Jehovha. U nga zumbe u di henyile. Ngako u txi maha toneto u na ti kombisa ti to awe u randa ngutu Jehovha kupinda sotshe.—Mas. 119:165.

16. Ngu tihi ati mmwani ni mmwani wathu a fanelako ku ti maha?

¹⁶ Athu ha tsaka ngutu ngu lungelo ayi hi ku nayo yo thumela Jehovha ngu kupfana kota “mtxhambi wumwewo” awu wu ku ni “M’dyisi mmwewo.” (Joh. 10:16) Dibhuku da Organizados Para Fazer a Vontade de Jeová ka pajina 165 di womba tiya: “Aku hi ti dilako ngu kupfana kuwa aku ku hagari ka dibanza da Wukristu, mmwani ni mmwani wathu a fanete kumaha totshe ati a nga tikotako ti to kupfana koneko kusimama.” Ngu toneto hotshethu hi fanete ku “ti trenara kasi ku hi wona vanathu nga ti Jehovha a va wonisako tona.” Nguko ka Jehovha hotshethu hi wonwako kota “vavadotho” hi va lisima kwakwe. Ina nawe u va wona vanathu i di va lisima? Jehovha wa tiwona totshe ati u ti mahako ti to u va vhuna ni ku va khatalela.—Mat. 10:42.

17. Ngu tihi ati hi fanelako kutiemisela kumaha?

¹⁷ Athu ha va randa vanathu. Ngu toneto hi lava ku hi ti ‘wonela hi si vekeli mkwathu txikhuvekiso, hambi txitsha txa ku mu humba.’ (Var. 14:13) Hi lava kuwona vanathu hi di va lisima ku hi pala, hi lava ku va divalela ti txi huma mbiluni. He zameni ku hi si zumbi hi di henyisanile ni vamwani. Ngu toneto athu he “xoteni kumaha ati ti vangako kudikha ni ti ti hi akako amu ka likholo.”—Var. 14:19.